បន្ទាប់ពីមានការតវ៉ាពីអតិថិជនកាលពីសប្ដាហ៍មុន ទីបំផុតក្រុមហ៊ុន ពៅ វណ្ណា នៅថ្ងៃទី២៥ ខែឧសភា បានសន្យាជាមួយលោក ប៉ាន់ខែម ប៊ុនថន ថានឹងដោះស្រាយប្រគល់ដីទៅពលរដ្ឋនៅអំឡុងខែមិថុនាខាងមុខនេះ។
អតិថិជនមួយរូប គឺអ្នកស្រី ស្រីនាង ប្រាប់វីអូឌី នៅថ្ងៃទី២៧ ខែឧសភា ថា អតិថិជនភាគច្រើនបានទទួលយកការសន្យានេះ និងរង់ចាំមើលលទ្ធផលជាក់ស្ដែង។ អ្នកស្រីសង្ឃឹមថា ក្រុមហ៊ុននឹងធ្វើតាមការសន្យា ចំពោះមុខលោក ប៉ាន់ខែម ប៊ុនថន ព្រោះប្រជាពលរដ្ឋបានស្វែងរកដំណោះស្រាយច្រើនឆ្នាំមកហើយ ខណៈក្រុមហ៊ុនតែងតែគេចវេស។
អ្នកស្រី ស្រីនាង និយាយថា៖ «ពេលខ្លះគាត់ជម្រុញឲ្យពួកខ្ញុំជាអតិថិជនហ្នឹង បើរង់ចាំមិនបាន ទៅប្ដឹងតុលាការទៅ ធ្វើតាមច្បាប់ទៅ។ ពេលខ្លះទៀត គាត់ក៏បែរជាមកឲ្យពួកយើងហ្នឹងរង់ចាំគាត់សិន គាត់កំពុងតែខំស្វះស្វែងដោះស្រាយហើយ។ ដល់ពេលអញ្ចឹង ពួកខ្ញុំជាអតិថិជននេះ វាវិលវល់ណាស់បង។ ខ្ញុំឆ្ងល់ដែរ ប៉ុន្តែក៏អត់ទាន់បានមានសកម្មភាព ឬក៏គិតអីដែរ គ្រាន់តែជាការឆ្ងល់ ព្រោះឥឡូវហ្នឹង គឺខ្ញុំស្ថិតនៅក្នុងការរង់ចាំដំណោះស្រាយពីបង ឯកឧត្តម ប៉ាន់ខែម ប៊ុនថន»។
កាលពីថ្ងៃទី១៨ ខែឧសភា ប្រជាពលរដ្ឋប្រមាណ២០០នាក់ តំណាងឱ្យអតិថិជនរងគ្រោះចំនួន ៨៧៥គ្រួសារ បានដង្ហែក្បួនពីវត្តកណ្ដាលឆ្ពោះទៅកាន់សាលាក្រុងប៉ោយប៉ែត ទាមទារដំណោះស្រាយពីក្រុមហ៊ុនដីឡូតិ៍ ពៅ វណ្ណា ក្រោយទិញដីជាង៦ឆ្នាំ តែមិនបានប្លង់កម្មសិទ្ធិ។
អតិថិជនម្នាក់ទៀត ថ្លែងក្នុងលក្ខខណ្ឌមិនបញ្ចេញឈ្មោះ ដោយបារម្ភពីសុវត្ថិភាព បានអះអាងថា លោកគ្មានជំនឿជាក់ថាក្រុមហ៊ុនអាចប្រគល់ដីតាមការសន្យាឡើយ ព្រោះដីនោះមានការជាប់ពាក់ព័ន្ធជាមួយបុគ្គលមានអំណាចផ្សេងទៀត ជាពិសេស ម្ចាស់ក្រុមហ៊ុនគឺអ្នកស្រី ពៅ វណ្ណា ផ្ទាល់ ធ្លាប់ទម្លាយថាដីនេះស្ថិតក្រោមសិទ្ធិរក្សាការពាររបស់ឧកញ៉ាម្នាក់ ប៉ុន្តែក្រោយមកគាត់ក៏ប្រែមកនិយាយថាដីនេះគ្មានជាប់ពាក់ព័ន្ធនឹងនរណាឡើយ។
អតិថិជនរូបនោះ និយាយថា៖ «សម្រាប់ខ្ញុំដូចជា ខ្ញុំអត់សប្បាយចិត្ត។ ខ្ញុំគិតក្នុងចិត្ត ធម្មតា(ក្រុមហ៊ុន) ធ្លាប់កុហកបងប្អូនយើងរាប់រយរាប់ពាន់ដងមិនអស់ហើយ តើឱ្យយើងមានជំនឿចិត្តម៉េចកើត»។
ប្រភពដដែលយល់ឃើញថា ប្រសិនបើក្រុមហ៊ុនមានស្មារតីចង់ដោះស្រាយបញ្ហានេះ ទីមួយគឺត្រូវផ្ដល់ទំនុកចិត្តដល់អតិថិជន ដោយធ្វើលិខិតសន្យានៅមុខពលរដ្ឋ និងបង្ហាញស្នាមមេដៃអ្នកទទួលខុសត្រូវ។ ទីពីរ ត្រូវដោះស្រាយដីនេះឱ្យដាច់ស្រេចជាមួយបុគ្គលពាក់ព័ន្ធផ្សេងទៀត ខណៈទីបី ករណីគ្មានដីឱ្យ ក្រុមហ៊ុនត្រូវបញ្ចេញសាច់ប្រាក់ដែលបានពីអតិថិជនខ្ទង់លានដុល្លារនោះ សងត្រឡប់មកវិញ ខណៈក្រុមហ៊ុនធ្លាប់ធានាថា ប្រសិនបើមានបុគ្គលទីបីរារាំងដីនេះ នោះក្រុមហ៊ុននឹងសងលុយអតិថិជនវិញគុណនឹង៥។
ប្រភពរូបនេះបន្តថា លោកចង់ឱ្យអតិថិជនទាំងអស់ បន្តសាមគ្គីគ្នាទាមទារដំណោះស្រាយពិតប្រាកដមួយ ដោយមិនត្រូវទទួលព្រមតាមការបញ្ចុះបញ្ចូល ឬការបំបែកបំបាក់ផ្ទៃក្នុងនោះឡើយ ព្រោះមានអតិថិជនខ្លះកំពុងធ្លាក់ខ្លួនឈឺ ខ្លះស្លាប់ ខ្លះបែកបាក់ប្ដីប្រពន្ធកូន ដោយសារការខកចិត្តនឹងដីនេះ។
អតិថិជនរូបនោះ បន្តថា៖ «អ្នកខ្លះក៏បែកបាក់គ្រួសារ និយាយទៅអ្នកខ្លះគាត់ខំរកទៅស្រុកថៃ រកតិកតក់ៗ កម្លាំងញើសឈាមគ្នាខំធ្វើ រកស៊ីផងអីផង ផ្ញើលុយមកបង់ដី ដល់ពេលចុងក្រោយអ៊ីចឹង សួរថាបាក់ទឹកចិត្តអត់? បាក់កម្លាំងចិត្តខ្លាំងណាស់ណា»។
ក្រុមហ៊ុនលក់ដីឡូតិ៍ពៅ វណ្ណា គឺជាកម្មសិទ្ធរបស់អ្នកស្រី ពៅ វណ្ណា ប្រពន្ធមេឃុំអូរបីជាន់ លោក តុល សារិន។ ពលរដ្ឋចាប់ផ្ដើមសម្រុកទិញដីឡូតិ៍នេះនៅឆ្នាំ២០១៩ ដោយបង់រំលស់ជាមួយក្រុមហ៊ុន និងជាមួយធនាគារ រហូតដល់ដាច់ជាស្ថាពរ ដោយជឿជាក់លើការផ្សព្វផ្សាយ គម្រោងហេដ្ឋារចនាសម្ព័ន្ធច្បាស់លាស់ និងស្ថិតនៅជិតតំបន់សេដ្ឋកិច្ចពិសេស។ ប៉ុន្តែការកាត់ប្លង់កម្មសិទ្ធិ ឬប្លង់រឹង បែរជាត្រូវរាំងស្ទះរហូតដល់ខែមិថុនា ឆ្នាំ២០២៥ ដោយសារដីនោះស្ថិតក្នុងសិទ្ធិរក្សាការពាររបស់ឧកញ៉ាម្នាក់។
អតិថិជនបានស្វែងរកអន្តរាគមន៍អស់ចំនួន១០លើកមកហើយ ដោយក្រុមហ៊ុនតែងសន្យានឹងដោះស្រាយនៅខែនេះខែនោះ រហូតអូសបន្លាយមកដល់ពេលបច្ចុប្បន្ន។
ទាក់ទិនរឿងនេះ អ្នកគ្រប់គ្រងប្រចាំការិយាល័យអង្គការលីកាដូ (LICADHO) នៅខេត្តបន្ទាយមានជ័យ លោក អ៊ិន គង់ជិត យល់ឃើញថា ការលើកពេលម្ដងហើយម្ដងទៀត បានធ្វើឱ្យពលរដ្ឋកាន់តែមានក្ដីកង្វល់ និងលែងមានជំនឿលើក្រុមហ៊ុន។ ករណីនេះ លោកជំរុញឱ្យអាជ្ញាធរតាមដាន និងធ្វើយ៉ាងណាឱ្យក្រុមហ៊ុនគោរពតាមការសន្យា។
លោក អ៊ិន គង់ជិត បន្ថែមថា៖ «ករណីដែលមិនអាចសម្រុះសម្រួលបាន ពួកគាត់គួរនាំគ្នាប្ដឹងទៅអាជ្ញាធរដោះស្រាយក្រៅប្រព័ន្ធ (អ.ដ.ក)។ នៅ អ.ដ.ក មួយទៀត ដែលអាចនឹងសម្រុះសម្រួលស្វែងរកដំណោះស្រាយបាន»។
ការទាមទារប្លង់កម្មសិទ្ធិ និងដីយកមកកាន់កាប់របស់ពលរដ្ឋទាំង ៨៧៥គ្រួសារនេះ គឺចំពេលដែលសេដ្ឋកិច្ចនៅក្រុងប៉ោយប៉ែត កំពុងធ្លាក់ចុះបណ្ដាលឱ្យបាត់បង់ការងារ និងប៉ះពាល់មុខរបរ ក្រោយការផ្ទុះសង្គ្រាមនៅជាយដែន និងការបង្ក្រាបឧក្រិដ្ឋកម្មអនឡាញ។ ពលរដ្ឋរំពឹងថា ក្រុមហ៊ុននឹងប្រគល់ដី ឬសងជាលុយ ដើម្បីពួកគាត់យកទៅដោះស្រាយជីវភាពក្នុងដំណាក់កាលលំបាកនេះ៕
