អ៊ីរ៉ង់ បាននិយាយកាលពីថ្ងៃទី៣០ខែមេសាថា ខ្លួននឹងឆ្លើយតបដោយ “ការវាយប្រហារដ៏រ៉ាំរ៉ៃ និងឈឺចាប់” លើទីតាំងនានារបស់សហរដ្ឋអាមេរិក ប្រសិនបើទីក្រុងវ៉ាស៊ីនតោនបន្តការវាយប្រហារឡើងវិញ ហើយបានបញ្ជាក់ជាថ្មីនូវការទាមទាររបស់ខ្លួនលើច្រកសមុទ្រ Hormuz ដែលធ្វើឱ្យផែនការរបស់សហរដ្ឋអាមេរិកក្នុងការបង្កើតសម្ព័ន្ធភាពដើម្បីបើកផ្លូវទឹកនេះឡើងវិញមានភាពស្មុគស្មាញ។
រយៈពេលពីរខែបន្ទាប់ពីសង្គ្រាមរវាងសហរដ្ឋអាមេរិក-អ៊ីស្រាអែល ជាមួយអ៊ីរ៉ង់ ច្រកសមុទ្រដ៏សំខាន់នេះនៅតែបន្តបិទនៅឡើយ ដែលបានកាត់ផ្ដាច់ការផ្គត់ផ្គង់ប្រេង និងហ្គាស ២០% របស់ពិភពលោក។ បញ្ហានេះបានធ្វើឱ្យតម្លៃថាមពលសកលហក់ឡើងខ្ពស់ និងបង្កើនការព្រួយបារម្ភអំពីហានិភ័យនៃឱនភាពសេដ្ឋកិច្ច។
កិច្ចខិតខំប្រឹងប្រែងដើម្បីដោះស្រាយជម្លោះបានឈានដល់ភាពទាល់ច្រក បើទោះបីជាមានបទឈប់បាញ់តាំងពីថ្ងៃទី៨ ខែមេសាក៏ដោយ ប៉ុន្តែអ៊ីរ៉ង់នៅតែបន្តបិទច្រកសមុទ្រនេះ ដើម្បីជាការឆ្លើយតបទៅនឹងការបិទខ្ទប់ផ្លូវទឹកពីសំណាក់កងទ័ពជើងទឹកសហរដ្ឋអាមេរិក លើការនាំចេញប្រេងរបស់អ៊ីរ៉ង់ ដែលជាខ្សែជីវិតសេដ្ឋកិច្ចរបស់ទីក្រុងតេអេរ៉ង់។
មន្ត្រីសហរដ្ឋអាមេរិកម្នាក់ បានប្រាប់ទីភ្នាក់ងារសារព័ត៌មាន Reuters ថា ប្រធានាធិបតីសហរដ្ឋអាមេរិក ដូណាល់ ត្រាំ ត្រូវបានកំណត់ពេលឱ្យទទួលរបាយការណ៍សង្ខេបកាលពីថ្ងៃ៣០មេសា អំពីផែនការសម្រាប់ការវាយប្រហារយោធាថ្មីៗជាបន្តបន្ទាប់ ដើម្បីបង្ខំឱ្យអ៊ីរ៉ង់ចរចាបញ្ចប់ជម្លោះ។
ជម្រើសបែបនេះ គឺជាផ្នែកមួយនៃផែនការរបស់សហរដ្ឋអាមេរិកជាយូរមកហើយ ប៉ុន្តែរបាយការណ៍ស្តីពីការសង្ខេបដែលបានស្នើឡើង ដែលចេញផ្សាយដំបូងដោយគេហទំព័រព័ត៌មាន Axios កាលពីយប់ថ្ងៃទី២៦ខែមេសា បានជំរុញឱ្យតម្លៃប្រេងហក់ឡើងយ៉ាងខ្លាំង ដោយតម្លៃប្រេងឆៅប្រភេទ Brent បានឡើងដល់ជាង ១២៦ ដុល្លារក្នុងមួយបារ៉ែលនៅចំណុចមួយ មុនពេលធ្លាក់ចុះមកវិញនៅត្រឹមប្រហែល ១១៤ ដុល្លារ។
យោងតាមទីភ្នាក់ងារសារព័ត៌មានផ្លូវការ IRNA អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei បាននិយាយកាលពីល្ងាចថ្ងៃទី៣០ខែមេសាថា វាមិនសមហេតុផលទេក្នុងការរំពឹងទុកនូវលទ្ធផលរហ័សពីការចរចាជាមួយសហរដ្ឋអាមេរិក។
លោកត្រូវបានគេដកស្រង់សម្តីថា៖ «ការរំពឹងថានឹងទទួលបានលទ្ធផលក្នុងរយៈពេលដ៏ខ្លី ដោយមិនគិតថាអ្នកសម្របសម្រួលជានរណានោះ តាមគំនិតរបស់ខ្ញុំ គឺមិនសូវប្រាកដនិយមនោះទេ»។
លោក ត្រាំ បានបញ្ជាក់ប្រាប់អ្នកយកព័ត៌មានកាលពីថ្ងៃទី៣០ខែមេសាថា អ៊ីរ៉ង់នឹងមិនត្រូវបានអនុញ្ញាតឱ្យមានអាវុធនុយក្លេអ៊ែរឡើយ ហើយតម្លៃសាំង ដែលជាកង្វល់ចម្បងសម្រាប់គណបក្សសាធារណរដ្ឋរបស់លោកមុនការបោះឆ្នោតពាក់កណ្តាលអាណត្តិក្នុងខែវិច្ឆិកា នឹង “ធ្លាក់ចុះដូចដុំថ្ម” នៅពេលសង្គ្រាមបញ្ចប់។
មន្ត្រីជាន់ខ្ពស់ម្នាក់នៃកងឆ្មាំបដិវត្តន៍អ៊ីរ៉ង់ បាននិយាយថា ការវាយប្រហារថ្មីណាមួយរបស់សហរដ្ឋអាមេរិកលើអ៊ីរ៉ង់ ទោះបីជាមានកម្រិតក៏ដោយ នឹងនាំមកនូវ “ការវាយប្រហារដ៏រ៉ាំរ៉ៃ និងឈឺចាប់” លើទីតាំងនានារបស់សហរដ្ឋអាមេរិកក្នុងតំបន់ ខណៈដែលមេបញ្ជាការកងកម្លាំងអាកាស លោក Majid Mousavi ត្រូវបានប្រព័ន្ធផ្សព្វផ្សាយអ៊ីរ៉ង់ដកស្រង់សម្តីថា៖ «យើងបានឃើញនូវអ្វីដែលបានកើតឡើងចំពោះមូលដ្ឋានក្នុងតំបន់របស់អ្នកហើយ យើងនឹងឃើញរឿងដដែលនេះកើតឡើងចំពោះនាវាចម្បាំងរបស់អ្នក»។
មេដឹកនាំកំពូល លោក Ayatollah Mojtaba Khamenei បាននិយាយនៅក្នុងសារជាលាយលក្ខណ៍អក្សរទៅកាន់ប្រជាជនអ៊ីរ៉ង់ថា ទីក្រុងតេអេរ៉ង់នឹងលុបបំបាត់ “ការរំលោភបំពានរបស់សត្រូវលើផ្លូវទឹក” ក្រោមការគ្រប់គ្រងថ្មីនៃច្រកសមុទ្រ ដែលជាការបង្ហាញថាទីក្រុងតេអេរ៉ង់មានបំណងរក្សាការកាន់កាប់លើច្រកនេះ។
លោកបានមានប្រសាសន៍ថា៖ «ជនបរទេសដែលមកពីចម្ងាយរាប់ពាន់គីឡូម៉ែត្រ… គ្មានកន្លែងនៅទីនោះទេ លើកលែងតែនៅបាតសមុទ្រប៉ុណ្ណោះ»៕
