ពលរដ្ឋនៅខេត្តព្រះសីហនុមួយចំនួន អះអាងពីការកើនឡើងបទល្មើសប្លន់ និងចាប់ជំរិត ពីសំណាក់ជនជាតិចិន បង្កការភ័យខ្លាចជាខ្លាំង ក្រោយអាជ្ញាធរបង្ក្រាបឧក្រិដ្ឋកម្មអនឡាញ ដែលបញ្ហានេះពលរដ្ឋនិងអ្នកឃ្លាំមើល ជំរុញឱ្យរដ្ឋាភិបាលទប់ស្កាត់ឱ្យមានប្រសិទ្ធភាព ដើម្បីសុវត្ថិភាពពលរដ្ឋ និងសន្តិសុខសង្គម។
អ្នកស្រី ឌួង រចនា ជាអាជីវករម្នាក់ក្នុងចំណោមអាជីវករផ្សេងទៀត រស់នៅក្រុងព្រះសីហនុ និយាយថាគ្រួសារគាត់មានការព្រួយបារម្ភចំពោះបទល្មើសប្លន់ប្រដាប់អាវុធ និងចាប់បង្ខាំងមនុស្សជំរិតទារប្រាក់ ដែលកើតឡើង នៅក្រោយយុទ្ធនាការបង្ក្រាប Scams Online នៅក្នុងខេត្តនេះ។
អ្នកស្រីថា៖ «បើសិនអត់មានស្កែមហ្នឹង អ្នករកស៊ីមិនថាជនជាតិខ្មែរ ជនជាតិចិន ឬក៏ជនជាតិផ្សេងៗទេ គឺគាត់មានអារម្មណ៍ថា មានសុវត្ថិភាព និងកក់ក្តៅ ហើយរីករាយនឹងមករកស៊ីនៅក្នុងខេត្តយើងជាបន្តទៀត។ ហើយពាក់ព័ន្ធនឹងសុវត្ថិភាពសន្តិសុខ ក៏មានការព្រួយបារម្ភដែរ ព្រោះនៅពេលសមត្ថកិច្ចគាត់បង្ក្រាបស្កេមអនឡាញទៅ គឺពួកគាត់ក៏បានបែកខ្ញែកគ្នាចេញមកខាងក្រៅ។ អញ្ចឹងហើយគឺយើងអត់ដឹងថា គាត់ចេញទៅណាខ្លះ ហើយមានបំណងអីខ្លះលើអ្នករកស៊ី អាជីវករទាំងក្នុងស្រុក ក៏ដូចជាក្រៅស្រុកនោះទេ»។
ជុំវិញបញ្ហានេះ ក្រុមអង្គការសង្គមស៊ីវិលមួយចំនួន បង្ហាញការព្រួយបារម្ភពីការអះអាងនេះ និងជំរុញឱ្យអាជ្ញាធរពាក់ព័ន្ធទប់ស្កាត់ឱ្យមានប្រសិទ្ធភាព។
លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូ ថ្លែងគាំទ្រចំពោះយុទ្ធនាការបង្ក្រាបបទល្មើស Scams Online ពីសំណាក់អាជ្ញាធរពាក់ព័ន្ធ។ ប៉ុន្តែទន្ទឹមគ្នានេះ លោកក៏ព្រួយបារម្ភពីការកើតឡើងបទល្មើសថ្មីទៀត គឺប្លន់ប្រដាប់អាវុធ និងចាប់បង្ខាំងមនុស្សជំរិតទារប្រាក់ ដែលពលរដ្ឋបានលើកឡើង។
បើតាមពលរដ្ឋ គិតមកត្រឹមថ្ងៃទី២២ ខែឧសភានេះ នៅខេត្តព្រះសីហនុ មានករណីជនល្មើសជនជាតិចិន បានប្រព្រឹត្តបទល្មើសចាប់បង្ខាំមនុស្សជំរិតទារប្រាក់ចំនួន២ករណី គឺនៅថ្ងៃទី៩ ខែឧសភា និងនៅយប់ថ្ងៃទី២១ ខែឧសភា ម្សិលមិញនេះ ដោយជនល្មើសមានកាំភ្លើងខ្លីប្រើប្រាស់ និងបាញ់តដៃជាមួយកម្លាំងសមត្ថកិច្ច ដោយមិនញញើតឡើយ។
សម្រាប់ លោក អំ សំអាត បទល្មើសនេះ បង្កការភ័យខ្លាចដល់ពលរដ្ឋ អាជីវករ ជាពិសេសភ្ញៀវទេសចរជាតិ អន្តរជាតិ និងអ្នកវិនិយោគ ដែលលោកចង់ឃើញអាជ្ញាធរពាក់ព័ន្ធទប់ស្កាត់ឱ្យមានប្រសិទ្ធភាព ។
លោកថា៖ «អ្វីដែលយើងឃើញថ្មីនោះគឺលេចចេញនូវបទល្មើស ដែលជនបរទេសមួយចំនួន ប្រព្រឹត្តបទល្មើសនៅក្នុងតំបន់ ឬក៏នៅក្នុងខេត្តមួយចំនួន ទាក់ទងបទល្មើសប្លន់ និងចាប់ជំរិត ដែលបង្កទៅជាអសន្តិសុខ អសុវត្ថិភាព សម្រាប់ប្រជាពលរដ្ឋ នាំឲ្យមានការភ័យខ្លាចដល់ពលរដ្ឋ ជាពិសេសការប្រើប្រាស់អាវុធ សម្រាប់ប្រព្រឹត្តបទល្មើស។ អញ្ចឹងត្រូវតែមានការរិតបន្តឹងឡើងវិញ ទាក់ទងនឹងការចរាចរនៃការជួញដូរអាវុធ ពីព្រោះហេតុអ្វីបានជាពួកជនបរទេសទាំងអស់ហ្នឹងមានអាវុធប្រើប្រាស់»។
មន្ត្រីសិទ្ធិមនុស្សរូបនេះ ផ្តល់ជាគំនិតថា ដើម្បីទប់ស្កាត់បទល្មើសទាំងនេះឱ្យមានប្រសិទ្ធភាព សមត្ថកិច្ច ឬអាជ្ញាធរ គួរមានផែនការគ្រប់គ្រងចំពោះវត្តមានរបស់ជនបរទេស ដែលចូលមកស្នាក់នៅ និងធ្វើការក្នុងមូលដ្ឋាននានា ដោយកំណត់អត្តសញ្ញាណឲ្យបានច្បាស់លាស់។
ជាងនេះទៀត ក៏ត្រូវពង្រឹងការគ្រប់គ្រងការជួញដូរអាវុធជាតិផ្ទុះ ឲ្យបានប្រសើរជាងរាល់ថ្ងៃនេះ ដ្បិតឃើញជនបរទេសអាចរកទិញសព្វាវុធមកធ្វើសកម្មភាព ស្ទើរគ្រប់ដៃ និងហាក់មានភាពងាយស្រួល ក្នុងការស្វែងរកទិញអាវុធទាំងនេះ មកបំរើបទល្មើសរបស់ពួកគេ។
លោកថា៖ «ទី១ ត្រូវតែមានការត្រួតពិនិត្យ និងទប់ស្កាត់ នូវការចរាចរអាវុធជាតិផ្ទុះ ពីព្រោះបើសិនជាជនបរទេសមានអាវុធ វាជាគ្រោះថ្នាក់មួយសម្រាប់កម្ពុជា។ ទី២ ត្រូវតែទប់ស្កាត់រាល់បទល្មើសដែលកើតឡើង ក៏ដូចជាការបង្ក្រាប ដើម្បីធានានូវសុវត្ថិភាព សន្តិសុខជូនប្រជាពលរដ្ឋ ក៏ដូចជាអ្នកវិនិយោគទុន និងភ្ញៀវបរទេស។ បើសិនជាករណីបទល្មើសហ្នឹងកើតឡើងច្រើន គឺវានឹងបង្កការភ័យខ្លាច ដែលធ្វើឲ្យអ្នកវិនិយោគ ក៏ដូចជាភ្ញៀវទេសចរ គឺមានការភ័យខ្លាច ឬមិនចូលមកប្រទេសកម្ពុជាទៀតទេ»។
ប្រហាក់ប្រហែលគ្នានេះដែរ សម្រាប់ លោក សេក សុជាតិ អ្នកព្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លើកឡើងថា ក្រុមឧក្រិដ្ឋជនប្លន់ប្រដាប់អាវុធ និងចាប់ជំរិត គឺជាក្តីបារម្ភថ្មីមួយទៀត សម្រាប់សង្គមកម្ពុជា ដែលទាមទារឲ្យអាជ្ញាធរបង្ក្រាប ប្រកបដោយឆន្ទៈខ្ពស់ និងជំនាញផងដែរ បើមិនដូច្នេះទេ វានឹងបន្តគំរាមកំហែងជាប្រព័ន្ធ រួមទាំងជីវភាពរស់នៅរបស់ប្រជាពលរដ្ឋ ។
លោកថា៖ «គឺជារឿងមិនគួរបណ្តែតបណ្តោយឲ្យមានបទល្មើសប្រើប្រាស់អាវុធ និងចាប់ជំរិតមនុស្សនោះទេ។ យើងដឹងហើយថា ក្រុមឧក្រិដ្ឋជនដែលគេចចេញពីការឆបោកតាមអនឡាញ ដូច្នេះពួកគាត់ប្រហែលជាមានបញ្ហាផ្នែកហិរញ្ញវត្ថុ ហេតុនេះហើយគឺមានតែវិធីសាស្ត្រខ្លះ ដើម្បីបានរស់នៅក្នុងស្ថានភាពហ្នឹង។ អញ្ចឹងគឺមានតែធ្វើការចាប់ជំរិតទៅលើជនជាតិចិនខ្លួនឯង ដើម្បីរកចំណូលចិញ្ចឹម ឬក៏ដោះស្រាយបញ្ហាផ្ទាល់ខ្លួនប្រចាំថ្ងៃ។ ក៏ប៉ុន្តែរឿងនេះ គឺជារឿងមួយដែលយើងមិនចង់ដឹងទេ?»។
បន្ថែមលើនេះ លោក សុជាតិ ក៏ចង់ឃើញការអនុវត្តច្បាប់នៅកម្ពុជា មានភាពយុត្តិធម៌ និងមិនលំអៀងសម្រាប់ដោះស្រាយបញ្ហាប្រឈម ដែលកំពុងកើតមាននៅកម្ពុជា ដើម្បីធានាសុវត្ថិភាពជូនដល់ពលរដ្ឋ ភ្ញៀវទេសចរ និងអ្នកវិនិយោគទុនបរទេសឲ្យមានទំនុកចិត្ត។
លោកថា៖ «ពីព្រោះករណីទាំងអស់នេះ គឺជាករណីដ៏រសើបសម្រាប់កម្ពុជា ហើយក៏សង្ឃឹមថា អាជ្ញាធរមានសមត្ថកិច្ច នៅគ្រប់បណ្តារាជធានីខេត្តទាំងអស់ គួរតែពិចារណា ហើយធ្វើការរិតបន្តឹងផ្នែកសន្តិសុខនេះ ឲ្យបានកាន់តែខ្លាំងជាងមុន ដើម្បីធានានូវសុខសុវត្ថិភាព។ ហើយបើសិនជាមិនអាចដោះស្រាយបញ្ហានេះ បានទាន់ពេលទេ អញ្ចឹងកម្ពុជា នឹងកាន់តែទទួលរងនូវការរិះគន់បែបអវិជ្ជមានកាន់តែខ្លាំង»។
ទាក់ទិនបញ្ហានេះ លោក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ បានប្រាប់កាសែតក្នុងស្រុក នៅថ្ងៃសុក្រនេះថា សមត្ថកិច្ចមិនព្រងើយកន្តើយ លើការងារចុះបង្ក្រាប ឬទប់ស្កាត់បទល្មើស ដែលកើតមានក្នុងមូលដ្ឋាននេះទេ។ ជាក់ស្តែង ករណីជនជាតិចិនមួយក្រុម បានធ្វើសកម្មភាពចាប់ជនជាតិចិនដូចគ្នា ញាត់ចូលក្នុងរថយន្ត កាលពីយប់ថ្ងៃទី២១ ខែឧសភា គឺកម្លាំងជំនាញរបស់លោក បានចុះអន្តរាគមន៍ចាប់ជនសង្ស័យបានចំនួន ៥នាក់ភ្លាមៗ ក្នុងនោះមានជនជាតិចិន ៤នាក់ និងអ្នកបើកឡានជនជាតិខ្មែរម្នាក់។
សូមបញ្ជាក់ថា កាលពីថ្ងៃទី៩ ខែឧសភា ក៏មានករណីជនសង្ស័យជនជាតិចិន បានចាប់បង្ខាំងបុរសជនជាតិចិនដូចគ្នា ឈ្មោះ TANG CAIYOU ជំរិតទារប្រាក់អស់ជិត ១០ម៉ឺនដុល្លារ។ ហើយក្រោយមកក៏ត្រូវបានកម្លាំងនគរបាលព្រហ្មទណ្ឌក្រសួងមហាផ្ទៃ និងកម្លាំងនគរបាលខេត្តព្រះសីហនុ សហការបង្ក្រាបចាប់ខ្លួនជនល្មើសបាន ៨នាក់ កសាងសំណុំរឿងទៅកាន់តុលាការផ្តន្ទាទោស។
កាលពីថ្ងៃទី២៩ ខែមេសា ក៏មានករណីជនជាតិចិន ២នាក់ ចេញធ្វើប្លន់ប្រដាប់អាវុធ នៅហាងបញ្ចាំមួយកន្លែង ក្នុងក្រុងព្រះសីហនុ ហើយត្រូវកម្លាំងសមត្ថកិច្ចចុះបង្ក្រាប និងចាប់ខ្លួនជនសង្ស័យបានទាន់ពេល។ រីឯកាលពីយប់ថ្ងៃទី២៣ ខែមីនា ក៏មានករណីខ្មាន់កាំភ្លើងមួយក្រុម បានបាញ់សម្លាប់ថៅកែកាស៊ីណូ ជនជាតិតៃវ៉ាន់ម្នាក់ ស្លាប់ក្នុងថ្លុកឈាម នៅកណ្តាលក្រុងព្រះសីហនុ ហើយខ្មាន់កាំភ្លើងបាន រត់គេចខ្លួនដោយសុវត្ថិភាព។ ហើយគិតមកដល់ថ្ងៃទី២២ ខែឧសភានេះ សមត្ថកិច្ចនៅមិនទាន់ស្រាវជ្រាវចាប់ខ្លួនជនល្មើសមកផ្តន្ទាទោស ឬបង្ហាញមុខ ឲ្យប្រជាពលរដ្ឋ បានដឹងជាសាធារណៈនៅឡើយទេ៕
