ការប្រើហិង្សាបង្ក្រាបអតិថិជន ហួយ វ័ន ផេ ដោយអាជ្ញាធរខណ្ឌសែនសុខ រាជធានីភ្នំពេញ កាលពីថ្ងៃទី២៧ ខែមេសា បានរងការរិះគន់យ៉ាងខ្លាំងពីអតិថិជន ពលរដ្ឋ និងមន្ត្រីសិទ្ធិមនុស្ស ព្រមទាំងបក្សប្រឆាំង ដែលពួកគេបញ្ហានេះវាគួរតែដោះស្រាយបញ្ហាអតិថិជនជាជនរងគ្រោះ មិនគួរប្រើហិង្សា ឬចាប់ខ្លួនពួកគេនោះទេ បើរដ្ឋាភិបាលពិតជាមានឆន្ទៈបង្ក្រាបឧក្រិដ្ឋកម្មអនឡាញ។
ហេតុការណ៍អាជ្ញាធរបំបែកក្រុមអ្នកតវ៉ានោះ ត្រូវអ្នកតវ៉ាអះអាងថា ក្រៅពីការប្រើហិង្សាបង្ក្រាបអតិថិជនជនជាតិចិនឱ្យរងរបួសធ្ងន់ ២នាក់ហើយនោះ អាជ្ញាធរក៏បានចាប់ពលរដ្ឋ២នាក់ទៀត ដោយចោទថា ជាដឹកនាំការតវ៉ាបិទផ្លូវជាដើម។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត ថ្លែងប្រាប់វីអូឌីនៅថ្ងៃទី២៨ ខែមេសា ដោយយល់ឃើញថា ករណីនេះមិនគួរមានហិង្សាកើតឡើងទេ នៅពេលដែលពលរដ្ឋតវ៉ាដោយសន្តិវិធី ហើយមិនគួរចាប់ខ្លួនពលរដ្ឋដែលជាអតិថិជនរងគ្រោះនោះទេ ព្រោះពលរដ្ឋបានរងគ្រោះមួយតង់ហើយពីសំណាក់ក្រុមហ៊ុន។ លោកចាត់ទុកករណីនេះ ជាបទពិសោធន៍សម្រាប់រដ្ឋាភិបាល មុននឹងផ្ដល់អាជ្ញាប័ណ្ណទៅដល់ក្រុមហ៊ុនណាមួយក្នុងការធ្វើអាជីវកម្ម គួរតែពិនិត្យឱ្យបានច្បាស់លាស់ ដើម្បីចៀសវាងធ្វើឱ្យពលរដ្ឋរងគ្រោះ។
លោក អំ សំអាត ថ្លែងថា៖ «វាគួរតែមានដំណោះស្រាយណាមួយសម្រាប់ពួកគាត់ បានន័យថា ការស្វែងរកដំណោះស្រាយសម្រាប់ពួកគាត់ ទៅលើបញ្ហាដែលបានរងផលប៉ះពាល់សម្រាប់ពួកគាត់កន្លងមកហ្នឹងណាបាទ។ វាមិនគួរណាទៅជាមានអំពើហិង្សា និងការចាប់ខ្លួនកើតឡើង»។
ក្រុមហ៊ុន ហួយវ័ន ផេ ត្រូវគេស្គាល់ថា គឺជាកម្មសិទ្ធិរបស់ លោក ហ៊ុន តូ ដែលត្រូវជាក្មួយប្រុសលោក ហ៊ុន សែន ប្រធានព្រឹទ្ធសភា និងត្រូវជាបងប្អូនជីដូនមួយជាមួយលោកនាយករដ្ឋមន្ត្រី ហ៊ុន ម៉ាណែត។ ក្រុមហ៊ុននេះបានប្ដូរឈ្មោះ ទៅជា អេច-ផេ វិញកាលពីខែធ្នូ ឆ្នាំ២០២៥ បន្ទាប់ពីអាមេរិកដាក់ទណ្ឌកម្ម មិនឱ្យមានប្រតិបត្តិការសាច់ប្រាក់ចូលក្នុងប្រព័ន្ធហិរញ្ញវត្ថុអាមេរិក កាលពីជាងមួយឆ្នាំមុន ដោយសារក្រុមហ៊ុនជាប់ពាក់ព័ន្ធនឹងការលាងលុយកខ្វក់ដ៏ធំសម្បើម ឱ្យក្រុមអ្នករកស៊ីឆបោកតាមអនឡាញ (Online Scam)។
តាមរយៈលិខិតរបស់អតិថិជន កាលពីថ្ងៃទី២៧ ខែមេសា បង្ហាញថា មានអតិថិជនរងគ្រោះជាជនជាតិខ្មែរ ជនជាតិចិន និងជនជាតិវៀតណាមប្រមាណ ៥០០នាក់ បានចាញ់បោកក្រុមហ៊ុន ហួយ វ័ន ឬ អេច ភេ (H-Pay)។ ពួកគេចោទធនាគារជាតិ និងស្ថាប័នពាក់ព័ន្ធថា មិនបានប្រកាសជាសាធារណៈពីការដកអាជ្ញាប័ណ្ណក្រុមហ៊ុននេះ កាលពីថ្ងៃទី២៥ ខែកញ្ញា ឆ្នាំ២០២៤ ទេ ខណៈក្រុមហ៊ុនបន្តបើកទ្វារ មានប្រតិបត្តិការចេញចូល និងដកដាក់លុយបានធម្មតា រហូតដល់ថ្ងៃទី១ ខែធ្នូ ឆ្នាំ២០២៥ ទើបបិទទ្វារ។
អតិថិជន ហួយ វ័ន ទាំងអស់បានចាប់ផ្ដើមតវ៉ាជាទ្រង់ទ្រាយធំនៅមុខធនាគារជាតិ តាមបណ្ដោយផ្លូវហាណូយ ក្រោយពិធីបុណ្យចូលឆ្នាំខ្មែររួច។ ការតវ៉ានៅថ្ងៃទី២៧ ខែមេសា បានផ្ទុះហិង្សាកើតឡើង បណ្ដាលឱ្យជនជាតិចិន ២រូប រងរបួសធ្ងន់ចំក្បាល និងផ្ទៃមុខ ព្រមទាំងអាជ្ញាធរបានចាប់ខ្លួនពលរដ្ឋពីរនាក់ទៀត ដោយចោទពួកគេថា ជាអ្នកដឹកនាំការតវ៉ាបិទផ្លូវ។ ពលរដ្ឋរងការចាប់ខ្លួនម្នាក់គឺលោក សួន សុវណ្ណថៃ ជាអ្នកម៉ៅការសំណង់ រស់នៅខណ្ឌដង្កោ រាជធានីភ្នំពេញ។ ចំណែកម្នាក់ទៀតគឺលោក វ៉ាត់ មករា ជាកម្មករសំណង់ រស់នៅខណ្ឌដង្កោដូចគ្នា។ បើតាមការចុះផ្សាយរបស់ស្នងការរាជធានីភ្នំពេញ បញ្ជាក់ថា បុរសទាំង ២នាក់ ត្រូវសមត្ថកិច្ចជំនាញឃុំខ្លួនសួរនាំដើម្បីអនុវត្តតាមនីតិវិធី ក្រោមការចោទថា ជាមេខ្លោងដឹកនាំតវ៉ាបិទផ្លូវ។
វីអូឌី ពុំទាន់អាចសុំការពន្យល់បន្ថែមពីស្នងការនគរបាលរាជធានីភ្នំពេញ លោក ជួន ណារិន្ទ បានទេ ខណៈក្រុមគ្រួសារពលរដ្ឋរងគ្រោះក៏ពុំទាន់អាចសុំការឆ្លើយតបបានដែរ គិតត្រឹមរសៀលថ្ងៃទី២៨ ខែមេសា។
ប៉ុន្តែ នៅថ្ងៃទី២៨ ខែមេសា ហ្វេសប៊ុកមួយដែលអះអាងថា ជាភរិយា និងម្ដាយបង្កើត លោក សួន សុវណ្ណថៃ បានបង្ហោះវីដេអូសុំទោស លោក ហ៊ុន សែន និងលោក ហ៊ុន ម៉ាណែត ទាំងទឹកមុខយំសស្រាក់ ស្នើសុំដោះលែងសមាជិកគ្រួសារ ដោយស្ត្រីជាម្ដាយបានបដិសេធថា កូនប្រុសមិនបានដឹកនាំការតវ៉ានោះទេ និងគ្រាន់តែចូលរួមតវ៉ាទាមទារលុយដែលបាត់បង់ តាមរយៈក្រុមហ៊ុនហួយវ័ន និងចង់បង្ហាញប្រាប់ដល់កម្មកររបស់ខ្លួនថា លុយបានជាប់នៅក្រុមហ៊ុនហួយវ័ន មិនមែនបានដកចាយ ឬគេចវេះមិនបើកប្រាក់ដល់កម្មករទេ។
សំឡេងស្ត្រីជាម្ដាយ៖ «សូមអង្វរដល់លោកទាំងទ្វេទាំងពីរ សូមឱ្យលោកជួយដោះស្រាយ ជួយដោះកូនខ្ញុំ សួន សុវណ្ណថៃ ហើយកូននៅតូចៗ ខ្ញុំអាណិតអាសូរណាស់រឿងនេះ ពួកខ្ញុំគ្រួសារអត់ដែលបានជួបទេ។ សម្តេចពុក និងសម្តេច ហ៊ុន ម៉ាណែត សូមក្មួយ ជួយក្រុមគ្រួសាររបស់ខ្ញុំ ដែលកូន សួន សុវណ្ណថៃ បើសិនជាកូនធ្វើម៉េចនៅក្មេងឆោតល្ងង់ កូនធ្វើអីមិនបានគិតមុខគិតក្រោយ ក៏សូមលោកឪពុក និងសម្តេច ហ៊ុន ម៉ាណែត ជួយលើកលែងទោសទាំងអស់ហ្នឹង ជួយឱ្យម្ដងមក ហ្នឹងហើយ»។
ជុំវិញករណីនេះដែរ អតីតតំណាងរាស្ត្រគណបក្សសង្គ្រោះជាតិ និងជាអនុប្រធានគណបក្សឆន្ទៈខ្មែរ លោក សុន ឆ័យ ថ្លែងប្រាប់វីអូឌីនៅថ្ងៃទី២៨ ខែមេសានេះថា ការបង្ក្រាបពលរដ្ឋរងគ្រោះដោយហិង្សាជាការរំលោភបំពានសិទ្ធិអតិថិជន ដោយលោកទាមទារឱ្យធនាគារជាតិដោះស្រាយជាបន្ទាន់ តាមរយៈការគ្រប់គ្រង ហើយធនាគារជាតិត្រូវធ្វើអធិការកិច្ចដើម្បីធានាទ្រព្យសកម្មរបស់អតិថិជន។ លោកថា ពេលអតិថិជនមានបញ្ហាជាមួយធនាគារ ឬគ្រឹះស្ថានហិរញ្ញវត្ថុ ពេលនោះហើយជាតួនាទីរបស់ធនាគារជាតិ ដោយពុំត្រូវឱ្យអតិថិជនប្ដឹងទៅតុលាការទេ។
លោក សុន ឆ័យ ថ្លែងថា៖ «ហេតុដូច្នេះ បានជាខ្ញុំបានរំឭកពីមុនមកហើយថា ត្រូវតែចុះធ្វើការងារ ដើម្បីធ្វើកិច្ចការងារយ៉ាងម៉េចឱ្យពលរដ្ឋហ្នឹងបានទទួលនូវប្រាក់កាសរបស់គេវិញ។ ហើយវិធានការដែលបន្ទាន់ហ្នឹង គឺធ្វើយ៉ាងម៉េចជំរុញឱ្យក្រុមហ៊ុនហ្នឹង រកលុយមកដាក់ក្នុងធនាគារ ដើម្បីផ្ដល់ឱ្យទៅអតិថិជនហ្នឹងឱ្យបានត្រឹមត្រូវវិញ»។
ចំណែក អ្នកប្រឹក្សាយោបល់ផ្នែកអភិវឌ្ឍផ្នត់គំនិត និងស្រាវជ្រាវ លោក សេក សុជាតិ យល់ឃើញថា ករណីនេះជារឿងអវិជ្ជមានខ្លាំងណាស់សម្រាប់កម្ពុជា ហើយលោកចាត់ទុកករណីនេះ ជាការតវ៉ាដ៏ធំមួយរបស់ជនជាតិចិន និងជនបរទេសកំពុងរស់នៅ រកស៊ី និងធ្វើការនៅកម្ពុជា។ លោកបន្តថា បើធនាគារមួយបានបិទ ហើយថវិកា ឬក៏ប្រាក់បញ្ញើរបស់ពួកគាត់មិនត្រូវបានផ្ដល់មកឱ្យវិញ នោះជារូបភាពមួយដែលបង្ហាញអំពីការចុះទន់ខ្សោយខ្លាំងនៃស្ថាប័នហិរញ្ញវត្ថុ ជាពិសេសធនាគារឯកជននៅក្នុងប្រទេសកម្ពុជា។
លោក សេក សុជាតិ ថ្លែងថា៖ «រូបភាពនេះ វាក៏បានជះភាពអវិជ្ជមានខ្លាំងទៅកាន់សហគមន៍អន្តរជាតិ ដែលធ្វើឱ្យអ្នករកស៊ី អ្នកដែលគាត់មានបំណងចង់មកវិនិយោគ ឬក៏ដាក់ប្រាក់បញ្ញើនៅកម្ពុជា គឺមានការខ្លាចរអា ហើយបញ្ហាទាំងអស់នេះ វានឹងក្លាយទៅជាប្រធានបទមួយដែលបង្ហាញអំពីភាពអវិជ្ជមាននៅក្នុងវិស័យហិរញ្ញវត្ថុ ជាពិសេសគឺធនាគារឯកជននៅកម្ពុជានឹងតែម្ដង»។
ទោះយ៉ាងណា លោក សេក សុជាតិ មើលឃើញថា ការអនុវត្តច្បាប់របស់មន្ត្រីមានសមត្ថកិច្ច គឺជារឿងត្រឹមត្រូវហើយ ក៏ប៉ុន្តែការប្រើប្រាស់ហិង្សាចំពោះអ្នកមកតវ៉ា ដោយគ្មានវិធីសាស្ត្រដោះស្រាយបញ្ហាត្រឹមត្រូវ រហូតបង្ករបួសស្នាម និងចាប់ជនរងគ្រោះថែមទៀត គឺជារូបភាពមួយបង្ហាញថា អ្នកគ្រប់គ្រង ឬចាត់ចែងកិច្ចការនេះ អាចមានទម្លាប់ ឬសមត្ថភាពត្រឹមតែការប្រើប្រាស់ហិង្សាដើម្បីបញ្ចប់បញ្ហា ជាជាងប្រើចំណេះដឹងរកដំណោះស្រាយ។
ចំណែក លោក សុន ឆ័យ ស្នើធនាគារជាតិត្រូវធ្វើរឿងចាំបាច់មួយ គឺធ្វើសវនកម្មទៅលើប្រព័ន្ធហិរញ្ញវត្ថុរបស់ធនាគារក្រុមហ៊ុន ហួយ វ័ន ផេ ឬអេច ផេ ដើម្បីឱ្យដឹងថា សាច់ប្រាក់មានប៉ុន្មានពិតប្រាកដ ដោយមិនអាចនិយាយថា សាច់ប្រាក់ជាប់ឱ្យគេខ្ចី ហើយមិនទាន់ប្រមូលដើម្បីមកសងអតិថិជននោះទេ។ លោកថា ការធ្វើសវនកម្មត្រូវមានស្ថាប័នឯករាជ្យមួយ ដើម្បីធ្វើឱ្យម្ចាស់ក្រុមហ៊ុនរកសាច់ប្រាក់មកបន្ថែម ដកសងជូនអតិថិជនភ្លាមៗ។ ប៉ុន្តែលោកបង្ហាញចម្ងល់ថា លោកហាក់មិនយល់ចំពោះការឱ្យអ្នកដាក់ប្រាក់ប្ដឹងតុលាការទៅវិញ៕
