មន្ទីរបរិស្ថានខេត្តពោធិ៍សាត់ នៅថ្ងៃទី១៩ ខែឧសភានេះ បានផ្សព្វផ្សាយករណីបាត់បង់ជីវិតរបស់សត្វប្រើសញីមួយក្បាល ដែលបានវង្វេងចូលចម្ការដំឡូងមី និងត្រូវបានពលរដ្ឋបង្អៅឆ្កែដេញខាំរហូតដល់ស្លាប់។
ករណីនេះ កើតឡើងនៅរសៀលថ្ងៃទី១៨ ខែឧសភា ក្នុងភូមិប៊ុនរ៉ានីសែនជ័យដំណាក់ទ្រយឹង ឃុំពពិល ស្រុកភ្នំក្រវាញ ដោយសត្វប្រើសញីមានផ្ទៃពោះ១ក្បាល ទម្ងន់ ១១០គីឡូក្រាម បានវង្វេងចូលមកក្នុងភូមិឋានរបស់ប្រជាពលរដ្ឋ ហើយត្រូវបានពលរដ្ឋមួយចំនួនព្រួតគ្នាវាយ និងបង្អៅឆ្កែដេញ បណ្តាលឱ្យសត្វប្រើសផ្អើលរត់បុករបងលួសមុតសាច់ និងត្រូវបានឆ្កែខាំរហូតដល់ស្លាប់។
មន្ទីរបរិស្ថានខេត្ត បានចាត់ទុកសកម្មភាពនេះ ថាមិនត្រឹមតែអមនុស្សធម៌ និងបំផ្លិចបំផ្លាញសម្បត្តិធនធានធម្មជាតិ និងសត្វព្រៃប៉ុណ្ណោះទេ ប៉ុន្តែវាជាអំពើខុសច្បាប់ក្នុងក្រមបរិស្ថានយ៉ាងធ្ងន់ធ្ងរ ខណៈពពួកសត្វប្រើសនេះ ស្ថិតក្នុងប្រភេទងាយរងគ្រោះ ដែលត្រូវបានចុះបញ្ជីក្រហម IUCN Red List។
មន្ត្រីឧទ្យានុរក្សនៃដែនជម្រកសត្វព្រៃភ្នំឱរ៉ាល់ និងអាជ្ញាធរមូលដ្ឋាន បាននិមន្តព្រះសង្ឃសូត្រមន្ត និងបញ្ចុះសពប្រើសញីនេះ នៅវត្តប៊ុនរ៉ានីសែនជ័យដំណាក់ទ្រយឹង។
បច្ចុប្បន្ន អាជ្ញាធរកំពុងធ្វើការស្រាវជ្រាវ ដើម្បីចាត់វិធានការតាមផ្លូវច្បាប់ជាធរមាន។ ជាមួយគ្នានេះ អាជ្ញាធរបានណែនាំថា ក្នុងករណីប្រទះឃើញមានសត្វព្រៃវង្វេងចូលក្នុងភូមិឋាន ពលរដ្ឋត្រូវចូលរួមការពារ ថែរក្សា និងរាយការណ៍ជាបន្ទាន់មកមន្ត្រីបរិស្ថាន ឬអាជ្ញាធរមូលដ្ឋានដែលនៅជិតបំផុត ដើម្បីសង្គ្រោះពួកវាឱ្យបានទាន់ពេលវេលា ជៀសវាងការបង្ករបួសស្នាម ឬសម្លាប់សត្វព្រៃដោយអចេតនា និងចេតនា។
ជុំវិញរឿងនេះ ប្រធានព្រៃសង្ឃរុក្ខាវ័ន ព្រះតេជព្រះគុណ ថូ ធូរស់ ដែលធ្វើការយ៉ាងសកម្មទៅលើការការពារសត្វព្រៃ មានសង្ឃដីកា ប្រាប់វីអូឌីថា កត្តានាំឱ្យសត្វព្រៃចូលភូមិឋានពលរដ្ឋ អាចបណ្ដាលមកពីផ្អើលនឹងមនុស្ស ឬឆ្កែប្រមាញ់ ការស្វែងរកចំណី ឬវង្វេងហ្វូងជាដើម។ ព្រះតេជព្រះគុណ កត់សម្គាល់ឃើញថា ប្រជាពលរដ្ឋខ្មែរមួយចំនួននៅតែមានទម្លាប់ដាក់អន្ទាក់ បរបាញ់ និងយាយីសត្វព្រៃនៅពេលវាវង្វេងចូលភូមិ ដែលជាមូលហេតុធ្វើឱ្យសត្វព្រៃកាន់តែថយចុះគួរឱ្យព្រួយបារម្ភ ។
ព្រះតេជព្រះគុណ ថូ ធូរស់ មានសង្ឃដីកាថា៖ «តាមទំនៀមទម្លាប់សត្វដែលរត់ចូលភូមិ គេមិនឱ្យប៉ះពាល់ទេ មិនឱ្យសម្លាប់ ហើយមិនឱ្យទទួលទានសាច់ហ្នឹងទៀត នេះបើតាមទំនៀមទម្លាប់ជំនឿពីបុរាណមក។ ហើយជាពិសេសសូមសំណូមពរដល់អាជ្ញាធរមូលដ្ឋានភូមិឃុំ សូមមេត្តាជួយផ្សព្វផ្សាយពីចំណេះដឹង ឬក៏បញ្ជ្រាបចំណេះដឹងដល់ពលរដ្ឋនៅក្នុងមូលដ្ឋានហ្នឹងឱ្យបានយល់ពីសារប្រយោជន៍ធនធានសត្វព្រៃរបស់យើងកុំឱ្យគាត់បៀតបៀនដោយប្រការណាមួយ ឱ្យគាត់ជួយអភិរក្ស ឬសង្គ្រោះដល់សត្វដែលចល័តច្រក ឬបាត់ទីជម្រកហ្នឹងពរ»។
ច្បាប់ស្ដីពីព្រៃឈើ និងច្បាប់ស្ដីពីតំបន់ការពារ បានចែងយ៉ាងច្បាស់ពីការហាមឃាត់ដាច់ខាតរាល់សកម្មភាព បរបាញ់ យាយី បំផ្លិចបំផ្លាញ ការដាក់អន្ទាក់ និងការប្រមាញ់ក្នុងរដូវកាលហាមឃាត់ ឬក្នុងតំបន់ការពារ ជាពិសេសទៅប្រភេទសត្វដែលជិតផុតពូជ។ ជនល្មើសអាចរងការពិន័យអន្តរការណ៍ ឬបញ្ជូនសំណុំរឿងទៅតុលាការ ដែលប្រឈមនឹងការកាត់ទោសដាក់ពន្ធនាគារ និងពិន័យជាប្រាក់។
ទោះយ៉ាងណា សកម្មភាពយាយីលើសត្វព្រៃនៅតែមាន តាមរយៈការដាក់អន្ទាក់ បរបាញ់ ការបំផ្លិចបំផ្លាញជម្រកសត្វទាំងនោះ ដោយកាប់ទន្ទ្រានព្រៃឈើជាដើម។ ចំណែកការលក់ដូរសត្វព្រៃ នៅតែមានដាក់តាំងហូរហែតាមបណ្ដោយផ្លូវជាតិ និងតំបន់រមណីយដ្ឋានព្រៃភ្នំមួយចំនួន៕
