ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស ជំរុញឲ្យអាជ្ញាធរកម្ពុជាដោះលែងមេបក្សប្រឆាំង លោក កឹម សុខា និងមនុស្ស ៣៣នាក់ផ្សេងទៀត ដែលបានចាប់ឃុំខ្លួន ព្រមទាំងទាមទារឱ្យទម្លាក់រាល់បទចោទទាំងអស់លើពួកគេ។
ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស លោក វឺកឃឺរ ធើក (Volker Türk) និយាយក្នុងសេចក្ដីប្រកាសព័ត៌មានចេញផ្សាយនៅថ្ងៃទី១ ខែឧសភានេះថា លោកព្រួយបារម្ភយ៉ាងខ្លាំងចំពោះការសម្រេចតម្កល់សាលក្រមផ្ដន្ទាទោសលើ លោក កឹម សុខា និងការផ្ដន្ទាទោសលើសកម្មជនបក្សប្រឆាំង អ្នកការពារសិទ្ធិមនុស្ស និងអ្នកប្រើប្រាស់បណ្ដាញសង្គមចំនួន ៣៣នាក់ផ្សេងទៀត។
មន្ត្រីជាន់ខ្ពស់របស់អង្គការអន្តរជាតិរូបនេះ ហៅការការផ្ដន្ទាទោសលើពួកគេ បានដើរផ្ទុយនឹងច្បាប់សិទ្ធិមនុស្សអន្តរជាតិ និងនាំឲ្យមានភាពភ័យខ្លាចកាន់តែខ្លាំង ដោយសារច្បាប់ព្រហ្មទណ្ឌនេះ ត្រូវបានបកស្រាយយ៉ាងទូលំទូលាយ និងមិនច្បាស់លាស់ ដែលយកមកអនុវត្តតាមទំនើងចិត្តចំពោះសង្គមស៊ីវិល អ្នកសារព័ត៌មាន និងពលរដ្ឋខ្មែរទូទៅ។
មន្ត្រីដដែលនេះ ក៏បានជំរុញឱ្យរដ្ឋាភិបាលលោក ហ៊ុន ម៉ាណែត ធានាថា ការរិះគន់ និងការបញ្ចេញមតិដោយស្របច្បាប់ត្រូវបានធានា និងដើម្បីការពារលំហស៊ីវិល ឯករាជ្យភាពប្រព័ន្ធតុលាការ និងលើកកម្ពស់ការកាត់ក្ដីដោយយុត្តិធម៌។
លោក កឹម សុខា ត្រូវសាលាឧទ្ធរណ៍ភ្នំពេញ កាលពីថ្ងៃទី៣០ ខែមេសា បានសម្រេចរក្សាបទចោទរបស់សាលាដំបូងរាជធានីភ្នំពេញ ផ្ដន្ទាទោសដាក់ពន្ធនាគាររយៈពេល ២៧ឆ្នាំ ដដែល ពីបទ «សន្ទិដ្ឋភាពជាមួយបរទេស» ដោយត្រូវឃុំខ្លួននៅក្នុងផ្ទះ ព្រមទាំងដកហូតសិទ្ធិពលរដ្ឋ និងសិទ្ធិនយោបាយជាស្ថាពរ កាលពីថ្ងៃទី៣ ខែមីនា ឆ្នាំ២០២៣។ បន្ថែមពីនេះ លោក កឹម សុខា ក៏ត្រូវសាលាឧទ្ធរណ៍ ហាមចាកចេញទៅក្រៅប្រទេស ចំនួន ៥ឆ្នាំទៀត។
ចំណែកតុលាការក្រុងភ្នំពេញ កាលពីថ្ងៃទី២៩ ខែមេសា បានសម្រេចផ្ដន្ទាទោសសកម្មជនកិច្ចព្រមព្រៀងសន្តិភាពទីក្រុងប៉ារីស២៣តុលា និងជនជាប់ចោទជាច្រើននាក់ទៀត ឱ្យជាប់ទោសចន្លោះពី ១៨ខែ ទៅ ២ឆ្នាំ ពាក់ព័ន្ធនឹងបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ក្រោយពីពួកគេបាននិយាយពីក្ដីបារម្ភរបស់ខ្លួនទាក់ទងនឹងគុណសម្បត្តិ និងគុណវិបត្តិនៃការបញ្ចូលខេត្តចំនួន៤ របស់កម្ពុជា ទៅក្នុងកិច្ចសហប្រតិបត្តិការត្រីកោណអភិវឌ្ឍន៍ជាមួយប្រទេសវៀតណាម និងឡាវ (CLV)៕
