ដប់បួនសប្តាហ៍បន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានបញ្ជាឱ្យមានការវាយប្រហារលើប្រទេសអ៊ីរ៉ង់ យោធាសហរដ្ឋអាមេរិកកំពុងសម្របខ្លួនទៅនឹងស្ថានភាពជម្លោះដ៏មិនធម្មតាមួយ ដែលមិនមែនជាសង្រ្គាមទ្រង់ទ្រាយធំ ប៉ុន្តែក៏នៅឆ្ងាយពីសន្តិភាពផងដែរ។
នៅលើនាវា និងមូលដ្ឋានទ័ពនានានៅមជ្ឈិមបូព៌ា ទាហានអាមេរិកបានបំពេញភារកិច្ចចំពេលមានការបាញ់បោះប្តូរគ្នាយ៉ាងខ្លាំងក្លាជាមួយអ៊ីរ៉ង់រៀងរាល់ពីរឬបីថ្ងៃម្តង ខណៈដែលកងទ័ពជើងទឹកកំពុងបិទខ្ទប់កំពង់ផែរបស់អ៊ីរ៉ង់។ នៅឯប្រទេសវិញ មន្ទីរប៉ង់តាហ្គូនកំពុងប្រញាប់ប្រញាល់ជំរុញការផលិតគ្រាប់រំសេវដែលបានខ្សោះជិតអស់ ខណៈដែលក្រុមគ្រួសាររបស់ទាហានកំពុងប្រឈមមុខនឹងភាពតានតឹងនៃការអូសបន្លាយពេលឈរជើង។
ការវាយបកពីសំណាក់អ៊ីរ៉ង់ នៅតែបន្តធ្វើឡើងប្រឆាំងនឹងសម្ព័ន្ធមិត្តរបស់សហរដ្ឋអាមេរិកនៅក្នុងតំបន់ ដូចជាប្រទេសបារ៉ែន និងគុយវ៉ែត ដែលអ៊ីរ៉ង់បានកំណត់គោលដៅវាយប្រហារដោយមីស៊ីលបាលីស្ទីក កាលពីថ្ងៃសុក្រ។
លោក ត្រាំ បានប្រកាសពីបទឈប់បាញ់ជាមួយអ៊ីរ៉ង់កាលពីខែមេសា ប៉ុន្តែសង្រ្គាមបានធ្លាក់ចូលទៅក្នុងភាពទាល់ច្រក ដោយអ៊ីរ៉ង់នៅតែបន្តបិទច្រកសមុទ្រហរមូស (Strait of Hormuz) ភាគច្រើនមិនឱ្យមានការដឹកជញ្ជូនទំនិញ ហើយលោក ត្រាំ បានព្រមានពីការវិលត្រឡប់ទៅរកការទម្លាក់គ្រាប់បែកទ្រង់ទ្រាយធំលើអ៊ីរ៉ង់វិញ ប្រសិនបើការចរចាសន្តិភាពត្រូវបរាជ័យ។
ការគំរាមកំហែងនេះ តម្រូវឱ្យទាហានអាមេរិកត្រូវរក្សាស្ថានភាពត្រៀមខ្លួនប្រយុទ្ធយ៉ាងខ្ពស់បំផុត។
មន្ត្រីអាមេរិកម្នាក់ដែលសុំមិនបញ្ចេញឈ្មោះ បាននិយាយថា៖«ការរក្សាស្ថានភាពប្រុងប្រយ័ត្នកម្រិតខ្ពស់បំផុត (Level 10) ជាប្រចាំបែបនេះ ដើម្បីត្រៀមខ្លួនចេញដំណើរភ្លាមៗនៅពេលមានបញ្ជា គឺជាបេសកកម្មប្រតិបត្តិការដ៏តានតឹង និងលំបាកខ្លាំងណាស់»។
លោក ចូសែហ្វ វ៉ូតថល (Joseph Votel) អតីតមេបញ្ជាការនៃបញ្ជាការដ្ឋានកណ្តាលរបស់យោធាសហរដ្ឋអាមេរិក បានពិពណ៌នាអំពីដំណាក់កាលជម្លោះបច្ចុប្បន្នថាជា «ដំណាក់កាលដ៏គ្រោះថ្នាក់បំផុតសម្រាប់យើង»។ លោកបានមានប្រសាសន៍ថា ការរក្សាទាហានឱ្យត្រៀមខ្លួនជានិច្ចក្នុងកំឡុងពេលបទឈប់បាញ់ មិនមែនជាការប្រឈមតូចតាចនោះទេ។
សម្រាប់ទាហានអាមេរិកដែលកំពុងសម្រាកព្យាបាលរបួស ការផ្លាស់ប្តូររបស់យោធាទៅរកស្ថានភាពសង្រ្គាមដ៏អូសបន្លាយនេះ តម្រូវឱ្យមានការសម្របខ្លួនយ៉ាងខ្លាំង។ នាយចំណានថ្នាក់ទីមួយនៃកងទ័ពបំរុងសហរដ្ឋអាមេរិក លោក ខូរី ហ៊ីក្ស (Cory Hicks) អាយុ ៣៧ ឆ្នាំ ស្ថិតក្នុងចំណោមអ្នករងរបួសដែលកំពុងស្តារនីតិសម្បទាពីការវាយប្រហារដោយដ្រូនរបស់អ៊ីរ៉ង់នៅដើមសង្រ្គាម ដែលបានធ្វើឱ្យបេះដូងរបស់លោកឈប់លោតអស់រយៈពេលជាច្រើននាទី។
យោធាសហរដ្ឋអាមេរិកបាននិយាយថា ទាហានអាមេរិកប្រហែល ៤០០ នាក់បានរងរបួសនៅក្នុងកំឡុងពេលមានជម្លោះនេះ ដែលភាគច្រើននៃពួកគេមានការរងរបួសខួរក្បាលដូចជាលោក ហ៊ីក្ស ដែរ។ ជាង ៩០% បានត្រឡប់ទៅបំពេញកាតព្វកិច្ចវិញហើយ។ ទាហានដប់បីនាក់ត្រូវបានសម្លាប់នៅក្នុងជម្លោះនេះ។
ក្រុមគ្រួសាររបស់ទាហានអាមេរិក ក៏ប្រឈមមុខនឹងភាពតានតឹង ចំពេលមានភាពមិនច្បាស់លាស់អំពីអ្វីដែលកំពុងកើតឡើងនៅក្នុងកំឡុងពេលបទឈប់បាញ់ផងដែរ។
អ្នកស្រី យ៉ាឌីរ៉ា ដែសសាន (Yadira Dessaint) ម្តាយរបស់នាយទាហានម្នាក់នៅក្នុងកងទ័ពបំរុង បាននិយាយថា៖ «វាពិតជាគួរឱ្យខ្លាចណាស់ដែលមិនបានដឹងពីព័ត៌មានលម្អិត អំពីអ្វីដែលកំពុងកើតឡើងពិតប្រាកដ»។
អ្នកស្រីបានចូលរួមការតវ៉ាដើម្បីឱ្យបញ្ឈប់សង្រ្គាម ដែលបានធ្វើឱ្យប៉ះពាល់ដល់ប្រជាប្រិយភាពរបស់លោក ត្រាំ។ យោងតាមការស្ទង់មតិរបស់ Reuters/Ipsos កាលពីខែឧសភា បានបង្ហាញថា មានអ្នកឆ្លើយសំណួរម្នាក់ក្នុងចំណោមបួននាក់ប៉ុណ្ណោះ ដែលបាននិយាយថាសកម្មភាពយោធារបស់សហរដ្ឋអាមេរិកនៅក្នុងប្រទេសអ៊ីរ៉ង់ គឺជារឿងដ៏មានតម្លៃ៕
