Political Issues, នយោបាយ, ព័ត៌មានជាតិ

លោក ហ៊ុន សែន រងការរិះគន់រឿងដោះស្រាយឱ្យឧកញ៉ា មិនអើពើពលរដ្ឋរងគ្រោះរាប់លាននាក់

លោក ញឹម សុខន
| ០៨ មិថុនា ២០២៦
ម៉ោង ២០:៤៧

នៅគ្រាដែលប្រធានព្រឹទ្ធសភា លោក ហ៊ុន សែន ក្នុងនាមប្រមុខរដ្ឋស្ដីទី ចេញមុខរកដំណោះស្រាយឱ្យឧកញ៉ាម្នាក់រឿងឆបោក ហើយបន្សល់ទុកពលរដ្ឋរងគ្រោះរាប់ម៉ឺននាក់ ចាញ់បោកក្រុមឧកញ៉ា អ្នករងគ្រោះពីការបាត់បង់ទឹកដី និងប្រព័ន្ធតុលាការផងនោះ រងការរិះគន់ថា មេដឹកនាំរូបនេះ បានយកចិត្តទុកដាក់ជាមួយតែជនខិលខូច មិនឱ្យតម្លៃដល់ជនរងគ្រោះជាអ្នកស្លូតត្រង់។

ពលរដ្ឋខ្មែរឥស្លាមម្នាក់រស់នៅខេត្តត្បូងឃ្មុំ អ្នកស្រី សា តឺណាស់ ប្រាប់វីអូឌីនៅថ្ងៃទី៨ ខែមិថុនា ថា ការមិនអើពើរបស់ថ្នាក់ដឹកនាំ ដើម្បីផ្ដល់ដំណោះស្រាយជូនពលរដ្ឋរងគ្រោះ ដោយសារក្រុមហ៊ុនប្រ៊ីលាន ស៊ីធី (Brilliant City) របស់អតីតឧកញ៉ា ឡេង ចាន់ណា បានបន្ថែមការឈឺចាប់ដល់ពួកគាត់មួយកម្រិតទៀត ខណៈខ្លួនបានចាញ់បោកក្រុមហ៊ុនមួយកម្រិតហើយ។ អ្នកស្រីថា បានចាញ់បោកក្រុមហ៊ុននេះ ចំនួន ១៥០០០ដុល្លារ បានពីការដាក់ប្លង់ដីនៅធនាគារ ដាក់វិនិយោគ ដើម្បីស៊ីការប្រាក់។ ប៉ុន្តែ ក្ដីរំពឹងត្រូវរលាយ ហើយខ្លួនជាស្ត្រីមេម៉ាយចិញ្ចឹមឪពុកចាស់ជរា និងកូនៗត្រូវរៀនរាល់ថ្ងៃទៀតនោះ ត្រូវទទួលអម្រែកកាន់តែធ្ងន់។ បច្ចុប្បន្ន អ្នកស្រីបង្ខំចិត្តទៅធ្វើការនៅប្រទេសម៉ាឡេស៊ី ដើម្បីរកប្រាក់បង់សងធនាគារជារៀងរាល់ខែ។

អ្នកស្រី សា តឺណាស់ និយាយថា៖ «យើងជាជនរងគ្រោះគឺត្រូវពឹងច្បាប់! ដល់ពេលច្បាប់កាត់ក្ដីគ្មានភាពស្មោះត្រង់ មាននីតិវិធីត្រឹមត្រូវ ហើយចេះតែឱ្យចាំពីមួយឆ្នាំទៅមួយឆ្នាំ។ ប៉ុន្តែ ជនឆបោកមិនត្រូវបានចាប់ដាក់គុកទេ គឺចាប់ ឡេង ចាន់ណា ប៉ុន្មាននាក់ហ្នឹង ហើយចាប់នេះគ្រាន់តែនាំឱ្យគេចពីជនរងគ្រោះ ក្រែងជនរងគ្រោះទ្រាំមិនបានប្រើហិង្សាអីហ្នឹង»។

ចំណែក ពលរដ្ឋម្នាក់ទៀតជាជនរងគ្រោះដោយសារក្រុមហ៊ុន អ្នកស្រី ឡេង ចាន់ណា ដែរ បានថ្លែងលាក់ឈ្មោះបង្ហាញក្ដីឈឺចាប់ និងអន់ចិត្តជាពន់ពេក ចំពោះថ្នាក់ដឹកនាំរដ្ឋាភិបាល។ អ្នកស្រីចាត់ទុករបស់ពន្យារពេលរបស់ក្រសួងពាក់ព័ន្ធ ប្រៀបបាននឹងការសម្លាប់ពលរដ្ឋរងគ្រោះ ដោយសារមន្ត្រីធំៗជាច្រើនបានពាក់ព័ន្ធនឹងគម្រោងឆបោកនេះ។

ពលរដ្ឋលាក់ឈ្មោះរូបនោះ និយាយថា៖ «សួរថាខ្ញុំរស់នៅក្នុងប្រទេសរាល់ថ្ងៃនេះ ពួកខ្ញុំឈឺចាប់អត់? ពួកខ្ញុំឈឺចាប់ណាស់ និងគ្មានអ្វីរំពឹង ទោះខ្ញុំមានរដ្ឋាភិបាលបវរធិបតី (ហ៊ុន ម៉ាណែត) ជាមេដឹកនាំ។ តែពេលខ្ញុំជួបទុក្ខលំបាក តើរដ្ឋាភិបាលជួយខ្ញុំបានទេដល់បច្ចុប្បន្ន។ ខ្ញុំយល់ថា លោកកំពុងដោះស្រាយឱ្យយើងខ្ញុំហើយ ក៏ប៉ុន្តែការដោះស្រាយនេះប្រៀបបានដូចសំរាម ដូច្នេះមិនដឹងយុត្តិធម៌នៅកម្រិតណាទេ។ ហើយបើថា បាន៥០ភាគរយ ឬតិចជាងនេះ ក៏ខ្ញុំអស់ចិត្តដែរ។ តែនេះដូចសំរាម ដោយមិនអាណិតពលរដ្ឋខំដាក់បណ្ដឹង និងធ្វើតាមគ្រប់បែបយ៉ាងតាមលោក គី តិច។ ចឹងខ្ញុំសួរថា អស់លោកអ្នកកាន់ច្បាប់ទុកពលរដ្ឋរងគ្រោះជាអ្វី ឬជនរងគ្រោះនេះមិនមែននៅក្នុងប្រទេសអស់លោកទេឬយ៉ាងណា?»។

ការលើកឡើងរបស់ពលរដ្ឋដូច្នេះ ធ្វើឡើងបន្ទាប់ពី លោក ហ៊ុន សែន កាលពីថ្ងៃទី៦ ខែមិថុនា បានចេញមុខអន្តរាគមន៍រហូតមានការដោះលែងឧកញ៉ាម្នាក់ គឺលោក ហេង ឡុង ឱ្យនៅក្រៅឃុំ ករណីចេញសែកគ្មានប្រាក់រហូត ៣០ម៉ឺនដុល្លារ ដល់ម្ចាស់កម្ចី។ លោក ហ៊ុន សែន សរសេរបញ្ជាក់ថា ការចេញមុខជួយឧកញ៉ារូបនេះ គ្រាន់តែដោះទាល់មួយគ្រា ហើយឧកញ៉ាដដែលនេះត្រូវរកប្រាក់មកសងម្ចាស់កម្ចីថ្មីវិញ។

យ៉ាងណា ការជួយរបស់ លោក ហ៊ុន សែន បានរងការរិះគន់ពេញបណ្ដាញសង្គម ខណៈពលរដ្ឋបានរងគ្រោះជាច្រើនករណី មិនថា តែក្រុមហ៊ុនអ្នកស្រី ឡេង ចាន់ណា ទេ ក្នុងនោះមានក្រុមហ៊ុន ពិភពដីមាស របស់អតីតឧកញ៉ា ហ៊ី គឹមហុង ក្រុមហ៊ុន ជា សារ៉ន និងក្រុមហ៊ុន ស៊ីអាយស៊ី (CIC) របស់លោក គុយ វ៉ាត ជាដើម។ ចំណែកពលរដ្ឋភៀសសឹក និងទាហានជួរមុខក៏សុទ្ធតែត្រូវការជំនួយផងដែរ។

លើសពីនេះ របាយការណ៍សង់ត្រាល់ រកឃើញថា ពលករដែលត្រឡប់មកពីថៃ ក្នុងកំឡុងខែកក្កដា ដល់ខែតុលា ឆ្នាំ២០២៥ មានចំនួន៨៥% អះអាងថា ខ្លួនមិនអាចសងបំណុលគេបាន ដោយសារចំណូលជាមធ្យមរបស់ពួកគាត់បានត្រឹមតែ ៦៤ដុល្លារក្នុងមួយខែ ក្នុង១គ្រួសារ ក្នុងពេលដែលប្រាក់ដែលត្រូវសងបំណុលប្រហាក់ប្រហែល ២២០ដុល្លារក្នុងមួយខែ។ ចំនួននេះ មិនទាន់គិតពីចំណាយប្រចាំខែសម្រាប់គ្រួសារក្រៅពីបំណុល។

ចំណែក របាយការណ៍របស់ UNDP រកឃើញថា ពលករដែលត្រឡប់ពីថៃវិញចំនួន ៨៣% មិនអាចមានលទ្ធភាពសងបំណុលគេទេ។ អង្គការទាំងពីរនេះថា មិនទាន់ឃើញអន្តរាគមន៍ពីរដ្ឋឡើយ។

ចំណែកមន្ត្រីគណបក្សប្រឆាំងនៅក្រៅប្រទេស លោក អ៊ុំ សំអាន យល់ឃើញថា ការចេញមុខរបស់ លោក ហ៊ុន សែន ជួយឧកញ៉ាបោកប្រាស់ គឺជារឿងខុសទំនង ខណៈមានករណីជាច្រើនទៀតដែលពលរដ្ឋកំពុងរងគ្រោះ គ្មានអាជ្ញាធរណាចេញមុខអន្តរាគមន៍ឡើយ។ លោកបន្តចោទជាសំណួរថា ហេតុអ្វីករណីក្មួយប្រុសបង្កើត លោក ហ៊ុន សែន គឺលោក ហ៊ុន តូ ដែលកំពុងបោកលុយអតិថិជនចិន វៀតណាម និងខ្មែរ ពីក្រុមហ៊ុន ហួយវ័ន ផេ ជាដើម នោះ លោក ហ៊ុន សែន មិនជួយអន្តរាគមន៍?។ លើសពីនេះ នៅមានក្រុមហ៊ុនជាច្រើនទៀតកំពុងបោកប្រាស់ពលរដ្ឋ ហើយពលរដ្ឋបានត្រឹមជាជនរងគ្រោះ ដូចជា ក្រុមហ៊ុន លោក ឡេង ណាវ៉ាត្រា ជាដើម។ ចំណែកមន្ត្រីបក្សប្រឆាំងដែលមានករណីស្រដៀងនេះ ក៏លោក ហ៊ុន សែន មើលមិនឃើញដែរ។

លោក អ៊ុំ សំអាន ថ្លែងថា៖ «ហើយបើចង់ជួយ ម្ដេចមិនជួយ លោក ថាច់ សេដ្ឋា ដែលគេដោះស្រាយរឿងសែកស្អុយតែ ៣ម៉ឺនដុល្លារ ហើយលោក ហេង ឡុង ដល់៣០ម៉ឺនដុល្លារ ហេតុអ្វីអន្តរាគមន៍ឧកញ៉ា ហេង ឡុង ព្រោះឧកញ៉ា ហេង ឡុង និងប្រពន្ធរបស់គាត់ គឺជាអ្នកគាំទ្របក្សប្រជាជន ដូច្នេះលោក ហ៊ុន សែន ជួយតែគ្នាគេទេ»។

យ៉ាងណា ទាំងមន្ត្រីបក្សប្រឆាំង និងជនរងគ្រោះ នៅតែជំរុញឱ្យមេដឹកនាំបង្ហាញការទទួលខុសត្រូវ លើបញ្ហាបូរណភាពទឹកដី ស្តារយុត្តិធម៌សង្គម និងត្រូវដកខ្លួនពីក្រុមឧក្រិដ្ឋជន ដើម្បីបញ្ចៀសចលាចលសង្គម៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។