អ៊ីរ៉ង់បាននិយាយកាលពីថ្ងៃទី៦ខែឧសភាថា ខ្លួនកំពុងពិនិត្យមើលសំណើថ្មីរបស់សហរដ្ឋអាមេរិក បន្ទាប់ពីប្រភពនានា បានលើកឡើងថា ទីក្រុងវ៉ាស៊ីនតោន និងទីក្រុងតេអេរ៉ង់ កំពុងខិតជិតសម្រេចបាននូវអនុស្សរណៈដែលមានតែមួយទំព័រ ដើម្បីបញ្ចប់សង្គ្រាមនៅក្នុងតំបន់ឈូងសមុទ្រ ខណៈដែលទុកបញ្ហាលំបាកៗដូចជា កម្មវិធីនុយក្លេអ៊ែររបស់អ៊ីរ៉ង់ជាដើម សម្រាប់ដោះស្រាយនៅពេលក្រោយ។
អ្នកនាំពាក្យក្រសួងការបរទេសអ៊ីរ៉ង់ ដែលដកស្រង់ដោយទីភ្នាក់ងារសារព័ត៌មាន ISNA បាននិយាយថា អ៊ីរ៉ង់នឹងបញ្ជូនការឆ្លើយតបរបស់ខ្លួនក្នុងពេលឆាប់ៗនេះ តាមរយៈប្រទេសប៉ាគីស្ថាន ដែលជាអ្នករៀបចំការចរចាសន្តិភាពតែមួយគត់នៃសង្គ្រាមនេះ ហើយចាប់តាំងពីពេលនោះមក បានដើរតួជាអ្នកសម្របសម្រួលចម្បងសម្រាប់សាររវាងភាគីទាំងសងខាង។
នៅក្នុងការបង្ហោះលើបណ្តាញសង្គម កាលពីព្រឹកព្រលឹមថ្ងៃទី៦ខែឧសភា ប្រធានាធិបតីអាមេរិក ដូណាល់ ត្រាំ មិនបានផ្តល់ព័ត៌មានលម្អិតណាមួយឡើយ ប៉ុន្តែបានមានប្រសាសន៍ថា សង្គ្រាមអាចនឹងបញ្ចប់ ប្រសិនបើ “អ៊ីរ៉ង់យល់ព្រមផ្តល់អ្វីដែលបានព្រមព្រៀងគ្នា”។ បន្ទាប់មក លោកប្រាប់កាសែត New York Post ថា វានៅតែលឿនពេកក្នុងការពិចារណាលើការជួបពិភាក្សាគ្នាដោយផ្ទាល់ ដើម្បីចុះហត្ថលេខាលើកិច្ចព្រមព្រៀង។
ប្រភពពីប៉ាគីស្ថានមួយ និងប្រភពមួយទៀតដែលទទួលបានព័ត៌មានអំពីការសម្របសម្រួល បានបញ្ជាក់ពីព័ត៌មានដែលរាយការណ៍ដំបូងដោយសារព័ត៌មានអាមេរិក Axios អំពីអនុស្សរណៈដែលមាន ១៤ ចំណុច និងមានតែមួយទំព័រ ដែលនឹងបញ្ចប់សង្គ្រាមជាផ្លូវការ។
ប្រភពដដែល បានបន្តថា អនុស្សរណៈនេះនឹងត្រូវបន្តដោយការពិភាក្សា ដើម្បីបើកដំណើរការដឹកជញ្ជូនតាមច្រកសមុទ្រ Hormuz ឡើងវិញ ការដកទណ្ឌកម្មរបស់សហរដ្ឋអាមេរិកលើអ៊ីរ៉ង់ និងការព្រមព្រៀងលើការរឹតត្បិតកម្មវិធីនុយក្លេអ៊ែររបស់អ៊ីរ៉ង់។
ប្រភពពីប៉ាគីស្ថាន បាននិយាយថា៖ «យើងនឹងបញ្ចប់រឿងនេះក្នុងពេលឆាប់ៗខាងមុខ។ យើងកំពុងខិតជិតដល់ហើយ»។
ប្រភពដែលទទួលបានព័ត៌មានអំពីការសម្របសម្រួល បាននិយាយថា ការចរចារបស់សហរដ្ឋអាមេរិកកំពុងត្រូវបានដឹកនាំដោយបេសកជនរបស់ លោក ត្រាំ គឺលោក Steve Witkoff និងកូនប្រសាលោកគឺលោក Jared Kushner។ ប្រសិនបើភាគីទាំងពីរយល់ព្រមលើកិច្ចព្រមព្រៀងបឋមនេះ វានឹងចាប់ផ្តើមរាប់ថយក្រោយរយៈពេល ៣០ ថ្ងៃនៃការចរចាលម្អិត ដើម្បីឈានទៅរកកិច្ចព្រមព្រៀងពេញលេញមួយ។
កិច្ចព្រមព្រៀងពេញលេញនោះ នឹងរួមបញ្ចូលនូវការដែលសហរដ្ឋអាមេរិកដកទណ្ឌកម្ម និងបញ្ចេញមូលនិធិអ៊ីរ៉ង់ដែលត្រូវបានបង្កក ការដែលអ៊ីរ៉ង់ និងសហរដ្ឋអាមេរិកដកការបិទខ្ទប់ច្រកសមុទ្រ Hormuz រៀងៗខ្លួន និងការរឹតត្បិតមួយចំនួនលើកម្មវិធីនុយក្លេអ៊ែររបស់អ៊ីរ៉ង់ ដោយមានគោលដៅផ្អាក ឬបញ្ឈប់ជាបណ្តោះអាសន្ននូវការចម្រាញ់សារធាតុអ៊ុយរ៉ាញ៉ូមរបស់អ៊ីរ៉ង់។
ខណៈដែលប្រភពបាននិយាយថា អនុស្សរណៈនេះនឹងមិនទាមទារការសម្បទានពីភាគីណាមួយនៅជំហានដំបូងឡើយ ពួកគេមិនបានលើកឡើងពីការទាមទារសំខាន់ៗមួយចំនួន ដែលទីក្រុងវ៉ាស៊ីនតោនធ្លាប់បានធ្វើកាលពីអតីតកាល ហើយដែលអ៊ីរ៉ង់បានបដិសេធនោះទេ ដូចជាការរឹតត្បិតលើកម្មវិធីមីស៊ីលរបស់អ៊ីរ៉ង់ និងការបញ្ចប់ការគាំទ្រដល់ក្រុមជីវពលក្នុងតំបន់មជ្ឈិមបូព៌ាជាដើម។
ប្រភពទាំងនោះ បាននិយាយពីលទ្ធភាពនៃការរឹតត្បិតលើការចម្រាញ់អ៊ុយរ៉ាញ៉ូមរបស់អ៊ីរ៉ង់នាពេលអនាគត ប៉ុន្តែមិនបានបញ្ជាក់ពីស្តុកអ៊ុយរ៉ាញ៉ូមដែលមានស្រាប់ជាង ៤០០ គីឡូក្រាម (៩០០ ផោន) ដែលត្រូវបានចម្រាញ់ជិតដល់កម្រិតអាចផលិតអាវុធបាននោះទេ ដែលកន្លងមកទីក្រុងវ៉ាស៊ីនតោនធ្លាប់បានទាមទារឱ្យអ៊ីរ៉ង់បោះបង់ចោល មុនពេលបញ្ចប់សង្គ្រាម៕
