អ្នកជំនាញបាននិយាយថា សង្គ្រាមរបស់រដ្ឋបាល លោក ត្រាំ ប្រឆាំងនឹងអ៊ីរ៉ង់ មិនគួរមានផលប៉ះពាល់ដល់ការលក់អាវុធឱ្យតៃវ៉ាន់នោះទេ បន្ទាប់ពីមន្ត្រីអាមេរិកម្នាក់បានលើកឡើងថា ការផ្អាកការដឹកជញ្ជូនកញ្ចប់អាវុធសំខាន់មួយតម្លៃ ១៤ ពាន់លានដុល្លារទៅឱ្យតៃវ៉ាន់ គឺដោយសារតែជម្លោះនៅតំបន់ឈូងសមុទ្រ។
ក្រុមអ្នកវិភាគ បានប្រាប់សារព័ត៌មាន Guardian ថា កញ្ចប់អាវុធដែលស្ថិតក្នុងភាពមិនច្បាស់លាស់បន្ទាប់ពីជំនួបរបស់ លោក ដូណាល់ ត្រាំ ជាមួយលោក ស៊ី ជិនពីង អាចចំណាយពេលរហូតដល់ ៦ ឆ្នាំ ដើម្បីដំណើរការ ហើយមានលទ្ធភាពទាបណាស់ ដែលមានការផ្សារភ្ជាប់ពិតប្រាកដរវាងព្រឹត្តិការណ៍នៅអ៊ីរ៉ង់ និងការដឹកជញ្ជូនអាវុធទៅតៃវ៉ាន់។ ភាពមិនប្រាកដប្រជាជុំវិញការគាំទ្ររបស់ទីក្រុងវ៉ាស៊ីនតោន បានលេចឡើងជាថ្មី បន្ទាប់ពីលោក ត្រាំ បានលើកឡើងថា លោកអាចប្រើប្រាស់ការលក់អាវុធឱ្យតៃវ៉ាន់ធ្វើជា «កូនអុកសម្រាប់ចរចា» ជាមួយទីក្រុងប៉េកាំង។
សេចក្តីថ្លែងការណ៍របស់រដ្ឋលេខាធិការស្តីទីកងទ័ពជើងទឹក លោក ហុង ខៅ (Hung Cao) នៅក្នុងសវនាការសភា បានបង្កឱ្យមានការព្រួយបារម្ភនៅទីក្រុងតៃប៉ិ បន្ទាប់ពីលោកបានលើកឡើងថា កញ្ចប់អាវុធដែលរង់ចាំការចុះហត្ថលេខារបស់ លោក ត្រាំ ត្រូវបានផ្អាកដើម្បីរក្សាទុកគ្រាប់រំសេវសម្រាប់ប្រតិបត្តិការ សង្គ្រាមអ៊ីរ៉ង់។ មានសេចក្តីរាយការណ៍ថា សហរដ្ឋអាមេរិកបានបូមយករំសេវចេញពីឃ្លាំងមីស៊ីលរបស់ខ្លួន ចាប់តាំងពីការចាប់ផ្តើមសង្គ្រាមប្រឆាំងនឹងអ៊ីរ៉ង់ កាលពីថ្ងៃទី២៨ ខែកុម្ភៈ។
បើតាមលោក រូប៊ឺត ហាំម៉ុន-ឆេមប៊ឺស (Rupert Hammond-Chambers) ប្រធានក្រុមប្រឹក្សាធុរកិច្ចអាមេរិក-តៃវ៉ាន់ថ្លែងថា ការលើកឡើងរបស់លោក ខៅ គឺ «មិនសមហេតុផលទាល់តែសោះ» ព្រោះកិច្ចព្រមព្រៀងអាវុធទាំងនេះត្រូវចំណាយពេលពី ៣ ទៅ ៦ ឆ្នាំទើបដឹកជញ្ជូនដល់។
លោកបានបន្តថា៖ «ប្រសិនបើគាត់ផ្ញើការជូនដំណឹងទៅសភាត្រឹមចុងខែមិថុនា នោះត្រូវចំណាយពេលពី ៦ ទៅ ១២ ខែទៀតទើបចុះកិច្ចសន្យា ហើយបន្ទាប់មកទើបពេលវេលាដឹកជញ្ជូនចាប់ផ្តើមរាប់ ដូច្នេះ យើងពិតជាឈានចូលដល់ទសវត្សរ៍ឆ្នាំ២០៣០ ហើយ»។
កាលពីចុងសប្តាហ៍ ទីភ្នាក់ងារសារព័ត៌មាន Reuters បានរាយការណ៍ពីសម្តីរបស់មន្ត្រីអាមេរិកម្នាក់ថា យោធាមានគ្រាប់រំសេវច្រើនលើសលប់ ដើម្បីបម្រើដល់គោលដៅយុទ្ធសាស្ត្រ ហើយការផ្អាកការលក់ឱ្យតៃវ៉ាន់គឺ «មិនពាក់ព័ន្ធនឹងសង្គ្រាមជាមួយអ៊ីរ៉ង់នោះទេ»។
ប្រទេសចិន បានទាមទារតៃវ៉ាន់ថាជាខេត្តមួយដែលបានបំបែកខ្លួន និងបានប្រឆាំងយ៉ាងខ្លាំងក្លាចំពោះការលក់អាវុធរបស់ទីក្រុងវ៉ាស៊ីនតោន។
យោងតាមសេចក្តីថ្លែងការណ៍របស់ក្រសួងការបរទេសចិន លោក ស៊ី ជិនពីង បានប្រាប់លោក ត្រាំ នៅទីក្រុងប៉េកាំងក្នុងខែនេះថា បញ្ហាតៃវ៉ាន់គឺជា «បញ្ហាសំខាន់បំផុតនៅក្នុងទំនាក់ទំនងចិន-អាមេរិក»។ លោក ត្រាំ បាននិយាយថា លោកមិនបានធ្វើការប្តេជ្ញាចិត្តណាមួយអំពីតៃវ៉ាន់ទេ ប៉ុន្តែការលើកឡើងរបស់លោកថាអាចប្រើប្រាស់ការលក់អាវុធជាកូនអុកសម្រាប់ចរចា នឹងរំលោភលើគោលនយោបាយដ៏យូរលង់របស់អាមេរិក។
ការអត្ថាធិប្បាយរបស់លោក ត្រាំ កាលពីសប្តាហ៍មុនថា លោកអាចនឹងនិយាយដោយផ្ទាល់ជាមួយប្រធានាធិបតីតៃវ៉ាន់ លោក ឡៃ ឈីងតេ (Lai Ching-te) គឺជាការបំបែកចេញពីពិធីសារការទូតជាច្រើនទសវត្សរ៍ ចាប់តាំងពីឆ្នាំ១៩៧៩ មក ហើយវានឹងធ្វើឱ្យប្រទេសចិនខឹងសម្បារយ៉ាងខ្លាំង។
សមាជិកសភារបស់តៃវ៉ាន់មកពីគណបក្សកាន់អំណាច (DPP) និងលោក ភីធឺ ម៉ាត់ទីស (Peter Mattis) ប្រធានមូលនិធិ Jamestown បានធ្វើសន្និសីទសារព័ត៌មានមួយ ដោយសង្កត់ធ្ងន់ថា បណ្តាញទំនាក់ទំនងរវាងតៃវ៉ាន់ និងអាមេរិកនៅតែរលូន។ លោក ម៉ាត់ទីស បានបន្ថែមថា ការលើកឡើងរបស់លោក ខៅ គឺមិនត្រឹមត្រូវនោះទេ ព្រោះកញ្ចប់អាវុធដែលបានសម្រេចរួចហើយ មិនអាចរងផលប៉ះពាល់ដោយសារជម្លោះអ៊ីរ៉ង់ឡើយ។
លោក ហាំម៉ុន-ឆេមប៊ឺស បាននិយាយថា ប្រសិនបើលោក ត្រាំ អនុម័តការលក់ក្នុងរយៈពេល ៤ ទៅ ៦ សប្តាហ៍ខាងមុខ ភាពមិនប្រាកដប្រជានឹងរលាយបាត់។ ប៉ុន្តែប្រសិនបើពន្យារពេលរហូតដល់រដូវស្លឹកឈើជ្រុះ នៅពេលដែលមានជំនួបកំពូលនានាជាមួយលោក ស៊ី ជិនពីង នោះវា «ដាក់តៃវ៉ាន់ឱ្យស្ថិតក្នុងស្ថានភាពដ៏អាក្រក់មួយ»៕
