ការផ្លាស់ប្តូរទីតាំងរូបសំណាក់ «ព្រះវិស្ណុគង់លើស្តេចគ្រុឌ» ពីខេត្តឧត្តរមានជ័យមកតម្កល់ទុកនៅទីតាំងដើមវិញនៅរង្វង់មូលក្បែរព្រះលានយន្តហោះចាស់ ផ្លូវជាតិលេខ៦ ក្នុងក្រុងសៀមរាប ធ្វើឱ្យពលរដ្ឋខ្លះសាទរ និងពលរដ្ឋខ្លះទៀតរស់នៅក្នុងតំបន់អង្គរមិនសប្បាយចិត្ត ដោយអះអាងថា អាជ្ញាធរមិនទទួលខុសត្រូវអភិរក្សកេរដំណែលបុព្វបុរសខ្មែរឱ្យគង់វង្សនោះឡើយ។
ពលរដ្ឋរស់នៅតំបន់អង្គរ លោក ស៊ាន ខេមរា យល់ថា រូបសំណាក់ប្រវត្តិសាស្ត្រនេះ បន្សល់ទុកតាំងពីទសវត្សរ៍ទី៦០ អាជ្ញាធរគួរតែអភិរក្សឱ្យបានល្អទាក់ទាញភ្ញៀវទេសចរ មិនគួរផ្លាស់ប្ដូរដោយស្ងាត់ៗនោះទេ ធ្វើឱ្យពលរដ្ឋមិនសប្បាយចិត្ត។
ពលរដ្ឋរស់នៅតំបន់អង្គររូបនេះ បន្ថែមថា ការអភិរក្សកេរដំណែលដូនតាឱ្យល្អ មានន័យថា គោរពគុណបុព្វបុរស ទេវតា និងអាទិទេព ថែរក្សាភូមិស្រុកដែលគាត់រស់នៅ។
លោកថា៖ «យើងគិតមើលចង់យកចេញ ក៏យកចេញ យកចូលក៏យកចូល មកអ៊ីចឹង លើកដាក់ៗតាមសេរីអ៊ីចឹង។ រូបកន្លែងចាស់ពីមុនមក បាត់រូបចាស់ យករូបថ្មីមក មិនដឹងរូបចាស់មានលោហៈធាតុអីយ៉ាងណា»។
រដ្ឋបាលខេត្តសៀមរាបថ្មីៗនេះ បានជូនដំណឹងស្តីពីការកែសម្រួលរូបសំណាក់នៅរង្វង់មូលមុខវិទ្យាល័យសម្ដេចឪ ដោយបានរៀបចំក្រុងពលី បួងសួងសុំយាងព្រះបាទជ័យវរ្ម័នទី៧ មកទៅគង់នៅវត្តរាជបូព៌ ហើយនឹងរៀបចំរូបសំណាក់ព្រះរៀមគង់លើគ្រុឌមកដាក់ទីតាំងដើមវិញ។
អ្នកនាំពាក្យសាលាខេត្តសៀមរាប លោក លី វណ្ណៈ ប្រាប់សារព័ត៌មានថ្មីៗថា ការកែប្រែរូបសំណាក់នេះធ្វើឡើង តាមការស្នើសុំរបស់ពលរដ្ឋដែលជឿលើបារមី ឫទ្ធានុភាព រូបសំណាក ព្រះវិស្ណុផ្លែងសរ ជិះលើគ្រុឌ។ លោកបន្ថែមថា ពលរដ្ឋបានបញ្ចេញមតិក្នុងគេហទំព័រហ្វេសប៊ុករបស់អភិបាលខេត្ត។
ទោះជាយ៉ាងណា ទំព័រហ្វេសប៊ុក ក្រុមព្រះសុរិយាដែលមានជំនាញខាងស្រាវជ្រាវប្រវត្តិសាស្ត្រ និងសិល្បៈ បង្ហោះសារតាមបណ្ដាញសង្គមជំនឿដូនតាខ្មែរជឿថា រូបសំណាក់ព្រះរាមគង់លើគ្រុឌ ការពារជាតិ ទាំងផ្លូវទឹក ផ្លូវគោក និងផ្លូវអាកាស និងបន្សាបឥទ្ធិពលចំពោះអ្នកដែលមានមហិច្ឆតាឈ្លានពានទឹកដីខ្មែរ ។
រូបសំណាក់នេះ បង្កើនសោភ័ណភាពខេត្ត សម្រាប់ប្រជាជន គោរពបូជា ផ្សាភ្ជាប់នឹងជំនឿនៅបាតបាល័ដ្ឋរង្វង់មូល ព្រះវិស្ណុគង់លើគ្រុឌជាកន្លែងបញ្ចុះអថ័ន ដើម្បីការពារ និងតម្កើងរិទ្ធិបារមី រូបបដិមាករ ព្រះវិស្ណុជិះគ្រុឌ ឱ្យកាន់តែខ្លាំងដោយបញ្ចុះអថ័នបណ្ដាសា ឧបកិច្ចថា ជនទាំងឡាយណាដែលបំផ្លិចបំផ្លាញ ក្បាច់ចម្លាក់ រង្វង់មូល និងរូបបដិមាព្រះវិស្ណុ គង់លើគ្រុឌ និងត្រូវរងទុក្ខទោស ធ្លាក់នរក៩ ជាន់ ឬបាត់បង់ជីវិត ដោយគ្រោះថ្នាក់ចរាចរណ៍ លិចទូក និងរន្ទះបាញ់ ជាដើម។
អ្នកសិក្សាផ្នែកព្រហ្មញ្ញសាសនា និងជាគ្រូអាចារ្យ លោក ម៉ាលី សានី ពន្យល់ថា ពលរដ្ឋខ្មែរមានជំនឿចាក់ជ្រៅក្នុងដួងចិត្តថា រូបសំណាក់នេះ ដើម្បីបង្ក្រាបផ្លូវងងឹត ដែលពួកអមនុស្សតែងតែយាយីតាមភូមិស្រុក ដោយត្រូវយាងអាទិទេព មកទប់ស្កាត់ផ្លូវក្នុងអាក្រក់ ក្នុងភូមិស្រុកដែលពួកគាត់រស់នៅ។ លោកថា ក្នុងពេលសៀមឈ្លានពានកម្ពុជា ពលរដ្ឋនឹកឃើញដល់រូបសំណាក់នេះ ហើយចង់ទុកនៅទីតាំងដើមវិញ។
លោក គង់ សានី និយាយថា៖ «ជំនឿបានចាក់ជ្រៅក្នុងដួងចិត្តពលរដ្ឋគាត់ គាត់ជឿថា ការដាក់រូបសំណាក់ដើម្បីបង្ក្រាបរាល់កលិយុគ ឬព្រះបិសាច ដែលតែងតែយាយីលើ ប្រទេសភូមិស្រុក ឬតំបន់ដែលគាត់រស់នៅ ធ្វើឱ្យគាត់បានសុខសាន្ត។ គាត់ជឿថា មានទេវតាណាមួយ មានឫទ្ធានុភាព»។
ប្រធានសមាគមមគ្គុទ្ទេសក៍ទេសចរណ៍អង្គរ លោក ខៀវ ធី យល់ថា ពលរដ្ឋសាទរចំពោះការផ្លាស់ប្តូររូបសំណាក់នេះនៅទីតាំងដើមវិញ ដោយជឿថា ប្រទេសមានសិរីមង្គល ត្រជាក់ត្រជុំឡើងវិញ។ លោកស្នើឱ្យអាជ្ញាធរគួរតែរក្សាកេរដំណែលដូនតា និងរៀបចំប្រព័ន្ធអភិរក្សឱ្យបានល្អ ។
លោក ខៀវ ធី និយាយថា៖ «អ្វីដែលមានហើយ មិនបាច់ដោះដូរទេ យើងគិតតែពង្រឹងថែមអ្វីដែលថ្មី! មានប៉ុន្មានយើងរក្សាទុកប៉ុណ្ណឹង យើងកុំដោះដូរ។ រង្វង់មូលយើងច្រើនណាស់ យើងគួរតែសាងសង់ គ្រប់រង្វង់មូល ដើម្បីបណ្ដុះស្មារតីយុវជន រំលឹកដឹងគុណបុព្វបុរសយើងច្រើន តាំងពីសម័យអង្គរ»។
លោក ខៀវ ធី បន្ថែមថា អាជ្ញាធរគួរតែសាងសង់រូបសំណាក់ព្រះរាជាសម័យបុរាណបន្ថែមទៀត នៅតាមរង្វង់មូលតាមបណ្ដាស្រុកមួយចំនួន ដូចជា ស្រុកបន្ទាយស្រី ដើម្បីគោរពដឹងគុណដល់បុព្វបុរស និងផ្សព្វផ្សាយវប្បធម៌ខ្មែរ។
ក្រុមព្រះសុរិយា បន្ថែមថា រូបសំណាក់ចម្លងព្រះវិស្ណុគង់លើគ្រុឌ ដែលដកចេញពីរង្វង់មូលផ្លូវជាតិលេខ៦ ពីខេត្តសៀមរាប ទៅកាន់ខេត្តបន្ទាយមានជ័យ កាលពីឆ្នាំ២០១០ ហើយក្រោយមកត្រូវយករូបសំណាក់នេះ ទៅរក្សាទុក នៅសាលាខេត្តសៀមរាបចាស់។ ក្រោយមក អំឡុងឆ្នាំ២០១០ អភិបាលខេត្តឧត្តរមានជ័យ លោក ប៉ិច សុខិន បានស្នើសុំរូបសំណាក់នេះ យាងគង់ប្រថាប់ នៅលើបាល័ដ្ឋរង្វង់មូល នៅទីរួមខេត្តឧត្តរមានជ័យ នៅថ្ងៃទី២៣ ខែតុលា ឆ្នាំ២០១០៕
