អង្គការ OPEC និងសម្ព័ន្ធមិត្តរបស់ខ្លួននឹងបាត់បង់អំណាចមួយផ្នែកលើទីផ្សារប្រេង នៅពេលដែលអារ៉ាប់រួម (UAE) ចាកចេញពីក្រុមនេះនៅថ្ងៃទី១ ខែឧសភា ប៉ុន្តែសម្ព័ន្ធអ្នកផលិតដែលនៅសេសសល់ទំនងជានឹងនៅបន្តរួមគ្នា និងបន្តសម្របសម្រួលលើគោលនយោបាយផ្គត់ផ្គង់ប្រេង។ នេះបើតាមការលើកឡើងរបស់ប្រតិភូ OPEC+ និងអ្នកវិភាគកាលពីថ្ងៃទី២៨ខែមេសា។
អារ៉ាប់រួម គឺជាអ្នកផលិតធំជាងគេទី៤ នៅក្នុងអង្គការនៃប្រទេសនាំចេញប្រេង (OPEC) ហើយបាននិយាយថា ខ្លួននឹងចាកចេញពីក្រុមនេះ កាលពីថ្ងៃទី២៨ខែមេសា បន្ទាប់ពីបានក្លាយជាសមាជិកអស់រយៈពេលជិត ៦០ឆ្នាំ។ ការណ៍នេះនឹងធ្វើឱ្យទីក្រុងអាប៊ូដាប៊ី រួចផុតពីគោលដៅផលិតកម្មប្រេងដែលកំណត់ដោយ OPEC និងសម្ព័ន្ធមិត្ត ដើម្បីរក្សាតុល្យភាពរវាងការផ្គត់ផ្គង់ និងតម្រូវការ។
ប្រភពពី OPEC+ ចំនួន ៥នាក់ ដែលសុំមិនបញ្ចេញឈ្មោះ បាននិយាយថា ការចាកចេញរបស់អារ៉ាប់រួមគឺជាភាពភ្ញាក់ផ្អើលមួយ។ ប្រភពចំនួន ៤ ក្នុងចំណោម ៥ បានបន្តថា ការចាកចេញនេះនឹងធ្វើឱ្យកិច្ចខិតខំប្រឹងប្រែងរបស់ OPEC+ ក្នុងការរក្សាតុល្យភាពទីផ្សារតាមរយៈការកែសម្រួលការផ្គត់ផ្គង់មានភាពស្មុគស្មាញ ដោយសារក្រុមនេះនឹងមានការគ្រប់គ្រងលើផលិតកម្មសកលតិចជាងមុន។
អារ៉ាប់រួមនឹងក្លាយជាអ្នកផលិតប្រេងធំជាងគេដែលចាកចេញពី OPEC ដែលជាការវាយប្រហារយ៉ាងខ្លាំងដល់អង្គការនេះ និងមេដឹកនាំជាក់ស្តែងគឺអារ៉ាប៊ីសាអូឌីត។ ទីក្រុងអាប៊ូដាប៊ីធ្លាប់បូមប្រេងបានប្រហែល ៣,៤ លានបារ៉ែលក្នុងមួយថ្ងៃ (bpd) ឬប្រហែល ៣% នៃការផ្គត់ផ្គង់ប្រេងឆៅរបស់ពិភពលោក មុនពេលសង្រ្គាមអាមេរិក-អ៊ីស្រាអែលប្រឆាំងនឹងអ៊ីរ៉ង់បានបង្ខំឱ្យខ្លួន និងអ្នកផលិតផ្សេងទៀតនៅតំបន់ឈូងសមុទ្រមជ្ឈិមបូព៌ា កាត់បន្ថយការដឹកជញ្ជូន និងបិទផលិតកម្មមួយចំនួន។
OPEC និងការិយាល័យទំនាក់ទំនងរដ្ឋាភិបាលអារ៉ាប៊ីសាអូឌីត មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។
នៅពេលចេញពី OPEC អារ៉ាប់រួមនឹងចូលរួមក្នុងជួរនៃអ្នកផលិតប្រេងឯករាជ្យដែលបូមប្រេងតាមតម្រូវការ ដូចជា សហរដ្ឋអាមេរិក និងប្រេស៊ីលជាដើម។ សម្រាប់ពេលនេះ មិនទាន់មានអ្វីច្រើនដែលអារ៉ាប់រួមអាចធ្វើបានដើម្បីបង្កើនផលិតកម្ម ឬការនាំចេញនោះទេ ដោយសារតែការបិទផ្លូវដឹកជញ្ជូនតាមច្រកសមុទ្រ Hormuz។ ប្រសិនបើការដឹកជញ្ជូនងើបឡើងវិញដល់កម្រិតមុនសង្រ្គាម អារ៉ាប់រួមអាចបង្កើនទិន្នផលដល់សមត្ថភាពរបស់ប្រទេសគឺ ៥ លានបារ៉ែលក្នុងមួយថ្ងៃ។
ធ្លាប់មានភាពតានតឹងរវាងអារ៉ាប់រួម និងអារ៉ាប៊ីសាអូឌីត ជុំវិញកូតាផលិតកម្មរបស់អេមីរ៉ាត ដែលស្ថិតក្នុងកម្រិត ៣,៥ លានបារ៉ែលក្នុងមួយថ្ងៃ។ អារ៉ាប់រួមបានស្នើសុំកូតាធំជាងមុន ដើម្បីឆ្លុះបញ្ចាំងពីការពិតដែលថាខ្លួនបានពង្រីកសមត្ថភាពជាផ្នែកនៃកម្មវិធីវិនិយោគតម្លៃ ១៥០ ពាន់លានដុល្លារ។
យោងតាមទីភ្នាក់ងារថាមពលអន្តរជាតិ សង្រ្គាមនៅអ៊ីរ៉ង់បានបណ្តាលឱ្យមានការរអាក់រអួលដល់ការផ្គត់ផ្គង់ថាមពលសកលធំបំផុតមិនធ្លាប់មាន បើគិតពីផលិតកម្មប្រេងប្រចាំថ្ងៃ។ ជម្លោះនេះក៏បានបង្ហាញឱ្យឃើញពីការមិនចុះសម្រុងគ្នាក្នុងចំណោមប្រទេសឈូងសមុទ្រ រួមទាំងរវាងអារ៉ាប់រួម និងអារ៉ាប៊ីសាអូឌីតផងដែរ។
អារ៉ាប់រួម គឺជាអ្នកផលិតទី៤ ដែលបានចាកចេញពី OPEC+ ក្នុងរយៈពេលប៉ុន្មានឆ្នាំចុងក្រោយនេះ ហើយជាអ្នកផលិតធំជាងគេបំផុត។ ប្រទេសអង់ហ្គោឡាបានចាកចេញពីប្លុកនេះក្នុងឆ្នាំ២០២៤ ដោយសំអាងលើការខ្វែងគំនិតគ្នាលើកម្រិតផលិតកម្ម។ អេក្វាឌ័របានចាកចេញពី OPEC ក្នុងឆ្នាំ២០២០ និងកាតាក្នុងឆ្នាំ២០១៩។
លោក Gary Ross នាយកប្រតិបត្តិនៃក្រុមហ៊ុន Black Gold Investors បាននិយាយថា OPEC+ នឹងមិនដួលរលំនោះទេ ព្រោះអារ៉ាប៊ីសាអូឌីតនឹងនៅតែចង់គ្រប់គ្រងទីផ្សារដោយមានជំនួយពីក្រុមនេះ៕
