កងទ័ពអ៊ីស្រាអែល បាននិយាយថា ខ្លួនបានចាប់ផ្តើមធ្វើការវាយប្រហារនៅទូទាំងប្រទេសលីបង់ បន្ទាប់ពីមានការប្រកាសរបស់នាយករដ្ឋមន្ត្រី លោក បេនហ្សាមីន ណេតានីយ៉ាហូ (Benjamin Netanyahu) ថា ប្រទេសរបស់លោកនឹងបង្កើនការវាយប្រហារលើក្រុម ហេសបូឡាហ៍ (Hezbollah)។
កងកម្លាំងការពារអ៊ីស្រាអែល (IDF) បាននិយាយថា ខ្លួនបានបើកការវាយប្រហារប្រឆាំងនឹងក្រុមហេសបូឡាហ៍ នៅក្នុងជ្រលងភ្នំ បេកា (Bekaa) នៅភាគខាងកើតនៃប្រទេសលីបង់ និងផ្នែកផ្សេងទៀតនៃប្រទេស។ ក្រុម ហេសបូឡាហ៍ បាននិយាយថា ខ្លួនបានវាយបកវិញដោយការវាយប្រហារដោយដ្រូន និងរ៉ុក្កែតចំនួន ២២ ដង លើទាហាន រថក្រោះ បន្ទាយ និងអគាររបស់អ៊ីស្រាអែល។
កាលពីដើមខែនេះ ប្រទេសលីបង់ និងអ៊ីស្រាអែល បានព្រមព្រៀងគ្នាពន្យារពេលបទឈប់បាញ់រយៈពេល ៤៥ ថ្ងៃ ទោះបីជាការប្រយុទ្ធគ្នាមួយចំនួននៅតែបន្តក៏ដោយ។
ក្នុងសេចក្តីថ្លែងការណ៍ជាវីដេអូកាលពីល្ងាចថ្ងៃទី២៥ខែឧសភា លោក ណេតានីយ៉ាហូ បាននិយាយថា អ៊ីស្រាអែលកំពុង “ស្ថិតក្នុងសង្គ្រាមជាមួយក្រុម ហេសបូឡាហ៍” ហើយយោធាត្រូវបានប្រាប់ឱ្យ “ផ្តល់ការវាយប្រហារយ៉ាងធ្ងន់ធ្ងរដល់ពួកគេ”។ លោកបានប្រកាសថា ការវាយលុកនេះបាន “កម្ចាត់ភេរវករជាង ៦០០ នាក់” ប៉ុន្តែ “អ្វីដែលតម្រូវឱ្យយើងធ្វើឥឡូវនេះ គឺត្រូវបង្កើនការវាយប្រហារ បង្កើនកម្រិតកាន់តែខ្លាំងក្លា”។
រដ្ឋមន្ត្រីស្តាំនិយមជ្រុលរបស់អ៊ីស្រាអែលពីររូប គឺលោក បេហ្សាលែល ស្ម៉ូទ្រិច (Bezalel Smotrich) និងលោក អ៊ីតាម៉ា បេន ហ្គីវៀរ (Itamar Ben Gvir) បានអំពាវនាវឱ្យមានការបន្តពង្រីកយុទ្ធនាការយោធា រួមទាំងការចូលទៅក្នុងទីក្រុងបេរូត (Beirut) ផងដែរ។
ក្រុម ហេសបូឡាហ៍ បាននិយាយថា ខ្លួនបានប្រើប្រាស់ដ្រូន និងរ៉ុក្កែតវាយប្រហារលើទីតាំងនានា កាលពីថ្ងៃទី២៥ខែឧសភា ដើម្បីឆ្លើយតបទៅនឹង “ការរំលោភលើបទឈប់បាញ់” របស់អ៊ីស្រាអែល។
មន្ត្រីមកពីប្រទេសលីបង់ និងអ៊ីស្រាអែល ដែលមិនមានទំនាក់ទំនងការទូតផ្លូវការនឹងគ្នា គ្រោងនឹងធ្វើការចរចាបន្ថែមទៀតនៅទីក្រុងវ៉ាស៊ីនតោននៅសប្តាហ៍ក្រោយ ខណៈដែលប្រធានាធិបតីលីបង់ លោក ហ្សូសែហ្វ អូន (Joseph Aoun) បានទាមទារឱ្យអ៊ីស្រាអែលដកទ័ពទាំងស្រុងចេញពីភាគខាងត្បូងប្រទេសលីបង់។
ចាប់តាំងពីកិច្ចព្រមព្រៀងបទឈប់បាញ់ត្រូវបានចុះហត្ថលេខាកាលពីថ្ងៃទី១៦ ខែមេសាមក ការវាយប្រហាររបស់អ៊ីស្រាអែលភាគច្រើន ត្រូវបានកម្រិតត្រឹមតែភាគខាងត្បូងនៃប្រទេស ជាកន្លែងដែលកងទ័ពអ៊ីស្រាអែលនៅសេសសល់។ ចំណែកឯជ្រលងភ្នំ បេកា ដែលត្រូវបានវាយប្រហារកាលពីល្ងាចថ្ងៃទី២៥ខែឧសភា ស្ថិតនៅភាគខាងកើតប្រទេសលីបង់ ក្បែរព្រំដែនប្រទេសស៊ីរី។
ការពង្រីកយុទ្ធនាការរបស់អ៊ីស្រាអែលបានកើតឡើង ខណៈដែលរដ្ឋបាលអ៊ីរ៉ង់បានទទូចថា កិច្ចព្រមព្រៀងសន្តិភាពជាមួយសហរដ្ឋអាមេរិក គួរតែរួមបញ្ចូលបទឈប់បាញ់ទាំងស្រុងលើគ្រប់រណសិរ្ស។ ប៉ុន្តែរដ្ឋាភិបាលរបស់អ៊ីស្រាអែល បានប្រឆាំងនឹងការបញ្ចប់ការប្រយុទ្ធគ្នាប្រឆាំងនឹងក្រុម ហេសបូឡាហ៍។
ទាហានអ៊ីស្រាអែលចំនួន ១០ នាក់ ត្រូវបានសម្លាប់ ចាប់តាំងពីបទឈប់បាញ់ដំបូងត្រូវបានព្រមព្រៀងគ្នា។ មនុស្សជាង ៤០០ នាក់ នៅក្នុងប្រទេសលីបង់ ត្រូវបានសម្លាប់ដោយការទម្លាក់គ្រាប់បែកក្នុងរយៈពេលដូចគ្នានេះ រួមទាំងក្រុមគ្រូពេទ្យ និងបុគ្គលិកសង្គ្រោះបន្ទាន់ជាច្រើននាក់។ អ៊ីស្រាអែលបានចេញបញ្ជាស្ទើរតែរាល់ថ្ងៃឱ្យប្រជាពលរដ្ឋលីបង់ភៀសខ្លួនចេញពីតំបន់ថ្មីៗនៅភាគខាងត្បូង ដែលបន្ថែមលើចំនួនប្រជាជនជាងមួយលាននាក់ដែលបានភៀសខ្លួនរួចទៅហើយ។
ប្រទេសលីបង់ត្រូវបានទាញឱ្យចូលទៅក្នុងការប្រយុទ្ធគ្នា បន្ទាប់ពីសហរដ្ឋអាមេរិក និងអ៊ីស្រាអែលបានបើកសង្គ្រាមប្រឆាំងនឹងអ៊ីរ៉ង់កាលពីថ្ងៃទី២៨ ខែកុម្ភៈ។ ក្រុម ហេសបូឡាហ៍ ដែលជាសម្ព័ន្ធមិត្តរបស់អ៊ីរ៉ង់ បានបាញ់រ៉ុក្កែតចូលអ៊ីស្រាអែល ដើម្បីសងសឹកនឹងការវាយប្រហារដែលបានសម្លាប់មេដឹកនាំកំពូលរបស់អ៊ីរ៉ង់ អាយ៉ាតូឡោះ អាលី ខាមេនេអ៊ី (Ayatollah Ali Khamenei)៕
