តំណាងប្រជាពលរដ្ឋរស់នៅតំបន់កោះមាស នៅព្រឹកថ្ងៃចន្ទនេះ បន្តដាក់ញត្តិនៅក្រសួងអធិការកិច្ច ស្នើសុំកិច្ចអន្តរាគមន៍ដោះស្រាយរឿងវិវាទដីធ្លីជាមួយក្រុមហ៊ុន ឃុន សៀ អ៊ឹមផត អិចផត ក្រោយដើរដាក់ញត្តិនៅព្រឹទ្ធសភា រដ្ឋសភា និងក្រសួងស្ថាប័នផ្សេងៗ នៅមិនទាន់មានលទ្ធផល។
លោក ឈឹម រី តំណាងពលរដ្ឋនៅតំបន់កោះមាស ក្នុងខណ្ឌច្បារអំពៅ រាជធានីភ្នំពេញ និងស្រុកកៀនស្វាយ ខេត្តកណ្តាល បានឱ្យដឹងថា ការដែលពួកគាត់នាំគ្នាដាក់ញត្តិនៅក្រសួងអធិការកិច្ច នៅព្រឹកថ្ងៃទី២៥ ខែឧសភានេះ ដោយសារតែខាងព្រឹទ្ធសភា បានបញ្ជូនករណីវិវាទដីធ្លីរបស់ពួកគាត់ មកក្រសួងអធិការកិច្ច។
លោកសង្ឃឹមថា ក្រសួងអធិការកិច្ច នឹងជួយដោះស្រាយបញ្ហាដីធ្លីរបស់ពលរដ្ឋនៅតំបន់កោះមាសនេះ ព្រោះពលរដ្ឋបានដើរដាក់ញត្តិស្វែងរកកិច្ចអន្តរាគមន៍ពីព្រឹទ្ធសភា រដ្ឋសភា ក្រសួងរៀបចំដែនដី និងអាជ្ញាធរពាក់ព័ន្ធអស់ហើយ តែនៅតែមិនមានដំណោះស្រាយ។ ការណ៍នេះ លោកបានព្រមានដែរថា នឹងបន្តទៅប្រមូលផ្តុំនៅមុខផ្ទះប្រធានព្រឹទ្ធសភា លោក ហ៊ុន សែន នាពេលខាងមុខ បើក្រសួងមួយនេះ នៅតែមិនអាចដោះស្រាយបាន។
លោកថា៖ «ហើយបើថា[ក្រសួង]អធិការកិច្ច ដោះស្រាយជូនប្រជាជនអាហ្នឹងខ្ញុំឈប់ត្រឹមហ្នឹង ហើយបើថាមិនចឹងទេ ខ្ញុំនឹងឡើងទៅដល់លោក សម្តេចម៉ង សម្តេច ហ៊ុន សែន វេចបាយទៅហើយ វេចបាយទៅផ្ទះសម្តេចតែម្តង[…] ទៅថ្នាក់ដឹកនាំកំពូលៗចង់អស់ហើយ មកដល់ក្រសួងអធិការកិច្ចហើយ ហើយសង្ឃឹមជឿជាក់លើក្រសួងអធិការកិច្ច សុំលោកជួយដោះស្រាយជូនប្រជាជនយើងខ្ញុំយើងផង ដូចខ្ញុំនេះគឺចំណាស់ប៉ុណ្ណឹងហើយ រកតែដីបង្កបង្កើនផលមិនបានផង គ្មានសិទ្ធិរស់នៅបាន គ្មានសិទ្ធិទទួលផល ដីដែលរដ្ឋអំណាចចែកឱ្យផង អស់លោកមានបុណ្យមានស័ក្តធ្វើប្លង់គ្របយកទៅ ឱ្យទៅអ្នកមាន អ្នកក្រនេះរាប់រយគ្រួសារនេះ លោកអត់គិតទេ ចឹងបានសង្ឃឹមលើក្រសួងអធិការកិច្ច សុំលោកជួយរកយុត្តិធម៌ជនបងប្អូនយើងខ្ញុំជាង១០០គ្រួសារនេះផង»។
យោងតាមញតិ្តរបស់ប្រជាពលរដ្ឋនៅតំបន់កោះមាសចំនួន ១៦៨គ្រួសារ ដែលដាក់ទៅក្រសួងអធិការកិច្ច បានលើកឡើងថា ប្រជាពលរដ្ឋបានរស់នៅលើដីនោះតាំងពីឆ្នាំ១៩៧៩មក ពោលគឺប្រមាណជា៤៧ឆ្នាំ ដោយអាជ្ញាធរបែងចែកជាក្រុម ដើម្បីឱ្យប្រជាពលរដ្ឋធ្វើដំណាំលើដីកោះ ដើម្បីចិញ្ចឹមជីវិត។
ញត្តិដដែលបន្តថា កាលពីឆ្នាំ២០២០ ក្រុមការងារសាលាខណ្ឌច្បារអំពៅ និងស្រុកកៀនស្វាយ បានចុះវាស់វែងដីដើម្បីកំណត់ទំហំដីអាស្រ័យផលនៅលើកោះមាសនេះ និងធ្វើបណ្ណកម្មសិទ្ធិ ប៉ុន្តែ ក្រោយមករដ្ឋាភិបាលតាមរយៈទីស្តីការគណៈរដ្ឋមន្ត្រី បានជួល កោះនេះ ឱ្យទៅក្រុមហ៊ុន ឃុន សៀ អ៊ឹមផត អិចផត ធ្វើការអភិវឌ្ឍទៅវិញ ដែលធ្វើឱ្យពលប្រជាសហគមន៍កោះមានចំនួន ១៦៨គ្រួសារ។
យោងតាមលិខិតមួយរបស់ទីស្តីការគណៈរដ្ឋមន្ត្រី ចុះថ្ងៃទី២៧ ខែកក្កដា ឆ្នាំ២០២៣ រដ្ឋាភិបាលបានអនុញ្ញាតឱ្យក្រុមហ៊ុន ឃុន សៀ ទិញផ្តាច់ទីតាំងដីកោះមាសទំហំជាង ៣៤០ហិកតា (៣៤០ហិកតា ៣៨អា ០៤សង់ទីអា) ស្ថិតនៅភូមិជ្រោយអំពិល១ សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ និងនៅភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្តាល ក្នុងតម្លៃជាង ១០លានដុល្លារ (១០ ២១១ ៤១២ដុល្លារ) ជាថ្នូរក្នុងការកសាងសមិទ្ធផលជូនរដ្ឋបាលរាជធានីភ្នំពេញ និងរដ្ឋបាលខេត្តកណ្តាល៕
