អនុប្រធានាធិបតីសហរដ្ឋអាមេរិក លោក JD Vance បានថ្លែងថា សហរដ្ឋអាមេរិក និងអ៊ីរ៉ង់ នៅតែត្រូវដោះស្រាយចំណុចទាក់ទើរមួយចំនួនទៀត មុនពេលកិច្ចព្រមព្រៀងស្តីពីសង្រ្គាមអាចសម្រេចទៅបាន។ តាមសេចក្តីរាយការណ៍ កិច្ចព្រមព្រៀងនេះ នឹងពន្យារពេលបទឈប់បាញ់រយៈពេល ៦០ថ្ងៃ និងចាប់ផ្តើមការចរចាលើអនាគតនៃកម្មវិធីនុយក្លេអ៊ែររបស់អ៊ីរ៉ង់។
កាលពីព្រឹកថ្ងៃទី២៨ខែឧសភា មន្ត្រីសហរដ្ឋអាមេរិកបានប្រាប់ BBC ថា ប្រទេសទាំងពីរបានព្រមព្រៀងគ្នាលើក្របខណ្ឌនៃកិច្ចព្រមព្រៀងមួយរួចហើយ ដោយរង់ចាំតែការអនុម័តពី លោក Trump និងថ្នាក់ដឹកនាំរបស់អ៊ីរ៉ង់ប៉ុណ្ណោះ។
ប៉ុន្តែ ទីភ្នាក់ងារសារព័ត៌មាន Tasnim របស់អ៊ីរ៉ង់ បានរាយការណ៍ថា កិច្ចព្រមព្រៀងនេះមិនទាន់ត្រូវបានបញ្ចប់ជាស្ថាពរនៅឡើយទេ។
ថ្លែងកាលពីល្ងាចថ្ងៃទី២៨ខែឧសភា លោក Vance បានមានប្រសាសន៍ថា ក្រុមអ្នកចរចាកំពុងជជែកដេញដោលលើចំណុចពាក្យពេចន៍មួយចំនួន រួមទាំង «បញ្ហានៃការចម្រាញ់សារធាតុអ៊ុយរ៉ានីញ៉ូម» ផងដែរ។ លោកបានប្រាប់អ្នកយកព័ត៌មានថា៖ «យើងមិនទាន់ដល់ទីនោះនៅឡើយទេ ប៉ុន្តែយើងកៀកខ្លាំងណាស់ ហើយយើងនឹងបន្តខិតខំប្រឹងប្រែងលើការងារនេះ»។ លោកបានបន្ថែមថា សហរដ្ឋអាមេរិកជឿជាក់ថា ភាគីអ៊ីរ៉ង់កំពុងចរចាដោយ «ចិត្តស្មោះ»។
ចាប់តាំងពីបទឈប់បាញ់បានចូលជាធរមានកាលពីថ្ងៃទី៨ ខែមេសា លោក Trump បានលើកឡើងជាញឹកញាប់ថា ភាគីទាំងពីរកៀកនឹងសម្រេចបាននូវកិច្ចព្រមព្រៀង ប៉ុន្តែរហូតមកដល់ពេលនេះ មិនទាន់មានលទ្ធផលជាដុំកំភួនណាមួយឡើយ ខណៈលោកកំពុងប្រឈមមុខនឹងសម្ពាធកាន់តែខ្លាំងក្នុងការបញ្ចប់សង្រ្គាមពីសំណាក់សម្ព័ន្ធមិត្ត និងសមាជិកសភា។
ម្យ៉ាងវិញទៀត លោក Trump និងមន្ត្រីដទៃទៀតបានព្រមានថា«ជម្រើសទី២ (Option B)» ដែលជាការត្រឡប់ទៅរកប្រតិបត្តិការប្រយុទ្ធគ្នាវិញ គឺនៅតែត្រូវបានដាក់នៅលើតុចរចាដដែល។
ការព្រាងកិច្ចព្រមព្រៀងនេះ អាចអនុញ្ញាតឱ្យមានការធ្វើដំណើរឆ្លងកាត់ដោយ «គ្មានការរឹតត្បិត» តាមច្រកសមុទ្រហ័រមូស (Strait of Hormuz) ហើយអ៊ីរ៉ង់នឹងត្រូវដកមីនចេញពីច្រកផ្លូវនាវាចរណ៍ដ៏ចង្អៀតនេះ ជាការដូរនឹងការដែលសហរដ្ឋអាមេរិកលុបចោលការបិទខ្ទប់ និងផ្តល់ការលើកលែងទណ្ឌកម្ម ដើម្បីអនុញ្ញាតឱ្យអ៊ីរ៉ង់ចាប់ផ្តើមលក់ប្រេងឡើងវិញ។
កាលពីថ្ងៃទី២៧ខែឧសភា ប្រព័ន្ធផ្សព្វផ្សាយរដ្ឋរបស់អ៊ីរ៉ង់បានរាយការណ៍ពីធាតុផ្សំនៃអ្វីដែលពួកគេពិពណ៌នាថា ជាសេចក្តីព្រាងមិនផ្លូវការនៃអនុស្សរណៈ ១៤ចំណុច ដែលរួមមានការដកកងកម្លាំងអាមេរិក និងការប្រគល់ការគ្រប់គ្រងច្រកសមុទ្រហ័រមូសទៅឱ្យអ៊ីរ៉ង់ និងអូម៉ង់ ប៉ុន្តែសេតវិមានបានហៅសេចក្តីព្រាងនោះថាជា «ការប្រឌិតទាំងស្រុង»។ ស្របពេលជាមួយគ្នានេះ រដ្ឋមន្ត្រីក្រសួងហិរញ្ញវត្ថុ លោក Scott Bessent បានបដិសេធមិនបញ្ជាក់ថាកិច្ចព្រមព្រៀងត្រូវបានសម្រេចនោះទេ ដោយថ្លែងថា៖ «វាទាំងអស់នឹងក្លាយជាការសម្រេចចិត្តរបស់ប្រធានាធិបតី»។
ទន្ទឹមនឹងនេះ ទាំងអ៊ីរ៉ង់ និងសហរដ្ឋអាមេរិក បានចោទប្រកាន់គ្នាទៅវិញទៅមកអំពីការរំលោភលើបទឈប់បាញ់ដ៏ផុយស្រួយ។ កងឆ្មាំបដិវត្តន៍ឥស្លាមអ៊ីរ៉ង់ (IRGC) បាននិយាយថា ខ្លួនបានវាយប្រហារលើមូលដ្ឋានទ័ពសហរដ្ឋអាមេរិក បន្ទាប់ពីមានការវាយប្រហាររបស់សហរដ្ឋអាមេរិកលើភាគខាងត្បូងប្រទេសអ៊ីរ៉ង់។ ប្រព័ន្ធផ្សព្វផ្សាយរដ្ឋរបស់អ៊ីរ៉ង់ក៏បានរាយការណ៍ថា បានបាញ់ទម្លាក់ដ្រូនអាមេរិកមួយគ្រឿង ប៉ុន្តែបញ្ជាការដ្ឋានកណ្តាលរបស់សហរដ្ឋអាមេរិកបានបដិសេធ និងអះអាងថា គ្មានយន្តហោះណាមួយត្រូវបានបាញ់ទម្លាក់នោះឡើយ៕
