គណបក្សក្រៅរដ្ឋាភិបាលមួយចំនួន ដែលគេដឹងថា មាននិន្នាការប្រជាធិបតេយ្យនោះ ជំរុញឱ្យបក្សកាន់អំណាចផ្តល់សិទ្ធិធ្វើនយោបាយឡើងវិញឱ្យ លោក កឹម សុខា ដើម្បីបង្ហាញពីឆន្ទៈស្តារប្រជាធិបតេយ្យ តាមការចង់បានរបស់ប្រជាពលរដ្ឋ និងបំណងអន្តរជាតិ ទោះពួកគេបានសាទរចំពោះការលើកលែងទោស ពីប្រមុខរដ្ឋស្តីទីលោក ហ៊ុន សែន ក្តី។
គណបក្សភ្លើងទៀន និងគណបក្សឆន្ទៈខ្មែរ បាននិយាយក្នុងសេចក្ដីថ្លែងការណ៍រួម ចុះថ្ងៃទី២៦ខែឧសភានេះ ក្រៅពីសម្តែងការសាទរចំពោះការសម្រេចលើកលែងទោស លោក កឹម សុខា នេះថាជាសញ្ញាវិជ្ជមាន ឆ្ពោះទៅរកការផ្សះផ្សាជាតិតាមបំណងប្រាថ្នារបស់ពលរដ្ឋខ្មែរ និងសហគមន៍អន្តរជាតិក្តី តែពួកគេថា ការស្ដារឡើងវិញនូវសិទ្ធិនយោបាយ លោក កឹម សុខា និងដោះលែងអ្នកទោសមនសិការផ្សេងទៀតដែលកំពុងជាប់ឃុំ នោះបញ្ជាក់កាន់តែច្បាស់ថា កម្ពុជាបានស្តារប្រជាធិបតេយ្យឡើងវិញឈរលើមូលដ្ឋាននីតិរដ្ឋ។
ការណ៍នេះ ពួកគេអំពាវនាវដល់រដ្ឋាភិបាលលើកលែងទោស និងទម្លាក់ចោលបទចោទប្រកាន់ចំពោះមេដឹកនាំ និងសកម្មជននយោបាយ សកម្មជនដីធ្លី សកម្មជនបរិស្ថាន និងសកម្មជនសិទ្ធិមនុស្ស ដើម្បីធានាបាននូវភាពសុខដុមរមនារវាងខ្មែរនិងខ្មែរ។
ប្រហាក់ប្រហែលនេះដែរ គណបក្សប្រជាធិបតេយ្យជឿនលឿន និងគណបក្សជំនាន់ថ្មី បាននិយាយថា ដើម្បីដោះស្រាយបញ្ហាជាតិបន្ទាន់ នៅក្នុងបរិបទកម្ពុជាកំពុងប្រឈមមុខនឹងបទឧក្រិដ្ឋអនឡាញ បញ្ហាជីវភាពប្រជាពលរដ្ឋ និងការឈ្លានពានរបស់ថៃ តាមបណ្ដោយព្រំដែន វាចាំបាច់ណាស់ ដែលរដ្ឋាភិបាលត្រូវបង្កើតឱ្យមានវប្បធម៌សន្ទនា រវាងខ្មែរនិងខ្មែរឡើងវិញ ដោយមានការចូលរួមពីគ្រប់ភាគីទើបខ្មែរខ្លាំង។
លើសពីនេះ រដ្ឋាភិបាលកម្ពុជាឯករាជ្យ២៣តុលារបស់លោក សម រង្ស៊ី ដែលមានមូលដ្ឋាននៅក្រៅប្រទេស បានសម្ដែងការខកចិត្តចំពោះការផ្ដល់សេរីភាពដល់ លោក កឹម សុខា ត្រឹមតែអាចបំពេញករណីក្នុងគ្រួសារ និងធ្វើកិច្ចការផ្ទាល់ខ្លួន ប៉ុន្តែមិនផ្ដល់សិទ្ធិនយោបាយពេញលេញ ដើម្បីបម្រើផលប្រយោជន៍ជាតិ។
ប្រភពនោះ បញ្ជាក់ថា លោក កឹម សុខា ក៏ដូចជាអ្នកទោសនយោបាយ និងអ្នកទោសមនសិការផ្សេងទៀត នៅតែស្ថិតក្នុងលក្ខខណ្ឌជាអ្នកទោសនយោបាយរបស់លោក ហ៊ុន សែន ដដែល។
លើសពីនេះ រដ្ឋាភិបាលក្រៅប្រទេសនេះ បន្តទាមទារផ្តល់សិទ្ធិសេរីភាពនយោបាយពេញលេញ ជូនលោក កឹម សុខា ទើបជាការចាប់ផ្ដើមដ៏ត្រឹមត្រូវនៃដំណើរការផ្សះផ្សា សាមគ្គីឯកភាពជាតិ ការផ្សះផ្សាដោយសុចរិត និងគោរពគោលការណ៍យុត្តិធម៌ និងភាពរឹងមាំក្នុងស្មារតីជាតិពិតប្រាកដ។
គួរំឭកជូនថា កាលពីថ្ងៃទី២៥ ខែឧសភានេះ លោក ហ៊ុន សែន ក្នុងនាមប្រមុខរដ្ឋស្តីទី បានសម្រេចលើកលែងទោសដល់លោក កឹម សុខា តាមសំណើរបស់លោកនាយករដ្ឋមន្ត្រី ហ៊ុន ម៉ាណែត ក្រោយត្រូវបានចាប់ឃុំខ្លួន និងដកសិទ្ធិធ្វើនយោបាយជិត១០ឆ្នាំ។ ប៉ុន្តែការលើកលែងទោសនេះ អនុវត្តចំពោះតែទោសជាប់ពន្ធនាគារ ២៧ឆ្នាំ ដែលជាមូលទោសប៉ុណ្ណោះ ដោយមិនអនុវត្តទោសបន្ថែមឡើយ។
កាលពីថ្ងៃទី៣ ខែមីនា ឆ្នាំ២០២៣ សាលាដំបូងរាជធានីភ្នំពេញ បានផ្តន្ទាទោស លោក កឹម សុខា ២៧ឆ្នាំ ឃុំនៅក្នុងផ្ទះ ដោយចោទពីបទសន្ទិដ្ឋិភាពជាមួយបរទេស ព្រមទាំងដកហូតសិទ្ធិពលរដ្ឋ និងសិទ្ធិនយោបាយជាស្ថាពរ។ លោក កឹម សុខា ត្រូវបានសមត្ថកិច្ចឆ្មក់ចូលចាប់ខ្លួនទាំងកណ្តាលយប់ ឈានចូលថ្ងៃទី៣ ខែកញ្ញា ឆ្នាំ២០១៧ ទាំងមានអភ័យឯកសិទ្ធិសភាជាអ្នកតំណាងរាស្ត្រ នៅគ្រាដែលគណបក្សសង្គ្រោះជាតិរបស់លោក ហក់ឡើងប្រជាប្រិយភាពជិតទាន់គណបក្សកាន់អំណាច ដែលបញ្ហានេះហើយដែលសហគមន៍ជាតិ និងអន្តរជាតិ ចាត់ទុកថា សំណុំរឿងចោទប្រកាន់ លោក កឹម សុខា មានចរិតនយោបាយ ដើម្បីកម្ចាត់បក្សប្រឆាំងចេញពីសង្វៀននយោបាយ ព្រោះការភ័យខ្លាចរបស់បក្សកាន់អំណាច។
ជុំវិញករណីនេះ អ្នកនាំពាក្យគណបក្សប្រជាជនកម្ពុជា លោក ជា ធីរិទ្ធ និយាយថា លោកពុំចាប់អារម្មណ៍ឆ្លើយនឹងការរិះគន់នេះឡើយ និងបានការពារថា ការលើកលែងទោស លោក កឹម សុខា ពេលនេះ បង្ហាញពីស្មារតីនៃការពង្រឹងសាមគ្គីភាពរបស់កម្ពុជា និងអនុគ្រោះដល់ លោក កឹម សុខា ឱ្យទៅថែម្ដាយកំពុងឈឺធ្ងន់ នៅដំណាក់កាលចុងក្រោយ។
លោក ជា ធីរិទ្ធ ថ្លែងថា៖ «ខ្ញុំគិតថា ចង់ពួកគេឬក៏នរណា និយាយថាម៉េចក៏ថាទៅ ក៏ប៉ុន្តែអ្វីដែលជាការលើកលែងទោសចំពោះលោក កឹម សុខា នេះ គឺជារឿងមួយដែលយើងគួរតែសាទរទៅវាល្អជាង ដែលវាបង្ហាញអំពីគុណធម៌របស់អ្នកនយោបាយ ជាពិសេសគុណធម៌របស់សម្ដេចធីបតី ហ៊ុន ម៉ាណែត ដែលលោកអនុគ្រោះមានគុណធម៌ចំពោះលោក កឹម សុខា»។
ចំណែក អ្នកប្រឹក្សាយោបល់ផ្នែកអភិវឌ្ឍផ្នត់គំនិត និងស្រាវជ្រាវ លោក សេក សុជាតិ ចាត់ទុកករណីនេះ ជារឿងវិជ្ជមាននៅក្នុងនយោបាយកម្ពុជា ដែលលោកថា ការលើកលែងទោសនេះជាការគួរឱ្យសាទរ។ ប៉ុន្តែ លោកយល់ថា ក្នុងកាលៈទេសៈបច្ចុប្បន្នការចង់ឱ្យលោក កឹម សុខា ទទួលបានសិទ្ធិធ្វើនយោបាយពេញលេញឡើងវិញឆាប់ៗ វាជាការលំបាកសង្ឃឹម ខណៈប្រព័ន្ធតុលាការ ត្រូវបានគេមើលឃើញថា មិនទាន់ឯករាជ្យនៅឡើយនោះ។
តែយ៉ាងណា អ្នកឃ្លាំមើលរូបនេះ នៅតែយល់ថា ករណីលោក កឹម សុខា អាចនឹងមានការប្រែប្រួលនៅក្នុងពេលអនាគត បើអ្នកនយោបាយបក្សកាន់អំណាច មានឆន្ទៈចង់ផ្សះផ្សាជាតិពិតប្រាកដ ហើយតម្កល់ប្រយោជន៍ជាតិជាធំនោះ៕
