ប្រជាពលរដ្ឋជិត ១០០នាក់ នៅសង្កាត់ស្វាយដង្គំ ក្រុងសៀមរាប នៅថ្ងៃព្រហស្បតិ៍នេះ បានប្រមូលផ្តុំតវ៉ានៅមុខសាលាខេត្តសៀមរាប ស្នើឱ្យអាជ្ញាធរពន្លឿនការដោះស្រាយបញ្ហាដីធ្លីនៅតំបន់ឃ្លាំងទឹកទំនប់៧៨ ដែលត្រូវបានជនខិលខូច និងក្រុមហ៊ុនឯកជន រំលោភយកទាំងបំពាន ខណៈដែលឃ្លាំងទឹកបុរាណមួយនេះ បានក្លាយជាដីគោករាក់អស់មួយផ្នែក ហើយវានឹងប៉ះពាល់ដល់ការអាស្រ័យផលបែបប្រពៃណីរបស់ពលរដ្ឋរាប់រយពាន់គ្រួសារ បើសិនមិនមានការជួយសង្គ្រោះបានទាន់ពេល។
ប្រជាពលរដ្ឋរស់នៅសង្កាត់ស្វាយដង្គំ លោក អ៊ន់ ប្រុស បានប្រាប់វីអូឌីនៅព្រឹកថ្ងៃទី០៤ ខែមិថុនានេះថា ពលរដ្ឋចំនួន ៧៥នាក់ រស់នៅសង្កាត់ស្វាយដង្គំ បាននាំគ្នាទៅតវ៉ានៅសាលាខេត្តសៀមរាប ដើម្បីស្នើសុំឱ្យថ្នាក់ដឹកនាំខេត្ត ជួយទប់ស្កាត់ករណីជនខិលខូច និងក្រុមហ៊ុនឯកជន ដែលពួកគាត់ពុំស្គាល់ឈ្មោះ បាននិងកំពុងទន្ទ្រានយកដីឃ្លាំងទឹកទំនប់៧៨ អស់ជាច្រើនហិកតា ចាប់តាំងពីឆ្នាំ២០១៤មក។
លោកបន្តថា កន្លងមក ពលរដ្ឋធ្លាប់បានតវ៉ា និងស្នើសុំអន្តរាគមន៍ពីអាជ្ញាធរសង្កាត់ និងអាជ្ញាធរក្រុងដែរ ប៉ុន្តែនៅពុំទាន់មានលទ្ធផលជាផ្លែផ្កា ទើបពួកគាត់បន្តមកថ្នាក់ខេត្តទៀត។
លោកថា៖ «លើកមុនខ្ញុំទៅខាងសាលាក្រុងម្តងហើយ ដល់ពេលខាងសាលាក្រុងនោះគាត់ដាក់កិច្ចសន្យា កិច្ចសន្យាជាមួយអ្នកដែលធ្វើផ្ទះនៅក្នុងតំបន់ឃ្លាំងទឹកនោះ កិច្ចសន្យាតាំងពី ថ្ងៃទី៣១ ខែ៣ ហើយខាងក្រុងដាក់ឱ្យរុះរើថ្ងៃទី១០ ខែ៤ ហើយដល់ខែ៦ ថ្ងៃទី៣ទី៤ហើយ គាត់អត់ទាន់រើទៀត ឥឡូវមានតែមកខាងខេត្តឱ្យជួយដោះស្រាយ។ បើសម្រាប់ខ្ញុំ ហើយនិងប្រជាពលរដ្ឋក្នុងសង្កាត់ហ្នឹង គាត់ចង់ឱ្យពន្លឿនការដោះស្រាយឱ្យជនដែលធ្វើផ្ទះក្នុងឃ្លាំងទឹកហ្នឹងរុះរើឱ្យឆាប់ៗ»។
ឃ្លាំងទឹកបុរាណទំនប់៧៨ មានផ្ទៃទឹករាប់ពាន់ហិកតានៅរដូវវស្សា ហើយនៅរដូវប្រាំងអាចស្តុកទឹករាប់លានម៉ែត្រគូប អំណោយផលគាប់ប្រសើរដល់កសិករបង្ហូរទឹកដាក់ស្រែប្រាំង។ ឃ្លាំងទឹកនេះ ក៏ជាជង្រុកត្រីសាច់ និងបន្លែធម្មជាតិដល់កសិករអាស្រ័យផល បែបប្រពៃណីជាច្រើនឆ្នាំមកហើយ និងមានផ្នែកខ្លះ មានព្រៃលិចទឹក បឹងឈូក និងដុះព្រលិតរំចង់ ផ្ដល់សម្រស់ស្រស់ស្អាតទាក់ទាញភ្ញៀវទេសចរ ជាប់នឹងភ្នំក្រោម កៀកនឹងតំបន់បឹងទន្លេសាប ដែលភ្ញៀវទេសចរចូលចិត្តទៅទស្សនាតំបន់នោះ។
កន្លងមក ប្រជាពលរដ្ឋរាប់រយនាក់ រស់នៅសង្កាត់ចំនួន៣ រួមមានសង្កាត់ស្វាយដង្គំ សង្កាត់សំបួរ និងសង្កាត់សៀមរាប បាននាំគ្នាតវ៉ាទៅអាជ្ញាធរសង្កាត់ និងសាលាក្រុង ជារឿយៗចាប់តាំងពីឆ្នាំ២០១៤ រហូតមកទល់ពេលនេះ ដើម្បីស្នើឱ្យអាជ្ញាធរជួយការពារឃ្លាំងទឹកបុរាណនេះ ស្របពេលដែលមានសកម្មភាពចាក់ដីលុបផ្នែកខ្លះ និងជីកយកអាចម៍ដីលក់ ធ្វើអាជីវកម្ម ពីសំណាក់ក្រុមអ្នកមានលុយ អស់ប្រមាណជាង ៣០០ហិកតា។
ពលរដ្ឋរស់នៅសង្កាត់ស្វាយដង្គំមួយរូបទៀត លោក ទិត ចន្ថា មានប្រសាសន៍ថា កន្លងមក ខាងអាជ្ញាធរក្រុងធ្លាប់បានចេញឱសានវាទឱ្យជនខិលខូចទាំងនោះរុះរើផ្ទះ ឬសំណង់ចេញពីដីឃ្លាំងទឹកទំនប់៧៨នេះដែរ ប៉ុន្តែមកដល់ពេលនេះ ពួកគេមិនទាន់រុះរើនៅឡើយ ទើបពលរដ្ឋនាំគ្នាទៅរកថ្នាក់ខេត្តឱ្យជួយបន្ថែមទៀត។ លោកថា ពលរដ្ឋស្នើដល់អាជ្ញាធរខេត្តមានចំណាត់ការទៅលើសំណង់ខុសច្បាប់ទាំងនោះ និងបោះបង្គោលព្រំដីតំបន់ឃ្លាំងទឹកដែលជាទ្រព្យសម្បត្តិរួមក្នុងសហគមន៍ ឱ្យបានច្បាស់លាល់ ដើម្បីជៀសវាងការទន្ទ្រានបន្ថែមទៀតពីជនខិលខូច។
លោកថា៖ «គឺខ្ញុំបាទចង់បានដំណោះស្រាយសមស្របមួយ យោងទៅតាមច្បាប់ ទៅតាមសិទ្ធិអំណាចរបស់ពលរដ្ឋ ដែលមានសិទ្ធិប្រើប្រាស់នៅលើដីឃ្លាំងទឹកជារួម ដោយគ្មានបុគ្គលណាអាចយកមកកាន់កាប់ ឬហែកជ្រៀកគប់គិតគ្នាលក់នូវដីឃ្លាំងទឹកហ្នឹងទេ»។
ប្រជាសហគមន៍ទាំងនោះ ស្នើឱ្យអាជ្ញាធរអនុវត្តច្បាប់ចំពោះជនល្មើស ទើបអាចការពារឃ្លាំងទឹកនេះយូរអង្វែង ព្រោះជនខិលខូចនៅតែបន្តដាក់លុបផ្នែកខ្លះ ដោយសារទីផ្សារដីឡើងថ្លៃ។
វីអូឌី មិនអាចសុំការអត្ថាធិប្បាយជុំវិញករណីនេះ ពីអភិបាលខេត្តសៀមរាប លោក ប្រាក់ សុភ័ណ បានទេនៅថ្ងៃទី០៤ ខែមិថុនានេះ។
បើតាមក្រុមប្រជាពលរដ្ឋ ក្នុងជំនួបជាមួយមន្ត្រីរដ្ឋបាលខេត្ត និងជួបតាមទូរស័ព្ទជាមួយអាជ្ញាធរក្រុងនោះ គឺខាងអាជ្ញាធរក្រុងថា នឹងចេញលិខិតបន្ថែមទៀតឱ្យម្ចាស់សំណង់ខុសច្បាប់ទាំងនោះរុះរើចេញ ឱ្យបានមុនថ្ងៃទី១១ខែមិថុនា សប្តាហ៍ក្រោយនេះ។
កន្លងមក ចៅសង្កាត់ស្វាយដង្គុំ ក្រុងសៀមរាប លោក ហ៊ា ហាវ ធ្លាប់បានឱ្យដឹងនាពេលថ្មីៗនេះថា អាជ្ញាធរក្រុង និងសមត្ថកិច្ចបានចុះដោះស្រាយបញ្ហានេះបានមួយចំនួនហើយ ដោយចាត់ឱ្យអ្នកដែលបំពានឃ្លាំងទឹកនេះ ធ្វើកិច្ចសន្យាបញ្ឈប់ និងរុះរើផ្ទះចេញពីតំបន់នោះ។ លោកថា អាជ្ញាធរបានជូនដំណឹង និងផ្សព្វផ្សាយហាមពលរដ្ឋមិនឱ្យចាក់ដីលុបឃ្លាំងនេះបន្តទៀតទេ។
លោកថ្លែងថា៖ «ខាងលើ(ថ្នាក់លើ) កំពុងសិក្សាមើលផែនទីកំណត់ឱ្យគាត់ តែកន្លែងនោះយើងហាមមិនឱ្យធ្វើអីតទៀតទេ »។
អនុប្រធានផ្នែកសិទ្ធិមនុស្ស និងដីធ្លី នៃសមាគមការពារសិទ្ធិមនុស្សអាដហុក លោក យិន ម៉េងលី មានប្រសាសន៍ថា បើឃ្លាំងទឹកទំនប់៧៨ ជាដីសាធារណៈរបស់រដ្ឋ ដូច្នេះការរំលោភយក ឬការសាងសង់សំណង់រំលោភយកដីសាធារណៈរបស់រដ្ឋ ដោយគ្មានការអនុញ្ញាត គឺជាអំពើខុសច្បាប់ ដែលអាជ្ញាធរត្រូវមានវិធានការរដ្ឋបាល ឬវិធានទប់ស្កាត់ការទន្ទ្រាន ដើម្បីការពារដីទ្រព្យសម្បត្តិរបស់រដ្ឋ។
លោកថា៖ «ចឹងរដ្ឋបាលខេត្តត្រូវពិនិត្យមើលឡើងវិញ រដ្ឋបាលខេត្តគឺជាទី១ ជាប្រធាន គណៈកម្មការគ្រប់គ្រងប្រើប្រាស់ដីធ្លីរបស់រដ្ឋ ចឹងពិនិត្យមើលឡើងវិញដើម្បីចាត់វិធានការសមស្របណាមួយក្នុងការឱ្យជនហ្នឹងរុះរើដោយស្ម័គ្រចិត្ត ទី១ទុករយៈពេល ទី២បើសិនជាជនហ្នឹងមិនព្រមធ្វើការរុះរើទេ រដ្ឋបាលក្រុងអាចមានវិធានការរដ្ឋបាល អាចធ្វើការកម្ទេចចំពោះសំណង់ ចំពោះរបងណាដែលរំលោភមកលើដីសាធារណៈ ហើយបើនៅរឹងទទឹងទៀត អាចធ្វើការប្តឹងផ្តន្ទាទោសទៅតាមច្បាប់ ទៅតុលាការ ពីបទ រំលោភបំពានលើទ្រព្យសម្បត្តិសាធារណៈ ចាត់វិធានការរបៀបនេះ បានធ្វើឱ្យពលរដ្ឋគាត់មើលឃើញថា ការអនុវត្តច្បាប់របស់រដ្ឋបាល របស់អាជ្ញាធរមានតម្លាភាព មិនមែនធ្វើបានតែទៅលើពលរដ្ឋទន់ខ្សោយទេ»។
ច្បាប់ភូមិបាលឆ្នាំ២០០១ មាត្រា២៥៩ និងមាត្រា២៦១ ចែងថា ការប៉ះពាល់កម្មសិទ្ធិនៃទ្រព្យសម្បត្តិសាធារណៈរបស់រដ្ឋ ត្រូវផ្ដន្ទាទោសពិន័យជាប្រាក់ពី ៥លានរៀល ដល់ ៥០លានរៀល និងផ្ដន្ទាទោសដាក់ពន្ធនាគារពី ១ (មួយ) ឆ្នាំ ដល់ ៥ (ប្រាំ) ឆ្នាំ៕
