ប្រធានាធិបតីអាមេរិក លោក ដូណាល់ ត្រាំ កាលពីថ្ងៃទី២៩ខែមេសា បានជំរុញឱ្យប្រទេសអ៊ីរ៉ង់ «ឆាប់មានភាពវៃឆ្លាតឡើង» និងចុះហត្ថលេខាលើកិច្ចព្រមព្រៀង បន្ទាប់ពីមានការជាប់គាំងអស់រយៈពេលជាច្រើនថ្ងៃ ក្នុងកិច្ចខិតខំប្រឹងប្រែងបញ្ចប់សង្គ្រាម និងមានរបាយការណ៍ប្រព័ន្ធផ្សព្វផ្សាយថា សហរដ្ឋអាមេរិកនឹងពន្យារពេលការបិទខ្ទប់កំពង់ផែរបស់អ៊ីរ៉ង់។
នៅក្នុងការបង្ហោះលើបណ្តាញសង្គម Truth Social លោក ត្រាំ ដែលធ្លាប់បានលើកឡើងថា អ៊ីរ៉ង់អាចទាក់ទងមកបានប្រសិនបើចង់ពិភាក្សា និងបានសង្កត់ធ្ងន់ដដែលៗថា ទីក្រុងតេអេរ៉ង់មិនអាចមានអាវុធនុយក្លេអ៊ែរបានឡើយនោះ បានមានប្រសាសន៍ថា ប្រទេសនេះ «មិនអាចរៀបចំខ្លួនឱ្យបានត្រឹមត្រូវនោះទេ»។
កាសែត Wall Street Journal បានស្រង់សម្តីមន្ត្រីអាមេរិកដែលនិយាយថា ប្រធានាធិបតីបានណែនាំដល់ជំនួយការឱ្យត្រៀមលក្ខណៈសម្រាប់ការពន្យារពេលការបិទខ្ទប់កំពង់ផែរបស់អ៊ីរ៉ង់ ក្នុងគោលបំណងបង្ខំឱ្យទីក្រុងតេអេរ៉ង់ចុះចាញ់។
មន្ត្រីបាននិយាយថា លោក ត្រាំ បានជ្រើសរើសបន្តរឹតបន្តឹងសេដ្ឋកិច្ច និងការនាំចេញប្រេងរបស់អ៊ីរ៉ង់តាមរយៈការបិទខ្ទប់នេះ ដោយសារជម្រើសផ្សេងទៀតរបស់លោក ដូចជា ការបន្តទម្លាក់គ្រាប់បែក ឬការដកខ្លួនចេញពីជម្លោះ គឺមានហានិភ័យខ្ពស់ជាង។ នេះបើយោងតាម WSJ។
លោក ត្រាំ បាននិយាយនៅក្នុងការបង្ហោះកាលពីថ្ងៃទី២៩ខែមេសា ដោយមិនបានពន្យល់ថា តើកិច្ចព្រមព្រៀងបែបនេះនឹងរួមមានអ្វីខ្លះនោះថា៖ «ពួកគេមិនដឹងពីរបៀបចុះហត្ថលេខាលើកិច្ចព្រមព្រៀងមិនមែននុយក្លេអ៊ែរនោះទេ។ ពួកគេគួរតែឆាប់មានភាពវៃឆ្លាតឡើង!»។
អ៊ីរ៉ង់ចង់ឱ្យសហរដ្ឋអាមេរិកទទួលស្គាល់សិទ្ធិរបស់ខ្លួនក្នុងការចម្រាញ់សារធាតុអ៊ុយរ៉ាញ៉ូម សម្រាប់អ្វីដែលខ្លួននិយាយថាជាគោលបំណងសន្តិភាព និងស៊ីវិល។
ប្រទេសនេះមានស្តុកអ៊ុយរ៉ាញ៉ូមចម្រាញ់ក្នុងកម្រិត ៦០% ប្រមាណ ៤៤០ គីឡូក្រាម (៩៧០ ផោន) ដែលជាសម្ភារៈអាចយកទៅប្រើប្រាស់សម្រាប់ផលិតអាវុធនុយក្លេអ៊ែរបានច្រើន ប្រសិនបើត្រូវបានចម្រាញ់បន្ថែមទៀត។
មន្ត្រីអ៊ីរ៉ង់ បាននិយាយកាលពីថ្ងៃទី២៨ខែមេសាថា ប្រទេសខ្លួនអាចទប់ទល់នឹងការបិទខ្ទប់នេះបាន ដោយសារខ្លួនកំពុងប្រើប្រាស់ផ្លូវពាណិជ្ជកម្មជំនួស ហើយសាធារណរដ្ឋអ៊ីស្លាមមិនចាត់ទុកថាសង្គ្រាមនេះបានបញ្ចប់ឡើយ។
សង្គ្រាមនេះ បានសម្លាប់មនុស្សរាប់ពាន់នាក់ បង្កឱ្យទីផ្សារថាមពលមានភាពវឹកវរ និងរំខានដល់ផ្លូវពាណិជ្ជកម្មសកល។
ទីភ្នាក់ងារព័ត៌មាននិស្សិតអ៊ីរ៉ង់ (ISNA) បានឱ្យដឹងថា ជាសញ្ញានៃផលប៉ះពាល់សេដ្ឋកិច្ចដែលសង្គ្រាមកំពុងផ្តល់ឱ្យសេដ្ឋកិច្ចអ៊ីរ៉ង់ រូបិយប័ណ្ណរបស់ខ្លួនបានធ្លាក់ចុះដល់កម្រិតទាបបំផុតជាប្រវត្តិសាស្ត្រ គឺ ១,៨១០,០០០ រៀល ក្នុងមួយដុល្លារអាមេរិក កាលពីថ្ងៃទី២៩ខែមេសា ខណៈដែលតម្រូវការរូបិយប័ណ្ណបរទេសដែលបានកើនឡើង ក្នុងអំឡុងពេលប្រាំមួយសប្តាហ៍នៃកិច្ចប្រយុទ្ធគ្នា កំពុងហូរចូលទៅក្នុងទីផ្សារសេរី។
ISNA បានរាយការណ៍ថា តម្លៃប្រាក់រៀលបានធ្លាក់ចុះជិត ១៥% ក្នុងរយៈពេលតែពីរថ្ងៃចុងក្រោយនេះប៉ុណ្ណោះ។
ធនាគារកណ្តាល បាននិយាយថា អតិផរណារបស់អ៊ីរ៉ង់ ចាប់ពីថ្ងៃទី២០ ខែមីនា ដល់ថ្ងៃទី២០ ខែមេសា គឺ ៦៥.៨% ដែលជានិន្នាការទំនងជានឹងកាន់តែអាក្រក់ទៅៗ ដោយសារការធ្លាក់ចុះនៃរូបិយប័ណ្ណ។
សំណើចុងក្រោយបង្អស់របស់អ៊ីរ៉ង់សម្រាប់ដោះស្រាយសង្រ្គាមរយៈពេលពីរខែ ដែលត្រូវបានផ្អាកតាំងពីថ្ងៃទី ៨ ខែមេសា ក្រោមកិច្ចព្រមព្រៀងបទឈប់បាញ់ នឹងទុកការពិភាក្សាអំពីកម្មវិធីនុយក្លេអ៊ែរដោយឡែក រហូតដល់ជម្លោះត្រូវបានបញ្ចប់ជាផ្លូវការ និងបញ្ហាដឹកជញ្ជូនត្រូវបានដោះស្រាយ។
ទោះជាយ៉ាងណាក៏ដោយ សំណើនោះមិនបានឆ្លើយតបទៅនឹងការទាមទាររបស់លោក ត្រាំ ដែលចង់ឱ្យបញ្ហានុយក្លេអ៊ែរត្រូវបានពិភាក្សាចាប់តាំងពីដំបូងមកនោះទេ៕
