លោក ស៊ី ជិនភីង បានលើកឡើងថា ពិភពលោកកំពុងស្ថិតក្នុងហានិភ័យនៃការធ្លាក់ចុះទៅរក «ច្បាប់ព្រៃ» វិញ ហើយបានកោតសរសើរចំពោះទំនាក់ទំនងចិន-រុស្ស៊ី ថាជាកម្លាំងស្ថិរភាពសកល ខណៈដែលលោកបានធ្វើជាម្ចាស់ផ្ទះទទួលស្វាគមន៍ លោក វ្ល៉ាឌីមៀ ពូទីន នៅក្នុងទីក្រុងប៉េកាំង កាលពីថ្ងៃទី២០ខែឧសភា ពោលគឺត្រឹមតែប៉ុន្មានថ្ងៃប៉ុណ្ណោះ បន្ទាប់ពីបានទទួលស្វាគមន៍លោក ដូណាល់ ត្រាំ។
មេដឹកនាំចិនបានទទួលស្វាគមន៍ប្រធានាធិបតីរុស្ស៊ីយ៉ាងឱឡារិក នៅចំកណ្តាលទីក្រុងប៉េកាំង មុនពេលដែលមេដឹកនាំទាំងពីរបានឈានជើងចូលទៅក្នុងមហាសាលប្រជាជន។ ទិដ្ឋភាពនេះបានរំលឹកទៅដល់ជំនួបកម្រិតខ្ពស់របស់ លោក ត្រាំ ជាមួយលោក ស៊ី កាលពីសប្តាហ៍មុន ដែលនៅពេលនោះ មេដឹកនាំនៃប្រទេសដែលមានសេដ្ឋកិច្ចធំជាងគេទាំងពីរ បានពិភាក្សាលើបញ្ហាជំនួញ ការវិនិយោគ ជម្លោះអ៊ីរ៉ង់ និងបញ្ហាតៃវ៉ាន់។
កិច្ចពិភាក្សារវាងលោក ស៊ី និងលោក ពូទីន បានចាប់ផ្តើមជាមួយនឹង «ជំនួបជាទម្រង់ចង្អៀត» ដើម្បីពិភាក្សាលើបញ្ហារសើបនានា មុនពេលបន្តធ្វើ «ជំនួបជាទម្រង់ទូលំទូលាយ» ជាមួយប្រតិភូរបស់ពួកគេ។ បន្ទាប់មក មេដឹកនាំទាំងពីរបានអញ្ជើញចូលរួមក្នុងពិធីចុះហត្ថលេខាលើឯកសារជាច្រើន រួមទាំងការបន្តសុពលភាពនៃ «សន្ធិសញ្ញាសហប្រតិបត្តិការមិត្តភាព និងភាពជាអ្នកជិតខាងល្អចិន-រុស្ស៊ី» ផងដែរ។
នៅក្នុងការអត្ថាធិប្បាយ លោក ស៊ី បានមានប្រសាសន៍ថា ទំនាក់ទំនងរវាងទីក្រុងប៉េកាំង និងទីក្រុងម៉ូស្គូ ស្ថិតក្នុង «កម្រិតខ្ពស់បំផុតនៃភាពជាដៃគូយុទ្ធសាស្ត្រគ្រប់ជ្រុងជ្រោយ» ដោយលោកបានអំពាវនាវឱ្យរួមគ្នាប្រឆាំងនឹង «ការគំរាមកំហែងឯកតោភាគីទាំងអស់» និងបានសង្កត់ធ្ងន់ថា បទឈប់បាញ់គ្រប់ជ្រុងជ្រោយនៅមជ្ឈិមបូព៌ា គឺជារឿងបន្ទាន់បំផុត។ ចំណែកលោក ពូទីន ក៏បានកោតសរសើរចំពោះទំនាក់ទំនងនេះថា ស្ថិតក្នុង «កម្រិតខ្ពស់ដែលមិនធ្លាប់មាន» និងបានបញ្ជាក់ថា រុស្ស៊ីនៅតែជា «អ្នកផ្គត់ផ្គង់ថាមពលដ៏គួរឱ្យទុកចិត្ត»។
ពាណិជ្ជកម្ម និងការវិនិយោគ គឺជាប្រធានបទសំខាន់បំផុតសម្រាប់លោក ពូទីន ខណៈដែលសេដ្ឋកិច្ចរបស់លោកកំពុងរងទណ្ឌកម្មពីសង្គ្រាមនៅអ៊ុយក្រែន។ ប្រទេសចិន ដែលជាដៃគូពាណិជ្ជកម្មធំបំផុតរបស់រុស្ស៊ី បានទិញប្រេងជិតពាក់កណ្តាលនៃការនាំចេញរបស់ទីក្រុងម៉ូស្គូ។ ផ្ទុយស្រឡះពីភាពតានតឹងជាមួយទីក្រុងវ៉ាស៊ីនតោន លោក ពូទីន និងលោក ស៊ី បានបង្ហាញពីចំណងទាក់ទងដ៏កក់ក្តៅកាន់តែខ្លាំងឡើង ដោយបានហៅគ្នាទៅវិញទៅមកថាជា «មិត្តចាស់»។
ខណៈពេលដែលលោក ស៊ី កំពុងរៀបចំទទួលស្វាគមន៍លោក ពូទីន ក្រសួងពាណិជ្ជកម្មចិនបានបញ្ជាក់ថា ប្រទេសចិននឹងទិញយន្តហោះប៊ូអ៊ីង (Boeing) ចំនួន ២០០ គ្រឿង និងបន្តកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក។ ទន្ទឹមនឹងនេះ អ្នកនាំពាក្យវិមានក្រឹមឡាំង ក៏មិនបានបដិសេធចំពោះលទ្ធភាពនៃជំនួបរវាងលោក ពូទីន និងលោក ត្រាំ នៅក្នុងខែវិច្ឆិកា ក្នុងកំឡុងកិច្ចប្រជុំកំពូលអេប៉ិក (Apec) នោះឡើយ៕
