ក្រសួងសុខាភិបាលកម្ពុជា បានចេញសេចក្ដីប្រកាសឱ្យពលរដ្ឋបង្ការ និងប្រុងប្រយ័ត្នចំពោះវីរុសកូវីដ-១៩ បំប្លែងថ្មីឈ្មោះ NB.1.8.1 ដែលកំពុងរីករាលដាលនៅតាមបណ្ដាប្រទេសមួយចំនួនក្នុងតំបន់អាស៊ី។ ទោះបីមិនទាន់មានភស្តុតាងវិទ្យាសាស្ត្របញ្ជាក់ពីកម្រិតហានិភ័យ តែកម្ពុជាបានរកឃើញវិជ្ជមានមួយករណីកាលពីសប្ដាហ៍មុន។
តាមរយៈសេចក្ដីប្រកាសព័ត៌មាននៅថ្ងៃទី២៤ ខែឧសភា ក្រសួងសុខាភិបាលកម្ពុជា បានឱ្យដឹងថា ជំងឺកូវីដ-១៩ បំប្លែងថ្មីប្រភេទ NB.1.8.1 កំពុងរីករាលដាលឆ្លងនៅតាមបណ្ដាប្រទេសមួយចំនួននៅលើសកលលោក ជាពិសេសនៅក្នុងតំបន់ប៉ាស៊ីហ្វិកខាងលិច រួមមាន ប្រទេសចិន សិង្ហបុរី និងហុងកុង។
វីរុសបំប្លែងថ្មី NB.1.8.1 គឺជាពូជកូនចៅដែលវិវត្តចេញពីពូជអូមីក្រុង (Omicron) ខ្សែស្រឡាយ JN.1.។ កាលពីថ្ងៃទី២៣ ខែឧសភា ឆ្នាំ២០២៥ អង្គការសុខភាពពិភពលោក (WHO) បានចាត់ថ្នាក់វីរុសនេះជាវីរុសបំប្លែងខ្លួនដែលស្ថិតក្រោមការតាមដាន បន្ទាប់ពីសង្កេតឃើញការកើនឡើងយ៉ាងឆាប់រហ័សនៃទិន្នន័យវិភាគលម្អិតហ្សែន នៅលើសកលលោក ជាពិសេសនៅអាស៊ីអាគ្នេយ៍ និងប៉ាស៊ីហ្វិកខាងលិច។
បើតាមក្រសួង បច្ចុប្បន្ននេះមិនទាន់មានភស្តុតាងវិទ្យាសាស្ត្រណាមួយ បញ្ជាក់ថា វីរុស NB.1.8.1 បង្កឱ្យមានស្ថានភាពជំងឺធ្ងន់ធ្ងរ ការសម្រាកពេទ្យកើនឡើង ឬគ្រោះថ្នាក់ខ្ពស់ជាងពូជអូមីក្រុងដែលបានរាលដាលមុនៗនោះទេ។
ទោះយ៉ាងណា ក្រសួងបានអះអាងថា កន្លងមកកម្ពុជាធ្លាប់បានរកឃើញវីរុស NB.1.8.1 នេះ នៅចន្លោះខែឧសភា ដល់ខែធ្នូ ឆ្នាំ២០២៥។ ខណៈចាប់តាំងពីដើមឆ្នាំ២០២៦ ក្រសួងសុខាភិបាល បានរកឃើញវីរុសនេះវិជ្ជមានចំនួន ១ករណី កាលពីថ្ងៃទី១៨ ខែឧសភា កន្លងទៅថ្មីៗនេះ នៅក្នុងចំណោមអ្នកជំងឺដែលមកទទួលសេវាសុខាភិបាលនៅតាមមន្ទីរពេទ្យ។
ស្ថិតក្នុងស្ថានភាពនេះ ក្រសួងសុខាភិបាល ណែនាំពលរដ្ឋឱ្យប្រុងប្រយ័ត្ន ដើម្បីបង្ការនូវការឆ្លងជំងឺផ្លូវដង្ហើម និងជំងឺកូវីដ-១៩ គ្រប់ទម្រង់ ដោយអនុវត្តឱ្យបានខ្ជាប់ខ្ជួននូវវិធានការបង្ការការចម្លងជំងឺ ពាក់ម៉ាស លាងដៃឱ្យញឹកញាប់ជាមួយសាប៊ូ ឬអាល់កុល ឬដែលលាងដៃ និងត្រូវខ្ទប់មាត់ និងច្រមុះពេលក្អក កណ្តាស់។ ក្នុងករណីមានរោគសញ្ញាគ្រុនក្តៅ ក្អក ឈឺក្បាល ហៀរសំបោរ ឬពិបាកដកដង្ហើម ត្រូវពិគ្រោះយោបល់នៅមណ្ឌលសុខភាព ឬមន្ទីរពេទ្យ ឱ្យបានទាន់ពេលវេលា។
ជាមួយគ្នានេះ ក្រសួងសុខាភិបាលជំរុញប្រជាពលរដ្ឋឱ្យបន្តទៅទទួលវ៉ាក់សាំងកូវីដ-១៩ ឱ្យបានគ្រប់ដូស ទាំងដូសមូលដ្ឋាន និងដូសជំរុញ នៅតាមមន្ទីរពេទ្យ ឬមណ្ឌលសុខភាព ដើម្បីពង្រឹងប្រព័ន្ធភាពស៊ាំរាងកាយ។
វីរុសកូវីដ-១៩ បានក្លាយជាជំងឺរាតត្បាតសកល ក្រោយផ្ទុះឡើងលើកដំបូងកាលពីឆ្នាំ២០១៩ ចេញពីតំបន់វូហាន ប្រទេសចិន។ វីរុសនេះ បានបង្កឱ្យប៉ះពាល់ដល់ផ្លូវដង្ហើមធ្ងន់ធ្ងររហូតដល់បាត់បង់ជីវិត។ វីរុសកូវីដ-១៩ បានបំប្លែងខ្លួនទៅជាវីរុសផ្សេងៗផងដែរ ដោយឆ្លងកាន់តែលឿន និងស៊ាំខ្លួនទៅនឹងវ៉ាក់សាំង រួមមាន ប្រភេទអាល់ហ្វា បេតា កាម៉ា ដែលតា និងអូមីក្រុង ខណៈដែលវីរុសអូមីក្រុង បានបំប្លែងទៅជាប្រភេទ XBB, EG.5, JN.1 និងចុងក្រោយគឺ NB.1.8.1។
តាមអង្គការសុខភាពពិភពលោក បានប៉ាន់ស្មានថា ហោចណាស់មានមនុស្សជាង ៧លាននាក់ ឬច្រើនជាងនេះ បានស្លាប់ដោយសារវីរុសកូវីដ-១៩។ ភាគច្រើននៃអ្នកស្លាប់គឺបណ្ដាលមកពីវីរុសបំប្លែងប្រភេទ ដែលតា នៅអំឡុងឆ្នាំ២០២០ ដល់ឆ្នាំ២០២២ ដែលកាលនោះធ្វើឱ្យមានការបិទខ្ទប់ ប៉ះពាល់ដល់សេដ្ឋកិច្ចពិភពលោកផងដែរ៕
