ប្រធានគណបក្សដើម្បីកម្ពុជា លោក ឯម សុខសុវណ្ណ ចាត់ទុកលទ្ធផលអង្កេតរបស់អង្គភាពប្រឆាំងអំពើពុករលួយថា មិនបានយកចិត្តទុកដាក់ស៊ើបអង្កេតឱ្យច្បាស់លាស់ ផ្អែកតាមអង្គហេតុ និងអង្គច្បាប់ ដើម្បីស្វែងរកការពិតកម្ចាត់អំពើពុករលួយដែលធ្វើឱ្យបាត់ថវិកាជាតិនៅខេត្តព្រៃវែងនោះទេ។
លោក ឯម សុខសុវណ្ណ ប្រាប់វីអូឌីនៅថ្ងៃទី០៧ ខែឧសភាថា អង្គភាពប្រឆាំងអំពើពុករលួយគួរតែស៊ើបអង្កេតឱ្យច្បាស់លាស់ក្នុងសំណុំរឿងនេះ មិនគួរសំអាងតែលើកំណត់ហេតុមន្ត្រីពន្ធដារ ដើម្បីចោទប្រកាន់លើរូបលោកខុសពីការពិត ក្នុងនាមជាដើមបណ្ដឹងនោះទេ។
លោកថា លទ្ធផលស៊ើបអង្កេតរបស់ ACU គ្មានមូលដ្ឋានច្បាប់ជាអំណះអំណាងនោះឡើយ ដោយគ្រាន់តែសរសេរលើក្រដាសប៉ុណ្ណោះ។
លោកថា៖ «វាអត់មានសំអាងហេតុ សំអាងច្បាប់ និងភស្តុតាង ធ្វើអ្វីក៏ដោយតែងតែមានសំអាងហេតុ និងសំអាងច្បាប់នឹងភស្តុតាង ហើយការសម្រេចមួយដ៏ត្រឹមត្រូវ មិនមែនចេះតែធ្វើអីទំនើង តាមអំពើចិត្តនោះទេ។ ស្ថាប័នអនុវត្តច្បាប់ ត្រូវយកច្បាប់ជាគោល វាមិនសាកសមជាមួយស្ថាប័នអនុវត្តច្បាប់»។
កាលពីថ្ងៃទី១២ ខែកុម្ភៈ ឆ្នាំ២០២៦ លោក ឯម សុខសុវណ្ណ បានប្តឹងស្វែងរកកិច្ចអន្តរាគមន៍ករណីនេះ ទៅប្រធានក្រុមប្រឹក្សាជាតិប្រឆាំងអំពើពុករលួយ លោកស្រី ម៉ែន សំអន ដើម្បីឱ្យស្ថាប័ននេះ ពិនិត្យពីភាពមិនប្រក្រតីរបស់អង្គភាពប្រឆាំងអំពើពុករលួយ។
វីអូឌី មិនទាន់អាចទាក់ទងសុំការបំភ្លឺរឿងនេះ ពីប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បាននៅឡើយទេគិតត្រឹមម៉ោងផ្សាយនេះ។
ថ្មីៗនេះ អង្គភាពប្រឆាំងអំពើពុករលួយ បានចេញសេចក្ដីប្រកាសព័ត៌មានមួយ ករណីលោក ឯម សុខសុវណ្ណ ប្តឹងមន្ត្រីរាជការ ១០ រូប នៅខេត្តព្រៃវែង ដោយបង្ហាញលទ្ធផលទម្លាក់កំហុសលើ លោក ឯម សុខសុវណ្ណ ដែលជាដើមបណ្ដឹងទៅវិញថា មិនបង់ពន្ធរថយន្តរបស់ខ្លួនសម្រាប់ឆ្នាំ២០២៣ និងព្យាយាមគេចវេះម្ដងជាពីរដង រហូតទាល់តែត្រូវបង់ពន្ធឆ្នាំ២០២៤ ក៏លោកព្យាយាមគេចវេះពុំព្រមបង់ពន្ធតាមច្បាប់កំណត់។ ACU បន្ថែមថា ពួកគេបានស៊ើបអង្កេតករណីនេះ ផ្អែកតាមការបញ្ជូនពីសាលាដំបូងខេត្តព្រៃវែង ហើយរកឃើញការពិត ចំពោះការគេចវេះរបស់លោក ឯម សុខសុវណ្ណ។
កាលពីថ្ងៃទី២៩ ខែវិច្ឆិកា ឆ្នាំ២០២៤ ប្រធានគណបក្សដើម្បីកម្ពុជា លោក ឯម សុខសុវណ្ណ បានដាក់ពាក្យប្តឹងប្រធានសាខាពន្ធដារខេត្តព្រៃវែង លោក សេក វណ្ណា និងមន្ត្រីពាក់ព័ន្ធ ៩ រូបទៀត ពីបទ កេងយកផលប្រយោជន៍ខុសច្បាប់ និងឆបោក ក្លែងបន្លំ រំលោភលើទំនុកចិត្ត និងការជ្រៀតជ្រែកដោយខុសច្បាប់ បំពេញមុខងារសាធារណៈ ខណៈដែលលោក មានភស្តុតាង និងឯកសារ ច្បាស់លាស់។
លោក ឯម សុខសុវណ្ណ ប្រាប់វីអូឌីថា លោកបានបង់ពន្ធផ្លូវរថយន្តសម្រាប់ឆ្នាំ២០២៣ រួចរាល់ហើយគឺចំនួន ៨០ ម៉ឺនរៀល (៨០០.០០០) ក៏ប៉ុន្តែលោកមិនដឹងថាមានមូលហេតុអ្វីនោះទេ បានជាការបង់ពន្ធរបស់លោកមិនមានក្នុងទិន្នន័យអគ្គនាយកដ្ឋានពន្ធដារ?
លោកបន្តថា នៅពេលលោកទៅបង់ពន្ធផ្លូវរថយន្តសម្រាប់ឆ្នាំ២០២៤ មន្ត្រីពន្ធដារតម្រូវឱ្យលោកបង់ពីរឆ្នាំជាប់គ្នា គឺឆ្នាំ២០២៣ និងឆ្នាំ២០២៤ ក្នុងទឹក ១ លាន៦ សែនរៀល (១៦០០.០០០) ឬប្រមាណ ៤០០ ដុល្លារ។
លោកបន្ថែមថា ដើម្បីរកយុត្តិធម៌ ស្វែងការពិត និងបង្ហាញពីតម្លាភាពសង្គម លោកក៏សម្រេចប្តឹងករណីនេះទៅកាន់តុលាការ ដោយទាមទារឱ្យតុលាការ និងរដ្ឋាភិបាលអនុវត្តច្បាប់លើមន្ត្រីទាំងនោះ។
ក៏ប៉ុន្តែមកទល់ពេលនេះ សំណុំរឿងនេះ ត្រូវតំណាងអយ្យការអមសាលាដំបូងខេត្តព្រៃវែង លោក គុជ គឹមឡុង តម្កល់សំណុំរឿងមិនចាត់ការកាលពីចុងខែតុលា ឆ្នាំ២០២៥ ដោយលើកហេតុផលថា កុំឱ្យយឺតយ៉ាវ និងកកស្ទះ ក្នុងសំណុំរឿងព្រហ្មទណ្ឌ ខណៈដែលតំណាងអយ្យការរកឃើញតម្រុយនៃបទល្មើស ក្នុងសំណុំរឿងរបស់លោក។
ជុំវិញរឿងនេះ នាយកទទួលបន្ទុកកិច្ចការទូទៅអង្គការលីកាដូ លោក អំ សំអាត ជំរុញឱ្យស្ថាប័នពាក់ព័ន្ធស្រាវជ្រាវ និងស៊ើបអង្កេតករណីនេះ ប្រកបដោយតម្លាភាព និងយុត្តិធម៌ ព្រោះរឿងនេះ ពាក់ព័ន្ធថវិកាជាតិ។
លោកថា៖ «ជាសមត្ថកិច្ចរបស់តុលាការ ឬអង្គភាពពាក់ព័ន្ធត្រូវធ្វើម៉េច ធ្វើការស្រាវជ្រាវ ដោយតម្លាភាព និងយុត្តិធម៌ ព្រោះនេះវាពាក់ព័ន្ធថវិកាជាតិ ដើម្បីកែលម្អ ធ្វើម៉េចកុំឱ្យបាត់បង់ថវិកាជាតិ ឬអាចមានការកិបកេងលើថវិកាជាតិ ត្រូវធ្វើម៉េចដោយតម្លាភាព»។
ចំណែក ប្រធានអង្គការប្រជាធិបតេយ្យខ្មែរ ដែលមានមូលដ្ឋាននៅប្រទេសអូស្រាលី លោក ស៊ឹង សែនករុណា សង្កេតឃើញថា ស្ថាប័នប្រឆាំងអំពើពុករលួយបង្កើតឡើងគ្រាន់តែបង្គ្រប់កិច្ច និងធ្វើការងារបម្រើគណបក្សកាន់អំណាចតែប៉ុណ្ណោះ មិនអាចដោះស្រាយបញ្ហាអំពើពុករលួយក្នុងស្ថាប័នរដ្ឋ ធ្វើឱ្យពលរដ្ឋមានជំនឿចិត្តនោះទេ។
លោកថា ការអភិវឌ្ឍជាតិនឹងពិបាករីកចម្រើនដោយសារអំពើពុករលួយ ស្របពេលដែលស្ថាប័ននេះក៏គ្មានសមត្ថភាពជម្រះអំពើពុករលួយឱ្យទូលំទូលាយដែរ។
លោក ស៊ឹង សែនករុណា ថ្លែងថា៖ «បានជាអភិវឌ្ឍន៍ជាតិមិនអាចទៅមុខរលូនជាប្រព័ន្ធទេ ដោយសារទទួលផលប្រយោជន៍ស៊ីរូងផ្ទៃក្នុងហ្នឹងប្រទេសជាតិហ្នឹងឯង ធ្វើឱ្យការអភិវឌ្ឍជាតិ មិនលូតលាស់ មិនជឿនលឿន តាមបណ្ដាប្រទេសដែលគេដឹកនាំត្រឹមត្រូវ មានការគោរពច្បាប់ច្បាស់លាស់»។
លោក ឯម សុខសុវណ្ណ រំលឹកថា ក្រោយពីលោកប្តឹងមន្ត្រីទាំងនោះទៅតុលាការអមសាលាដំបូងខេត្តព្រៃវែង មន្ត្រីពន្ធដារមួយក្រុម បានធ្វើដំណើរទៅដល់ផ្ទះឪពុកម្ដាយរបស់លោកនៅឯស្រុកកំណើត ក្នុងស្រុករមាសហែក ខេត្តស្វាយរៀង ដើម្បីបង់ពន្ធជំនួសលោក។
លោកថា មន្ត្រីទាំងនោះបានបង់ពន្ធរថយន្តជំនួសរូបលោកដោយផ្ទាល់ ក្នុងឆ្នាំ២០២៣ និង២០២៤ នូវទឹកប្រាក់ ១លាន៦០ម៉ឺនរៀល (១៦០ ០០០រៀល) ក៏ប៉ុន្តែលោកបដិសេធមិនទទួលប្រាក់ទាំងនោះទេ។
ប្រធានគណបក្សនយោបាយរូបនេះ បន្ថែមថា លោកនឹងប្តឹងប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ទៅស្ថាប័នកំពូលថ្នាក់ជាតិ រួមមាន រដ្ឋសភា និងព្រឹទ្ធសភា ដើម្បីឱ្យស្ថាប័នទាំងនេះដោះស្រាយសំណុំរឿងនេះដោយយុត្តិធម៌ ហើយត្រូវធានាថា លុយពន្ធដារដែលប្រមូលពីរាស្ត្រ គឺជាស្បៀងសន្តិសុខជាតិ នឹងគ្រប់គ្រងឱ្យបានត្រឹមត្រូវ។
សន្ទស្សន៍នៃការយល់ឃើញពីអំពើពុករលួយឆ្នាំ២០២៥ ដែលចេញដោយអង្គការតម្លាភាពអន្តរជាតិ (Transparency International) កាលពីថ្ងៃទី១០ ខែកុម្ភៈ ឆ្នាំ២០២៦ បង្ហាញថា កម្ពុជាក្រោមការគ្រប់គ្រងរបស់លោក ហ៊ុន ម៉ាណែត បានធ្លាក់មកដល់ចំណុចទាបបំផុតមិនធ្លាប់មាន ក្នុងរយៈពេលមួយទសវត្សរ៍ចុងក្រោយ ដោយទទួលបានពិន្ទុត្រឹមតែ ២០ លើ ១០០ ប៉ុណ្ណោះ។
ទិន្នន័យនេះ ឆ្លុះបញ្ចាំងថា អំពើពុករលួយនៅកម្ពុជាមិនមែនជាករណីដាច់ដោយឡែកនោះទេ ប៉ុន្តែវាបានក្លាយជាមហារីកដែលចាក់ឫសយ៉ាងជ្រៅក្នុងប្រព័ន្ធរដ្ឋបាលសាធារណៈ៕
