ប្រជាពលរដ្ឋរាប់សិបគ្រួសារនៅភូមិចំនួន៨ ក្នុងសង្កាត់បល្ល័ង្គ ក្រុងរុនតាឯក ខេត្តសៀមរាបស្នើអាជ្ញាធររកដំណោះស្រាយបញ្ហាដីសហគមន៍រួម ដែលត្រូវបានអាជ្ញាធរមូលដ្ឋានគប់គិតធ្វើប្លង់ឱ្យបុគ្គលឯកជនកាន់កាប់ ហើយបុគ្គលទាំងនោះបានបិទផ្លូវធ្វើដំណើរឆ្លងកាត់ និងហាមប្រជាពលរដ្ឋលែងឱ្យចូលអាស្រ័យផលនៅលើដីនោះដូចមុន។
ប្រជាពលរដ្ឋរស់នៅភូមិព្រំកុដ្ឋ សង្កាត់បល្ល័ង្គ លោក អុល សំអន អាយុ ៥៥ឆ្នាំ បានអះអាងប្រាប់វីអូឌីនៅថ្ងៃទី២១ ខែឧសភា ឆ្នាំ២០២៦នេះថា កាលដើមឡើយប្រជាពលរដ្ឋរស់នៅភូមិចំនួន ៨ ក្នុងឃុំបល្ល័ង្គ ប៉ុន្តែឥលូវនេះបានដូរមកជាសង្កាត់បល្ល័ង្គ បានបរិច្ចាគផ្តល់ដី និងទិញដីពីពលរដ្ឋក្នុងភូមិសរុបជាង ៣ហិកតា ដើម្បីរៀបចំជាសហគមន៍ ក្រោមការគ្រប់គ្រងរបស់ព្រះសង្ឃព្រះនាម ម៉ែន សាម៉េត ដោយមានការអភិវឌ្ឍបង្កើតជាសាលារៀនមាន ៥បន្ទប់ មានរបង និងដីសម្រាប់ប្រជាសហគមណ៍ដាំដុះបន្លែបង្ការតាមក្រុម។
លោកបន្តថា លុះក្រោយមក មានការដូរប្រធានសហគមន៍ជាបន្តបន្ទាប់ ហើយស្របពេលការដាំបន្លែជាក្រុមរបស់ប្រជាសហគមន៍ មិនមានទីផ្សារ ក៏បានទុកដីនោះចោល ហើយនៅអំឡុងចុងឆ្នាំ២០២២ ក៏ស្រាប់តែព្រះតេជគុណ ម៉ែន សាម៉េត និងបុគ្គលឯកជនចំនួន ២គ្រួសារ មកកាន់កាប់ និងបានគប់គិតជាមួយអាជ្ញាធរភូមិ និងអតីតមេឃុំចាស់ ធ្វើប្លង់កម្មសិទ្ធិ ព្រមទាំងបានដាក់លួសធ្វើរបងបិទផ្លូវ មិនឱ្យពលរដ្ឋធ្វើដំណើរឆ្លងកាត់ និងចូលទៅអាស្រ័យផលឡើយ។
ការណ៍នេះ លោកស្នើដល់អាជ្ញាធរដោះស្រាយប្រគល់ដីនោះ មកឱ្យប្រជាសហគមន៍កាន់កាប់និងអាស្រ័យផលដូចដើមវិញ។
លោក អុល សំអន បានលើកឡើងថា៖ «សម្រាប់អ្នកតវ៉ា[ប្រជាពលរដ្ឋដែលតវ៉ា]ហ្នឹង គាត់ចង់ឱ្យបើកផ្លូវនេះឡើងវិញ ហើយសុំឱ្យម្ចាស់អាអ្នកដែលនៅ ដែលទៅឱ្យនៅហ្នឹង សុំឱ្យចេញៗ ទុកដីនោះសម្រាប់ធ្វើជាផលប្រយោជន៍សហគមន៍តទៅទៀត ព្រោះដីហ្នឹងប្រជាពលរដ្ឋសហគមន៍ទាំង ៨ភូមិហ្នឹង គាត់មកគាស់កកាយដី ដីដុះព្រៃ គាស់កកាយដាំឥវ៉ាន់[ដំណាំ]ឡើងស្រឡះ ដល់សម្រាកប៉ុន្មានឆ្នាំនេះ ព្រៃវាដុះមកវិញ។ ប្រជាពលរដ្ឋចង់ទាមទារយកមកវិញទាំងអស់ ដើម្បីយកមកបម្រើផលប្រយោជន៍សហគមន៍»។
តំណាងសហគមន៍មួយរូបទៀតនៅសង្កាត់បល្ល័ង លោក មឿន មៀន អាយុ ៥៦ឆ្នាំ បានអះអាងថា ក្នុងចំណោមដីសហគមន៍ជាង ៣ហិកតានេះ លោកបានបរិច្ចាគដីចំនួនជាង ១ហិកតា សម្រាប់បម្រើផលប្រយោជន៍ផ្សេងៗក្នុងសហគមន៍ ប៉ុន្តែបែរជាព្រះសង្ឃព្រះនាម ម៉ែន សាម៉េត និងបុគ្គលឯកជនពីរបីនាក់ បែរជាថាដីនោះជារបស់ខ្លួន និងបានចាក់សោររបងបិទផ្លូវដែលប្រជាពលរដ្ឋក្នុងឃុំធ្លាប់ធ្វើដំណើរឆ្លងកាត់ និងមិនឱ្យសហគមន៍ចូលដាំដំណាំ ឬប្រើប្រាស់ជាប្រយោជន៍ទៅវិញ។
លោកថា៖ «ខ្ញុំបរិច្ចាកឱ្យទៅ ស្មានថាធ្វើដីសហគមន៍ៗ ដើម្បីផលប្រយោជន៍ឃុំយើងណា ដល់គាត់ធ្វើៗទៅ គាត់ដាច់អាណត្តិៗ យកដីនេះធ្វើបុគ្គល អ្នកនៅតាមភូមិនេះ គេអត់សុខចិត្តៗគេតវ៉ា[…] សុំអំពាវនាវឱ្យខាងអាជ្ញាធរជួយដោះស្រាយរឿងដីនេះ បើយកធ្វើបុគ្គល បិទផ្លូវអ្នកស្រុកដើរអស់រលីងចឹង មិនឱ្យផ្លូវអ្នកស្រុកដើរទេ អ្នកស្រុកប្រុងថារួមគ្នារួមដៃគ្នាវៃកម្ទេចសោរចោលយកផ្លូវដើរនេះឯង»។
វីអូឌី មិនអាចស្វែងរកសុំការឆ្លើយតបជុំវិញករណីនេះ ពីព្រះតេជគុណ ម៉ែន សាម៉េត ដែលរងការចោទថារំលោភយកដីសហគមន៍នោះ និងចៅសង្កាត់បល្ល័ង្គ អ្នកស្រី ឡែម ណាត បានទេ គិតមកដល់ម៉ោងផ្សាយនេះ។
អនុប្រធានផ្នែកសិទ្ធិមនុស្សនិងដីធ្លីនៃសមាគមអាហដុក លោក យិន ម៉េងលី មានប្រសាសន៍ថា បើដីនោះជាដីរបស់សហគមន៍ គឺត្រូវទុកសម្រាប់បម្រើផលប្រយោជន៍សាធារណៈ មិនអាចមានបុគ្គលណាមួយយកដីនោះធ្វើប្លង់ ឬឯកសារជាកម្មសិទ្ធិបានទេ ដែលការណ៍នេះ មន្ត្រីជំនាញផ្នែកសុរិយោដី និងអាជ្ញាធរគួរតែធ្វើការស្រាវជ្រាវ និងពិនិត្យឱ្យបានល្អិតល្អន់ ហើយដោះស្រាយដោយតម្លាភាព។
លោកបន្តថា៖ «ប្រជាពលរដ្ឋសហគមន៍ហ្នឹងដែលពាក់ព័ន្ធ គាត់អាចធ្វើពាក្យបណ្តឹងទៅអភិបាលស្រុក ឬក៏អភិបាលខេត្តដែលជាប្រធានគណៈកម្មការគ្រប់គ្រងប្រើប្រាស់ដីធ្លីរបស់រដ្ឋ ដើម្បីឱ្យមានវិធានការចំពោះបញ្ហាហ្នឹង ហើយត្រូវចាត់វិធានការថែមទៀតចំពោះបុគ្គលណា ដែលលបលួចទ្រព្យសម្បត្តិសាធារណៈនេះ ពីព្រោះនេះជាបទល្មើសដែលមានចែងនៅក្នុងច្បាប់ ត្រូវតែផ្តន្ទាទោស ដើម្បីជាគំរូ កុំឱ្យមានការគប់គិតគ្នាជាមួយនឹងថ្នាក់ក្រោម ដើម្បីលក់ទ្រព្យសម្បត្តិសាធារណៈនេះ»៕
