តុលាការកំពូល គ្រោងបើកសវនាការសំណុំរឿង លោក រ៉ុន ឈុន នៅពាក់កណ្តាលខែក្រោយនេះ ជុំវិញបណ្តឹងសារទុក្ខដែលលោកប្រឆាំងទៅនឹងបទចោទរបស់សាលាដំបូងរាជធានីភ្នំពេញ ខណៈគេដឹងថា លោក រ៉ុង ឈុន ជាបុគ្គលសកម្មជំរុញតម្លាភាពសង្គម និងបញ្ហាទឹកដី។
តាមដីកាជូនដំណឹងរបស់អគ្គព្រះរាជអាជ្ញាអមតុលាការកំពូល លោក ស៊ឺ វណ្ណនី ចុះថ្ងៃទី២៥ ខែឧសភា ឆ្នាំ២០២៦ សវនាការសំណុំរឿងលោក រ៉ុង ឈុន ត្រូវធ្វើឡើងនៅថ្ងៃទី១៥ ខែមិថុនា វេលាម៉ោង៨ព្រឹក នៅសាលសវនការទី៣នៃតុលាការកំពូល។
បណ្តឹងសាទុក្ខនេះ គឺ លោក រ៉ុង ឈុន ជំទាស់នឹងបទចោទប្រកាន់ថាបាន «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ដែលសាលាដំបូងរាជធានីភ្នំពេញ បានចោទប្រកាន់ កាលពីឆ្នាំ២០២១ ពោលគឺប្រមាណជាង៥ឆ្នាំមកនេះ ។
លោក រ៉ុង ឈុន ត្រូវគេដឹងថា ជាសកម្មជនសិទ្ធិការងារ សកម្មនិយាយរឿងពលរដ្ឋខ្មែររស់នៅតាមព្រំដែនដែលបានបាត់បង់ដីស្រែចម្ការទៅប្រទេសវៀតណាម តាមរយៈការបោះបង្គោលនាសម័យ លោក ហ៊ុន សែន ដឹកនាំប្រទេស ខណៈបច្ចុប្បន្ន លោក រ៉ុង ឈុន ជាទីប្រឹក្សាគណបក្សកម្លាំងជាតិ។
យ៉ាងណា ភាពសកម្មនេះ លោក រ៉ុង ឈុន ត្រូវបានចាប់ឃុំខ្លួនក្នុងពន្ធនាគារច្រើនដង ដែលចុងក្រោយលោកត្រូវចាប់ឃុំខ្លួនអស់រយៈពេលប្រមាណជា ១៥ ខែ ។
ការផ្តន្ទាទោសជាលើកទីពីរ អំឡុងខែឧសភា ឆ្នាំ២០២៥ ហើយសាលាដំបូងរាជធានីភ្នំពេញ បានសម្រេចផ្តន្ទាទោស លោក រ៉ុង ឈុន ដោយដាក់ទោសពន្ធនាគាររយៈពេល ៤ ឆ្នាំ និងពិន័យជាប្រាក់ចំនួន ៤ លានរៀល (ប្រហែល ១.០០០ ដុល្លារអាមេរិក) និងដកសិទ្ធិធ្វើនយោបាយជាអចិន្ត្រៃយ៍។
មួយវិញទៀត ការដែលោក រ៉ុង ឈុន ប្តឹងសារទុក្ខទៅតុលាការកំពូលនេះ ក្រោយពីសាលាឧទ្ធរណ៍ភ្នំពេញ បានតម្កល់បទចោទលើរូបលោក ដូចសាលក្រមរបស់សាលាដំបូងរាជធានីភ្នំពេញដែរ ដែលករណីនេះ លោក រ៉ុង ឈុន ចាត់ទុកថា ជារឿងអយុត្តិធម៌ ខណៈរូបគ្រាន់តែជាតួអង្គជំរុញឱ្យមានតម្លាភាពសង្គម និងបញ្ហាទឹកដី ដូចមានចែងក្នុងរដ្ឋធម្មនុញ្ញ៕
