ក្រសួងនិងអាជ្ញាធរ បានជួបតំណាងប្រជាពលរដ្ឋជិត ៧០០គ្រួសារ នៅខេត្តព្រះវិហារ ក្រោមហេតុផលដើម្បីស្វែងរកដំណោះស្រាយជម្លោះដីធ្លីជាមួយក្រុមហ៊ុនចំនួនពីរ មានទាំងក្រុមកូនលោក ទ្រី ភាព ដែលការចុះដោះស្រាយនេះ ក្រោយអ្នករងគ្រោះឡើងមកតវ៉ានៅភ្នំពេញ ទាមទារឱ្យមេដឹកនាំជួយទប់ស្កាត់ការរំលោភបំពាន កើតចេញពីគម្រោងផ្តល់ដីសម្បទានដែលរដ្ឋផ្តល់ឱ្យទៅក្រុមហ៊ុន។
សមាគមការពារសិទ្ធិមនុស្សអាដហុក បានឱ្យដឹងនៅលើទំព័រហ្វេសប៊ុករបស់ខ្លួន ដោយមានភ្ជាប់លិខិតរបស់នាយករដ្ឋបាលសាលាខេត្តព្រះវិហារ លោក យ៉ង គឹមហឿង ចុះថ្ងៃទី០២ ខែមិថុនា មកផ្សព្វផ្សាយថា កិច្ចប្រជុំដោះស្រាយទំនាស់ដីធ្លីរវាងពលរដ្ឋ និងក្រុមហ៊ុនចំនួន២។
កិច្ចប្រជុំរកដំណោះស្រាយ ធ្វើឡើងនៅម៉ោង២រសៀលថ្ងៃទី០៤ ខែមិថុនា ឆ្នាំ២០២៦ នៅរដ្ឋបាលខេត្តព្រះវិហារ ដោយមានការចូលរួមពី លោក ផែង គីមស្រេង អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អភិបាលរងខេត្ត រួមទាំងអាជ្ញាធរពាក់ព័ន្ធជាច្រើននាក់ទៀត។
បើតាមអាដហុក កិច្ចប្រជុំនេះ នឹងដោះស្រាយទំនាស់ដីធ្លីរវាងពលរដ្ឋចំនួន ៩២គ្រួសារ មកពីស្រុកសង្គមថ្មី និងពលរដ្ឋចំនួន ៣៩៧គ្រួសារទៀត មកពីស្រុករវៀង ដែលមានជម្លោះ ជាមួយក្រុមហ៊ុនឆាយណាហ្គ្រេតខស ខេមបូឌា អ៊ីនវេសមេន។ រីឯកិច្ចប្រជុំមួយទៀត មានពលរដ្ឋ ២០២គ្រួសារ ដែលមានជម្លោះជាមួយជាមួយក្រុមហ៊ុន គ្លូបលគ្រីន ខេមបូឌា អេនើជី ឌីវេឡុបមេន នៅក្នុងឃុំរីករាយ និងឃុំរួសរាន់ ស្រុករវៀង ខេត្តព្រះវិហារ។
កិច្ចប្រជុំដោះស្រាយទំនាស់ដីធ្លីនេះ កើតឡើងបន្ទាប់ពីពលរដ្ឋបានឡើងតវ៉ាដាក់ពាក្យសុំអន្តរាគមន៍ទៅក្រសួងពាក់ព័ន្ធជាច្រើនលើក ដោយចោទក្រុមហ៊ុនថាបានឈូសឆាយបំផ្លិចបំផ្លាញផលដំណាំរបស់ពួកគាត់ ហើយក៏មានពលរដ្ឋមួយចំនួន រងការគំរាមកំហែងឱ្យឈប់ធ្វើការតវ៉ា។
កាលពីឆ្នាំ២០២៣ រដ្ឋលេខាធិការប្រចាំការទីស្ដីការគណៈរដ្ឋមន្ត្រី លោក ហ៊ីង ថូរ៉ាក់ស៊ី បានចុះហត្ថលេខាអនុញ្ញាតឲ្យក្រុមហ៊ុន គ្លូប៊ល ហ្គ្រីន (ខេមបូឌា) របស់លោក ទ្រី ដាលុច រុករកនិងធ្វើអាជីវកម្មរ៉ែដែកទូទាំងប្រទេស ដោយលើកហេតុផលថា ជួយអភិវឌ្ឍន៍សេដ្ឋកិច្ចជាតិ។
ក្រុមហ៊ុន គ្លូប៊ល ហ្គ្រីន ជាកម្មសិទ្ធិរបស់លោក ទ្រី ដាលុច ត្រូវជាកូនបង្កើត ឧកញ៉ា ទ្រី ភាព ដែលមានរឿងអាស្រូវលក់ដូរឈើប្រណីតខុសច្បាប់នាំចូលទៅក្រៅប្រទេស និងជាឈ្មួញឈើដ៏ល្បីល្បាញនៅកម្ពុជា។
ចំណែក វិវាទដីធ្លីរវាងពលរដ្ឋនៅស្រុកសង្គមថ្មី និងស្រុករវាងវិញ កើតឡើងក្រោយពីរដ្ឋាភិបាល បានផ្តល់ដីសម្បទានសេដ្ឋកិច្ចសម្រាប់វិនិយោគដំណាំកសិ-ឧស្សាហ៍កម្ម ឱ្យក្រុមហ៊ុន ឆាយណាហ្គេ្រត ខស (ខេមបូឌា) អ៊ិនវេសមេន លើផ្ទៃដីទំហំ ៥ ៩៨០ហិកតា តាមរយៈអនុក្រឹត្យ ចុះថ្ងៃទី២៤ ខែកុម្ភៈ ឆ្នាំ២០១២។ នេះបើតាមសេចក្ដីជូនដំណឹងរបស់រដ្ឋបាលខេត្តព្រះវិហារ ចុះថ្ងៃទី២៧ ខែមីនា ឆ្នាំ២០២៦។
លិខិតដដែលបន្តថា ក្រោយមានការសម្របសម្រួលរវាងប្រជាពលរដ្ឋ ជាមួយភាគីក្រុមហ៊ុនវិនិយោគជាច្រើនលើក ភាគីខាងក្រុមហ៊ុនយល់ព្រមដោះស្រាយតាមយន្តការឈ្នះៗ ដោយផ្តល់ជូនប្រជាពលរដ្ឋដែលចូលមករំលោភកាន់កាប់លើទីតាំងដីរដ្ឋដែលបានចុះបញ្ជីរួចនេះ ក្នុង ១ហិកតា ជាថវិកាចំនួន ១ ២០០ ០០០រៀល (មួយលាន ម្ភៃម៉ឺនរៀល) ជាថ្នូរនឹងការចាកចេញ និងទុករយៈពេល ១៥ថ្ងៃ ដោយគិតចាប់ពីថ្ងៃទី៣០ ខែមីនា ឆ្នាំ២០២៦ រហូតដល់ថ្ងៃទី១៣ ខែមេសា ឆ្នាំ២០២៦ ជាកំហិត។
ទោះជាយ៉ាងណា តំណាងប្រជាពលរដ្ឋទាំង ៣៩៧ គ្រួសារ បានអះអាងថា ពួកគាត់បានអាស្រ័យផលលើដីនោះ តាំងពីឆ្នាំ២០០០មក ខណៈក្រុមហ៊ុនបានចូលទៅឈូសឆាយលើដីនោះនៅឆ្នាំ២០១២។ ក្រុមតំណាងពលរដ្ឋចាត់ទុកការផ្តល់ដីដែលគាត់បាននិងកំពុងអាស្រ័យផល ទៅឱ្យក្រុមហ៊ុន ពីសំណាក់អាជ្ញាធររដ្ឋ ថាជារឿងមិនត្រឹមត្រូវ និងបានស្នើដល់រដ្ឋាភិបាល កាត់ឆ្វៀលដីជណពួកគាត់បានអាស្រ័យផលវិញ ព្រោះពួកគាត់រស់ពឹងផ្អែកលើដីនោះដើម្បីជីវភាព៕
