អតីតនាយករដ្ឋមន្ត្រីដែលគេដឹងថា មានអំណាចកំពូលនៅកម្ពុជា គឺលោក ហ៊ុន សែន បានគូសបញ្ជាក់ទៅកាន់មេដឹកនាំថៃថា សូមកុំនិយាយថា ធ្លាក់ចូលអន្ទាក់កម្ពុជា ដែលចង់ឲ្យភាគីទី៣ចូលរួម និងកុំបបួលកម្ពុជារៀបចំយន្តការទ្វេភាគីថ្មី ជំនួសយន្តការទ្វេភាគីចាស់ដែលថៃលុបចោលជាឯកតោភាគី។
ប្រតិកម្មឆ្លើយតបរបស់លោក ហ៊ុន សែន នៅថ្ងៃទី៦ខែឧសភានេះ គឺធ្វើឡើងមួយថ្ងៃក្រោយប្រទេសថៃប្រកាសដកខ្លួន ឬលុបចោលអនុស្សរណៈយោគយល់គ្នា រវាងកម្ពុជា-ថៃ ឬ(MOU2001)ស្តីពីតំបន់ទាមទារដែនសមុទ្រត្រួតស៊ីគ្នា ដោយនាយករដ្ឋន្ត្រីថៃ សំអាងថា ការសម្រេចដកខ្លួននេះ ដោយថា(MOU2001)«គ្មានវឌ្ឍនភាព» ក្រោយអនុស្សរណៈនេះ មានអាយុកាលជាង២៥ឆ្នាំ។
លោក ហ៊ុន សែន បាននិយាយលើហ្វេសប៊ុករបស់លោក នៅថ្ងៃទី៦ខែឧសភានេះថា លោកសូមគាំទ្រយ៉ាងពេញទំហឹងនៅគោលជំហររាជរដ្ឋាភិបាលលោក ហ៊ុន មាណែត លើដំណោះស្រាយស្តីពីតំបន់សមុទ្រត្រួតស៊ីគ្នារវាងកម្ពុជា ថៃ ក្រោយពេលភាគីថៃលុបចោល MOU 2001 ជាឯកតោភាគី។
លោកថា ការណ៍នេះ មិនត្រូវបង្កើតយន្តការទ្វេភាគីជំនួសយន្តការ MOU 2001 នោះឡើយ គឺដំណើរឆ្ពោះទៅតាមយន្តការច្បាប់សមុទ្រឆ្នាំ១៩៨២ តែម្តង ទើបអាចដោះស្រាយដោយមានភាគីទី៣ ចូលរួមរកយុត្តិធម៌ដូចដែលលោកនាយករដ្ឋមន្ត្រី ហ៊ុន ម៉ាណែត បានលើកឡើងកាលពីថ្ងៃម្សិលមិញ។
លោកបានរំឭកថា សម្រាប់រូបលោក៖ «ដែលបានធ្វើកិច្ចការនេះ តាំងពីអតីតនាយករដ្ឋមន្ត្រី ឆាត ឆៃឈុនហាវ៉ាន់ ឆ្នាំ១៩៨៩ ដល់១៩៩០ និងបន្តមកចុះហត្ថលេខាលើ MOU 2001 ខ្ញុំពិតជាសោកស្តាយនូវការលុបចោលជាឯកតោភាគីពីសំណាក់ភាគីថៃ ក្រោមហេតុផល(គ្មានវឌ្ឍនភាព)»។
ក្នុងន័យនេះលោក បំភ្លឺក្នុងន័យដើមថា គ្មានវឌ្ឍនភាពដោយសារអ្វី? ភាគីថៃខ្លួនឯងដឹងច្បាស់ជាងនរណាទាំងអស់ តើថៃដូរនាយករដ្ឋមន្ត្រីប៉ុន្មានហើយក្រោយរដ្ឋប្រហារទម្លាក់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា ឆ្នាំ២០០៦? កម្ពុជាធ្វើដំណើរដោយ នាយករដ្ឋមន្ត្រី ហ៊ុន សែន និងបន្តដោយ នាយករដ្ឋមន្ត្រី ហ៊ុន ម៉ាណែត ដោយគ្មានការផ្លាស់ប្តូរយន្តការ និងខ្លឹមសារចរចា។ ក្នុងពេលជាមួយគ្នាថៃ ផ្លាស់ប្តូរនាយករដ្ឋមន្ត្រីប្រមាណ ១០នាក់ តើនេះជាហេតុផលមួយនៃការគ្មានវឌ្ឍនភាពទេ?។
លើសពីនេះ លោកគូសបញ្ជាក់ថា ទោះបីថៃមានការផ្លាស់ប្តូរនាយករដ្ឋមន្ត្រីច្រើនរូបក៏ដោយ ក៏ថ្នាក់ដឹកនាំទាំងនោះនៅតែបង្ហាញការបន្តចរចា សូម្បីរដ្ឋាភិបាលលោកនាយករដ្ឋមន្ត្រី អាប់ភីស៊ីត វេចាជីវ៉ា ក៏បានចាត់បញ្ជូនឧបនាយករដ្ឋមន្ត្រី សុថេប ធឿកសុបាន់ និងរដ្ឋមន្ត្រីក្រសួងការពារជាតិ ប្រាវីត វង្សសុវណ្ណ មកជួបចរចាជាមួយលោកនៅផ្ទះក្នុងក្រុងតាខ្មៅ នាឆ្នាំ២០១០ ដែលនៅពេលនោះហើយដែលវរជនទាំងពីរបានស្គាល់សម្លកកូរខ្មែរលើកដំបូង ដែលភរិយារបស់លោកចំអិនផ្ទាល់ដៃ ជូនភ្ញៀវកិត្តិយសទាំង២រូបសម្រាប់អាហារថ្ងៃត្រង់។
លោកសង្កត់ធ្ងន់ថា៖ «កម្ពុជាធ្វើដំណើរទៅកាន់ច្បាប់អន្តរជាតិ សូមកុំចោទប្រកាន់ថា កម្ពុជាធ្វើអន្តរជាតូបនីយកម្មបញ្ហាទ្វេភាគី និងសូមកុំនិយាយថាធ្លាក់ចូលអន្ទាក់កម្ពុជាដែលចង់ឲ្យភាគីទី៣ ឬអន្តរជាតិចូលរួមនិងក៏សូមកុំបបួលកម្ពុជារៀបចំយន្តការទ្វេភាគីថ្មី ជំនួសយន្តការទ្វេភាគីចាស់ដែលថៃលុបចោលជាឯកតោភាគី»។
លោក ហ៊ុន សែន សង្ឃឹមថា កម្ពុជានិងថៃ នឹងដឹកដៃគ្នាទៅកាន់យន្តការអន្តរជាតិ ដែលមានសមត្ថកិច្ចលើបញ្ហាសមុទ្រ៕
