ករណីចាប់ជំរិត ឈានដល់ឃាតកម្មសម្លាប់មនុស្ស និងប្លុងសាកសពចោលក្នុងទិដ្ឋភាពឃោរឃៅ កំពុងបន្លាចផ្លូវចិត្តប្រជាពលរដ្ឋកម្ពុជា ឱ្យរស់នៅលាយឡំជាមួយភាពភ័យខ្លាច និងក្ដីបារម្ភក្នុងរយៈពេលប៉ុន្មានខែចុងក្រោយនេះ។
ប្រជាពលរដ្ឋរស់នៅរាជធានីភ្នំពេញ អ្នកស្រី សៀ ដាវី ប្រាប់វីអូឌីឱ្យដឹងថា អ្នកស្រីបារម្ភខ្លាចករណីចាប់ជំរិត គំរាមសម្លាប់ ធ្លាក់លើសមាជិកគ្រួសារអ្នកស្រីនៅថ្ងៃណាមួយ ស្របពេលជីវភាពកំពុងខ្វះខាតស្រាប់ទៅហើយនោះ។
អ្នកស្រីថា៖ «ចេះតែព្រួយបារម្ភ! ដូចជាខ្ញុំផ្ទាល់ ឬបងប្អូនអីចឹង យើងចេះតែនិយាយប្រាប់គ្នាពាក់ព័ន្ធនឹងរឿងសកម្មភាពបទល្មើសអីហ្នឹង ព្រោះយើងមើលមិនឃើញដែរ។ ដូចក្មេងៗដើរលេងអីចឹង ចេះតែប្រាប់បងប្អូនទៅថា ឱ្យឧស្សាហ៍មើលកូនៗផង ខ្លាចគេចាប់ គេអីចឹងទៅ។ យើងមិនមែនជាអ្នកមានអីទេ បើគេចាប់យកទៅ យើងដឹងទៅរកលុយឯណាបានយកទៅឱ្យគេ? អ៊ីចឹងវាបារម្ភពីសុវត្ថិភាពក្មេងៗផង និងសុវត្ថិភាពខ្លួនឯងផង។ ខ្លាចអាទីមួយ រឿងចោរ និងរឿងអីហ្នឹង។ សូម្បីតែបើកទ្វារលក់ដូរត្រឹមម៉ោង ៨ អីហ្នឹងគឺបិទអស់ហើយ អត់ហ៊ាននៅដល់យប់ជ្រៅទេ គឺល្មមៗបិទទ្វារហើយ»។
យោងតាមការចុះផ្សាយព័ត៌មាន ក្នុងរយៈពេលមិនដល់មួយសប្ដាហ៍ សមត្ថកិច្ចបានរកឃើញករណីចាប់ជំរិត និងឃាតកម្មប្លុងសាកសពចោលដល់ទៅពីរករណី ដោយមានមនុស្សស្លាប់ចំនួន ៣នាក់ ក្នុងនោះពីរនាក់ជាជនជាតិខ្មែរ។ ជនល្មើសបានសហការគ្នាជាក្រុមក្នុងការចាប់ជំរិត និងសម្លាប់ជនរងគ្រោះរួចដឹកសាកសពទៅប្លុងចោល ដោយមួយករណី ប្លុងចោលក្បែរគំនរសម្រាមខណ្ឌដង្កោ និងករណីមួយទៀត យកទៅបោះចោលក្នុងលូហើយចាក់បេតុងពីលើ។
ពលរដ្ឋម្នាក់ទៀតនៅរាជធានីភ្នំពេញ កញ្ញា ស៊ុន រ៉ានី តក់ស្លុតនឹងភាពឃោរឃៅទាំងនេះ និងបារម្ភថាសកម្មភាពនេះអាចកើតឡើងកាន់តែច្រើនក្នុងសង្គម ប្រសិនបើអាជ្ញាធរមិនរឹតបន្តឹងការដាក់ទោសទណ្ឌលើជនល្មើស។ កញ្ញាកត់សម្គាល់ថា ករណីឃាតកម្មសាហាវឃោរឃៅភាគច្រើនប្រព្រឹត្តដោយជនបរទេស ដែលទាមទារឱ្យអាជ្ញាធរត្រូវបង្កើនការត្រួតពិនិត្យលើការរស់នៅរបស់ពួកគេ។
កញ្ញា ស៊ុន រ៉ានី និយាយថា៖ «យើងអត់ដឹងថាពួកគាត់ហ្នឹង ជាមនុស្សល្អឬក៏អាក្រក់ ឬក៏ជាមនុស្សបែបណា ដែលគាត់មកហើយ មិនត្រឹមតែគាត់មកហើយ គាត់បង្កនូវវិនាសកម្ម ក៏ដូចជាបញ្ហាមិន ដូចជាឃាតកម្ម ឬក៏បញ្ហាអសន្តិសុខផ្សេងៗនៅក្នុងប្រទេសយើងផងដែរ។ អានេះក៏សូមឱ្យ សំណូមពរមួយទៀត ទៅលើការរឹតបន្តឹងទៅលើជនអន្តោប្រវេសន៍ដែលធ្វើដំណើរចូលមកក្នុងប្រទេសកម្ពុជាផងដែរ»។
ករណីចាប់ជំរិត ឈានដល់ការសម្លាប់ជនរងគ្រោះ បានកើតមានជាច្រើនករណី ដោយភាគច្រើននៃជនល្មើស គឺជាជនបរទេស។ ទោះយ៉ាងណា គេក៏ឃើញមានពលរដ្ឋខ្មែរ ប្រព្រឹត្តបទល្មើសឃោរឃៅនេះផងដែរ ក្នុងនាមជាអ្នកផ្សំគំនិត និងបង្កលក្ខណៈងាយស្រួលឱ្យមេខ្លោងដែលជាជនបរទេស។
ទាក់ទិនរឿងនេះ ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព(PDP) លោក យង់ គិមអេង កត់សម្គាល់ឃើញកត្តាធំៗបួន ដែលនាំឱ្យមានការចាប់ជំរិត និងឃាតកម្មឃោរឃៅ រួមមាន គ្រឿងញៀននិងគ្រឿងស្រវឹង ភាពក្រីក្រ ភាពឥតការងារធ្វើ និងការត្រាប់តាមវីដេអូ ឬខ្សែភាពយន្ត។ លោកបន្តថា ករណីនេះទាមទារឱ្យអាជ្ញាធរ និងរដ្ឋាភិបាល បង្កើនការអនុវត្តគោលនយោបាយភូមិឃុំមានសុវត្ថិភាព បង្កើតប៉ុស្តិ៍យាម លុបបំបាត់អំពើហិង្សា ការលួចឆក់ប្លន់ជាដើម។
លោក យង់ គិមអេង ថ្លែងថា៖ «ហើយរដ្ឋាភិបាលក៏ត្រូវតែដោះស្រាយបញ្ហាសង្គមដែលកើតមានឱ្យបានឆាប់ដែរ ពីព្រោះអាជ្ញាធរគ្នាមិនអាចទៅដោះស្រាយបញ្ហាសង្គមជារួមនេះទេ ប៉ុន្តែមានតែរដ្ឋទេដែលអាចមានលទ្ធភាពក្នុងការដោះស្រាយបញ្ហាសង្គម ដូចជា ភាពក្រីក្រ ដូចជាភាពអត់ការងារធ្វើ ដូចជាការខ្វះជំនាញរបស់ប្រជាពលរដ្ឋជាដើម ដើម្បីឱ្យគាត់កាន់តែមានជំនាញ កាន់តែមានការងារធ្វើច្រើនអីចឹងទៅ»៕
