ហ្វេសប៊ុកឈ្មោះដើម្បីយុត្តិធម៌ បានអះអាងនៅថ្ងៃទី៣០ខែមេសានេះថា ក្រុមការងារដើម្បីយុត្តិធម៌របស់ខ្លួន បានធ្វើយុទ្ធនាការសរសេរសារលើក្រដាសប្រាក់រៀលថា «អំណាចហ៊ុនតត្រកូលខ្មែរថ្នូរតជំនាន់» នៅទីសាធារណៈមួយចំនួន ក្នុងខេត្តសៀមរាប និងក្រុងប៉ោយប៉ែត ក្នុងសប្តាហ៍នេះ។
បើតាមប្រភពនេះ សារលើក្រដាសប្រាក់ដែលថា «អំណាចហ៊ុនតត្រកូល ខ្មែរថ្នូរតជំនាន់» មានសរសេរនៅលើក្រដាសប្រាក់ប្រភេទចាប់ពី ១០០០រៀល រហូតដល់១ម៉ឺនរៀល និងសារខ្លះសរសេរថា អំណាចហ៊ុន ហៀរកែងខ្មែរសែនចំបែងពុករលួយគ្រប់ទិសទី ជាដើម។
វីអូឌី មិនអាចរកការពន្យល់បន្ថែមពីម្ចាស់ហ្វេសប៊ុក ដើម្បីយុត្តិធម៌ ដើម្បីសុំការពន្យល់បន្ថែមជុំវិញគោលបំណងនៃការធ្វើយុទ្ធនាការផ្ញើលើក្រដាសប្រាក់រៀលជាថ្មីទៀតនេះទេ។
ប៉ុន្តែអំឡុងដើមឆ្នាំ២០២៥ ហ្វេបសប៊ុកឈ្មោះដើម្បីយុត្តិធម៌ ធ្លាប់អំពាវនាវឱ្យពលរដ្ឋទាំងក្នុង និងក្រៅប្រទេសចូលរួមធ្វើយុទ្ធនាការ ចែករំលែកសារដូចគ្នានេះ ក្រោមហេតុផលថា ដើម្បីបង្ហាញឆន្ទៈចង់បានប្រជាធិបតេយ្យ ប្រឆាំងការកាន់អំណាចផ្តាច់ការគ្រួសារហ៊ុន និងបានអះអាងថា សារលើក្រដាស់ប្រាក់រៀលនេះ ត្រូវបានគេផ្លុងចោលនៅទីសាធារណៈ ក្នុងបណ្តាខេត្តមួយចំនួន ដូចជា នៅខេត្តកណ្តាល បន្ទាយមានជ័យ កំពង់ចាម និងសៀមរាបជាដើម។
ដោយឡែក តំណាងរាស្ត្រគណបក្សប្រឆាំង លោក អ៊ុំ សំអាន និយាយថា ការចែកសារបែបនេះលោកយល់ថា ទំនងជាប្រជាពលរដ្ឋឈឺចាប់នឹងអំពើអយុត្តិធម៌សង្គម មេដឹកនាំធ្វើឱ្យបាត់បង់ទឹកដីទៅប្រទេសថៃជិត ៦០ទីតាំង ដោយមិនប្តឹងថៃដើម្បីទាមទារដីមកវិញ រួមទាំងឧក្រិដ្ឋកម្មអនឡាញជាដើម។
លោកគូសបញ្ជាក់ថា ជាក់ស្តែងប៉ុន្មានថ្ងៃមុននេះ អតិថិជនរងគ្រោះដែលបានដាក់លុយក្នុងក្រុមហ៊ុន ហួយវ័ន ផេ ត្រូវបានអាជ្ញាធរបង្ក្រាបយ៉ាងហិង្សា រហូតអ្នកខ្លះបែកក្បាល ខ្លះសន្លប់ និងខ្លះត្រូវបានចាប់ខ្លួន តែថាមេឧក្រិដ្ឋជន ដូចលោក ហ៊ុន តូ ជាដើម មិនត្រូវបានប្រព័ន្ធច្បាប់ចាប់បង្ខំឱ្យសងលុយទៅជនរងគ្រោះវិញនោះទេ ដែលនេះដូចសារមានសរសេរលើក្រដាសប្រាក់ថា «អំណាចហ៊ុនតត្រកូលខ្មែរថ្នូរតជំនាន់»។
លោកថា៖ «សារនេះ ប្រជាពលរដ្ឋចង់បំផុសឱ្យមហាជនងើបឡើងទម្លាក់ត្រកូលហ៊ុនពីអំណាច ដើម្បីកុំឱ្យខ្មែរយើងថ្ងូរតជំនាន់ទៀត ព្រោះបណ្តោយឱ្យឧកញ៉ាបោកប្រជាពលរដ្ឋ ឱ្យលោក ហ៊ុន តូ ដែលជាក្រុមគ្រួសារត្រកូលហ៊ុន ធ្វើបាបប្រជាពលរដ្ឋឧកញ៉ារំលោភយកដីធ្លីប្រជាពលរដ្ឋ អាហ្នឹងយើងឃើញអយុត្តិធម៌ក្នុងសង្គមជាច្រើន»។
មួយវិញទៀត លោកមើលឃើញថា ការបង្ក្រាបជនរងគ្រោះ មិនចាត់វិធានការច្បាប់លើមេឧក្រិដ្ឋជនឆបោកដែលជាប់សែស្រឡាយមេដឹកនាំនេះ បញ្ជាក់ថា អំពើអយុត្តិធម៌វាបានរីកធំដល់ពលរដ្ឋចម្រុះជាតិសាសន៍ ដែលទោះជាពួកគេមិនជាប់ពាក់ព័ន្ធរឿងនយោបាយ ខណៈលោកថា ពីមុនអំពើអយុត្តិធម៌នេះ វាបានកើតឡើងតែលើគណបក្សប្រឆាំងប៉ុណ្ណោះ តែពេលនេះ អ្នកមិនដែលនិយាយរឿងបញ្ហាសង្គមសោះ ក៏រងគ្រោះពីប្រព័ន្ធដឹកនាំបែបគ្រួសារនិយមនេះដែរ។
លោកថា៖ «បាទ! សារហ្នឹងវាបង្ហាញការពិតជាក់ស្តែង ដែលបានកើតឡើងក្នុងសង្គម ក្រោមការដឹកនាំរបស់ត្រកូលហ៊ុន ធ្វើឱ្យប្រជាពលរដ្ឋរងគ្រោះពីការដឹកនាំផ្តាច់ការរបស់ត្រកូលហ៊ុន មានការឆបោកតាមអនឡាញ រហូតមានការដាក់ទណ្ឌកម្មពីអាមេរិក[…] ដូច្នេះសារនេះបញ្ជាក់ពីតថភាពជាក់ស្តែងក្នុងសង្គមខ្មែរក្រោមការដឹកនាំរបស់ត្រកូលហ៊ុន»។
អ្នកនាំពាក្យគណបក្សប្រជាជនកម្ពុជា លោក ជា ធីរិទ្ធ ព្រមានពីការចាត់វិធានការច្បាប់ បើរកឃើញថា ទង្វើរបស់បុគ្គលណាមួយ ជាការបំពានច្បាប់របស់កម្ពុជា។
លោកថា៖ «ខ្ញុំមិនមានការឆ្លើយតបច្រើនទេ ខ្ញុំគ្រាន់តែចង់បញ្ជាក់ថា ធ្វើអ្វីក៏ធ្វើចុះ ក៏ប៉ុន្តែទង្វើទាំងនោះសូមឲ្យស្ថិតនៅក្រោមច្បាប់ក្នុងប្រទេសកម្ពុជា គ្មានបុគ្គលណាម្នាក់ដែលមិនស្ថិតនៅក្រោមច្បាប់របស់កម្ពុជាទេ ដូច្នេះប្រសិនបើធ្វើទង្វើទាំងឡាយណាដែលប្រាសចាកពីច្បាប់កម្ពុជានោះ ច្បាប់នឹងដាក់ទោសចំពោះបុគ្គលដែលល្មើសច្បាប់»។
ប្រព័ន្ធនីតិរដ្ឋនៅកម្ពុជានៅដើមឆ្នាំ២០២៦ បង្ហាញពីការធ្លាក់ចុះនៃគុណភាពអភិបាលកិច្ចនៅខាងក្នុង ដែលផ្ទុយគ្នាទាំងស្រុងនឹងការលើកឡើងកន្លងមករបស់រដ្ឋាភិបាល លោក ហ៊ុន ម៉ាណែត។
យោងតាមទិន្នន័យចុងក្រោយបង្អស់នៃសន្ទស្សន៍ការយល់ដឹងពីអំពើពុករលួយ (CPI) ឆ្នាំ ២០២៥ ដែលទើបតែចេញផ្សាយនៅថ្ងៃទី១០ ខែកុម្ភៈ ឆ្នាំ២០២៦នេះ កម្ពុជាក្រោមការគ្រប់គ្រងរបស់លោក ហ៊ុន ម៉ាណែត បានធ្លាក់មកដល់ចំណុចទាបបំផុតមិនធ្លាប់មាន ក្នុងរយៈពេលមួយទសវត្សរ៍ចុងក្រោយ ដោយទទួលបានពិន្ទុត្រឹមតែ ២០ លើ ១០០ ប៉ុណ្ណោះ។
តួលេខនេះ មិនមែនគ្រាន់តែជាលេខសម្រាប់វាស់វែងប្រព័ន្ធនីតិរដ្ឋធម្មតានោះទេ ប៉ុន្តែវាជាសញ្ញាអាសន្នដែលបង្ហាញថា បញ្ហាអំពើពុករលួយនៅកម្ពុជាលែងជាបញ្ហាបុគ្គលទៀតហើយ ប៉ុន្តែវាបានក្លាយជាជំងឺជាប្រព័ន្ធដែលចាក់ឫសយ៉ាងជ្រៅ តាមរយៈបណ្តាញបក្ខពួកនិយម។
ក្នុងទិដ្ឋភាពនីតិរដ្ឋ របាយការណ៍សន្ទស្សន៍នីតិរដ្ឋឆ្នាំ២០២៥ របស់គម្រោងយុត្តិធម៌ពិភពលោក បានបង្ហាញភស្តុតាងដែលថា ប្រព័ន្ធយុត្តិធម៌នៅកម្ពុជា ត្រូវបានបាត់បង់ឯករាជ្យភាពទាំងស្រុង ហើយត្រូវបានជំនួសមកវិញ ដោយការប្រើប្រាស់ច្បាប់ ដើម្បីការពារផលប្រយោជន៍បក្ខពួក និងបង្ក្រាបសំឡេងរិះគន់។ ស្ថានភាពនេះ បង្កើតនូវបរិយាកាសអវិជ្ជមាន សម្រាប់វិស័យសេដ្ឋកិច្ច ព្រោះអ្នកវិនិយោគ ដែលមានគុណភាពតែងតែផ្តល់អាទិភាព លើប្រទេសដែលមានប្រព័ន្ធច្បាប់ច្បាស់លាស់៕
