អ្នកឃ្លាំមើល អះអាងថា លោក ហ៊ុន សែន កំពុងបង្កើតឈុតឆាកថ្មីដើម្បីបោកប្រាស់ពលរដ្ឋថា រដ្ឋាភិបាលនៃក្រុមគ្រួសាររបស់លោកជាជនរងគ្រោះដោយក្រុមឧក្រិដ្ឋជនអនឡាញ។
ទន្ទឹមនឹងនេះ ពួកគេទាមទារឱ្យរដ្ឋាភិបាលដឹកនាំដោយ លោក ហ៊ុន ម៉ាណែត បង្ហាញតម្លាភាព និងត្រូវចាត់វិធានការមិនលើកលែងចំពោះបុគ្គលដែលត្រូវបានអាមេរិកដាក់ក្នុងបញ្ជីខ្មៅ មានលោក ហ៊ុន តូ ជាដើម។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់វីអូឌីនៅថ្ងៃទី២៥ ខែឧសភា ថា លោក ហ៊ុន សែន កំពុងយករឿងឧក្រិដ្ឋកម្មអនឡាញមកធ្វើឡប់ឡែ ដើម្បីកុហកពលរដ្ឋខ្មែរថា មេដឹកនាំកម្ពុជាមិនពាក់ព័ន្ធនឹងក្រុមឧក្រិដ្ឋជន ហើយអះអាងថា ខ្លួនស្អាតស្អំ ក្នុងពេលដែលនាយករដ្ឋមន្ត្រី លោក ហ៊ុន ម៉ាណែត កំពុងបង្ក្រាបបទឧក្រិដ្ឋកម្មអនឡាញ ដែលបានធ្វើឱ្យខូចមុខមាត់កម្ពុជានៅលើឆាកអន្តរជាតិ។ លោកថា នេះជាសារដែល លោក ហ៊ុន សែន ចង់ប្រាប់ទៅពលរដ្ឋ ដែលលោកតែងប្រើក្នុងន័យប្រជាភិថុតិពលរដ្ឋយ៉ាងមានប្រសិទ្ធភាពក្នុងពេលកន្លងទៅ។
លោក ម៉ែន ណាត ថ្លែងថា៖ «ប៉ុន្តែរឿងពិតនៅក្នុងការបង្ក្រាបបទឧក្រិដ្ឋកម្មអនឡាញនៅប្រទេសកម្ពុជានេះ មែនទែនទៅ គឺគ្រាន់ គឺរដ្ឋាភិបាលលោក ហ៊ុន ម៉ាណែត កូនប្រុសរបស់លោក ហ៊ុន សែន ហ្នឹង បង្ក្រាបតែជនរងគ្រោះ ហើយនិងពួកប្រព្រឹត្តបទឧក្រិដ្ឋតូចតាច។ តែមេឧក្រិដ្ឋជននៅប្រទេសកម្ពុជា ដែលមានកេរ្តិ៍ឈ្មោះអាស្រូវបំផុត នៅក្នុងបញ្ជីខ្មៅរបស់សហរដ្ឋអាមេរិក មិនទាន់ត្រូវបានបង្ក្រាបទេ ហើយថែមទាំងមន្ត្រីរដ្ឋាភិបាលនិយាយការពារភាពស្អាតស្អំរបស់ពួកគេ នៅក្នុងបញ្ជីខ្មៅរបស់សហរដ្ឋអាមេរិក ដូចជា មេឆបោកអនឡាញ លោក លី យ៉ុងផាត់ លោក កុក អាន លោក ហ៊ុន តូ ជាដើម»។
អ្នកឃ្លាំមើលរូបនេះ បន្តថា ពលរដ្ឋខ្មែរកំពុងរងគ្រោះទ្វេដង ដោយសារការដឹកនាំរបស់ក្រុមគ្រួសារ លោក ហ៊ុន សែន តាមរយៈការប៉ះពាល់សេដ្ឋកិច្ចគ្រួសារយ៉ាងធំសម្បើម ដោយសារលុយរបស់ខ្លួនត្រូវក្រុមហ៊ុន ហួយវ័ន របស់លោក ហ៊ុន តូ លួចយកផង ហើយកេរ្តិ៍ឈ្មោះប្រទេសត្រូវរងឈ្មោះអសោចលើពិភពលោកថែមទៀត។
លោកថា មិនមែនរដ្ឋាភិបាលគ្មានសមត្ថភាពដោះស្រាយទេ ប៉ុន្តែបើដោះស្រាយទៅ វាប៉ះពាល់លោក ហ៊ុន សែន អ្នកជាអ្នកនៅពីខាងក្រោយខ្នងនៃបទឧក្រិដ្ឋកម្មឆបោកអនឡាញ ព្រោះមេឧក្រិដ្ឋជនធំ ដូចជា លោក ចេន ហ្ស៊ី ប្រធានក្រុមហ៊ុន ព្រីនស៍ គ្រុប (Princes Group) ជាមន្ត្រីជំនិតរបស់ លោក ហ៊ុន សែន ដែលធ្លាប់ប៉ាវមន្ត្រីរដ្ឋាភិបាលស៊ីចាយ និងជិះយន្តហោះទៅប្រជុំនៅអាមេរិកជាដើម។
ដោយឡែក អ្នកតាមដានភូមិសាស្ត្រនយោបាយ លោក សេង វណ្ណលី យល់ថា ការបង្ក្រាបបទល្មើសអនឡាញរបស់រដ្ឋាភិបាលកន្លងមក ហាក់មានលក្ខណៈជ្រើសរើសធ្វើឡើងតែលើក្រុមតូចតាច នៅពេលដែលមានសម្ពាធពីអន្តរជាតិ ជាពិសេសពីសហរដ្ឋអាមេរិក។ អ្នកជំនាញរូបនេះ បន្តថា ដើម្បីឱ្យយុទ្ធនាការនេះមានប្រសិទ្ធភាពពិតប្រាកដ រដ្ឋាភិបាលត្រូវតែបង្ហាញសកម្មភាពជាក់ស្ដែង ក្នុងការអនុវត្តច្បាប់ឱ្យស្មើភាព តួយ៉ាងការអនុវត្តច្បាប់លើលោក ហ៊ុន តូ ជាដើម។
លោក សេង វណ្ណលី ថ្លែងថា៖ «ដើម្បីឱ្យយុទ្ធនាការនេះមានប្រសិទ្ធភាពពិតប្រាកដ ខ្ញុំគិតថា លោក ហ៊ុន ម៉ាណែត ជាពិសេសរួមទាំង លោក ហ៊ុន សែន ផងត្រូវតែបង្ហាញសកម្មភាពជាក់ស្ដែងក្នុងការអនុវត្តច្បាប់ស្មើភាពគ្នា ចំពោះបុគ្គលគ្រប់រូបដោយមិនគិតពីឋានៈ ឬក៏ឥទ្ធិពលនយោបាយ ជាពិសេសគឺមិនគិតអំពីសាច់ញាតិរបស់បុគ្គលមួយចំនួនឬក៏ក្មួយរបស់ខ្លួន»។
លោក សេង វណ្ណលី ក៏ជំរុញឱ្យរដ្ឋាភិបាលបង្កើតគណៈកម្មការស៊ើបអង្កេតចំរុះ ដែលមានការចូលរួមពីអ្នកជំនាញអន្តរជាតិដូចជាពីតំណាងអង្គការសហប្រជាជាតិ ឬប៉ូលិសអន្តរជាតិ ដើម្បីធានាថាដំណើរការស្រាវជ្រាវត្រូវបានធ្វើឡើង ដោយគ្មានការជ្រៀតជ្រែកពីអ្នកមានឥទ្ធិពលនយោបាយផ្ទៃក្នុង ជាពិសេសពីសំណាក់ឥស្សរជននយោបាយរបស់គណបក្សកាន់អំណាចកម្ពុជា។
ការលើកឡើងរបស់របស់អ្នកឃ្លាំមើលនៅពេលនេះ បន្ទាប់លោក ហ៊ុន សែន ថ្លែងក្នុងពេលជួបមន្ត្រីនៅរាជធានីភ្នំពេញ កាលពីថ្ងៃទី២៤ ខែឧសភា ដោយអះអាងថា កម្ពុជាជាជនរងគ្រោះពីបទល្មើសអនឡាញ ហើយលោកជំរុញឱ្យរដ្ឋាភិបាលកូនរបស់លោកចាត់វិធានការបង្ក្រាបឱ្យតឹងរ៉ឹង ដោយពុំមានការលើកលែងឡើយ។ ដូចជា ចាប់បញ្ជូនមន្ត្រីពាក់ព័ន្ធនឹងឧក្រិដ្ឋកម្មអនឡាញទៅតុលាការ ឬរឹបអូសទ្រព្យសម្បត្តិបានពីបទល្មើសនេះ ទៅប្រើក្នុងវិស័យកងទ័ពជាដើម។
យ៉ាងណា លោក ហ៊ុន សែន ហាក់ថ្លែងឌឺដងទៅប្រទេសថៃដែលបានប្រើលេសបង្ក្រាបបទល្មើសនេះ វាយប្រហារឈ្លានពានកម្ពុជា ហើយលោកចោទថា ប្រទេសថៃជាប្រទេសឈានមុខខាងឧក្រិដ្ឋកម្មអនឡាញ ហើយក្រុមឧក្រិដ្ឋជនអាចចូលមកកម្ពុជាដោយខុសច្បាប់ តាមរយៈប្រទេសថៃ និងធ្វើឱ្យកម្ពុជាជួបបញ្ហាដល់សព្វថ្ងៃ។ បន្ថែមពីនេះ លោក ហ៊ុន សែន បានបញ្ជាឱ្យសួរចម្លើយឧក្រិដ្ឋជនដែលរដ្ឋាភិបាលចាប់បាន ដើម្បីបង្ហាញដល់អន្តរជាតិថា កម្ពុជាជាជនរងគ្រោះក្នុងវិស័យឆបោកអនឡាញនេះ។
លោក ហ៊ុន សែន ថ្លែងថា៖«កម្ពុជាធ្លាប់ត្រូវគេប្រមាថថា ជាប្រទេសដែលមានសង្គ្រាមអត់ចេះ ឈប់ តែកម្ពុជាបានក្លាយទៅជាប្រទេសដែលមានសន្តិភាពពេញលក្ខណៈ ប្រទេសខ្លះនៅមានក្រុម ចង់បំបែកខ្លួននៅក្នុងតំបន់របស់យើង នៅនឹងលើពិភពលោកផង។ ប៉ុន្តែ កម្ពុជាអត់មានតំបន់ អភិគមន៍ និងជម្លោះប្រដាប់អាវុធគ្នាឯងទេ កម្ពុជានឹងធ្វើសារជាថ្មីម្ដងទៀតឲ្យពិភពលោកបានស្គាល់ថា កម្ពុជា បានបំផ្លាញអនឡាញហើយ ប្រទេសអ្នកឯងមានយ៉ាងណារឿងរបស់អ្នកឯងទៅចុះ»។
ទោះលោក ហ៊ុន សែន ថ្លែងថា លោកនិងរដ្ឋាភិបាលមិនពាក់ព័ន្ធនឹងក្រុមឧក្រិដ្ឋជនអនឡាញយ៉ាងណាក្ដី ប៉ុន្តែ រដ្ឋាភិបាលមិនបានចាត់វិធានការចំពោះមនុស្សជំនិតនឹងគណបក្សរបស់លោក គឺលោក លី យ៉ុងផាត់ លោក កុក អាន និងក្មួយបង្កើតលោក គឺលោក ហ៊ុន តូ ជាដើមនោះទេ ទោះសហរដ្ឋអាមេរិកបានដាក់ក្រុមមន្ត្រីទាំងនេះ ក្នុងបញ្ជីខ្មៅនិងបង្កកប្រាក់ដោយសារជាប់ពាក់ព័ន្ធនឹងការប្រព្រឹត្តិអំពើឆបោកតាមអនឡាញ និងលាងលុយក៏ដោយ។
ជាក់ស្ដែង កាលពីថ្ងៃទី២៣ ខែឧសភា រដ្ឋាភិបាលបានដកតំណែងមន្ត្រីជាន់ខ្ពស់ ពាក់ព័ន្ធនឹងបទល្មើសអនឡាញនៅខេត្តមណ្ឌលគិរី រួមមាន អភិបាលខេត្ត ស្នងការនគរបាល និងមេបញ្ជាការកងរាជអាវុធហត្ថខេត្តជាដើម។ ប៉ុន្តែ អភិបាលខេត្តមណ្ឌលគិរី ត្រូវបានតែងតាំងជារដ្ឋលេខាធិការក្រសួងមហាផ្ទៃ ក្រោយត្រូវដកដំណែង។
ការណ៍នេះ ត្រូវបានមន្ត្រីគណបក្សប្រឆាំងនៅក្រៅប្រទេស លោក អ៊ុំ សំអាន រិះគន់ថា ការបង្ក្រាបបទល្មើសឆបោកតាមអនឡាញរបស់លោក ហ៊ុន ម៉ាណែត គ្រាន់តែជាឆាកល្ខោនតែប៉ុណ្ណោះ។ លោកសរសេរលើហ្វេសប៊ុកនៅថ្ងៃទី២៥ ខែឧសភា ថា អតីតអភិបាលខេត្តមណ្ឌលគិរី លោក ថង សាវុន ជាកូនប្រុសរបស់សមមិត្ត ប៊ូ ថង ដែលធ្លាប់តស៊ូនិងជាមិត្តរួមអាវុធជាមួយលោក ហ៊ុន សែន ទើបលោក ហ៊ុន សែន អនុគ្រោះ ហើយលោក ថង សាវុន មិនត្រូវបានផ្ដន្ទាទោសដាក់ពន្ធនាគារ និងថែមទាំងដំឡើងបុណ្យសក្តិថែមទៀត។
ជុំវិញករណីនេះ នាយកនៃស្ថាប័នអ្នកតស៊ូមតិសិទ្ធិមនុស្ស និងសិទ្ធិការងារអាស៊ី (Asia Human Rights and Labour Advocates – AHRLA) លោក ហ្វីល រ៉ូប៊ឹតសុន (Phil Robertson) អះអាងប្រាប់វីអូឌីតាមសារអេឡិកត្រូនិកនៅថ្ងៃទី២៥ ខែឧសភា ថា រដ្ឋាភិបាលកម្ពុជាកំពុងព្យាយាមបង្កើតភាពជឿជាក់ថា ខ្លួនបោសសម្អាតឧក្រិដ្ឋកម្មអនឡាញ ប៉ុន្តែនៅមិនអាចបដិសេធបានទេថា មនុស្សមួយចំនួនមានឥទ្ធិពលខ្លាំងពេក រហូតរដ្ឋាភិបាលមិនអាចប៉ះពាល់បាន ពីព្រោះអ្នកជំនួញធំៗទាំងនោះ មានទំនាក់ទំនងជិតស្និទ្ធជាមួយរដ្ឋាភិបាល និងគណបក្សប្រជាជនកម្ពុជា។ លោកបន្តថា ស្ថានការណ៍នេះ គេត្រូវយល់ថា រដ្ឋាភិបាលកម្ពុជាគ្រាន់តែចង់ស្ដារមុខមាត់លើឆាកអន្តរជាតិ និងទាក់ទាញការវិនិយោគបរទេសបន្ថែមប៉ុណ្ណោះ ខណៈកម្ពុជាកំពុងមានបញ្ហាសេដ្ឋកិច្ច។
មន្ត្រីសិទ្ធិមនុស្សអន្តរជាតិរូបនេះថា រដ្ឋាភិបាលកម្ពុជាមានវិធីតែមួយគត់ ដែលអាចបង្កើតទំនុកចិត្តពីសហគមន៍អន្តរជាតិបាន គឺការចាប់ខ្លួន និងផ្ដន្ទាទោសអ្នកមានអំណាច និងពុករលួយខ្លាំងៗ ដែលនៅពីក្រោយប្រតិបត្តិការឆបោកអនឡាញ ដោយចាប់ផ្តើមពី លោក ហ៊ុន តូ តែម្ដង៕
