ព្រៃលិចទឹកច្រើនហិកតាក្នុងបរិវេណឧទ្យានជាតិបុទុមសាគរ ខេត្តកោះកុង ត្រូវបានគេអះអាងមកថា កំពុងរងការកាប់ទន្ទ្រានយកធ្វើជាកម្មសិទ្ធិ ទាំងគ្មានការទប់ស្កាត់ពីស្ថាប័នពាក់ព័ន្ធ ដែលបញ្ហានេះ ពួកគេជំរុញឱ្យរដ្ឋាភិបាលចាត់វិធានការទប់ស្កាត់ឱ្យមានប្រសិទ្ធភាព ដើម្បីការពារធនធានធម្មជាតិក្នុងខេត្តជាប់សមុទ្រមួយនេះ។
ពលរដ្ឋសុំមិនបញ្ចេញអត្តសញ្ញាណ បានឲ្យដឹងនៅថ្ងៃទី២៩ខែមេសានេះថា បើគ្មានការទប់ស្កាត់ឲ្យបានឆាប់ទេ ដីព្រៃបំរុងស្មាច់ និងដីព្រៃកោងកាង មានទីតាំងនៅជាប់មាត់ព្រែកតាអុក ស្ថិតក្នុងភូមិជីត្រេះ ឃុំអណ្ដូងទឹក ស្រុកបូទុមសាគរ នឹងត្រូវបាត់បង់។
ប្រភពនោះថា បទល្មើសឈូសឆាយកាប់រានដីព្រៃក្នុងមូលដ្ឋានខាងលើនេះ មានវិសាលភាពកាន់តែធ្ងន់ធ្ងរ និងមានដីព្រៃជាង ២០ហិកតា ត្រូវបានគេកាប់ទន្ទ្រានយកធ្វើជាកម្មសិទ្ធិទាំងគ្មានការរារាំងពីស្ថាប័នពាក់ព័ន្ធក្នុងខេត្តនេះ ។
ប្រភពនោះជំរុញឱ្យក្រសួងពាក់ព័ន្ធ រួមទាំងអង្គភាពប្រឆាំងអំពើពុករលួយ បង្កើនវិធានទប់ស្កាត់បន្ទាន់ រកមន្ត្រីពាក់ព័ន្ធមកផ្តន្ទាទោស ដើម្បីការពារសម្បត្តិធម្មជាតិ នៅខេត្តជាប់មាត់សមុទ្រមួយនេះឱ្យបានគង់វង់។
ប្រភពថា៖ «ដីព្រៃកាប់រានហ្នឹងមានទំហំជាង ២០ហិកតា អាជ្ញាធរបានលក់ទៅឲ្យគេនៅទីក្រុងភ្នំពេញ។ នៅចំណុចជីសៀត ព្រែកតាអុក គប់គិតគ្នាលក់ដីហ្នឹង។ សង់ខ្ទមមិនទាន់ដុតព្រៃផងទេ»។
ប្រធានឧទ្យានជាតិបុទុមសាគរ ខេត្តកោះកុង លោក រុន ប្រាវ សុំមិនធ្វើអត្ថាធិប្បាយជុំវិញវិធានការនេះ ដោយគ្រាន់តែសួរបញ្ជាក់ពីទីតាំង ហើយថា លោកនឹងដាក់របាយការណ៍ជូនទៅថ្នាក់លើ។
លើសពីនេះ លោកជំរុញឱ្យទៅសួរអាជ្ញាធរស្រុកបុទុមសាគរ និងថ្នាក់ខេត្ត ជំនួសវិញ ដោយសំអាងថា វិធានទប់ស្កាត់បទល្មើស លើសពីដែនសមត្ថកិច្ចរបស់លោក ។
វីអូឌី នៅមិនទាន់អាចទាក់ទង អ្នកនាំពាក្យ និងជាអភិបាលរងខេត្តកោះកុង លោក ឈិត រតនៈ ដើម្បីបំភ្លឺជុំវិញករណីខាងលើបានទេ គិតត្រឹមម៉ោងផ្សាយនេះ ខណៈមន្ត្រីអង្គភាពប្រឆាំងអំពើពុករលួយ ក៏មិនទាន់អាចទាក់ទងបានទេ។
យ៉ាងណា លោក ខេង សំខាន់ អ្នកនាំពាក្យ និងជាអភិបាលរងស្រុកបុទុមសាគរ ថ្លែងប្រាប់សារព័ត៌មានក្នុងស្រុក នៅថ្ងៃអង្គារនេះថា រូបលោកមិនទាន់ទទួលបានព័ត៌មានជុំវិញសកម្មភាពទន្ទ្រានកាប់រានដីព្រៃក្នុងមូលដ្ឋាននេះទេ។ ប៉ុន្តែលោកថានឹង «ចាត់ក្រុមការងារចុះទៅពិនិត្យ ដល់ទីតាំងកើតមានបទល្មើសនេះ»។
ចំណែក លោក រុន ប្រាវ ប្រធានឧទ្យានជាតិបុទុមសាគរ ខេត្តកោះកុង ក៏មិនធ្វើអត្ថាធិប្បាយដែរ ដោយគ្រាន់តែសួរនាំរកទីតាំង កើតមានសកម្មភាពកាប់ទន្ទ្រានដីព្រៃលិចទឹកទាំងនោះ ដើម្បីដាក់របាយការណ៍ជូនទៅថ្នាក់លើ។ លោកស្នើឲ្យទាក់ទងទៅអាជ្ញាធរស្រុកបុទុមសាគរ ឬថ្នាក់ដឹកនាំរដ្ឋបាលខេត្តកោះកុងជំនួសវិញ ព្រោះលើសពីដែនសមត្ថកិច្ចរបស់ខ្លួន។
ទាក់ទិនបញ្ហានេះដែរ លោក សន ជ័យ នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា ហៅកាត់ (ANSA) ចាត់ទុកព្រៃកោងកាងថាជាព្រៃ ដែលមានសារៈសំខាន់ ហើយអាជ្ញាធរពាក់ព័ន្ធត្រូវយកចិត្តទុកដាក់ការពារឲ្យបានគង់វង្ស ដោយមិនត្រូវមានការគប់គិតណាមួយ ឈានទៅបំផ្លាញធនធានទាំងនេះទេ។
លោករិះគន់អាជ្ញាធរមូលដ្ឋាន ក៏ដូចជាមន្ត្រីស្ថាប័នជំនាញពាក់ព័ន្ធ ដែលបណ្តែតបណ្តោយឲ្យមានបទល្មើសកាប់ទន្ទ្រានព្រៃកោងកាង កើតឡើងអនាធិបតេយ្យ នៅខេត្តកោះកុង ដោយគ្មានការទប់ស្កាត់បែបនេះ។ លោកថា ព្រៃកោងកាង គឺជាដង្ហើមរស់របស់ធនធានសមុទ្រគ្រប់ប្រភេទ និងមានសក្តានុពលបំរើខាងវិស័យទេសចរណ៍ និងអាចជួបទប់ទល់នឹងបំរែបម្រួលអាកាសធាតុថែមទៀតផង។
លោកថា៖ «តាមពិតទៅព្រៃកោងកាងជាព្រៃ ដែលត្រូវយកចិត្តទុកដាក់ណាស់។ ជាព្រៃនៅក្នុងតំបន់ឆ្នេរ ហើយបើសិនជាអាជ្ញាធរនៅតែបណ្តែតបណ្តោយបែបនេះ ខ្ញុំគិតថា វាប៉ះពាល់ទៅដល់ ទី១ សោភណ្ឌភាពផ្នែកទាក់ទាញវិស័យទេសចរណ៍ ហើយទី២ វាអាចបង្ហាញពីចំណុចខ្សោយរបស់អាជ្ញាធរមូលដ្ឋាន ដែលចេះតែបើកដៃ ចេះតែព្រងើយកន្តើយបើកដៃឲ្យមានការកាប់បំផ្លាញបែបនេះ។ ទង្វើបែបនេះ វាអាចបង្កើតឲ្យមានការសង្ស័យថា មានការគប់គិតគ្នា។ អញ្ចឹងក្រសួងបរិស្ថាន ក៏ដូចជាសមត្ថកិច្ចពាក់ព័ន្ធ គួរតែមានការស៊ើបអង្កេតទៅលើករណីនេះដែរ»។
យ៉ាងណាក៏ដោយចុះ ពលរដ្ឋរស់នៅស្រុកបុទុមសាគរ ទទូចថា បើថ្នាក់ដឹកនាំក្រសួងពាក់ព័ន្ធ មិនមានបទបញ្ជាមក ថ្នាក់ដឹកនាំរដ្ឋបាលខេត្តកោះកុង ឲ្យមានវិធានការទប់ស្កាត់សកម្មភាពឈូសឆាយទន្ទ្រានកាប់រានដីព្រៃលិចទឹក នៅឃុំអណ្តូងទឹក ឲ្យបានទាន់ពេលទេ នឹងត្រូវរលាយហិនហោច ដោយការគប់គិតគ្នា រវាងអាជ្ញាធរមូលដ្ឋានជាមួយឈ្មួញមានទ្រព្យជាក់ជាមិនខាន ព្រោះជាបន្តបន្ទាប់មកនេះ អាជ្ញាធរខេត្តនេះ ហាក់មិនសូវជួយឈឺឆ្អាលការពារព្រៃឈើ ឬព្រៃលិចទឹក ដែលជាសម្បត្តិសាធារណៈរបស់រដ្ឋ ឲ្យបានគង់វង្សនោះទេ៕
