ប្រជាពលរដ្ឋប្រមាណ ៨៧៥គ្រួសារ នៅក្រុងប៉ោយប៉ែត ខេត្តបន្ទាយមានជ័យ កំពុងរង់ចាំដំណោះស្រាយពីក្រុមហ៊ុន ពៅ វណ្ណា នៅថ្ងៃចន្ទសប្ដាហ៍ក្រោយ ដោយរំពឹងថាជំនួបលើកទី១០នេះ ក្រុមហ៊ុននឹងផ្ដល់សំណង ឬប្លង់កម្មសិទ្ធិដល់ពួកគាត់។
ពលរដ្ឋរងគ្រោះ លោក ឈី ឆន ប្រាប់វីអូឌីនៅថ្ងៃទី២២ ខែឧសភាថា នៅថ្ងៃចន្ទសប្ដាហ៍ក្រោយ ក្រុមហ៊ុនត្រូវជួបជាមួយអតិថិជនម្ដងទៀត តាមការសន្យាកាលពីថ្ងៃទី១៨ ខែឧសភា។ លោករំពឹងថា ជំនួបលើកទី១០នេះ នឹងមានផ្លែផ្កាតាមរយៈការប្រគល់ប្លង់កម្មសិទ្ធិ ឬបង្វិលសងលុយត្រឡប់មកវិញ ដើម្បីឱ្យលោកដោះស្រាយជីវភាព។
លោក ឈី ឆន និយាយថា៖ «ជួយបានច្រើន! បើសិនបងបានដីហ្នឹងមក បងអាចថា លក់នូវអ្វីដែលបងអាចថាលក់បាន។ អាចថាមើលទៅតាមទីផ្សារដែរ បើថាវាខាតក៏វាខាតខ្លះអីខ្លះទៅ ធ្វើម៉េចឲ្យតែបានលុយហ្នឹងយកមកដោះស្រាយជីវភាព។ សព្វថ្ងៃហ្នឹងគឺពិបាកខ្លាំង នៅខាងប៉ោយប៉ែតហ្នឹងគឺពិបាកខ្លាំងមែនទែន គឺសេដ្ឋកិច្ចដូចងាប់បណ្តោយ»។
កាលពីថ្ងៃទី១៨ ខែឧសភា ប្រជាពលរដ្ឋប្រមាណ ២០០នាក់ តំណាងឱ្យអតិថិជនរងគ្រោះចំនួន ៨៧៥គ្រួសារ បានដង្ហែក្បួនពីវត្តកណ្ដាលឆ្ពោះទៅកាន់សាលាក្រុងប៉ោយប៉ែត ទាមទារដំណោះស្រាយពីក្រុមហ៊ុនដីឡូតិ៍ ពៅ វណ្ណា ដែលជាកម្មសិទ្ធិរបស់ប្រពន្ធមេឃុំអូរបីជាន់ លោក តុល សារិន។ ពួកគាត់អះអាងថា ការទាមទារនេះ ដោយសារក្រុមហ៊ុនគេចវេស និងកុហកអតិថិជនម្ដងហើយម្ដងទៀត ដែលជំរុញពួកគាត់ត្រូវតែសុំការអន្តរាគមន៍ពីអាជ្ញាធរ ដោយមាន លោក ប៉ាន់ខែម ប៊ុនថន ប្រធានក្រុមការងាររដ្ឋាភិបាលប្រចាំក្រុងប៉ោយប៉ែត ជាអ្នកទទួលដោះស្រាយ។
តាមរយៈជំនួបនៅព្រឹកនោះ ក្រុមហ៊ុនបានសុំពេលបីថ្ងៃ សម្រាប់ឆ្លើយតប ប៉ុន្តែលោក ប៉ាន់ខែម ប៊ុនថន ពន្យារពេលឱ្យមួយសប្ដាហ៍ ដោយជំនួបលើកក្រោយនឹងប្រព្រឹត្តទៅនៅថ្ងៃចន្ទ ទី២៥ ខែឧសភា។
អតិថិជនអះអាងថា គិតចាប់ពីពាក់កណ្ដាលឆ្នាំ២០២៥ មកទល់ពេលនេះ ពួកគាត់បានជួបជាមួយក្រុមហ៊ុន ៩ដង និងជួបនៅមុខលោក ប៉ាន់ខែម ប៊ុនថន ៣ដង រួចមកហើយ។
គ្រួសារលោក ឈី ឆន បានទិញដីពីក្រុមហ៊ុនពៅ វណ្ណា ចំនួន៣ប្លង់ ក្នុងមួយប្លង់តម្លៃ ១ម៉ឺន ៣ពាន់ដុល្លារ តាំងពីឆ្នាំ២០១៩ ដោយប្រើប្រាស់លុយបានពីកម្លាំងញើសឈាម រំពឹងទទួលបានផលប្រយោជន៍ពីដីនេះ។
ប្រពន្ធលោក ឈី ឆន គឺអ្នកស្រី សុខ ស្រីមុំ បង្ហាញភាពហត់នឿយនឹងការទាមទារដំណោះស្រាយ ដោយបញ្ជាក់ថាអ្នកស្រីគ្រាន់តែចង់បានតែដីដែលជាកម្លាំងញើសឈាម ឬក្រុមហ៊ុនអាចសងបង្វិលលុយត្រឡប់មកវិញ។ អ្នកស្រីឱ្យដឹងថា បច្ចុប្បន្នអ្នកស្រីកំពុងដាក់លក់ផ្ទះ ព្រោះគ្មានមុខរបរ ប្ដីក៏បាត់បង់ការងារ ដោយសារការបិទព្រំដែន និងការបង្ក្រាបឧក្រិដ្ឋកម្មអនឡាញ។
អ្នកស្រី សុខ ស្រីមុំ និយាយថា៖ «សង្ឃឹមជឿជាក់លើបងឯកឧត្តមដែរថាគាត់នឹងរកដំណោះស្រាយ ព្រោះគាត់ដោះស្រាយឲ្យគេបានច្រើននាក់ហើយ។ ហើយខ្ញុំក៏សំណូមពរគាត់នៅក្នុងអង្គប្រជុំដែរថា ឲ្យបងដោះស្រាយឲ្យខ្ញុំមក ឲ្យចប់សព្វគ្រប់នៅក្នុងខែប្រាំ ព្រោះខ្ញុំវាដល់ដំណាក់កាលមួយដែលថាខ្ញុំទប់លែងជាប់ ពីមុនមកគឺខ្ញុំអត់ដែលរករឿងឡាំប៉ាអីទេ ព្រោះអីសេដ្ឋកិច្ច យើងរកបានយើងចេះតែទប់ជាប់បណ្តើរៗអ៊ីចឹងណា។ លើកនេះគឺខ្ញុំទប់លែងជាប់ហ្មង ព្រោះថាវាអស់រកអីអត់បានរហូតដល់ថ្នាក់ខ្ញុំលក់ឡៃឡុងផ្ទះចោល បងគិតទៅ»។
ការសម្រេចចិត្តទិញដីពីក្រុមហ៊ុនពៅ វណ្ណា ក្នុងគម្រោងទី១០ និងទី១១នេះ ដោយសារពលរដ្ឋមើលឃើញពីសក្ដានុពល ព្រោះជាដីស្ថិតនៅជិតតំបន់សេដ្ឋកិច្ចពិសេស ដែលអាចមានតម្លៃខ្ពស់នៅពេលក្រោយ។
ពលរដ្ឋរងគ្រោះម្នាក់ទៀត គឺលោក ហៃ ថុន ឱ្យដឹងថាដីឡូតិ៍ ក្រុមហ៊ុនពៅ វណ្ណា មានបង្គោលភ្លើង និងហេដ្ឋារចនាសម្ព័ន្ធច្បាស់លាស់ ខណៈក្រុមហ៊ុនបានផ្ដល់ លិខិតផ្ទេរសិទ្ធិកាន់កាប់អចលនទ្រព្យដែលមិនទាន់ចុះបញ្ជី ឬហៅថាប្លង់ទន់ឱ្យអតិថិជន និងថែមទាំងបានចុះបញ្ជីបង់ពន្ធប្រថាប់ត្រានៅថ្នាក់ខេត្តទៀតផង ដែលធ្វើឱ្យលោកមិននឹកស្មានថាមានបញ្ហាបែបនេះឡើយ។
លោក ហៃ ថុន និយាយថា៖ «ហើយពេលដែលចុះធ្វើប្លង់រឹងនេះ គេអត់បាញ់ប្លង់ឲ្យ អត់បាញ់បំបែកក្បាលដីធ្វើប្លង់រឹងឲ្យ ដោយសារគេថាដីហ្នឹងវាពាក់ព័ន្ធ»។
ពលរដ្ឋចាប់ផ្ដើមសម្រុកទិញដីនេះនៅឆ្នាំ២០១៩ ដោយបង់រំលស់ជាមួយក្រុមហ៊ុន និងជាមួយធនាគារ រហូតដល់ដាច់ជាស្ថាពរ។ ប៉ុន្តែប្លង់កម្មសិទ្ធិ ឬប្លង់រឹង បែរជាត្រូវរាំងស្ទះ រហូតដល់ខែមិថុនា ឆ្នាំ២០២៥ ទើបពួកគាត់ដឹងថាមានឧកញ៉ាម្នាក់ចេញមុខអះអាងថាដីនោះស្ថិតក្នុងសិទ្ធិរក្សាការពាររបស់ខ្លួន។
វីអូឌី មិនអាចទាក់ទងសុំការអត្ថាធិប្បាយបន្ថែម ពីប្រធានក្រុមការងាររដ្ឋាភិបាលប្រចាំក្រុងប៉ោយប៉ែត លោក ប៉ាន់ខែម ប៊ុនថន បានទេនៅថ្ងៃសុក្រនេះ។
ទាក់ទិនរឿងនេះ អ្នកគ្រប់គ្រងប្រចាំការិយាល័យអង្គការលីកាដូ (LICADHO) នៅខេត្តបន្ទាយមានជ័យ លោក អ៊ិន គង់ជិត លើកឡើងថា ដីធ្លីទាំងនោះអាចជួយប្រជាពលរដ្ឋក្រុងប៉ោយប៉ែត ដោយយកទៅលក់ដូរ ឬដាក់បញ្ចាំយកលុយដោះស្រាយជីវភាពបាន ចាប់តាំងពីការបិទព្រំដែនបានញាំញីមុខរបរពួកគាត់។ លោកចង់ឃើញ ក្រុមហ៊ុនមានទំនួលខុសត្រូវ ផ្ដល់ដំណោះស្រាយឆាប់រហ័សដល់ពលរដ្ឋ។
លោក អ៊ិន គង់ជិត ថ្លែងថា៖ «ក្នុងនាមគាត់ដែលជាម្ចាស់ក្រុមហ៊ុនមួយ ត្រូវតែមានការទទួលខុសត្រូវខ្ពស់ ហើយរឿងនេះ ពួកគាត់អត់ទាន់គិតដល់រឿងព្រហ្មទណ្ឌផង។ អ៊ីចឹង ម្ចាស់ក្រុមហ៊ុនត្រូវតែមានការទទួលខុសត្រូវ ត្រូវតែដោះស្រាយតាមអ្វីដែលគាត់ (អតិថិជន) ទាមទារ»៕
