ប្រជាពលរដ្ឋភាគច្រើន បង្ហាញការអស់ជំនឿទៅលើស្ថាប័នរដ្ឋមួយចំនួន ដែលប្រកាសឲ្យពលរដ្ឋសហការផ្តល់ព័ត៌មាន ដើម្បីមន្ត្រីមានមូលដ្ឋានចុះទប់ស្កាត់បទឧក្រិដ្ឋឱ្យបានទាន់ពេល និងមានប្រសិទ្ធភាព ប៉ុន្តែថា ពេលពួកគាត់ទូរសព្ទប្រាប់គ្មានការឆ្លើយតបនោះទេ។
បញ្ហានេះ ពួកគេជំរុញឱ្យរដ្ឋាភិបាលពិនិត្យឡើងវិញ ដើម្បីស្តារមុខមាត់កម្ពុជា ដែលប្រទេសក្រីក្រមួយនេះ ត្រូវបានអន្តរជាតិរកឃើញថា ប៉ុន្មានឆ្នាំចុងក្រោយនេះបានក្លាយជាដែនដីពួកឧក្រិដ្ឋជន។
លោក រស់ សារី រស់នៅខេត្តព្រះសីហនុ ស្នើឲ្យថ្នាក់ដឹកនាំរដ្ឋបាលខេត្តព្រះសីហនុ ក៏ដូចជាសមត្ថកិច្ចជំនាញពាក់ព័ន្ធ ពិចារណាលើបញ្ហានេះឡើងវិញ ដោយថា ទូរសព្ទ Hot Line ជាច្រើនខ្សែ ពេលពលរដ្ឋជួបហេតុការណ៍អ្វីមួយ ហើយរាយការណ៍ជូនសមត្ថកិច្ច គឺមិនមានអ្នកឆ្លើយតបទេ។
លោកថា បើបញ្ហានេះ មិនត្រូវបានកែប្រែទេនោះ វាឆ្លុះបញ្ចាំងថា មន្ត្រីគ្មានការទទួលខុសត្រូវចំពោះសុវត្ថិភាពពលរដ្ឋ និងសន្តិសុខសង្គមទេ។
លោកថា៖ «ចង់រាយការណ៍ពាក់ព័ន្ធបទល្មើសអំពើហិង្សា ឬមួយក៏រឿងបន្ទាន់ណាមួយ ដែលអាចបង្កឲ្យមានគ្រោះថ្នាក់ដល់គាត់។ ចឹងពេលហៅឬខលទៅ អាជ្ញាធរអត់លើកទូរសព្ទ ហើយហេតុការណ៍ហ្នឹងវាអាចកើតឡើងធ្ងន់ធ្ងរ។ តែបើអាជ្ញាធរមកទាន់ពេល ហេតុការណ៍ហ្នឹងវាមិនអាចកើតឡើងទេ។ ដូចជាករណីចោរប្លន់ ពេលឃើញហេតុការណ៍ហ្នឹង ផ្តល់ព័ត៌មានទៅសមត្ថកិច្ច។ ឥឡូវមានពេលខ្លះអត់ហ៊ានទូរសព្ទទៅសមត្ថកិច្ចទេ គឺមានតែខាងព័ត៌មានទេ ដូចទាក់ទងទៅកាន់ទីកន្លែងកើតហេតុ លឿនជាងទាក់ទងទៅអាជ្ញាធរ»។
ពលរដ្ឋរូបនេះ មើលឃើញថា មន្ត្រីនៅតាមស្ថាប័នរដ្ឋភាគច្រើន គឺមិនមែនមន្ត្រីបំរើរាស្ត្រ ដូចថ្នាក់ដឹកនាំស្ថាប័នកំពូលកម្ពុជា តែងក្រើនរំលឹក ត្រូវចាត់ទុករាស្ត្រជាធំនោះទេ។ ប៉ុន្តែផ្ទុយទៅវិញ មន្ត្រីមានឋានៈ ឬតួនាទីខ្ពស់ភាគច្រើន តែងបង្ហាញចរិកកោងកាច សម្លុត គម្រាមកំហែង និងពើងទ្រូងដាក់រាស្ត្រទៅវិញទេ។
ស្រដៀងគ្នាដែរ សម្រាប់ពលរដ្ឋរស់នៅតាមរាជធានីខេត្តផ្សេងទៀត ក៏បានលើកឡើងពីផលវិបាក ក្នុងការជួបជាមួយអាជ្ញាធរ ឬសមត្ថកិច្ច ដូចគ្នាពលរដ្ឋខាងលើដែរ។ ហើយពួកគាត់ សំណូមពរដល់ថ្នាក់ដឹកនាំក្រសួងស្ថាប័នមួយចំនួននោះ ជួយកែលម្អចំណុចអវិជ្ជមាន របស់ខ្លួនឲ្យបានប្រសើរជាងនេះ?។
លោក ជុំ ឌីណា អះអាងថា គាត់ក៏ធ្លាប់បានទូរសព្ទ និងផ្ញើសារសួរនាំទៅ សមត្ថកិច្ចប្រដាប់អាវុធ ប៉ុន្តែមន្ត្រីភាគច្រើនមិនបានឆ្លើយតបដូចគ្នា ។ បញ្ហានេះ លោកជំរុញឱ្យរដ្ឋាភិបាលពិនិត្យឡើងវិញ ដើម្បីឱ្យពលរដ្ឋមានភាពកក់ក្តៅចំពោះសារអំពាវនាវរបស់មេដឹកនាំ។
លោកថា៖ «ធ្លាប់បានទាក់ទងទៅមន្ទីរមួយចំនួនដែរ ក្រោមការគ្រប់គ្រងរបស់ខេត្ត គឺបានទាក់ទងឆាតទៅ Hot Line គឺមិនដែលបានឆ្លើយតបទេ។ មានដូចជា ខាងមន្ត្រីមន្ទីរសុរិយោដី និងមន្ទីរពាក់ព័ន្ធដទៃទៀតជាដើម គឺ៣ខែក្រោយទើបមានការឆ្លើយតប»។
ទាក់ទិនបញ្ហានេះ លោក អំ សំអាត នាយកទទួលបន្ទុកកិច្ចការទូទៅអង្គការលីកាដូ និយាយថា វាមិនមែនជារឿងល្អទេ នៅពេលមន្ត្រីបម្រើរាស្ត្រ តែមិនឆ្លើយតបទៅនឹងកង្វល់របស់រាស្ត្រនោះ។ ចំណុចនេះ អាចនាំឲ្យពលរដ្ឋអស់ទំនុកចិត្ត និងបាត់ជំនឿទៅលើការដឹកនាំនៅតាមមូលដ្ឋាន បើមិនកែលម្អ។
លោកថា៖ «សំខាន់ពាក្យថាមន្ត្រីបំរើរាស្ត្រ គឺនៅពេលរាស្ត្រត្រូវការមន្ត្រី មន្ត្រីត្រូវតែមានការឆ្លើយតបទៅនឹងសំណូមពរ ទៅនឹងកង្វល់ ឬក៏ការផ្តល់ព័ត៌មានផ្សេងៗ ពីប្រជាពលរដ្ឋ ដើម្បីចូលរួមក្នុងការថែរក្សានូវសន្តិសុខ សុវត្ថិភាព សណ្តាប់ធ្នាប់ និងការចូលរួមក្នុងការអភិវឌ្ឍនៅក្នុងមូលដ្ឋាន។ មន្ត្រីបើកាលណាផ្តល់លេខទូរសព្ទដល់ប្រជាពលរដ្ឋ គឺគាត់សង្ឃឹមហើយថា បើមានបញ្ហាអ្វីគាត់នឹងទាក់ទងទៅមន្ត្រីទាំងអស់ហ្នឹង ដើម្បីឲ្យជួយ អញ្ចឹងបើសិនជាផ្តល់លេខទូរសព្ទ តែគ្មានការឆ្លើយតប គឺមិនល្អទេ»។
ប្រហាក់ប្រហែលនេះដែរ លោក សន ជ័យ នាយកប្រតិបត្តិអង្គការ សម្ព័ន្ធគណនេយ្យភាពសង្គមកម្ពុជា ឲ្យដឹងដែរថា រាល់ថ្ងៃនេះ មន្ត្រីជាក្បាលម៉ាស៊ីនដឹកនាំរាជធានីខេត្ត មេប៉ូលិស និងមេប៉េអឹម ជាដើម ហាក់មានគម្លាតឆ្ងាយពីប្រជាពលរដ្ឋ។
យ៉ាងណា លោកចង់ឃើញមន្ត្រីពាក់ព័ន្ធពិនិត្យមើលបញ្ហានេះឡើងវិញ ដើម្បីឱ្យពលរដ្ឋមានជំនឿលើអាជ្ញាធរពាក់ព័ន្ធ ដែលជាអ្នកការពារសណ្តាប់ធ្នាប់សង្គម។
លោកថា៖ «ចំណុចនេះយើងអាចមើលឃើញដែរថា ការសន្យាខ្លះរបស់អាជ្ញាធរ គ្រាន់តែធ្វើឲ្យតែល្អមើល តែជាក់ស្តែងបែរជាមិនមានការឆ្លើយតប មិនមានការអន្តរាគមន៍ទៅលើអ្វីដែលពលរដ្ឋរាយការណ៍។ អញ្ចឹងហើយ ដើម្បីឲ្យការងារមានប្រសិទ្ធភាព អាជ្ញាធរត្រូវបែងចែកវេនការងារប្រចាំការរបស់ខ្លួន។ ក្រុមណាវេនយប់ក្រុមណាវេនថ្ងៃឲ្យជាក់លាក់ ដើម្បីពង្រឹងនូវសុខមាលភាពរបស់អាជ្ញាធរមានសមត្ថកិច្ច ក្នុងការបំពេញការងារដែរ»។
ទាក់ទិនបញ្ហានេះ លោក ហ៊ុន សែន ប្រធានព្រឹទ្ធសភា និងជាមេបក្សកាន់អំណាច តែងបានក្រើនរំលឹកដល់មន្ត្រីក្រោមឱវាទរបស់លោក សូមកុំឲ្យភ្លេចត្រចៀក ហើយត្រូវយកចិត្តទុកដាក់បំរើរាស្ត្រ ដោយមិនត្រូវចាត់ទុកខ្លួនឯងជាចៅហ្វាយរាស្ត្រនោះទេ។ លោកថា ការបង្ហាញឥរិយាបថពើងទ្រូង គឺនាំឲ្យពលរដ្ឋស្អប់ខ្ពើម និងមិនចំណេញទាល់តែសោះ។
លោកថា៖ «មន្ត្រីរបស់យើងជានិច្ចជាកាលត្រូវរំលឹកខ្លួនឯងថា ខ្លួនជាអ្នកបំរើប្រជាជន មិនមែនជាចៅហ្វាយប្រជាជនទេ។ ចំណុចនេះ ត្រូវគិតឲ្យបាន ២៤ម៉ោងលើ២៤ម៉ោង មិនអាចធ្វេសប្រហែសបានមួយនាទីណាឡើយ។ ត្រូវចាំឲ្យច្បាស់ យើងមិនមែនជាចៅហ្វាយប្រជាជនទេ។ យើងជាខ្ញុំបំរើដ៏ស្មោះត្រង់បំផុតរបស់ប្រជាជន។ ចំណុចនេះ ទើបជាចំណុចដែលអ្នកទាំងអស់គ្នាអាចនឹងក្លាយទៅជាមន្ត្រីល្អ ដែលប្រជាជនផ្តល់នូវជំនឿទុកចិត្ត។ បើមិនដូច្នេះទេ ពួកអ្នកនឹងប្រែក្លាយ និងប្រែធាតុទៅជាមន្ត្រីអាក្រក់ ដែលប្រជាជនស្អប់ខ្ពើម»។
ទោះជាបែបនេះក្តី អ្នកឃ្លាំមើល សង្កេតឃើញថា សារដាស់តឿនមន្ត្រីពីសំណាក់មេដឹកនាំនេះ មិនមែនជារឿងថ្មីទេ ហើយថា ប្រសិទ្ធភាពនៃការអនុវត្តក៏បានយូរដែរច្រើនឆ្នាំមកនេះ ដែលធ្វើឱ្យកម្ពុជាមានបញ្ហាចាក់ស្រេះ រួមទាំងឧក្រិដ្ឋកម្មអនឡាញ បទឧក្រិដ្ឋចាប់ជម្រិត រំលោភសិទ្ធិមនុស្ស និងគ្រឿងញៀនជាដើម ខណៈក្បាលម៉ាស៊ីនដឹកនាំបានក្លាយជាប្រព័ន្ធគ្រួសារ និងបក្ខពួកនិយមទៅហើយនោះ។
បរិបទនេះ សន្ទស្សន៍នៃអំពើពុករលួយ ដែលចេញផ្សាយដោយអង្គការតម្លាភាពអន្តរជាតិ នៅដើមឆ្នាំ២០២៦នេះ បានរកឃើញថា កម្ពុជាមានកម្រិតខ្ពស់ជាងគេជាប់គ្នាជិត១០ឆ្នាំ បើធៀបនឹងប្រទេសជាសមាជិកអាស៊ាន ។
ប្រភពនោះរកឃើញថា មូលហេតុចម្បងមកពីប្រព័ន្ធយុត្តិធម៌ មិនអាចកាត់ទោសកំហុសមេដឹកនាំបាន។ ហើយថា ដើម្បីរើខ្លួនចេញពីបញ្ហានេះ ត្រូវពង្រឹងនីតិរដ្ឋ និងត្រូវបើកលំហរប្រជាធិបតេយ្យ និងមានការបោះឆ្នោតដោយសេរី ត្រឹមត្រូវ និងយុត្តិធម៌៕
