ពលករខ្មែរម្នាក់បានស្លាប់ ដោយសារត្រូវខ្សែភ្លើងឆក់នៅលើទូកនេសាទមួយនៅប្រទេសថៃ កាលពីថ្ងៃទី២ ខែមិថុនា។
អង្គការសង់ត្រាល់បានស្រង់ប្រភពផ្សព្វផ្សាយដោយនាយកដ្ឋានជលផលថៃ នៅថ្ងៃទី៤ ខែមិថុនា ឱ្យដឹងថា ពលករខ្មែរដែលស្លាប់នោះមានវ័យ ២៦ឆ្នាំ គឺជាសមាជិកនាវិកលើនាវានេសាទមួយគ្រឿងមានទម្ងន់ជិត២០០តោន។
ប្រភពដដែល បញ្ជាក់ថា ការរកឃើញករណីស្លាប់ពលករខ្មែរនេះ នៅពេលនាយកដ្ឋានជលផល អង្គភាពការពារ និងបង្ក្រាបការនេសាទសមុទ្រស៊ីឈុន និងមជ្ឈមណ្ឌលការពារ និងបង្ក្រាបការនេសាទសមុទ្រសុងក្លា ចុះត្រួតពិនិត្យលើនាវានោះ ក្រោយបានទទួលរបាយការណ៍ថា មានអ្នកនៅលើនាវាម្នាក់ត្រូវបានឆក់ចរន្តអគ្គិសនី កាលពីថ្ងៃទី២ ខែមិថុនា ឆ្នាំ២០២៦ នៅម៉ោងប្រមាណជិត៨ព្រឹក។
ក្នុងប្រតិបត្តិការនេះ មន្ត្រីជលផលបានដាក់ពង្រាយទូកល្បាតនេសាទ Y.09-69 ដើម្បីជួយសង្គ្រោះ ប៉ុន្តែ ជនរងគ្រោះជាពលករខ្មែររូបនោះបានស្លាប់ហើយ។ រីឯសាកសពត្រូវបាននាំយកមកច្រាំង ដើម្បីបន្តនីតិវិធី។
វីអូឌី ពុំអាចសុំការឆ្លើយពីករណីនេះ ពីមន្ត្រីនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ស៊ុន មេសា បានទេនៅថ្ងៃទី៤ ខែមិថុនា នេះ។
ជុំវិញករណីនេះ នាយកដ្ឋានជលថៃ មិនទាន់បង្ហាញរបាយការណ៍លម្អិតពីមូលហេតុបណ្ដាលឱ្យឆក់ខ្សែភ្លើងស្លាប់ពលករខ្មែររូបនោះទេ ហើយក៏មិនទាន់ផ្សព្វផ្សាយពីអត្តសញ្ញាណរបស់ពលករខ្មែរនោះដែរ។ ចំណែកមន្ត្រីអង្គការសង់ត្រាល់ប្រចាំប្រទេសថៃ លោក លឹង សុផុន កំពុងតាមដានករណីនេះ៕
