គ្រូពេទ្យ និងសាក្សីក្នុងតំបន់ បាននិយាយថា មនុស្សយ៉ាងហោចណាស់ ៣ នាក់ ត្រូវបានសម្លាប់ និងរាប់សិបនាក់ទៀតបានរងរបួស នៅក្នុងការវាយប្រហារតាមអាកាសដ៏ធំមួយរបស់អ៊ីស្រាអែល ទៅលើអគារស្នាក់នៅអាល់ខាយ៉ាលី (al-Kayali) ស្ថិតក្នុងតំបន់ផ្សារដ៏មមាញឹកបំផុតមួយ នៅកណ្តាលទីក្រុងហ្គាហ្សា (Gaza City) មុនឱកាសពិធីបុណ្យសាសនាឥស្លាម អ៊ីដអាល់អាដហា (Eid al-Adha)។
ការិយាល័យរបស់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់ញ៉ាហ៊ូ (Benjamin Netanyahu) បាននិយាយថា យោធាអ៊ីស្រាអែលបានកំណត់គោលដៅលើមេបញ្ជាការផ្នែកប្រដាប់អាវុធរបស់ក្រុមហាម៉ាស គឺលោក ម៉ូហាំម៉េត អូដេហ៍ (Mohammed Odeh) ប៉ុន្មានថ្ងៃបន្ទាប់ពីអ្នកកាន់តំណែងមុនរបស់លោក គឺលោក អ៊ីស អាត់ឌីន អាល់ហាដាដ (Izz ad-Din al-Haddad) ត្រូវបានសម្លាប់នៅក្នុងការវាយប្រហារតាមអាកាសស្រដៀងគ្នានេះ។
នេះគឺជាការវាយប្រហារដ៏សាហាវចុងក្រោយបង្អស់របស់អ៊ីស្រាអែលលើតំបន់ហ្គាហ្សា ទោះបីជាមានបទឈប់បាញ់កំពុងអនុវត្តក៏ដោយ។ ទាំងក្រុមហាម៉ាស និងអ៊ីស្រាអែល មិនទាន់មានការអត្ថាធិប្បាយណាមួយជុំវិញការស្លាប់របស់ លោក អូដេហ៍ ក្នុងការវាយប្រហារនេះនៅឡើយទេ។ ក្រុមជួយសង្គ្រោះបានប្រញាប់ប្រញាល់ទៅកាន់កន្លែងកើតហេតុ ប៉ុន្តែមានការពិបាកក្នុងការឡើងទៅដល់ជាន់ខាងលើ ដោយសារតែកម្រិតនៃការខូចខាតខ្លាំង និងភាពកកស្ទះនៅក្នុងតំបន់នោះ។
ការិយាល័យរបស់លោក ណេតាន់ញ៉ាហ៊ូ បានពិពណ៌នាថា លោក អូដេហ៍ គឺជា «ស្ថាបត្យករម្នាក់» នៃការវាយប្រហារកាលពីថ្ងៃទី៧ ខែតុលា ឆ្នាំ២០២៣ របស់ក្រុមហាម៉ាស ដែលទទួលខុសត្រូវចំពោះការសម្លាប់ ការចាប់ពង្រត់ និងការធ្វើឱ្យរងរបួសដល់ពលរដ្ឋអ៊ីស្រាអែល និងទាហាន IDF ជាច្រើននាក់។
អ៊ីស្រាអែល បានធ្វើការវាយប្រហារជាប្រចាំនៅទូទាំងតំបន់ហ្គាហ្សា ចាប់តាំងពីបទឈប់បាញ់បានចាប់ផ្តើមកាលពីថ្ងៃទី១០ ខែតុលា។ ក្រុមហាម៉ាស បានចោទប្រកាន់អ៊ីស្រាអែល ថាបានវាយប្រហារលើជនស៊ីវិល ខណៈដែលក្រសួងសុខាភិបាលក្នុងតំបន់រាយការណ៍ថា មានអ្នកស្លាប់ជាង ៨០០ នាក់ ក្នុងកំឡុងពេលបទឈប់បាញ់នេះ។
រីឯរដ្ឋភិបាលអ៊ីស្រាអែល បានចោទប្រកាន់ក្រុមហាម៉ាសវិញថា បានរំលោភលើកិច្ចព្រមព្រៀងដោយមិនព្រមទម្លាក់អាវុធ។
ដំណាក់កាលចុងក្រោយនៃផែនការសន្តិភាព ដែលដឹកនាំដោយសហរដ្ឋអាមេរិកសម្រាប់តំបន់ហ្គាហ្សា បានជាប់គាំង ចាប់តាំងពីសហរដ្ឋអាមេរិក និងអ៊ីស្រាអែលបានចាប់ផ្តើមសង្គ្រាមជាមួយអ៊ីរ៉ង់ កាលពីខែកុម្ភៈ។ កិច្ចពិភាក្សាស្តីពីការទម្លាក់អាវុធនៅតែស្ថិតក្នុងភាពទាល់ច្រក ខណៈដែលក្រុមហាម៉ាសបានដំណើរការកងកម្លាំងនគរបាលរបស់ខ្លួនឡើងវិញ និងហាក់ដូចជាកំពុងពង្រឹងអំណាចរបស់ខ្លួនឡើងវិញ។
នៅក្នុងសេចក្តីថ្លែងការណ៍របស់ខ្លួន អ៊ីស្រាអែល បាននិយាយថា ខ្លួននឹងបន្តតាមប្រមាញ់អ្នកណាដែលបានចូលរួមក្នុងការវាយប្រហារ កាលពីថ្ងៃទី៧ ខែតុលា ដែលបណ្តាលឱ្យមនុស្សប្រហែល ១,២០០ នាក់ត្រូវបានសម្លាប់ ហើយ ២៥១ នាក់ផ្សេងទៀត ត្រូវបានចាប់ខ្លួនធ្វើជាចំណាប់ខ្មាំង។
អ៊ីស្រាអែល បានឆ្លើយតបដោយការបើកយុទ្ធនាការយោធាដ៏ធំមួយនៅក្នុងតំបន់ហ្គាហ្សា ដែលបានបណ្តាលឱ្យមនុស្សជាង ៧២,៧៤៤ នាក់ ត្រូវបានសម្លាប់ យោងតាមក្រសួងសុខាភិបាលដែលគ្រប់គ្រងដោយក្រុមហាម៉ាស (តួលេខដែល UN ចាត់ទុកថាគួរឱ្យទុកចិត្ត) និងបានធ្វើឱ្យប្រជាពលរដ្ឋភាគច្រើនបាត់បង់ទីជម្រក។
ការវាយប្រហារចុងក្រោយរបស់អ៊ីស្រាអែលលើតំបន់ហ្គាហ្សានេះ បានកើតឡើងបន្ទាប់ពីមនុស្ស ១១ នាក់ត្រូវបានសម្លាប់ដោយការវាយប្រហាររបស់អ៊ីស្រាអែលនៅក្នុងប្រទេសលីបង់។ លោក ណេតាញ៉ាហ៊ូ បានប្ដេជ្ញាបង្កើនសកម្មភាពយោធានៅក្នុងប្រទេសនោះ ទៅលើទីតាំងដែលអ៊ីស្រាអែលអះអាងថាជាគោលដៅរបស់ក្រុមហេសបូឡា (Hezbollah)៕
