សេចក្តីរាយការណ៍នានា បានឱ្យដឹងថា សកម្មជនសង្គមមួយរូបទៀត គឺកញ្ញា ខែម ស្រីមុំ ត្រូវបានសមត្ថកិច្ចឆ្មក់ចូលចាប់ខ្លួនដល់បន្ទប់ជួលមួយកន្លែង នៅក្នុងរាជធានីភ្នំពេញ នៅយប់មិញនេះ ខណៈគាត់សកម្មចែករំលែកបញ្ហាសង្គម រួមទាំងការឈ្លានពានរបស់ថៃមកលើកម្ពុជា។
អ្នកនាំពាក្យសមាគមការពារសិទ្ធិមនុស្សអាដហុក លោក យិន ម៉េងលី ឱ្យវីអូឌីដឹងនៅថ្ងៃសៅរ៍នេះថា លោក ទទួលបានព័ត៌មានពីការចាប់ខ្លួន កញ្ញា ខែម ស្រីមុំ ប៉ុន្តែមិនទាន់ដឹងថា ការចាប់ខ្លួននោះមកពីមូលហេតុអ្វីពិតប្រាកដទេ ដោយគ្រាន់តែដឹងថា ពេលនេះ ស្ត្រីរូបនោះ ត្រូវបានបញ្ជូនទៅសួរនាំនៅស្នងការនគរបាលរាជធានីភ្នំពេញ។
លោកថា៖ «ហ្នឹងហើយខ្ញុំទទួលបានព័ត៌មានថាគាត់ត្រូវបានឃាត់ខ្លួន នៅស្នងការរាជធានីភ្នំពេញតាំងពីម្សិលមិញ ប៉ុន្តែខ្ញុំមិនទាន់ដឹងថា ការឃាត់ខ្លួនគាត់ហ្នឹងមិនដឹងពីមូលហេតុអ្វីទេ អាហ្នឹងខ្ញុំគ្រាន់តែទទួលព័ត៌មានថា ពិតជាមានការឃាត់ខ្លួនអញ្ចឹងមែន»។
វីអូឌី មិនអាចទាក់ទង អគ្គស្នងការរង និងជាស្នងការនគរបាលរាជធានីភ្នំពេញ លោក ជួន ណារិន្ទ ដើម្បីសុំការបញ្ជាក់ពីមូលហេតុនៃការឃាត់ខ្លួន កញ្ញា ខែម ស្រីមុំ នេះបានទេភ្លាមៗនេះ។
ប៉ុន្តែ ប្រភពដែលស្និទ្ធ សុំមិនឱ្យបញ្ចេញឈ្មោះ ឱ្យដឹងថា កញ្ញា ខែម ស្រីមុំ ត្រូវបានសមត្ថកិច្ចឆ្មក់ចូលចាប់ខ្លួន កាលពីយប់ថ្ងៃទី១៥ ខែឧសភា នៅបន្ទប់ជួលមួយកន្លែង ក្នុងរាជធានីភ្នំពេញ ដែលនាងបានជួលស្នាក់ ហើយថាការចាប់ខ្លួននេះ ក្រោយនាងចែករំលែកបញ្ហាសង្គមលើហ្វេសប៊ុករបស់នាង ដែលហ្វេសប៊ុកនោះ មានភ្ជាប់រូបលោកបណ្ឌិត កែម ឡី ហើយមានឈ្មោះថា កែម ស្រីមុំ ឬ ខែម ស្រីមុំ។
ប្រភពនោះ ឱ្យដឹងទៀតថា គាត់បានជួបសន្ទនាជាមួយ កញ្ញា ខែម ស្រីមុំ រយៈពេលខ្លី នៅព្រឹកថ្ងៃទី១៦ខែឧសភានេះ តាមទូរសព្ទ ដែលស្រីមុំ តេមក ។ គាត់ថា ស្រីមុំ បាននិយាយទាំងអួលដើមកថា នាងត្រូវគេចាប់ខ្លួនពិតមែន ហើយពេលនេះកំពុងនៅស្នងការនគរបាលរាជធានីភ្នំពេញ ដែលសមត្ថកិច្ចគំរាមថា នឹងបញ្ជូននាងទៅតុលាការ ដើម្បីចាត់វិធានឃុំខ្លួនបណ្តោះអាសន្នក្នុងពន្ធនាគារ តែស្រីមុំ ចង់បានមេធាវីការពារ។
ម៉្យាងវិញទៀត ប្រភពដដែលឱ្យដឹងទៀតថា កញ្ញា ខែម ស្រីមុំ ក្រៅពីសកម្មក្នុងកិច្ចការងារសង្គម នាងក៏ជាសមាជិកអ្នកសារព័ត៌មាននៅក្នុងស្រុកផងដែរ។
បើតាមហ្វេសប៊ុក ឈ្មោះកែម ស្រីមុំ ឬខែម ស្រីមុំ បានចែករំលែកព័ត៌មានជាច្រើនពាក់ព័ន្ធនឹងព័ត៌មានអន្តរជាតិ បញ្ហាអយុត្តិធម៌សង្គម ករណីចាប់ខ្លួនសកម្មជនចលនាមាតាធម្មជាតិ សកម្មភាពចូលរួមកិច្ចការសង្គម និងព័ត៌មានពាក់ព័ន្ធនឹងការឈ្លានពានរបស់ថៃមកលើបូរណភាពទឹកដីកម្ពុជាជាដើម៕
