ប្រជាពលរដ្ឋជាង ៤០គ្រួសារ រស់នៅតំបន់ជ្រោះដំណាក់ក្បូន នៃឧទ្យានជាតិជួរភ្នំក្រវាញ ស្ថិតក្នុងភូមិកោះប៉ោ ឃុំប៉ាក់ខ្លង ស្រុកមណ្ឌលសីមា ខេត្តកោះកុង បារម្ភពីការបាត់បង់ទីលំនៅឋាន និងមុខរបរ ខណៈបរិស្ថានខេត្ត តម្រូវឱ្យចាកចេញ ត្រឹមថ្ងៃទី០៥ ខែឧសភានេះ ទោះបានមករស់នៅជិត១០ឆ្នាំក្តី។
អ្នកស្រី នាក់ វណ្ណី ដែលអះអាងថាជាពលរដ្ឋម្នាក់ ក្នុងចំណោមពលរដ្ឋជាង ៤០គ្រួសារ ដែលមានផ្ទះឬតូបលក់ដូរ នៅតំបន់ជ្រោះដំណាក់ក្បូន ស្នើឱ្យរដ្ឋបាលខេត្តកោះកុង និងរដ្ឋាភិបាល ជួយអន្តរាគមន៍ឲ្យពួកគាត់ អាចបង្កើតសហគមន៍ និងរស់នៅប្រកបរបរលក់ដូរអាហារចំណីផ្សេងៗ ជូនភ្ញៀវទេសចរ នៅតំបន់នោះ សម្រាប់ចិញ្ចឹមជីវិតដោយគ្មានការបណ្តេញចេញ។
អ្នកស្រីបន្តថា ពួកគាត់ត្រូវបានមន្ត្រីមន្ទីរបរិស្ថានខេត្តកោះកុង មកបង្ខំឲ្យចាកចេញពីទីតាំងនេះ ចំនួន៣ដងមកហើយ ខណៈពួកគាត់បានមករស់នៅតំបន់ជ្រោះដំណាក់ក្បួននេះ ជិត១០ឆ្នាំមកហើយ តាំងពីមិនទាន់មានផ្លូវនិងអគ្គិសនី។
គាត់ថារយៈជិត១០ឆ្នាំនេះ ពួកគាត់បានសង់ផ្ទះរស់នៅ ដាំដុះ និងសង់ជាខ្ចមតូចៗ សម្រាប់លក់ម្ហូបអាហារ និងទទួលស្វាគមន៍ភ្ញៀវទេសចរ បន្ទាប់ពីរដ្ឋាភិបាលបានអភិវឌ្ឍន៍ផ្លូវតំបន់នេះរួចមក។
អ្នកស្រីបន្តថា ពលរដ្ឋឬអាជីវករពួកគាត់ មិនយកដីតំបន់នេះជាកម្មសិទ្ធិស្របច្បាប់ទេ ដោយគ្រាន់សុំរស់នៅធ្វើរោង ឬកញ្ចុះសម្រាប់លក់ដូរ ដើម្បីរកប្រាក់ចំណូលចិញ្ចឹមគ្រួសារប្រចាំថ្ងៃតែប៉ុណ្ណោះ ដ្បិតពួកគាត់ មិនមានដីសង់ផ្ទះនោះទេ។
អ្នកស្រី នាក់ វណ្ណី និយាយថា៖ «ពីមុនកម្សត់ក្រណាស់នៅទីនេះ ហើយកន្លែងនេះមិនមែនស្អាតភ្លឹងអញ្ចឹងទេពីមុន។ ហើយដល់ពេលប្រជាពលរដ្ឋ រស់នៅតំបន់នេះជួយគ្នារើសសំអាមសំអាតអនាម័យទើបតំបន់នេះមានបរិស្ថានល្អ។ ហើយពីមុនមក តំបន់នេះអត់មានផ្លូវធ្វើដំណើរស្អាតអញ្ចឹងទេ ហើយទឹកស្ទឹងនេះឆ្លងដោយសារក្បួន ដល់ពេលពលរដ្ឋពួកខ្ញុំ ចូលមករស់នៅ ហើយរដ្ឋបានបង្កើតផ្លូវនៅចំតំបន់នេះ ក៏មានភ្ញៀវទេសចរមកលេង ហើយក៏នាំគ្នាសម្អាតអនាម័យ កន្លែងយើងៗសំអាត កន្លែងគេៗសំអាត។ ដល់ពេលពលរដ្ឋសំអាតស្អាតអញ្ចឹងទៅ ក៏មានភ្ញៀវមកលេងហូរហែរមកដល់រាល់ថ្ងៃនេះ»។
ស្រដៀងគ្នាដែរ អ្នកស្រី ស៊ីម ស្រីពៅ ជាពលរដ្ឋម្នាក់ទៀតរស់នៅតំបន់នេះដែរ ឲ្យដឹងថា ពេលតំបន់នេះ មិនទាន់មានការអភិវឌ្ឍផ្លូវ ពួកគាត់បានដាំដុះដំណាំ បន្លែ ឬផ្លែឈើហូបផ្លែផ្សេងៗ សម្រាប់រួមផ្សំចិញ្ចឹមជីវិត។
ប៉ុន្តែក្រោយអភិវឌ្ឍន៍ផ្លូវ ពួកគាត់បានបង្កើតមុខរបរលក់ដូរបន្តិចបន្តួច សម្រាប់រកប្រាក់ចំណូល ទើបឃើញវត្តមានមន្ត្រីមន្ទីរបរិស្ថាន ចូលមកបណ្តេញ និងកាប់បំផ្លាញដំណាំពួកគាត់ ឲ្យចេញពីតំបន់នេះទៅវិញ?។
អ្នកស្រី ស្នើសុំដល់ថ្នាក់ដឹកនាំខេត្ត និងរដ្ឋាភិបាល ជួយឲ្យពួកគាត់បានរស់នៅ និងប្រកបអាជីវកម្មលក់ដូរម្ហូបអាហារនៅតំបន់នេះដូចដើមវិញ ព្រោះពួកគាត់គ្មានដីសង់លំនៅឋានរស់នៅនោះទេ។ ជាងនេះទៀត កូនចៅរបស់ពួកគាត់ ក៏មិនបានចូលសាលារៀនដែរ ដោយសារតែមានជីវភាពខ្វះខាត។
អ្នកស្រី ស៊ីម ស្រីពៅ និយាយថា៖ «សុំឲ្យគាត់ជួយឲ្យប្រជាពលរដ្ឋ ដែលក្រខ្សត់រស់នៅតំបន់កន្លែងហ្នឹង ឲ្យនៅបានសុខ និងប្រកបអាជីវកម្មលក់ដូរ ដាំដំណាំហូបបានហ្នឹងឲ្យមានសុវត្ថិភាព។ ពលរដ្ឋខំដាំដំណាំហូបផ្លែទទួលផលហើយ ក៏ត្រូវមន្ត្រីបរិស្ថានមកកាប់បំផ្លាញចោលអស់ម្តងជាពីរដង។ ហើយខ្ញុំក៏នៅតែបន្តដាំដុះជាបន្តទៀត ដើម្បីទុកឲ្យកូនចៅហូប ព្រោះយើងនៅឆ្ងាយពីផ្សារ ហើយយើងមិនមានលុយកាក់សម្រាប់ដោះដូរទិញគេបានហូបទេ គឺមានតែខំដាំដុះឲ្យកូនៗបានហូប ប៉ុន្តែត្រូវមន្ត្រីបរិស្ថានមកកាប់បំផ្លាញជាបន្តបន្ទាប់»។
ពលរដ្ឋបន្តថា ពេលពួកគាត់ចូលមករស់នៅតំបន់ជ្រោះដំណាក់ក្បូនពីដំបូង មិនឃើញវត្តមាន មន្ត្រីបរិស្ថាន ឬអាជ្ញាធរពាក់ព័ន្ធចុះមកហាមឃាត់ទេ។ ប៉ុន្តែក្រោយតំបន់នោះមានផ្លូវ និងមានភ្ញៀវទេសចរមកកម្សាន្ត អាចលក់ដូរចិញ្ចឹមជីវិតបាន ទើបលេចមុខមន្ត្រីអាជ្ញាធរចុះមកបណ្តេញពួកគាត់ឲ្យចាកចេញពីទីតាំងនេះ ទាំងគ្មានដំណោះស្រាយទៅវិញ?។
មេឃុំបាក់ខ្លង លោក ថូវ ប៊ុនកេ បានបដិសេធអត្ថាធិប្បាយ ដោយរុញឱ្យសួរទៅអភិបាលស្រុកមណ្ឌលសីមា និងអភិបាលខេត្តកោះកុង ដែលវីអូឌីមិនអាចទាក់ទងបាន។
យ៉ាងណា លោក ឈិត រតនៈ អ្នកនាំពាក្យរដ្ឋបាលខេត្តកោះកុង ត្រូវបានសារព័ត៌មានក្នុងស្រុក ស្រង់សំដីមកចុះផ្សាយថា ពលរដ្ឋដែលបានចូលមករស់នៅតំបន់ជ្រោះដំណាក់ក្បួន គឺទើបចូលមករស់នៅប៉ុន្មានឆ្នាំចុងក្រោយនេះទេ។ ហើយថា ការចូលមករស់នៅនេះ គឺបានប៉ះពាល់ដល់ដីការពារដោយក្រសួងបរិស្ថាន ដែលមិនអនុញ្ញាតឲ្យមានសកម្មភាពចូលមកទន្ទ្រានកាន់កាប់ធ្វើកម្មសិទ្ធិនោះទេ។
យ៉ាងណា លោកថា មិនទាន់ទទួលបានរបាយការណ៍ច្បាស់ពីថ្នាក់ក្រោម ជុំវិញការបណ្តេញចេញនេះទេ ដោយរង់ចាំមានឯកសារគ្រប់គ្រាន់ពីថ្នាក់ក្រោមសិន។
លើសពីនេះ មេភូមិកោះប៉ោ លោក វិន សុវាន បានឲ្យដឹងថា ពលរដ្ឋដែលស្នាក់នៅត្រង់ចំណុចខាងលើ គឺភាគច្រើនជាអ្នកចំណាកស្រុកមកពីឆ្ងាយ ហើយតំបន់នោះជាតំបន់ដាច់ស្រយាល ចម្ងាយពីភូមិប្រហែលជាង ២០គីឡូម៉ែត្រ។ លោកបន្តថា ដើមឡើយតំបន់នេះ មិនមានមនុស្សរស់នៅទេ ប៉ុន្តែនៅពេលតំបន់នេះ មានការសាងសង់វារីអគ្គិសនី ទើបមានកម្មករប្រមាណ ៤ទៅ៥គ្រួសារ បានមកសង់ខ្ទមរស់នៅទីនេះជាបណ្ដោះអាសន្ន។ លុះវារីអគ្គិសនីសង់រួចរាល់ ពលរដ្ឋទាំងនោះ មិនព្រមចាកចេញពីទីតាំងនេះឡើយ ហើយថែមទាំងមានអ្នកចំណូលថ្មី ចូលមករស់នៅតំបន់នេះជាបន្តបន្ទាប់។
លោកប្រាប់សារព័ត៌មានក្នុងស្រុកថា៖ «តាមខ្ញុំដឹង ដីតំបន់នោះ គេវិនិយោគឱ្យក្រុមហ៊ុនឯកជនមួយ ក្នុងទំហំដីប្រមាណ ១០ហិកតា.!»។
បន្ថែមលើនេះ លោក ប៉ែន ប៊ុនឈួយ អភិបាលរងស្រុកមណ្ឌលសីមា បានឲ្យដឹងដែរថា កាលពីឆ្នាំ២០១៩ នៅតំបន់នេះ ពិតជាមានក្រុមហ៊ុនមួយ បានទទួលសិទ្ធិវិនិយោគពិតមែន ប៉ុន្តែមិនឃើញមានការអភិវឌ្ឍអ្វីទាល់តែសោះ រហូតមកដល់បច្ចុបន្ននេះ។ លោកបន្តថា រាល់ថ្ងៃនេះ ដីតំបន់នេះ មិនទាន់បានវិនិយោគទៅឲ្យក្រុមណាផ្សេងទៀតទេ។
ទាក់ទិនបញ្ហានេះដែរ លោក ង៉ែត ស៊ីណាប់ មន្ត្រីសម្របសម្រួលសមាគមអាដហុក ប្រចាំខេត្តកោះកុង ស្នើឲ្យអាជ្ញាធរស្ថាប័នជំនាញពាក់ព័ន្ធ រកដំណោះស្រាយជូនពលរដ្ឋ ដោយអហិង្សានិងសន្តិវិធី ជាជាងបណ្តេញឲ្យចាកចេញទាំងបង្ខំ។ លោកទទួលស្គាល់ថា ពលរដ្ឋទាំងនោះ អាចជាពលរដ្ឋមកពីតំបន់ ឬខេត្តឆ្ងាយៗ ហើយចូលមករស់នៅ ក្នុងតំបន់ជ្រោះដំណាក់ក្បួននេះ ពុំទាន់មានឯកសារទទួលស្គាល់ពិតមែន ប៉ុន្តែចង់ឃើញអាជ្ញាធរពាក់ព័ន្ធដោះស្រាយបញ្ហានេះដោយតម្លាភាព។
លោក ង៉ែត ស៊ីណាប់ ថ្លែងថា៖ «បើគាត់កាន់កាប់រយៈពេលដប់ឆ្នាំ ឬដប់ឆ្នាំជាងនេះ ថ្វីត្បិតតែពួកគាត់កាន់កាប់ដោយមិនស្របច្បាប់មែន ប៉ុន្តែតាមការដោះស្រាយតាមបែបសមធម៌ តាមការដោះស្រាយក្នុងភាពជាឪពុកម្តាយ គឺគួរតែត្រូវគិត ឬរកដំណោះស្រាយអ្វីមួយ ដែលសមស្រប ដែលប្រជាពលរដ្ឋបានទៅកាន់កាប់អាស្រ័យផលនៅទីនោះ ហើយរកវិធីដោះស្រាយទៅតាមសមធម៌ ព្រោះការបណ្តេញចេញដោយហិង្សា ជារឿងមួយដែលអសីលធម៌ និងរំលោភសិទ្ធិមនុស្សផងដែរ»។
យ៉ាងណា បើតាមពលរដ្ឋ កាលពីថ្ងៃទី០២ ខែឧសភាថ្មីៗនេះ មន្ត្រីមន្ទីរបរិស្ថាន បានដឹកនាំកម្លាំងសមត្ថកិច្ចជាច្រើននាក់ ចុះមកបង្ខំឲ្យពួកគាត់រុះរើផ្ទះ ឬកញ្ចុះដែលសង់រស់នៅនិងប្រកបមុខរបរចិញ្ចឹមជីវិត ចេញពីតំបន់ជ្រោះដំណាក់ក្បូននេះ ម្តងរួចមកហើយ ហើយថែមទាំងបានប្រើកាំភ្លើងមកភ្ជង់ពួកគាត់បង្ខំឲ្យរុះរើសំណង់ផ្សេងៗ ចេញពីតំបន់ខាងលើនេះ ឲ្យអស់មុនថ្ងៃទី៥ ខែឧសភា។ តែថានៅពេលប្រជាពលរដ្ឋ ប្រមូលផ្តុំតវ៉ា ក៏បានដកថយទៅវិញ ប៉ុន្តែមន្ត្រីទាំងនោះបានគំរាមថា នឹងនាំយកគ្រឿងចក្រមកឈូសកំទេចទីតាំងតូបលក់ដូរ ឬផ្ទះរស់នៅរបស់ពលរដ្ឋពួកគាត់ ឲ្យអស់ក្នុងសប្តាហ៍នេះទៀត៕
