អ្នកធ្វើការងារពាក់ព័ន្ធនឹងបរិស្ថាន ជំរុញឱ្យអាជ្ញាធរខេត្តព្រះសីហនុ ទប់ស្កាក់ការបង្ហូរទឹកស្អុយ ចេញពីរោងចក្រកែច្នៃដំណាប់ផ្លែឈើមួយចំនួន នៅស្រុកកំពង់សិលា និងក្រុងកំពង់សោម ឱ្យមានប្រសិទ្ធភាព ដើម្បីការពារសុខភាពពលរដ្ឋ ដែលរស់នៅជុំវិញតំបន់នោះ។
លោក សុខ សុខុម ប្រធានអង្កការស្រឡាញ់ធនធានធម្មជាតិ ហៅកាត់ ស៊ីអ៊ិនរ៉ូ (CNRO) ប្រចាំខេត្តព្រះសីហនុ នៅថ្ងៃអង្គារនេះ បានជំរុញឲ្យក្រសួង មន្ទីរបរិស្ថាន ក៏ដូចជារដ្ឋបាលខេត្តព្រះសីហនុ ត្រូវមានវិធានការច្បាប់តឹងរឹង ជាមួយក្រុមហ៊ុន ឬសិប្បកម្មកែច្នៃដំណាប់ផ្លែឈើទាំងអស់ ដែលការធ្វើអាជីវកម្មរបស់ខ្លួន ប៉ះពាល់ដល់ការរស់នៅរបស់ពលរដ្ឋក្នុងមូលដ្ឋាន និងប៉ះពាល់ដល់ជីវចម្រុះ នៅតាមព្រែក ឬតាមសមុទ្រ ក្នុងករណីបង្ហូរកាកសំណល់មានសារធាតុគីមី មិនឆ្លងកាត់អាងចម្រោះទឹកស្អាត ឲ្យបានត្រឹមត្រូវជាមុន។
លោកថា៖ «ខ្ញុំជាសង្គមស៊ីវិល សូមឲ្យក្រសួងបរិស្ថាន ចាត់វិធានការតាមផ្លូវច្បាប់ ហើយផាកពិន័យ ហើយបើក្រុមហ៊ុនទាំងនោះ គ្មានឧបករណ៍ចម្រោះប្រព័ន្ធទឹកស្អាត ទឹកកខ្វក់ ឲ្យបានស្អាតទេ គួរតែបិទទៅកុំឲ្យដំណើរការ ពីព្រោះបើទុកឲ្យដំណើរការ ការបង្ហូរទឹកកខ្វក់ហ្នឹង ប៉ះពាល់ដល់ប្រជាពលរដ្ឋរស់នៅក្នុងខេត្តព្រះសីហនុជាបន្តទៀតហើយ។ អញ្ចឹងគួរតែក្រសួងបរិស្ថានដែលជាស្ថាប័នជំនាញ ពិនិត្យមើលឲ្យបានត្រឹមត្រូវ និងច្បាស់លាស់ផង»។
អ្នកការពារបរិស្ថានរូបនេះ បន្តថា ចំពោះករណីបង្ហូរទឹកកខ្វក់ចេញពីក្រុមហ៊ុន ឬរោងចក្រ កែច្នៃដំណាប់ផ្លែឈើ ដោយមិនឆ្លងកាត់អាងចម្រោះទឹកស្អាតជាមុន ចូលទៅក្នុងដៃព្រែកទឹកសាប ឬចូលទៅសមុទ្រ គួរត្រូវលុបបំបាត់ឲ្យបានជាស្ថាពរ។ ដ្បិតក្លិនស្អុយបានប៉ះពាល់ធ្ងន់ធ្ងរដល់ការប្រកបមុខរបរ និងសុខភាពរបស់ពលរដ្ឋ ដែលមានផ្ទះនៅជុំវិញរោងចក្រទាំងនោះ។
ប្រហាក់ប្រហែលគ្នានេះដែរ លោក ជិន វណ្ណៈ ប្រធានអង្គការការពារបរិស្ថាន មានមូលដ្ឋានក្នុងខេត្តព្រះសីហនុ ក៏បានឲ្យដឹងដែរថា សកម្មភាពបង្ហូរទឹកស្អុយ ឬទឹកកខ្វក់ មិនឆ្លងកាត់អាងចម្រោះទឹកស្អាតរបស់ក្រុមហ៊ុនកែច្នៃដំណាប់ផ្លែឈើ នៅក្នុងខេត្តព្រះសីហនុ នៅតែជាបញ្ហាប្រឈម ជាពិសេសនៅរដូវមានភ្លៀងធ្លាក់នេះ។
លោកថា ករណីនេះ បានជះក្លិនស្អុយ ប៉ះពាល់ដល់ការរស់នៅរបស់ប្រជាពលរដ្ឋ ដែលមានផ្ទះ រស់នៅជុំវិញក្រុមហ៊ុនឬរោងចក្រ និងប៉ះពាល់ដល់បរិស្ថានក្នុងទឹក ពេលបង្ហូរកាកសំណល់រាវ មានសារធាតុគីមី ចូលទៅក្នុងសមុទ្រ នាំឲ្យប៉ះពាល់ដល់ជីវចម្រុះ ឬធនធានត្រីជាដើម ដែលទាមទារឲ្យថ្នាក់ដឹកនាំក្រសួងមន្ទីរជំនាញ ជាពិសេស អភិបាលខេត្តព្រះសីហនុ ជួយមានវិធានការទប់ស្កាត់ឲ្យមានប្រសិទ្ធភាព។
លោកថា៖ «ស្នើឲ្យក្រុមហ៊ុនទាំងអស់ហ្នឹងធ្វើអាងចម្រោះ ហើយចម្រោះទឹកកខ្វក់ហ្នឹងឲ្យស្អាតរួចហើយ ចាំឲ្យបង្ហូរចូលព្រែក ទើបមិនប៉ះពាល់ដល់ជីវចម្រុះ។ តែបើក្រុមហ៊ុនអត់ធ្វើអាងចម្រោះទឹកស្អាតទេ គឺប៉ះពាល់ច្រើន គឺប៉ះពាល់ដល់មច្ឆា ប៉ះពាល់ដល់ជីវចម្រុះ និងប៉ះពាល់ដល់ការរស់នៅរបស់ប្រជាពលរដ្ឋ គឺប៉ះពាល់ច្រើនមែនទែន។ តែបើក្រុមហ៊ុនធ្វើអាងចម្រោះហើយ ហើយចម្រោះទឹកស្អុយហ្នឹងហើយ ចាំបង្ហូរទឹកហ្នឹងចូលព្រែកទៅ គឺទឹកហ្នឹងអត់មានជាតិពុល ហើយចាំបង្ហូរចូលព្រែកទៅ គឺទឹកហ្នឹងអត់មានប៉ះពាល់អីទេ»។
អ្នកការពារបរិស្ថានរូបនេះ ចង់ឃើញមន្ត្រីស្ថាប័នជំនាញចុះអនុវត្តច្បាប់ ចំពោះក្រុមហ៊ុន ឬរោងចក្រ ក៏ដូចជាសិប្បកម្មកែច្នៃដំណាប់ផ្លែឈើ មានផ្លែស្វាយ ជាដើម នៅក្នុងមូលដ្ឋាន ឲ្យមានប្រសិទ្ធភាពយូរអង្វែង ខណៈកន្លងមក ម្ចាស់ទីតាំងទាំងនេះ បានអនុវត្តត្រឹមតែក្នុងអំឡុងពេល មន្ត្រីជំនាញ បានចុះទៅធ្វើកំណត់ហេតុឬកិច្ចសន្យា ដោយអនុវត្តតាមត្រឹមមួយដង្ហើមចង្រិតប៉ុណ្ណោះ។
ឆ្លើយតបបញ្ហានេះ លោក ឆាយ សុគន្ធដា អភិបាលស្រុកកំពង់សិលា បានប្រាប់សារព័ត៌មានក្នុងស្រុក ឱ្យពលរដ្ឋជូនដំណឹងជាផ្លូវការមកមន្ត្រីជំនាញ ដើម្បីចុះទប់ស្កាត់។
លោកបន្តថា ថ្មីៗនេះ ក៏មានករណីម្ចាស់ទីតាំងមួយកន្លែង ឈ្មោះ ឆាយ ជាងហេង បាននាំយកកាកសំណល់ផ្លែស្វាយទៅទុកក្នុងស្រះទឹក និងលើដីស្រែទំហំប្រមាណ ២ហិកតា នាំឲ្យជះក្លិនស្អុយប៉ះពាល់ដល់ការរស់នៅរបស់ប្រជាពលរដ្ឋក្នុងមូលដ្ឋាននេះពិតមែន។ ប៉ុន្តែលោកថា ករណីនេះ ត្រូវបានមន្ត្រីជំនាញចុះអន្តរាគមន៍ទប់ស្កាត់រួចហើយ។
ចំណែក លោក ម៉ើង សុភាព ប្រធានស្តីទីមន្ទីរបរិស្ថានខេត្តព្រះសីហនុ បានអះអាងដែរថា ពិតជាមានក្រុមហ៊ុនកែច្នៃផ្លែឈើ ឬដំណាប់ស្វាយ នៅស្រុកកំពង់សិលា និងក្រុងកំពង់សោម មិនបានគ្រប់គ្រងកាកសំណល់របស់ខ្លួន ឲ្យបានត្រឹមត្រូវតាមស្តង់ដារពិតមែន។ ហើយថា ករណីនេះ មន្ត្រីជំនាញរបស់លោក ក៏បានចុះណែនាំ និងធ្វើកិច្ចសន្យាជាមួយក្រុមហ៊ុនទាំងនោះរួចហើយ។
លោកព្រមានថា នៅថ្ងៃអនាគត នឹងមានវិធានច្បាប់ឲ្យបានធ្ងន់ធ្ងរ បើក្រុមហ៊ុនទាំងនោះ គឃ្លើនមិនអនុវត្តតាមការណែនាំរបស់មន្ត្រីជំនាញ។
លោកថា៖ «ទាក់ទងក្រុមហ៊ុនដំណាប់ស្វាយ នៅស្រុកកំពង់សិលា ក៏ដូចជានៅក្រុងកំពង់សោម ទឹកសាបយើងនេះ ពិតជាមានការសាយភាយក្លិនពិតមែន។ ហើយតាមការពិតមកពីក្រុមហ៊ុនដឹកជញ្ជូនសំបកស្វាយ សំបកដំណាប់ផ្លែឈើហ្នឹង មកកាន់ទីលានទុកដាក់សំរាម ឬទុកដាក់កាកសំណល់ឧស្សាហកម្មហ្នឹង គឺគាត់បានទុកឲ្យលើសថ្ងៃកំណត់។ ប៉ុន្តែក្រោយពេលមន្ត្រីជំនាញបរិស្ថានចុះទៅពិនិត្យពន្យល់ណែនាំគាត់ទៅ គឺគាត់បានអនុវត្តតាមផែនការហ្នឹងហើយ»។
ទាក់ទិនបញ្ហានេះដែរ ប្រជាពលរដ្ឋមួយចំនួន ដែលមានផ្ទះរស់នៅជិតក្រុមហ៊ុនកែច្នៃផ្លែឈើ (Chin huay(cambodia)co,HD), ក្រុមហ៊ុនទីលានទុកដាក់សំណល់រឹងឧស្សាហកម្ម របស់ក្រុមហ៊ុនសន្យាពេជ្រ ត្រេឌិង មានទីតាំងនៅក្រុងកំពង់សោម និងពលរដ្ឋមួយចំនួនទៀត មានផ្ទះរស់នៅក្នុងឃុំអូរបាក់រទេះ ស្រុកកំពង់សិលាជាដើម បានលើកពីការសាយភាយនៃក្លិនស្អុយ ចេញពីរោងចក្រកែច្នៃផ្លៃឈើទាំងនោះ និងបានស្នើកិច្ចអន្តរាគមន៍ ពីអាជ្ញាធរជួយទប់ស្កាត់ក្លិនស្អុយឲ្យមានប្រសិទ្ធភាពយូរអង្វែង។
បើតាមញត្តិរបស់ពលរដ្ឋដែលបានដាក់មកកាន់អាជ្ញាធរកន្លងទៅថ្មីៗនេះ ផលប៉ះពាល់ទឹកកខ្វក់មានក្លិនស្អុយខ្លាំងពិបាកដកដង្ហើមនេះ កំពុងគំរាមកំហែងជីវភាពពលរដ្ឋយ៉ាងតិច ៣ឃុំសង្កាត់ ដូចជា នៅឃុំអូរបាក់រទេះ ក្នុងស្រុកកំពង់សិលា។ ដោយឡែកនៅក្រុងកំពង់សោម ប៉ះពាល់ពលរដ្ឋ ២សង្កាត់ គឺសង្កាត់រាម និងសង្កាត់បិតត្រាំង។
កង្វល់នេះ ប្រជាពលរដ្ឋមួយចំនួន បានអះអាងថា ចំពោះកាកសំណល់រឹង ឬរាវ និងក្លិនស្អុយ ដែលជះចេញពីក្រុមហ៊ុនកែច្នៃផ្លែឈើខាងលើ គឺអាជ្ញាធរ ទប់ស្កាត់មិនមានប្រសិទ្ធភាពយូរអង្វែងទេ។ ពួកគាត់ថា ក្រុមហ៊ុនអនុវត្តតាមតែនៅពេលមន្ត្រីចុះទៅពិនិត្យ ឬធ្វើកិច្ចសន្យា ដោយអនុវត្តតាមក្នុងរយៈពេលខ្លីតែប៉ុណ្ណោះ ដែលធ្វើឲ្យពួកគាត់បាត់បង់ជំនឿ និងទំនុកចិត្ត ទៅលើការដឹកនាំរបស់អាជ្ញាធររដ្ឋបាលខេត្តព្រះសីហនុទៀតហើយ៕
