សវនាការលើកទីបី របស់អតីតឧកញ៉ា ហ៊ី គឹមហុង ម្ចាស់ក្រុមហ៊ុនពិភពដីមាស បានប្រព្រឹត្តទៅនៅថ្ងៃទី២០ ខែឧសភា នេះ ដោយឈានទៅដល់ដំណាក់មួយទៀត មុនពេលប្រកាសសាលក្រម។
មេធាវីតំណាងដោយអាណត្តិ និងទាមទារសំណងឱ្យជនរងគ្រោះ គឺអ្នកស្រី តាំង ស៊ីនហុង បានប្រាប់ក្រុមអ្នកសារព័ត៌មានក្រោយសវនាការថា តុលាការបានទុករយៈពេល៣០ថ្ងៃ ដើម្បីឱ្យគ្រួសារនីមួយៗប្រមូលភស្តុតាងជាទិន្នន័យសាច់ប្រាក់ដែលចាញ់បោក ដើម្បីបង្កើតជារចនាសម្ព័ន្ធទាមទារសំណង។ អ្នកស្រីបន្តថា ការធ្វើបែបនេះ គឺដើម្បីភាពច្បាស់លាស់ និងងាយស្រួលផ្ដល់សំណងរដ្ឋប្បវេណី ដ្បិតកន្លងទៅពលរដ្ឋដាក់ចំនួនទឹកលុយសរុបដែលធ្វើឱ្យពិបាកបែងចែក។
អ្នកស្រី តាំង ស៊ីនហុង និយាយថា៖ «ភស្តុតាងមានអស់ហើយ មានគ្រប់គ្រាន់ទាំងអស់ហើយ តែគ្រាន់ថា កន្លែងបែងចែកបំណុលសំណងរដ្ឋប្បវេណី ព្រោះអីគាត់(តុលាការ)ចង់ឲ្យមានថាឥឡូវ (ជនរងគ្រោះ) ‘ក’ បានប៉ុន្មាន? ជំងឺចិត្តប៉ុន្មាន? បើមិនចឹងទេ ពេលសាលក្រមចេញមក វាយគ្នាងាប់ ដោះស្រាយអត់ចេញទេអាលុយហ្នឹង វានៅមូលមួយដុំ អ៊ីចឹងយើងចង់ដាក់ថា នេះ ‘ក’ ប៉ុន្មាន? ជំងឺចិត្តប៉ុន្មាន? ខាតបង់ប៉ុន្មាន? ‘ខ’ ប៉ុន្មាន? ‘ខ’ ប៉ុន្មាន? អីចឹងទៅណា វារាយមកអញ្ចឹង»។
បើតាមមេធាវី ពលរដ្ឋបានប្ដឹងទារសំណងចំនួនជាង ២៦លានដុល្លារ និងសំណងជំងឺចិត្ត១០លានដុល្លារ។ អ្នកស្រីបន្ថែមថា អំឡុងពេល៣០ថ្ងៃនេះ ក៏តម្រូវឱ្យជនរងគ្រោះជាង ២០០គ្រួសារផ្សេងទៀត ប្រមូលភស្តុតាងបញ្ជាក់បន្ថែមដើម្បីចូលរួមទាមទារសំណង ព្រោះមេធាវីភាគីចុងចោទ ទទួលស្គាល់តែចំនួន ៧៦១គ្រួសារ ខណៈជនរងគ្រោះពិតប្រាកដ គឺមានទៅ ១១១៥គ្រួសារ។
អ្នកស្រី តាំង ស៊ីនហុង និយាយថា៖ «ភស្តុតាងខាងភាគីគេ(លោក ហ៊ី គឹមហុង) ដាក់ថាតែ ៧០០ ជាង (គ្រួសារ) យើង ១,១១៥ (គ្រួសារ) ហើយគេថា ឯកសារគេប្រឹងរកអស់ ប៉ុន្តែតាមពិតគាត់ធ្វើបាបប្រជាពលរដ្ឋទេ។ អញ្ចឹងយើងត្រូវដាក់អាហ្នឹងមួយ មួយទៀត ដូចខ្ញុំនិយាយអញ្ចឹង រចនាសម្ព័ន្ធលើៗ ប្រជាពលរដ្ឋ ក ខ គ ឃ ប៉ុន្មានៗ អញ្ចឹងណា ត្រូវតែមានឲ្យច្បាស់ នៅពេលដែលយើងរឹបអូសទ្រព្យសម្បត្តិលក់ឡៃឡុងអីបានលុយ យើងនឹង តុលាការនឹងបែងចែកថា ណា សងទៅ ‘ក’ នេះប៉ុន្មាន? សងទៅនេះប៉ុន្មាន? នេះប៉ុន្មាន? នេះប៉ុន្មាន? នេះប៉ុន្មាន? ឲ្យវាច្បាស់»។
រវាង៣០ថ្ងៃនេះ អ្នកស្រីអះអាងថា នឹងបញ្ជូនរចនាសម្ព័ន្ធទៅតុលាការ និងសុំពន្លឿនករណីនេះ ឈានទៅរកការប្រកាសសាលក្រមតែម្ដង។ អ្នកស្រីជឿជាក់ថា នឹងស្វែងរកទាំងយុត្តិធម៌ និងសំណងឱ្យប្រជាពលរដ្ឋ។
ទិដ្ឋភាពនៅមុខតុលាការព្រឹកនេះ ត្រូវបានបិទដោយពលរដ្ឋជាង ២០០នាក់ ឡើងមកពីបណ្ដាខេត្តនានា ដើម្បីតវ៉ារកយុត្តិធម៌ និងទាមទារឱ្យចាប់ខ្លួន លោក ហ៊ី គឹមហុង ឃុំក្នុងពន្ធនាគារវិញ។ ប៉ុន្តែមេធាវី តាំង ស៊ីនហុង បានពន្យល់ថា ការឃុំខ្លួនឡើងវិញត្រូវមាននីតិវិធីច្បាប់ ខណៈការធ្វើបែបនេះ មិនបានផ្ដល់ផលចំណេញអ្វីឡើយ ដោយ លោក ហ៊ី គឹមហុង ត្រូវនៅក្រៅឃុំដើម្បីរកលុយសងពលរដ្ឋ។
អតីតឧកញ៉ា ហ៊ី គីមហុង ត្រូវបានសមត្ថកិច្ចចាប់ខ្លួន កាលពីខែសីហា ឆ្នាំ២០២៣ ពាក់ព័ន្ធនឹងបទចោទឆបោកមានស្ថានទម្ងន់ទោស ក្រោយពលរដ្ឋប្ដឹងទាក់ទិននឹងគម្រោងវិយោគដីធ្លី។ ប៉ុន្តែកាលពីដើមខែវិច្ឆិកា ឆ្នាំ២០២៣ លោក ហ៊ី គឹមហុង ត្រូវបានសាលាឧទ្ធរណ៍ភ្នំពេញ ដោះលែងឱ្យនៅក្រៅឃុំបណ្ដោះអាសន្ន បន្ទាប់ពីជាប់ពន្ធនាគារប្រមាណ ៣ខែ។
ជាងបីឆ្នាំមកនេះ ពលរដ្ឋដែលចាញ់បោកអតីតឧកញ៉ា ហ៊ី គឹមហុង បានលក់ដីធ្លី ផ្ទះសម្បែង យកលុយសងធនាគារដែលខ្ចីមកបណ្ដាក់ទុនវិនិយោគ។ ជនរងគ្រោះខ្លះធ្លាក់ខ្លួនឈឺ ក្នុងនោះមាន ៣៨នាក់ បានបាត់បង់ជីវិតដោយឈឺចិត្ត និងអត្តឃាត ប្ដីប្រពន្ធបែកបាក់គ្នា ខណៈកុមារមិនបានរៀនសូត្រ ដោយសារឪពុកម្ដាយធ្លាក់ខ្លួន។
ជាក់ស្ដែងជនរងគ្រោះមកពីខេត្តកំពត អ្នកស្រី ម៉ក់ ផល្លា ត្រូវរ៉ាប់រងចិញ្ចឹមចៅពីរនាក់ និងធ្លាក់ខ្លួនដោយសារបំណុលជាង ២ម៉ឺនដុល្លារ ដែលកូននិងកូនប្រសារខ្ចីបណ្ដាក់ទុនក្នុងក្រុមហ៊ុនពិភពដីមាស។ អ្នកស្រីបន្តថា គ្រួសារបែកបាក់ និងសម្ពាធជីវភាពធ្វើឱ្យអ្នកស្រីស្ទើរបញ្ចប់ជីវិតម្ដងៗទៅហើយ ដោយមានតែសំណងប៉ុណ្ណោះ គឺជាក្ដីសង្ឃឹមតែមួយគត់សម្រាប់អ្នកស្រី។
អ្នកស្រី ម៉ក់ ផល្លា និយាយថា៖ «ពលរដ្ឋរងគ្រោះម្នាក់ទៀតមកពីខេត្តស្វាយរៀង អ្នកស្រី ម៉ៅ រ៉ានី ចាញ់បោកលុយ ៥ម៉ឺនដុល្លារ ដោយក្នុងនោះ៣ម៉ឺនដុល្លារជាលុយខ្ចីធនាគារ។ ទោះបីលក់ដីផ្ទះសងផ្ដាច់បំណុល តែគ្រួសារអ្នកស្រីធ្លាក់ខ្លួនគ្មានផ្ទះសម្បែងនៅឡើយ។
ចំណែក អ្នកស្រី ម៉ៅ រ៉ានី និយាយថា៖ «សូម្បីតែលុយដើមក៏ដកលែងបានទាំងអស់ សព្វថ្ងៃខ្ញុំលក់ដីសងគេ សូម្បីផ្ទះក៏លែងមានឱ្យកូននៅដែរ។ លក់ដីនៅឆ្នាំ២០២៥»។
ទាក់ទិនរឿងនេះ នាយកទទួលបន្ទុកកិច្ចការទូទៅអង្គការលីកាដូ លោក អំ សំអាត ចង់ឃើញសំណុំរឿងនេះបិទបញ្ចប់ដោយឆាប់រហ័ស ដោយផ្ដល់យុត្តិធម៌ និងសំណងឱ្យពលរដ្ឋដោះស្រាយជីវភាព។ លោកបន្តថា ការបញ្ចប់ករណីនេះនឹងក្លាយជាគម្រូភាពមួយបង្ហាញថាយុត្តិធម៌នៅតែមានសម្រាប់ជនរងគ្រោះពីករណីឆបោក។
លោក អំ សំអាត និយាយថា៖ «ករណីនេះជាករណីធំមួយ ហើយក៏ជាករណីគម្រូមួយដែរ បើប្រជាពលរដ្ឋទទួលបានយុត្តិធម៌ពេញលេញ នឹងបង្ហាញអំពីប្រព័ន្ធយុត្តិធម៌យើងហ្នឹងជាជំនឿទុកចិត្តសម្រាប់ប្រជាពលរដ្ឋរងគ្រោះ ដោយសារការចាញ់បោកទៅលើក្រុមហ៊ុន»។
កាលពីខែកក្កដា ឆ្នាំ២០២៥ លោក ហ៊ី គឹមហុង បានចំណាយប្រាក់ប្រមាណ ១ម៉ឺនដុល្លារ ទិញគ្រឿងឧបភោគ ឧបត្ថម្ភកងទ័ព ប៉ុន្តែត្រូវបានជនរងគ្រោះពីការចាញ់បោក ចាត់ទុកទង្វើនេះថា ដើម្បីបិទបាំងរឿងអាស្រូវឆបោករបស់ខ្លួន ខណៈជនរងគ្រោះរាប់ពាន់គ្រួសារ កំពុងជួបវិបត្តិជីវភាពធ្ងន់ធ្ងរ៕
