ព្រឹទ្ធសភាសហរដ្ឋអាមេរិក បានជំរុញសេចក្តីសម្រេចស្តីពីអំណាចធ្វើសង្គ្រាម កាលពីថ្ងៃទី១៩ខែឧសភា ដែលនឹងបញ្ចប់សង្គ្រាមអ៊ីរ៉ង់ លើកលែងតែប្រធានាធិបតី ដូណាល់ ត្រាំ ទទួលបានការអនុញ្ញាតពីសភា ដែលនេះជាការប្រកាសដ៏កម្រមួយប្រឆាំងនឹងមេដឹកនាំបក្សសាធារណរដ្ឋរូបនេះ ក្នុងរយៈពេល ៨០ ថ្ងៃ បន្ទាប់ពីកងកម្លាំងសហរដ្ឋអាមេរិក និងអ៊ីស្រាអែល បានចាប់ផ្តើមវាយប្រហារលើប្រទេសអ៊ីរ៉ង់។
លទ្ធផលឆ្នោតលើវិធានការនីតិវិធីដើម្បីជំរុញសេចក្តីសម្រេចនេះគឺ ៥០ ទល់នឹង ៤៧ សំឡេង ខណៈដែលសមាជិកបក្សសាធារណរដ្ឋរួមបក្សរបស់ លោក ត្រាំ ចំនួន ៤ រូប បានបោះឆ្នោតគាំទ្ររួមជាមួយសមាជិកបក្សប្រជាធិបតេយ្យស្ទើរតែទាំងអស់។ លទ្ធផលនេះ គឺជាជ័យជម្នះសម្រាប់សមាជិកសភាទាំងឡាយណា ដែលបានវែកញែកថា សភា មិនមែនប្រធានាធិបតីនោះទេ ដែលគួរតែមានអំណាចក្នុងការបញ្ជូនកងទ័ពទៅធ្វើសង្គ្រាម ដូចដែលមានចែងនៅក្នុងរដ្ឋធម្មនុញ្ញ។ ទោះជាយ៉ាងណា សេចក្តីសម្រេចនេះនៅតែប្រឈមនឹងឧបសគ្គធំៗ ដោយត្រូវឆ្លងកាត់រដ្ឋសភាដែលដឹកនាំដោយបក្សសាធារណរដ្ឋ និងត្រូវទទួលបានសំឡេងភាគច្រើនពីរភាគបីទាំងពីរថ្នាក់ ដើម្បីជៀសវាងការប្រើវ៉េតូបដិសេធរបស់លោក ត្រាំ។
សមាជិកព្រឹទ្ធសភាបក្សប្រជាធិបតេយ្យ លោក ធីម ខេន (Tim Kaine) ដែលជាអ្នករៀបចំសេចក្តីសម្រេចនេះ បាននិយាយថា បទឈប់បាញ់បានផ្តល់ឱកាសដ៏ល្អសម្រាប់លោក ត្រាំ ក្នុងការលើកឡើងពីហេតុផលរបស់លោកមកកាន់សភា ព្រោះប្រធានាធិបតីកំពុងទទួលបានសំណើសន្តិភាព និងការទូតពីទីក្រុងតេហេរ៉ង់ ប៉ុន្តែលោកកំពុងបោះវាចូលក្នុងធុងសំរាមដោយមិនបានចែករំលែកឡើយ។ មុននេះ សមាជិកបក្សសាធារណរដ្ឋបានរារាំងការប៉ុនប៉ងស្រដៀងគ្នានេះចំនួន ៧ លើករួចមកហើយនៅក្នុងព្រឹទ្ធសភានៅឆ្នាំនេះ។
នៅក្រោមច្បាប់ស្តីពីអំណាចធ្វើសង្គ្រាមឆ្នាំ១៩៧៣ របស់សហរដ្ឋអាមេរិក ប្រធានាធិបតីអាចធ្វើសកម្មភាពយោធាបានត្រឹមតែ ៦០ថ្ងៃប៉ុណ្ណោះ មុនពេលបញ្ចប់វា ឬត្រូវស្នើសុំការអនុញ្ញាតពីសភា។ លោក ត្រាំ បានប្រកាសកាលពីថ្ងៃទី ១ ខែឧសភា ថា បទឈប់បាញ់បានបញ្ចប់អរិភាពប្រឆាំងនឹងអ៊ីរ៉ង់ហើយ។ ទោះបីជាមានការអះអាងបែបនេះក៏ដោយ ក៏សហរដ្ឋអាមេរិកបាននិងកំពុងបិទខ្ទប់កំពង់ផែរបស់អ៊ីរ៉ង់ និងវាយប្រហារលើនាវារបស់អ៊ីរ៉ង់ ហើយអ៊ីរ៉ង់ក៏បាននិងកំពុងបិទខ្ទប់ច្រកសមុទ្រហរមូសយ៉ាងមានប្រសិទ្ធភាព និងវាយប្រហារលើនាវារបស់សហរដ្ឋអាមេរិកផងដែរ។
សមាជិកបក្សប្រជាធិបតេយ្យ និងសមាជិកបក្សសាធារណរដ្ឋមួយចំនួនតូច បានអំពាវនាវឱ្យលោក ត្រាំ មកសុំការអនុញ្ញាត ដោយបង្ហាញការព្រួយបារម្ភថា លោកអាចនឹងនាំប្រទេសចូលទៅក្នុងជម្លោះដ៏រ៉ាំរ៉ៃ ដោយគ្មានការកំណត់នូវយុទ្ធសាស្ត្រច្បាស់លាស់។ ផ្ទុយទៅវិញ វិមានប្រធានាធិបតី និងសមាជិកបក្សសាធារណរដ្ឋភាគច្រើនបានការពារថា សកម្មភាពរបស់លោក ត្រាំ គឺស្របច្បាប់ក្នុងនាមជាមេបញ្ជាការកំពូល ដើម្បីការពារសហរដ្ឋអាមេរិក ហើយបានចោទប្រកាន់បក្សប្រជាធិបតេយ្យថា បានដាក់សេចក្តីសម្រេចនេះឡើងដោយសារតែរឿងនយោបាយបក្សពួកនិយមតែប៉ុណ្ណោះ៕
