ក្រោយសមត្ថកិច្ចបង្ក្រាបអ្នករងគ្រោះចម្រុះជាតិសាសន៍ ដែលថា បានចាញ់បោកក្រុមហ៊ុន ហួយវ័ន ផេ របស់លោក ហ៊ុន តូ ម្នាក់ៗរាប់ម៉ឺនដុល្លារនោះ ក្រុមអ្នកតាមដានព្រមានថា មេដឹកនាំកម្ពុជាអាចនឹងត្រូវអាមេរិកចាប់ខ្លួន បើមិនចាប់ខ្លួនមេឧក្រិដ្ឋកម្មអនឡាញឱ្យបានទាន់ពេល។
កាលពីថ្ងៃចន្ទម្សិលមិញនេះ អតិថិជនចម្រុះជាតិសាសន៍រាប់សឹបនាក់ មានខ្មែរ វៀតណាម និងចិនផងនោះ ដែលអះអាងថា ពួកគេបានចាញ់បោក តាមរយៈដាក់ប្រាក់ក្នុងក្រុមហ៊ុននេះ បានប្រមូលផ្តុំគ្នាជាថ្មីទៀត នៅជិតធនាគារជាតិ ក្នុងរាជធានីភ្នំពេញ។
យ៉ាងណា អំឡុងនៃការតវ៉ានោះ ពួកគេមួយចំនួនបានរងរបួសហូរឈាមលើផ្ទៃមុខ ខ្លះសន្លប់ និងខ្លះត្រូវបានចាប់ខ្លួន ក្រោយកម្លាំងសន្តិសុខ ចូលទៅបំបែកការតវ៉ា។
តំណាងរាស្ត្រពីគណបក្សប្រឆាំង លោក អ៊ុំ សំអាន បានបង្ហោះសារលើហ្វេសប៊ុករបស់លោកនៅថ្ងៃទី២៨ខែមេសានេះថា លោកចង់ឃើញអាមេរិកចាប់ខ្លួន លោក ហ៊ុន សែន និងលោក ហ៊ុន ម៉ាណែត មកឃុំខ្លួននៅសហរដ្ឋអាមេរិក ដូចអាមេរិកចាប់ខ្លួន លោក ម៉ាឌូរ៉ូ នៃវេណេហ្សូអេឡា ដោយសំអាងថា ព្រោះរដ្ឋអាជ្ញានៃតុលាការអាមេរិកប្ដេជ្ញាថា នឹងចាត់ការមន្ត្រីខ្មែរ ដែលចូលដៃក្នុងរឿងឆបោកតាមអនឡាញ មិនថាស័ក្តិធំប៉ុនណា។
លោកបន្តថា លោក ហ៊ុន សែន និងលោក ហ៊ុន ម៉ាណែត គឺជាមេខ្លោងនៃការឆបោកតាមអនឡាញនៅកម្ពុជា។ នៅប្រទេសកម្ពុជាពួកឆបោកតាមអនឡាញបោកប្រាស់ជនបរទេស រីឯធនាគារ Huione Pay របស់ឧកញ៉ា ហ៊ុន តូ បោកប្រាស់ពលរដ្ឋខ្មែរនិងជនជាតិចិន។
លោក អ៊ុំ សំអាន ឱ្យវីអូឌីដឹងបន្តែមនៅថ្ងៃទី២៨ខែមេសានេះថា លោកជឿថា អាមេរិកអាចនឹងចាត់វិធាននេះលើមេដឹកនាំកម្ពុជា ដូចករណីចាប់ខ្លួនមេដឹកនាំប្រទេសវេណេហ្សូអេឡាដែរ បើមេដឹកនាំខ្មែរមិនចាប់ខ្លួនមនុស្សមួយចំនួនដែលអាមេរិកបានរកឃើញនោះ។
លោកគូសបញ្ជាក់ថា ឧក្រិដ្ឋកម្មអនឡាញនៅកម្ពុជា បានបង្កផលប៉ះពាល់ដល់ជនជាតិអាមេរិក ដូចមានក្នុងរបាយការណ៍ដាក់ទណ្ឌកម្មរបស់សហរដ្ឋអាមេរិក ដែលបានប្រកាសកន្លងមក ដូច្នេះហើយអាមេរិកនឹងចាត់វិធានការរឿងនេះលើមេដឹកនាំខ្មែរ។
លោកថា៖ «ខ្ញុំជឿថា បើសិនជាលោក ហ៊ុន សែន ហ៊ុន ម៉ាណែត មិនចាត់ការចំពោះឧកញ៉ា លី យ៉ុងផាត់ ឧកញ៉ា ហ៊ុន តូ ឧកញ៉ កុក អាន ឧកញ៉ា ទ្រី ភាព លោក នេត សាវឿន លោក ឌី វិជ្ជា លោក ស សុខា ដែលមានក្នុងបញ្ជីទណ្ឌកម្មរបស់អាមេរិក និងក្នុងបញ្ជីសភាអាមេរិក ដូច្នេះខ្ញុំយល់ថា បើអត់ចាត់ការរឿងហ្នឹងទេ អាមេរិកអាចនឹងទៅចាប់ខ្លួន លោក ហ៊ុន សែន និងលោក ហ៊ុន ម៉ាណែត ដែលជាមេខ្លោងនៅពីក្រោយបទល្មើសនេះយកមកដាក់គុកនៅអាមេរិក»។
ប្រហាក់ប្រហែលគ្នានេះដែរ អ្នកសិក្សាផ្នែកច្បាប់ និងជាអ្នកវិភាគសង្គម លោក វ៉ន ចាន់ឡូត បានបង្ហោះសារក្រោយអាជ្ញាធរកម្ពុជាបង្ក្រាបទៅលើអតិថិជន ហួយវ័ន ផេ ដោយលើកឡើងថា បើមិនកម្ចាត់ឧក្រិដ្ឋជនក្បែរក្លៀក អាមេរិកអាចចេញដីកាចាប់ខ្លួនសម្ដេចតែម្ដង។
លើសពីនេះ លោកប្រាប់វីអូឌីបន្ថែមថា អ្វីដែលលោកសំអាងបែបនេះ ដោយយោងលើការតាមដានព័ត៌មាននៅសហរដ្ឋអាមេរិក ពីការតាមកម្ចាត់ឧក្រិដ្ឋកម្មអនឡាញ។
លើសពីនេះ លោកថា ដោយឡែក នៅប្រទេសកម្ពុជា អគ្គរដ្ឋអាជ្ញារបស់សហរដ្ឋអាមេរិក បានប្រកាសជំហរយ៉ាងម៉ឺងម៉ាត់ហើយថា នឹងបន្តបោសសម្អាតទោះបីអ្នកនោះ មានឋានៈនិងមានតួនាទីជាអ្វីក៏ដោយ ឱ្យតែអាមេរិករកឃើញថា ពាក់ព័ន្ធនឹងអំពើឆបោកតាមអនឡាញនេះ បើប៉ះពាល់ពលរដ្ឋអាមេរិកៗនឹងចាត់វិធានការ។
សម្រាប់ លោក ចាន់ឡូត ករណីនេះ អាមេរិបានធ្វើរួចហើយទៅលើមេដឹនាំនៃបណ្តាប្រទេសមួយចំនួន រួមទាំងប្រទេសវេណេហ្សូអេឡាជាដើម។ លោកថា របៀបចាត់ការរបស់សហរដ្ឋអាមេរិក គឺដំបូងឡើយ គឺអាមេរិកដាក់ទណ្ឌកម្មទៅលើមន្ត្រីដែលស្និទ្ធនឹងលោក ម៉ាឌូរ៉ូ ហើយបន្ទាប់មកបើអាមេរិករកឃើញថា ស្ថានការណ៍នេះ ពុំមានការថយចុះទេ អាមេរិកអាចចេញដីការចាប់ខ្លួនចំពោះមេដឹកនាំកំពូលតែម្តង។
ការណ៍នេះ លោកថា ក្នុងករណីឆបោកអនឡាញនៅកម្ពុជា មួយរយៈចុងក្រោយនេះ អាមេរិកបានដាក់ទណ្ឌកម្មលើមន្ត្រីក្នុងជួររដ្ឋាភិបាលគ្រាក់ៗមួយចំនួន និងបុគ្គលដែលមានភក្តីភាពបំផុតជាមួយលោក ហ៊ុន សែន និងលោក ហ៊ុន ម៉ាណែត រួចហើយដែរ។
លោកសង្កត់ធ្ងន់ថា នេះជាករបោះជំហានរបស់សហគមន៍អន្តរជាតិ ក៏ដូចជាសហរដ្ឋអាមេរិក ដែលអាចនឹងមានការវាយតម្លៃចុងក្រោយមួយលើវិធាននេះ ដែលលោកគិតថា វាជាហានិភ័យរបស់មេដឹកនាំកម្ពុជា បើមិនចាប់មេឧក្រិដ្ឋជនទាំងនោះទាន់ពេល ។
លោកថា៖ «នេះស្តែងឱ្យឃើញថា ជាការបោះជំហានរបស់សហគមន៍អន្តរជាតិ ក្នុងនោះដឹកនាំដោយសហរដ្ឋអាមេរិក ដែលអាចនឹងមានាករវាយតម្លៃចុងក្រោយមួយបើរកឃើញថា អំពើឆបោកនេះនៅតែបង្កការគំរាមកំហែងទៅកាន់សហរដ្ឋអាមេរិក ហើយចេញពីមូលដ្ឋាននៃប្រទេសកម្ពុជា នោះហានិភ័យអាចនឹងធ្លាក់ទៅដល់មេដឹកនាំកំពូលរបស់ប្រទេសកម្ពុជាតែម្តង ដែលអាចប្រឈមនឹងការចេញដីកាចាប់ខ្លួន»។
វីអូឌី មិនអាចរកការឆ្លើយតប ពីអ្នកនាំពាក្យរដ្ឋាភិបាល លោក ប៉ែន បូណា បានទេគិតត្រឹម៉ោងផ្សេងនេះ។ ប៉ុន្តែកាលពីថ្ងៃទី២៦ ខែមេសានេះ លោកបានអះអាងថា លោក ហ៊ុន សែន បានរំឭកមន្ត្រីឱ្យបន្តពង្រឹងសន្តិសុខនៅតាមមូលដ្ឋាន រួមទាំងទប់ស្កាប់បទឧក្រិដ្ឋឆបោកអនឡាញផងដែរ។
លោកថា៖ «សម្តេចតេជោ ក៏បានរំឭកដល់មន្ត្រីទាំងអស់ ត្រូវបន្តរក្សានូវស្ថេរភាពជាតិ និងយកចិត្តទុកដាក់រក្សាសណ្តាប់ធ្នាប់សង្គម ដោយបន្តអនុវត្តគោលនយោបាយភូមិឃុំមានសុវត្ថិភាព រួមមានការបង្ក្រាបបទល្មើសផ្សេងៗ ដូចជា អំពើចោរឆក់ គ្រឿងញៀន ជាពិសេសអំពើឆបោកតាមអនឡាញ»។
លើសពីនេះ អ្នកនាំពាក្យគណបក្សប្រជាជនកម្ពុជា លោក ជា ធីរិទ្ធ ហៅការលើកឡើងរបស់ក្រុមអ្នកឃ្លាំមើលនេះថា ជាសារនយោបាយបែប្រជាភុថុតិ ដែលពួកគេបានធ្វើជាង៣០ឆ្នាំមកហើយ។ ហើយថា ការលើកឡើងនេះ ក៏គ្មានពលរដ្ឋណាជឿដែរ។
លោកថា៖ «មេដឹកនាំកម្ពុជា គឺជាមេដឹកនាំដែលបានសង្គ្រោះប្រជាជនកម្ពុជា ចេញពីសង្គ្រាមនាំកម្ពុជាឱ្យមានសន្តិភាព និងការអភិវឌ្ឍដែលប្រជាពលរដ្ឋខ្មែរភាគច្រើនស្រឡាញ់និងគាំទ្រ»។
ក្រុមហ៊ុន ហួយវ័ន ផេ របស់លោក ហ៊ុន តូ ត្រូវបានសារព័ត៌មានអន្តរជាតិជាច្រើនរាយការណ៍ថា ជាប្រភពនៃការលាងលុយកខ្វក់ ពាក់ព័ន្ធនឹងអំពើឆបោកតាមអនឡាញ ។
អតិថិជនជាច្រើន អះអាងថា ក្រុមហ៊ុននេះ នៅតែបន្តប្រតិបត្តិការរបស់ខ្លួនដដែល បើទោះបីជាមានសេចក្តីប្រកាសព័ត៌មានរបស់ធនាគារជាតិ ចេញផ្សាយនៅខែធ្នូ ឆ្នាំ២០២៥ បានលើកឡើងថា រាជរដ្ឋាភិបាលបានដកហូតអាជ្ញាបណ្ណពីក្រុមហ៊ុន ហួយវ័ន ផេ នេះតាំងពីខែកញ្ញា ឆ្នាំ២០២៤ ហើយក្រុមហ៊ុននេះក៏បានរងសវនកម្មកាលពីខែមិថុនា ឆ្នាំ២០២៥ ក៏ដោយ ។
ដោយឡែក ក្រសួងរតនាគារសហរដ្ឋអាមេរិក នៅថ្ងៃទី២៣ខែមេសានេះ បានប្រកាសដាក់ទណ្ឌកម្ម លោក កុក អាន សមាជិកព្រឹទ្ធសភាបក្សប្រជាជនកម្ពុជាដែលជាមនុស្សជំនិតរបស់ លោក ហ៊ុន សែន ក្នុងរឿងឧក្រិដ្ឋកម្មឆបោកអនឡាញ។
នៅក្នុងរបាយការណ៍ជាភាសាអង់គ្លេសជាង១០ទំព័រ ការិយាល័យគ្រប់គ្រងទ្រព្យសម្បត្តិបរទេស (OFAC) នៃក្រសួងរតនាគារសហរដ្ឋអាមេរិក ចេញនៅថ្ងៃទី២៣ ខែមេសា ឆ្នាំ២០២៦ បានកំណត់អត្តសញ្ញាណនិងដាក់ទណ្ឌកម្ម លោក កុក អាន សមាជិកព្រឹទ្ធសភាកម្ពុជា ដែលគ្រប់គ្រងទីតាំងឆបោកនានានៅទូទាំងប្រទេស ព្រមទាំងបុគ្គល និងអង្គភាពចំនួន ២៨ផ្សេងទៀត នៅក្នុងបណ្តាញរបស់លោក។ ប្រតិបត្តិករឆបោកនៅអាស៊ីអាគ្នេយ៍នៅក្នុងបណ្តាញនេះ បានលួចប្រាក់រាប់លានដុល្លារពីជនរងគ្រោះជនជាតិអាមេរិក ក្នុងប្រតិបត្តិការ ក្រោមការការពាររបស់លោក កុក អាន និងទំនាក់ទំនងនយោបាយរបស់លោក។
បើតាមOFAC លោក កុក អាន និងបណ្តាញមជ្ឈមណ្ឌលឆបោករបស់បក្សពួកលោក ដែលប្រតិបត្តិការចេញពីកាស៊ីណូ និងមជ្ឈមណ្ឌលការិយាល័យដែលត្រូវបានកែច្នៃសម្រាប់ការងារឆបោក បានធ្វើការលាងលុយកខ្វក់ដែលបានមកពីជនរងគ្រោះ និងផ្តល់ជាមូលដ្ឋានដើម្បីកំណត់គោលដៅលើពលរដ្ឋអាមេរិក និងប្រព្រឹត្តការរំលោភសិទ្ធិមនុស្សដោយគ្មានទោសពៃរ៍៕
