ពលរដ្ឋឃុំល្បើក ស្រុកឈូក ខេត្តកំពត ដែលធ្លាប់តែរស់នៅអាស្រ័យនឹងព្រៃស្រោង ដោយការជីកដំឡូង គាស់ទំពាំង និងកាប់ឫស្សី ឃ្វាលគោជាដើម នៅក្នុងសហគមន៍ភ្នំត្នោតនោះ ឥឡូវស្ថានភាពរបស់ពួកគេត្រូវបានផ្លាស់ប្ដូរទាំងស្រុង ក្រោយក្រុមហ៊ុនរ៉ែរបស់អ្នកមានឥទ្ធិពលម្នាក់ធ្វើអាជីវកម្មជីកកកាយ និងបំផ្ទុះដីថ្ម គាស់រំលើងយករ៉ែជិត ២០ទីតាំង ជាង ១ឆ្នាំមកនេះ។
ពលរដ្ឋម្នាក់ក្នុងចំណោមពលរដ្ឋរងគ្រោះជាង ២០គ្រួសារ ដែលរស់នៅក្បែររណ្ដៅរ៉ែរបស់ក្រុមហ៊ុនក្នុងតំបន់ភ្នំត្នោត ស្ថិតនៅភូមិត្រពាំងគគីរ ឃុំល្បើក ស្រុកឈូក បានអះអាងថា ពួកគេបង្ខំចិត្តស៊ូទ្រាំរស់នៅទាំងភាពភ័យខ្លាច ដោយសារជញ្ជាំងផ្ទះរបស់ខ្លួនបានប្រេះស្រាំយ៉ាងដំណំ បណ្ដាលមកពីការបំផ្ទុះដីយករ៉ៃ ជាង ១ឆ្នាំមកហើយ។
អ្នកស្រី ខឹម នួន ថ្លែងប្រាប់វីអូឌីដោយទឹកមុខអស់សង្ឃឹមថា រាល់ថ្ងៃអ្នកស្រីគ្មានជម្រើសអ្វីក្រៅពីបន្តរស់នៅក្នុងផ្ទះថ្មផ្ទាល់ដី ដែលរងការប្រេះស្រាំនេះទេ ពីព្រោះអ្នកស្រីត្រូវចិញ្ចឹមចៅជិត ១០នាក់ក្នុងបន្ទុក ដែលកូនៗអ្នកស្រីត្រូវទៅធ្វើការរកស៊ីចិញ្ចឹមជីវិតនៅឆ្ងាយពីផ្ទះ និងនៅរាជធានីភ្នំពេញ។
ជាអ្នកភូមិរស់នៅទីនេះតាំងពីកំណើត អ្នកស្រី ខឹម នួន ហាក់អន់ចិត្តយ៉ាងខ្លាំង នៅពេលដែលអាជ្ញាធររបស់ខ្លួនមិនអើពើដោះស្រាយទាមទារសំណងខូចខាតផ្ទះពីក្រុមហ៊ុនជីករ៉ែ ក្រៅតែពីចុះប្រាប់ឱ្យពួកគាត់ការពារសុវត្ថិភាព នៅពេលក្រុមហ៊ុនបំផ្ទុះរករ៉ែ ប៉ះពាល់ផ្ទះពលរដ្ឋ។
អ្នកស្រី ខឹម នួន និយាយថា៖ «កាលពីឆ្នាំ២០២៥ ក្រុមហ៊ុនគេមកជីកហើយគេបាញ់ថ្មហ្នឹងវារញ្ជួយដីអញ្ចឹងទៅ វាប្រេះ។ ពេលយើងប្រេះហើយយើងប្រាប់គេភូមិអញ្ចឹងទៅប្រាប់ភូមិអីប្រាប់កន្លែងអាជ្ញាធរគេហ្នឹង គេថាឲ្យយើងប្រយ័ត្នទៅ ព្រោះអីគេត្រូវតែធ្វើហើយក្រុមហ៊ុនហ្នឹង បើយើងអត់ប្រយ័ត្នខ្លាចមានគ្រោះថ្នាក់ អញ្ចឹងឲ្យយើងប្រយ័ត្ន។ អញ្ចឹងក៏ខ្ញុំមិនដឹងថា ទៅស្នើដល់កន្លែងណាហើយក៏ប្រាប់ទៅកន្លែងទីណាទៀតទេ ខ្ញុំដល់ប្រាប់គេភូមិឃុំហើយក៏គេអត់អើពើខ្ញុំក៏ស្ងាត់ស្ងៀមទៅ»។
ផ្ទះអ្នកស្រី ខឹម នួន នៅជាប់នឹងរបងព័ទ្ធស័ង្កសីជិតឈឹងរបស់ក្រុមហ៊ុនជីករ៉ែដ៏ធំ។ បើតាមការអះអាងរបស់អ្នកស្រី ក្រុមហ៊ុនជីករ៉ែនេះ បានចាប់ផ្ដើមដំណើរការនៅដើមឆ្នាំ២០២៥។ អ្នកស្រីរំលឹកថា កាលពីក្រុមហ៊ុនខួងរករ៉ែដំបូងនៅជាប់ផ្ទះរបស់ខ្លួន ពេលនោះសំឡេងផ្ទុះបានលឺឡើងយ៉ាងកងរំពង និងធ្វើឱ្យចៅតូចៗរបស់អ្នកស្រីភ័យខ្លាច និងញ័រណែនដើមទ្រូងជាដើម។ ពេលខ្លះមានកម្ទេចថ្មទំហំជិត កន្លះគីឡូក្រាម ខ្ទាតរំលងដំបូលផ្ទះក៏មាន ពេលក្រុមហ៊ុនបាញ់ថ្មម្ដងៗ។ ចំណែកផ្សែងក៏ចាប់ផ្ដើមហុយទ្រលោមខ្មួលខ្មាញ់មើលគ្នាលែងយល់ ដែលបង្ខំឱ្យអ្នកស្រីនាំចៅតូចៗរត់កាត់វាលស្រែទៅផ្ទះពលរដ្ឋផ្សេងទៀត អង្គុយចាំទម្រាំក្រុមហ៊ុនពន្លត់គ្រឿងចក្រ ទើបអាចត្រឡប់មកផ្ទះវិញបាន។
អ្នកស្រី ខឹម នួន បន្តថា៖ «កូនខ្ញុំអាចៅតូចហ្នឹងពេលវាផ្ទុះខ្លាំងវាថា ម៉ែអើយចុងម៉ែអើយចុកទ្រូងកូនណាចុកទ្រូងកូនណា។ ម៉ែអូនអូនអូនហត់ណាស់ វាថា អ៊ីចឹងវាហត់ពេកវាអាហ្នឹងវារញ្ជួយឡើងអ៊ីចឹងទៅ។ អ៊ីចឹងហើយខ្ញុំចេះតែនាំចៅគាត់រត់ទៅផ្ទះគេលិចនោះ។ រាល់ថ្ងៃតែគេរៀបផ្ទុះ មិនថា ពិបាក មិនថាស្រណុក ក៏នាំចៅរត់រហូតទាល់តែគេឈប់ផ្ទុះបានមកវិញ»។
ឆ្លើយតបនឹងកង្វល់របស់ពលរដ្ឋរងគ្រោះរូបនេះ មេឃុំល្បើក លោក ឯម ភៀង ថ្លែងប្រាប់វីអូឌីនៅថ្ងៃទី៥ ខែមិថុនា ថា លោកទើបបានទទួលព័ត៌មានថា តំណាងក្រុមហ៊ុនរ៉ែ លោក ប៊ូ ម៉ៅ គ្រោងទៅជួបអ្នកស្រី ខឹម នួន ដើម្បីពិភាក្សាដោះស្រាយសំណង ក្រោយផ្ទុះព័ត៌មានដែលស្ត្រីរូបនេះថ្លែងប្រាប់វីអូឌី។ លើសពីនេះ លោកទទួលស្គាល់ថា នៅមានពលរដ្ឋផ្សេងទៀតក្នុងចំណោមពលរដ្ឋជាង ២០គ្រួសារ មិនទាន់ទទួលបានសំណងពីក្រុមហ៊ុនជីករ៉ែនៅឡើយដែរ ប៉ុន្តែលោកបដិសេធមិនប្រាប់ចំនួនលំអិតនៃគ្រួសាររងផលប៉ះពាល់។ យ៉ាងណា លោកក៏ព្យាយាមលាក់ឈ្មោះក្រុមហ៊ុនរ៉ែនេះផងដែរ ដោយគ្រាន់តែអះអាងថា ជាក្រុមហ៊ុនមានអាជ្ញាធរពីថ្នាក់ជាតិត្រឹមត្រូវ។
លោក ឯម ភៀង និយាយថា៖ «អត់ដឹងទេព្រោះរឿងក្រុមហ៊ុនអាហ្នឹង ដោះស្រាយប៉ុន្មានដងហើយ ប៉ុន្តែមិនដឹងមួយណា។ គេដោះស្រាយគ្នាគេហ្នឹងពីរលើកហើយ។ មានថ្ងៃហ្នឹងគេចុះទៅមើលទៀតហើយ»។
ចំណែក តំណាងក្រុមហ៊ុនរ៉ែ លោក ប៊ូ ម៉ៅ ប្រាប់វីអូឌីនៅថ្ងៃនេះថា លោកនឹងពិភាក្សាជាមួយអាជ្ញាធរមូលដ្ឋានមុនទៅជួបគ្រួសាររងផលប៉ះពាល់ដែលបានផ្សព្វផ្សាយទុក្ខលំបាករបស់ខ្លួន។ ប៉ុន្តែលោកមិនបញ្ជាក់លម្អិតថា នឹងដោះស្រាយរបៀបម៉េច ហើយហេតុអ្វីទើបក្រុមហ៊ុនមិនអើពើដោះស្រាយពីកង្វល់របស់ពលរដ្ឋជាង ១ឆ្នាំមកហើយ រហូតអ្នកស្រី ខឹម នួន ទម្លាយប្រាប់ជាសាធារណៈ។ មួយវិញទៀត លោកក៏មិនឆ្លើយតបដែរពីព័ត៌មានលម្អិតរបស់ក្រុមហ៊ុនថា ជារបស់បុគ្គលរូបណា និងមានឈ្មោះអ្វីឱ្យពិតប្រាកដ។
លោក ប៊ូ ម៉ៅ និយាយថា៖ «ម្សិលមិញបងបានហៅម្ចាស់គាត់មកសម្របសម្រួលដែរណា ! ហើយបងទៅពិនិត្យផ្ទាល់ទីតាំងហ្នឹងហើយប៉ះពាល់យ៉ាងម៉េចៗ ហើយត្រូវរៀបចំឲ្យគាត់ទៅម៉េចឲ្យបានល្អហើយឲ្យបានសប្បាយចិត្តឡើងវិញ»។
ទាក់ទងករណីនេះ អភិបាលខេត្តកំពតលោក ម៉ៅ ធនិន ប្រាប់វីអូឌីនៅថ្ងៃទី៥ ខែមិថុនា ដោយលោកមិនបញ្ជាក់ឈ្មោះក្រុមហ៊ុនជីករ៉ែ និងអ្នកពាក់ព័ន្ធនោះទេ។ លោកថា ការដោះស្រាយករណីនេះ គឺជារឿងជំនាញរបស់មន្ទីររ៉ែ និងថាមពលខេត្ត ហើយលោករុញឱ្យវីអូឌីសួរខាងជំនាញ ឬមកជួបលោកផ្ទាល់នៅសាលាខេត្តកំពត។
លោក ម៉ៅ ធនិន ថ្លែងថា៖ «ប្អូនចង់បានការបញ្ជាក់ណាមួយទៅលើការងារនេះ ប្អូនជួបជាមួយនឹងលោកប្រធានមន្ទីររ៉ែនិងថាមពល។ ហើយបើមិនអញ្ចឹងទេប្អូនអាចជួបជាមួយបងផ្ទាល់នៅសាលាខេត្តណានឹងជួបផ្ទាល់ ព្រោះការងារនេះប្អូនស្ដាប់មួយចំហៀងទេប្អូន មិនទាន់ដឹងពីយន្តការនៃការដោះស្រាយរបស់មន្ទីរជំនាញ និងអាជ្ញាធរទេ។ ហើយបើប្អូនចង់ដឹងច្បាស់ជួបបងនៅរដ្ឋបាលខេត្ត ហើយបើមិនអញ្ចឹងទេ ជួបជាមួយប្រធានមន្ទីររ៉ែ និងថាមពល»។
យ៉ាងណា វីអូឌីពុំអាចសុំការឆ្លើយបំភ្លឺរឿងនេះពី ប្រធានមន្ទីររ៉ែ និងថាមពលខេត្តកំពត លោក សោម វិចិត្រ បានទេ នៅថ្ងៃទី៥ ខែមិថុនា។
ទាក់ទងករណីនេះដែរ សកម្មជនចលនាមាតាធម្មជាតិ កញ្ញា មាន លីសា និយាយថា ការដោះស្រាយបញ្ហារបស់ពលរដ្ឋរងគ្រោះគួរចាត់ជាអាទិភាព មិនមែនចាំដល់ពលរដ្ឋទម្លាយប្រាប់កាសែតពីកង្វល់របស់ខ្លួនឡើយ។ កញ្ញាថា ការដោះស្រាយមិនលំបាកទេ បើអាជ្ញាធរពាក់ព័ន្ធពិតជាចង់ឱ្យពលរដ្ឋនៅមូលដ្ឋានទទួលបានផលប្រយោជន៍ ជាងការពារផលប្រយោជន៍ឱ្យក្រុមហ៊ុន។ សកម្មជនបរិស្ថានរូបនេះបន្តថា ការជួយលាក់បាំងព័ត៌មានក្រុមហ៊ុនជីករ៉ែពីសំណាក់អាជ្ញាធរមិនមែនជារឿងថ្មីទេ ហើយកញ្ញាសង្ស័យថា ក្រុមហ៊ុនជីករ៉ែនៅតំបន់ភ្នំត្នោតនេះជារបស់ក្រុមហ៊ុនលោក ទ្រី ភាព ដែលកូនប្រុសរបស់លោកគឺលោក ទ្រី ដាលុច ប្រើឈ្មោះក្លូបល ហ្គ្រីន (Global Green) ដើម្បីធ្វើអាជីវកម្ម។
កញ្ញា មាន លីសា ថ្លែងថា៖ «អញ្ចឹងរឿងនេះចង់ដោះស្រាយ ឬក៏មិនដោះស្រាយ វាទាក់ទងជាមួយនឹងខ្សែខ្នងនៅពីក្រោយ ដែលបញ្ហាជម្លោះនេះគឺ Global Green ដែលមាន ទ្រី ភាព នៅពីក្រោយច្បាស់ណាស់។ ហើយឬក៏កូនៗ ទ្រី ភាព ហ្នឹង ជាពិសេសហ្នឹងគឺលោក ម៉ៅ ធនិន ក៏មានចំណែកក្នុងការកាងអំណាចឲ្យពួកក្រុមហ៊ុនទាំងអស់ហ្នឹងដែរចាស»។
ស្រដៀងនឹងការលើកឡើងនេះ ពលរដ្ឋរងគ្រោះម្នាក់ដែលថ្លែងលាក់ឈ្មោះនិងសំឡេងអះអាងប្រាប់វីអូឌីថា ក្រុមហ៊ុនជីករ៉ែអាចជារបស់លោក ទ្រី ភាព ហើយអភិបាលខេត្តកំពតលោក ម៉ៅ ធនិន ជាអ្នកកាងពីក្រោយ។ ប្រភពនេះបន្តថា កាលពីឆ្នាំ២០២៤ មានស្ត្រីម្នាក់ដែលគេស្គាល់ថា ជំទាវតូច ជាមនុស្សជំនិតលោក ម៉ៅ ធនិន ចាប់ផ្ដើមចុះទិញដីពលរដ្ឋនៅតំបន់នេះសឹងទាំងអស់ ហើយបានធ្វើផ្លូវកាត់ព្រៃសហគមន៍ភ្នំត្នោត ដើម្បីដឹកជញ្ជូនរ៉ែនោះ។ លោកថែមទាំងបានលឺតំណាងក្រុមហ៊ុនលោក ប៊ូ ម៉ៅ ថា ក្រុមហ៊ុនជីករ៉ែនេះជារបស់ក្រុមហ៊ុន លោក ទ្រី ភាព ថែមទៀត។ ប្រភពបន្តថា មានពលរដ្ឋខ្លះលក់ដីបាន ក៏ប្ដូរទីលំនៅទៅកន្លែងផ្សេង ដោយសារមិនអាចទ្រាំនឹងសំឡេងរញ្ជួយ ដីហុយទ្រលោម ខណៈផ្ទះពួកគេនៅជាប់នឹងរណ្ដៅរ៉ែជាដើម។ ប៉ុន្តែ ពលរដ្ឋខ្លះដែលគ្មានលទ្ធភាពក៏សុខចិត្តទ្រាំរស់នៅទាំងលំបាក ហើយគ្មានសំណងដល់ពួកគេថែមទៀត។
ចំណែកសារព័ត៌មានក្នុងស្រុកបានត្រឹមចុះផ្សាយពីការតវ៉ារបស់ពលរដ្ឋតែប៉ុណ្ណោះ នៅពេលក្រុមហ៊ុនចាក់ដីបិទផ្លូវពលរដ្ឋ ឬក្ដីបារម្ភរបស់ពួកគេ ករណីខ្លាចធ្លាក់ក្មេងៗ ឬសត្វពាហនៈចូលរណ្ដៅដែលក្រុមហ៊ុនមិនបិទបាំងជាដើម។
ចំណែកពលរដ្ឋរស់នៅតំបន់នោះ ហាក់សំដែងភាពភ័យខ្លាច នៅពេលមានអ្នកកាសែតចុះជួប និងសួរនាំរឿងរណ្ដៅនៅជាប់របងផ្ទះគាត់ ដោយពួកគេនិយាយឡើងញាប់មាត់ថា មិនដឹងគេជីកធ្វើអីឡើយ ទោះឃើញអាចម៍ដីខ្ពស់ផុតដំបូលផ្ទះពួកគាត់ ហើយឡានធំៗបរកាត់ផ្ទះរាល់ថ្ងៃយប់យ៉ាងណាក្ដី។
ទិដ្ឋភាពតំបន់នោះ ត្រូវបានគេដាក់សន្តិសុខយាមកាមយ៉ាងតឹងរ៉ឹងក្នុងប៉មនៃច្រកចូលការដ្ឋាន និងគ្មានស្លាកឈ្មោះក្រុមហ៊ុន ឬបញ្ជាក់ថា ជាអាជីវកម្មអ្វីពិតប្រាកដដែរ។ យ៉ាងណា មានពលរដ្ឋអះអាងថា ពួកគេបានឃើញមានជនជាតិចិនច្រើនបម្រើការជាមួយខ្មែរនៅទីនោះ ដោយភាគច្រើនជិះឡានទំនើបចេញចូលៗ។ ចំណែក រថយន្តធុនធ្ងន់ប្រភេទយីឌុបត្រូវបានគេបិទយ៉ាងជិតឈឹង សម្រាប់ដឹកជញ្ជូនរ៉ែចេញ តាមផ្លូវថ្មីដែលគេធ្វើកាត់តាមព្រៃសហគមន៍ភ្នំត្នោត ឆ្ពោះទៅផ្លូវ៤១។
បច្ចុប្បន្នទីតាំងដែលក្រុមហ៊ុនជីករ៉ែ មានប្រមាណជិត ២០រណ្ដៅ ហើយគេប្រមូលចូលការដ្ឋានកែច្នៃចំនួន៤ ស្ថិតនៅភូមិត្រពាំង គគីរ ឃុំល្បើក។ កាលពីឆ្នាំ២០០៥ តំបន់ភ្នំត្នោតនេះ ត្រូវបានក្រសួងកសិកម្ម និងអាជ្ញាធរខេត្តកំពត រួមនឹងសហគមន៍រួមគ្មានបង្កើតជាព្រៃសហគមន៍ ជាប្រភេទព្រៃស្រោង សម្រាប់ពលរដ្ឋរកអនុផលដើម្បីចិញ្ចឹមជីវិត លើផ្ទៃដីជិត ៥រយហិកតា (៤៥៨ហិកតា)។ ប៉ុន្តែក្រោយក្រុមហ៊ុនជីករ៉ៃចាប់ផ្ដើមចូលមកក្នុងដើមឆ្នាំ២០២៥ ពួកគេបែរជាត្រូវក្លាយជនរងគ្រោះ ហើយខ្លះពុំបានទទួលបានសំណងពីភាគីក្រុមហ៊ុននោះឡើយ រហូតគ្រួសារអ្នកស្រី ខឹម នួន ទម្លាយទុក្ខលំបាកប្រាប់វីអូឌី កាលពីថ្ងៃទី១ ខែមិថុនា ឆ្នាំ២០២៦៕
