លោក បេនហ្សាមីន នេតាញ៉ាហូ (Benjamin Netanyahu) បានថ្លែងថា លោកបានចេញបញ្ជាទៅកងទ័ពអ៊ីស្រាអែល ឱ្យដណ្តើមគ្រប់គ្រង ៧០ភាគរយនៃតំបន់ហ្គាហ្សាស្ទ្រីប (Gaza Strip) ដែលជាការចាត់វិធានការមួយ គំរាមកំហែងដល់ការបំផ្លាញកិច្ចព្រមព្រៀងបទឈប់បាញ់ដ៏ផុយស្រួយស្រាប់ទៅហើយ និងបង្កឱ្យមានស្ថានភាពមនុស្សធម៌ដ៏មហន្តរាយ។
ស្ថិតក្រោមកិច្ចព្រមព្រៀងបទឈប់បាញ់ សម្របសម្រួលដោយសហរដ្ឋអាមេរិក កាលពីខែតុលា កងទ័ពអ៊ីស្រាអែលបានដកថយទៅកាន់ខ្សែបន្ទាត់ខណ្ឌសីមា ដែលបានផ្តល់ឱ្យអ៊ីស្រាអែលនូវការគ្រប់គ្រងផ្ទាល់ ៥៣ភាគរយនៃទឹកដី។
ចាប់តាំងពីពេលនោះមក កងកម្លាំងអ៊ីស្រាអែលបានរំកិលទីតាំងរបស់ខ្លួនជាលំដាប់ ឆ្ពោះទៅទិសខាងលិច ចូលទៅក្នុងពាក់កណ្តាលដែលគ្រប់គ្រងដោយក្រុមហាម៉ាស (Hamas) ហើយបានប្រកាសតំបន់គ្មានមនុស្សរស់នៅ (no man’s land) ដ៏ធំទូលាយ ដោយពួកគេទាមទារសិទ្ធិបើកការបាញ់ប្រហារលើបុគ្គលណា ដែលពួកគេយល់ឃើញថាជាការគំរាមកំហែង។
ពេញមួយរយៈពេលប្រាំបីខែនៃបទឈប់បាញ់ កងកម្លាំងអ៊ីស្រាអែលបានបន្តបើកការបាញ់ប្រហារលើជនជាតិប៉ាឡេស្ទីន និងធ្វើការវាយប្រហារតាមអាកាស ដោយបានសម្លាប់ជនជាតិប៉ាឡេស្ទីនជាង ៩០០នាក់ ចាប់តាំងពីបទឈប់បាញ់បានចាប់ផ្តើម។
ថ្លែងនៅក្នុងសន្និសីទមួយ លោក Netanyahu បានបញ្ជាក់យ៉ាងច្បាស់ពីទំហំនៃគោលដៅទឹកដីរបស់អ៊ីស្រាអែល៖ «បច្ចុប្បន្ន យើងកំពុងតែបង្អត់ និងសង្កត់សង្កិនក្រុមហាម៉ាស។ ឥឡូវនេះ យើងគ្រប់គ្រង ៦០ភាគរយនៃទឹកដីនៅក្នុងតំបន់ហ្គាហ្សាស្ទ្រីប។ កាលពីមុនយើងនៅត្រឹម ៥០ភាគរយទេ រួចយើងបានរំកិលទៅ ៦០ភាគរយ។ បញ្ជារបស់ខ្ញុំគឺត្រូវរំកិលទៅដល់… ៧០ភាគរយ»។
រីឯរដ្ឋមន្ត្រីការពារជាតិ លោក Israel Katz បានថ្លែងថា គោលដៅចុងក្រោយរបស់រដ្ឋាភិបាល គឺចង់ឱ្យជនជាតិប៉ាឡេស្ទីនមួយចំនួនធំ ចាកចេញពីតំបន់ហ្គាហ្សា តាមរយៈ «ការធ្វើចំណាកស្រុកដោយស្ម័គ្រចិត្ត»។ ប៉ុន្តែអ្វីដែលសកម្មជនសិទ្ធិមនុស្សពិពណ៌នាថាគឺជាផែនការសម្អាតពូជសាសន៍ (ethnic cleansing) ដោយធ្វើឱ្យលក្ខខណ្ឌរស់នៅខាងក្នុងតំបន់ហ្គាហ្សា មិនអាចទ្រាំទ្របាន។
ការពង្រីកការគ្រប់គ្រងផ្នែកយោធារបស់អ៊ីស្រាអែល នឹងក្លាយជាការរំលោភបំពានដោយផ្ទាល់ លើបទឈប់បាញ់កាលពីខែតុលា សេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ និងផែនការសន្តិភាពរបស់លោក Donald Trump ដែលបានកំណត់ «ខ្សែបន្ទាត់ពណ៌លឿង» បណ្តោះអាសន្ន ខណ្ឌចែកតំបន់ហ្គាហ្សាជាពីរចំណែក។
លោក Muhammad Shehada អ្នកស្រាវជ្រាវនៅក្រុមប្រឹក្សាអឺរ៉ុបទទួលបន្ទុកទំនាក់ទំនងបរទេស បានថ្លែងថា៖ «ឥឡូវនេះ លោក Netanyahu កំពុងប្រកាសថា កិច្ចព្រមព្រៀងរបស់លោក Trump ទាំងមូល គឺមោឃៈ និងគ្មានតម្លៃ»។
លោកបានបន្ថែមថា ការពង្រីកការគ្រប់គ្រងរហូតដល់ ៧០ភាគរយនៃតំបន់ហ្គាហ្សា មានន័យថា ប្រជាជនប៉ាឡេស្ទីន ២,២លាននាក់ នឹងត្រូវណែនណាន់តាន់តាប់ចូលទៅក្នុងទឹកដីតិចជាងមួយភាគបីនៃទឹកដីដើមរបស់ពួកគេ ដែលជាកន្លែងកកកុញខ្លាំងស្រាប់ទៅហើយ។ «វាលែងខុសពីសាលក្រមប្រហារជីវិតសម្រាប់មនុស្សជាច្រើន ដែលគ្មានកន្លែងត្រូវទៅនោះទេ»។
របាយការណ៍សង្ខេបរបស់អង្គការសហប្រជាជាតិ កាលពីថ្ងៃទី២៤ខែឧសភា បានកត់ត្រានូវការរំលោភបំពានថ្មីៗ ដោយរថក្រោះ និងដ្រូន (drones) អ៊ីស្រាអែល បានរំកិលទៅមុខ និងកំណត់គោលដៅលើរាល់ការផ្លាស់ទីណាមួយដែលនៅជិតខ្សែបន្ទាត់បទឈប់បាញ់។ លើសពីនេះ ក្រុមជីវពលប្រដាប់អាវុធគាំទ្រដោយអ៊ីស្រាអែល ក៏បានបង្កើនសកម្មភាពកាន់តែខ្លាំងឡើង ដោយបានបង្ខំប្រជាជនប៉ាឡេស្ទីនតាមបណ្តោយខ្សែបន្ទាត់ ឱ្យបោះបង់ចោលផ្ទះសម្បែង និងជម្រករបស់ពួកគេ។
លោក Gershon Baskin អ្នកវិភាគអ៊ីស្រាអែលម្នាក់ បានថ្លែងថា លោកជឿជាក់ថាផែនការបទឈប់បាញ់ដើមបានដួលរលំហើយ ដោយសារការចរចាជាមួយក្រុមហាម៉ាសបានបញ្ចប់។ លោកបានថ្លែងថា លោកជឿជាក់ថា សហរដ្ឋអាមេរិកនឹងប្តូរទៅប្រើផែនការបម្រុង (fallback plan) ក្នុងគោលបំណងអនុវត្តការងារកសាងឡើងវិញ នៅក្នុងតំបន់ដែលគ្រប់គ្រងដោយអ៊ីស្រាអែល និងអនុញ្ញាតឱ្យតែជនជាតិប៉ាឡេស្ទីនណា ដែលគ្មានការទាក់ទងនឹងក្រុមហាម៉ាស ប៉ុណ្ណោះ ទើបអាចផ្លាស់ទីមកកាន់ទីនោះបាន។
លោក Baskin បានសន្និដ្ឋានថា៖ «នៅចុងបញ្ចប់ មនុស្សតែម្នាក់គត់ដែលនៅសេសសល់ក្នុងតំបន់របស់ក្រុមហាម៉ាស គឺក្រុមហាម៉ាស និងក្រុមប្រដាប់អាវុធផ្សេងទៀត។ ហើយបន្ទាប់មក អ៊ីស្រាអែលនឹងមានសេរីភាពក្នុងការចាត់ការជាមួយពួកគេ តាមអ្វីដែលពួកគេចង់បាន»៕
