ក្រសួងសុខាភិបាលលីបង់ បានប្រកាសថា ការវាយប្រហារតាមអាកាសរបស់អ៊ីស្រាអែលលើភាគខាងត្បូងលីបង់កាលពីថ្ងៃទី១៩ខែឧសភា បានសម្លាប់មនុស្សយ៉ាងហោចណាស់ ១៩នាក់ ក្នុងនោះមានស្ត្រី ៤នាក់ និងកុមារ ៣នាក់ ដែលនេះជាការវាយប្រហារចុងក្រោយបង្អស់ក្នុងចំណោមការវាយប្រហារស្ទើរតែរាល់ថ្ងៃពីភាគីទាំងសងខាង ហើយវាមិនបានបញ្ឈប់ឡើយ បើទោះបីជាមានបទឈប់បាញ់ដ៏ផុយស្រួយមួយ ក្រោមការសម្របសម្រួលពីសហរដ្ឋអាមេរិកក៏ដោយ។
កងទ័ពអ៊ីស្រាអែលមិនបានធ្វើអត្ថាធិប្បាយភ្លាមៗជុំវិញការបាត់បង់ជីវិត ឬព្រឹត្តិការណ៍ជាក់លាក់ណាមួយនោះទេ ប៉ុន្តែបាននិយាយថា ចន្លោះពីរសៀលថ្ងៃទី១៨ខែឧសភា ដល់រសៀលថ្ងៃទី១៩ខែឧសភា ខ្លួនបានកំណត់គោលដៅលើទីតាំងហេដ្ឋារចនាសម្ព័ន្ធរបស់ក្រុមហេសបូឡា (Hezbollah) ជាង ២៥កន្លែងនៅភាគខាងត្បូងលីបង់។
ការប្រយុទ្ធគ្នាលើកចុងក្រោយរវាងអ៊ីស្រាអែល និងហេសបូឡា បានចាប់ផ្តើមកាលពីថ្ងៃទី២ ខែមីនា ដោយក្រុមសកម្មប្រយុទ្ធលីបង់មួយនេះ បានបាញ់គ្រាប់រ៉ុក្កែតចូលទៅក្នុងប្រទេសអ៊ីស្រាអែល រយៈពេលពីរថ្ងៃបន្ទាប់ពីសហរដ្ឋអាមេរិក និងអ៊ីស្រាអែលបានវាយប្រហារលើប្រទេសអ៊ីរ៉ង់។
នៅទីក្រុងបេរូត (Beirut) រដ្ឋាភិបាលបាននិយាយថា ការវាយប្រហារតែមួយលើកលើភូមិ Deir Qanoun al Nahr ក្នុងខេត្តតំបន់ឆ្នេរ Tyre បានសម្លាប់មនុស្ស ១០នាក់ ក្នុងនោះមានកុមារ ៣នាក់ និងស្ត្រី ៣នាក់។ មនុស្ស ៣នាក់ បានរងរបួស ក្នុងនោះមានកុមារម្នាក់ផងដែរ។
ក្រសួងមិនបានផ្តល់ព័ត៌មានលម្អិតបន្ថែមអំពីការវាយប្រហារនេះទេ ប៉ុន្តែទីភ្នាក់ងារសារព័ត៌មានជាតិដែលគ្រប់គ្រងដោយរដ្ឋបាននិយាយថា វាបានបំផ្លាញផ្ទះមួយខ្នង និងបណ្តាលឱ្យមនុស្សជាច្រើននាក់ជាប់នៅក្រោមគំនរបាក់បែក។ សាកសពរបស់ពួកគេត្រូវបានទាញចេញមកក្រៅនៅពេលថ្ងៃត្រង់។
យោងតាមក្រសួង ការវាយប្រហារតាមអាកាសមួយទៀត គឺនៅលើទីក្រុងភាគខាងត្បូង Nabatieh បានសម្លាប់មនុស្ស ៤នាក់ និងរបួស ១០នាក់ផ្សេងទៀត រួមទាំងស្ត្រី ២នាក់។ ការវាយប្រហារលើកទីបីនៅក្នុងភូមិ Kfar Sir ដែលនៅជិតនោះ បានសម្លាប់មនុស្ស ៥នាក់ ក្នុងនោះមានស្ត្រីម្នាក់។
ការស្លាប់ចុងក្រោយនេះបានកើតឡើងមួយថ្ងៃ បន្ទាប់ពីចំនួនអ្នកស្លាប់ក្នុងការប្រយុទ្ធគ្នាជុំចុងក្រោយរវាងអ៊ីស្រាអែល និងហេសបូឡា បានកើនឡើងហួសពី ៣,០០០នាក់ ហើយពីរថ្ងៃបន្ទាប់ពីកិច្ចព្រមព្រៀងឈប់បាញ់គ្នាដែលសម្របសម្រួលដោយសហរដ្ឋអាមេរិក ដែលបានអនុវត្តចាប់តាំងពីថ្ងៃទី១៧ ខែមេសា ត្រូវបានពន្យារពេលចំនួន ៤៥ថ្ងៃបន្ថែមទៀត។
ចាប់តាំងពីពេលនោះមក អ៊ីស្រាអែលបានលើកទ័ពឈ្លានពានភាគខាងត្បូងលីបង់ និងបានទម្លាក់គ្រាប់បែកលើរដ្ឋធានីបេរូត ក៏ដូចជាតំបន់ផ្សេងៗទៀត ដោយនិយាយថាខ្លួនកំពុងកំណត់គោលដៅលើហេដ្ឋារចនាសម្ព័ន្ធរបស់ក្រុមហេសបូឡា។ ក្រុមហេសបូឡា ដែលជាក្រុមសកម្មប្រយុទ្ធ និងជាអង្គការនយោបាយដ៏មានឥទ្ធិពលមួយនៅក្នុងប្រទេសលីបង់ បានប្រឆាំងនឹងសម្ពាធក្នុងការទម្លាក់អាវុធ រួមទាំងសម្ពាធពីរដ្ឋាភិបាលលីបង់ផងដែរ។
មនុស្សជាងមួយលាននាក់នៅក្នុងប្រទេសលីបង់ត្រូវបានជម្លៀសខ្លួនដោយសារតែការប្រយុទ្ធគ្នា ដោយអ្នកខ្លះបានជ្រកកោននៅក្នុងតង់តាមដងផ្លូវ និងតាមបណ្តោយសមុទ្រមេឌីទែរ៉ាណេក្នុងទីក្រុងបេរូត។
ទន្ទឹមនឹងនេះ អ៊ីស្រាអែលបានជួបការលំបាកក្នុងការទប់ស្កាត់ការវាយប្រហារដោយដ្រូនញឹកញាប់របស់ក្រុមហេសបូឡា ដែលសំដៅលើកងទ័ពរបស់ខ្លួននៅលើទឹកដីលីបង់ និងទីប្រជុំជនព្រំដែនភាគខាងជើងអ៊ីស្រាអែល។
កងទ័ពអ៊ីស្រាអែល បាននិយាយថា ទាហានម្នាក់របស់ខ្លួនត្រូវបានសម្លាប់កាលពីថ្ងៃ១៩ឧសភា នៅក្នុងសមរភូមិនៅភាគខាងត្បូងលីបង់ ដែលធ្វើឱ្យចំនួនទាហានអ៊ីស្រាអែលស្លាប់កើនឡើងដល់ ២១នាក់ ចាប់តាំងពីជម្លោះចុងក្រោយនេះបានចាប់ផ្តើម៕
