ប្រតិបត្តិការបោសសម្អាតឧក្រិដ្ឋកម្មអនឡាញទ្រង់ទ្រាយធំជាងកន្លះឆ្នាំមកនេះ បានធ្វើឱ្យឧស្សាហកម្មឆបោកជាច្រើនកន្លែងដួលរលំ ប៉ុន្តែបច្ចុប្បន្នវាត្រូវបានជំនួសមកវិញដោយសហគ្រាសតាមផ្ទះ។
ក្រុមឧក្រិដ្ឋជនទាំងនោះ ប្រមូលផ្ដុំគ្នាក្នុងចំនួនតិចជាង ៣០នាក់ ដោយជ្រើសរើសទីតាំងផ្ទះលំហែ បុរី ផ្ទះល្វែង ភោជនីយដ្ឋាន និងផ្ទះសំណាក់ជាដើម សម្រាប់ការលាក់ខ្លួន និងប្រតិបត្តិការ។
ជាក់ស្ដែងការបង្ក្រាបមួយនៅចុងខែមេសា ក្នុងផ្ទះសំណាក់មួយកន្លែងនៅក្រុងខេមរភូមិន្ទ ខេត្តកោះកុង សមត្ថកិច្ចចាប់បានជនបរទេស១៧នាក់។ ករណីមួយទៀត នៅថ្ងៃទី៣ ខែមិថុនា សមត្ថកិច្ចរកឃើញជនបរទេសចំនួន ១៩នាក់ និងទូរស័ព្ទជាង ២ពាន់គ្រឿង នៅផ្ទះលំហែមួយកន្លែងនៅច្រកម្ទេស ក្រុងបាវិត ខេត្តស្វាយរៀង។ ដោយឡែក ការបង្ក្រាបមួយទៀត នៅកណ្ដាលក្រុងបាត់ដំបង កាលពីថ្ងៃទី១ ខែមិថុនា អាជ្ញាធរបានរកឃើញឧក្រិដ្ឋជនអនឡាញប្រមាណ ៣០នាក់ ក្នុងនោះមានសន្តិសុខ៧នាក់ជាជនជាតិខ្មែរ ខណៈម្ចាស់វីឡាគឺជាមន្ត្រីយោធា។
អ្នកតាមដាន បារម្ភថា ការបង្កើតជម្រកអនឡាញតាមរូបភាពថ្មីនៅក្នុងបន្ទប់ជួល និងផ្ទះជួលអាចធ្វើឱ្យការបង្ក្រាបកាន់តែពិបាកជាងមុន ដោយសារមានទីតាំងច្រើន និងមិនប្រាកដប្រជា ខណៈជនជាតិខ្មែរដែលបាត់បង់ការងារ ក៏អាចវិវត្តខ្លួនក្លាយជាភ្នាក់ងារស្កេមអនឡាញតាមផ្ទះផងដែរ។
អ្នកតាមដានឧក្រិដ្ឋកម្មអនឡាញ លោក ជុំ ឧទិត្យ កត់សម្គាល់ថា ទោះការឆបោកតាមផ្ទះមានទម្រង់តូច តែវាក៏ត្រូវតភ្ជាប់ទៅនឹងបណ្ដាញប្រព័ន្ធធំដែលមានវត្តមានទាំងក្នុង និងក្រៅប្រទេស។ លោកបន្តថា ផ្អែកលើការតាមដានអាស័យដ្ឋានអ៊ីនធឺណិត ឬ IP address ឧក្រិដ្ឋជនកំពុងជ្រើសរើសគោលដៅថ្មី តាមបណ្ដាប្រទេសស្ថិតនៅក្នុងតំបន់អាស៊ីអាគ្នេយ៍ដដែល ដែលធ្វើឱ្យបណ្ដាញឧក្រិដ្ឋកម្មអនឡាញ នៅតែមានភាពប្រទាក់ក្រឡាគ្នា។
ករណីនេះ លោកយល់ឃើញថា ការបោសសម្អាតតាមរបៀបបច្ចុប្បន្ន គឺគ្មានប្រសិទ្ធភាពឡើយ ដរាបណាគ្មានការជីកឫសគល់ទាំងបណ្ដាញក្នុងស្រុក និងក្រៅប្រទេស។
លោក ជុំ ឧទិត្យ មានប្រសាសន៍ថា៖ «ទាល់តែយើងបោសសម្អាតជាប្រព័ន្ធដែរ។ យើងបោសសម្អាតតាំងពីមេឧក្រិដ្ឋជន ប្រតិបត្តិករឆបោក ប្រព័ន្ធសឺវើរមេ ហើយអ្វីដែលសំខាន់មួយទៀតនោះ គឺកន្លែងលាងលុយកខ្វក់។ កន្លែងហ្នឹងវាសំខាន់ដែរ ពីព្រោះកាលណាគេឆបោកបាន លុយហ្នឹងវាមិនទាន់អាចចែកបានភ្លាមៗទេ វាទាល់តែមានកន្លែងលាង។ ហើយអាការលាងលុយហ្នឹង មិនមែនទូ ជញ្ជីង លក់មាស ឬក៏កន្លែងដូរលុយធម្មតាអាចទៅលាងលុយទាំងអស់ហ្នឹងបានទេ វាទាល់តែមានការសហការពីរដ្ឋ ឬក៏ពីអំណាចរដ្ឋនៃប្រទេសមួយ បានវាអាចធ្វើទៅបាន»។
តាមការតាមដាន លោក ជុំ ឧទិត្យ មើលឃើញថា ក្រុមឧក្រិដ្ឋជនបោះទីតាំងនៅប្រទេសចំនួន៤ រួមមាន ភូមា ឡាវ ហ្វីលីពីន និងស្រីលង្កា ដោយសារជាប្រទេសមាននីតិរដ្ឋខ្សោយ។ លោកបន្តថា ពួកឧក្រិដ្ឋជនបានជ្រើសរើសការធ្វើដំណើរតាមច្រករបៀង ចូលទៅខេត្តស្រះកែវ ត្រាត និងចន្ទបុរី ប្រទេសថៃ មុនបន្តទៅប្រទេសទាំងនោះ។ លោកឱ្យដឹងទៀតថា ពួកជនបរទេសពិសេសជនជាតិចិន ព្យាយាមគេចមិនព្រមទៅប្រទេសកំណើត ដោយហេតុថាពួកគេមានឈ្មោះក្នុងបញ្ជីជនល្មើសត្រូវចាប់ខ្លួន ដោយសារការបង្កើតគណនីធនាគារក្លែងក្លាយទុកស្តុក និងជួញដូរលុយកខ្វក់ ទៅកាន់ទីក្រុងឌូបៃ និងប្រទេសវៀតណាម។
បើតាមប្រធានលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ឆ.ប.ឆ) លោក ឆៃ ស៊ីណារិទ្ធ បានប៉ាន់ស្មានថា ចំណាត់ការបោសសម្អាតឧក្រិដ្ឋកម្មអនឡាញនៅពេលនេះ អាចនឹងធ្វើឱ្យជនបរទេសហោចណាស់ជាង ២០ម៉ឺននាក់ ស្ម័គ្រចិត្តចាកចេញពីប្រទេសកម្ពុជា។
ក្រៅពីជនបរទេស នៅក្នុងប្រតិបត្តិការបង្ក្រាបមួយចំនួន សមត្ថកិច្ចក៏បានរកឃើញជនជាតិខ្មែរជាប្រតិបត្តិករអនឡាញផងដែរ ប៉ុន្តែអាជ្ញាធរជ្រើសរើសការមិនបញ្ចេញតួលេខ ដោយអប់រំពួកគេហើយដោះលែងត្រឡប់ទៅផ្ទះវិញ។
ថ្លែងក្នុងសន្និសីទសារព័ត៌មានមួយកាលពីថ្ងៃទី២៦ ខែឧសភា លោកស្រី ជូ ប៊ុនអេង បានឱ្យដឹងថា សមត្ថកិច្ចបានរកឃើញប្រតិបត្តិករអនឡាញជាជនជាតិខ្មែរ និងបានហៅទៅអប់រំណែនាំ។ ប៉ុន្តែអ្នកស្រីថា បញ្ហាគួរឱ្យបារម្ភនោះ គឺនៅត្រង់ពួកគេអាចបង្កើតសកម្មភាពឆបោកដោយខ្លួនឯង ដោយសារមានជំនាញនេះស្រាប់។
លោកស្រី ជូ ប៊ុនអេង ថ្លែងថា៖ «ឥឡូវឃើញខ្មែរយើងស្ថិតនៅក្នុងរង្វង់នៃអ្នកប្រព្រឹត្តបទល្មើសហ្នឹងដែរ ប៉ុន្តែនៅពេលដែលយើងយកគាត់អប់រំ ហើយឱ្យត្រឡប់ទៅផ្ទះវិញអីហ្នឹង កុំភ្លេចថាពួកគាត់មានចំណេះដឹងហ្នឹងរួចហើយ អ៊ីចឹងគាត់អាចប្រើប្រាស់ពេលណាក៏បានដែរ។ អ៊ីចឹងនេះគឺជាហានិភ័យក្នុងរឿងស្កេមអនឡាញ ដោយសារបច្ចេកវិទ្យានេះវាបានធ្វើឱ្យគាត់ដិតដាមហើយ អ៊ីចឹងគាត់អាចប្រើប្រាស់សម្រាប់បោកប្រាស់គេពេលណាក៏បាន។ នេះគឺជារឿងគួរឱ្យព្រួយបារម្ភ»។
ទោះបីការបង្ក្រាបឧក្រិដ្ឋកម្មអនឡាញ មានភាពសស្រាក់សស្រាំ និងមានច្បាប់ថ្មីកំណត់ការផ្ដន្ទាទោសធ្ងន់ធ្ងរ ប៉ុន្តែអ្នកឃ្លាំមើលថា លទ្ធផលពិតប្រាកដនឹងមិនអាចវិជ្ជមានឡើយ ដរាបណាបណ្ដាញឧក្រិដ្ឋជន និងមេខ្លោងធំៗ ពិសេសអ្នកមានអំណាចនៅក្នុងស្រុកមិនត្រូវបានបង្ក្រាបឱ្យដល់ឫសគល់៕
