នាយករដ្ឋមន្ត្រីចក្រភពអង់គ្លេស លោក សឺ គៀ ស្តាម័រ (Sir Keir Starmer) នឹងទទួលស្វាគមន៍លោក វ៉ូឡូឌីមៀ ហ្សេឡេនស្គី (Volodymyr Zelensky) នៅវិមានដោននីងស្ទ្រីត (Downing Street) នៅចុងថ្ងៃទី៧ខែមិថុនានេះ រួមជាមួយប្រធានាធិបតីបារាំង លោក អេម៉ានូអែល ម៉ាក្រុង (Emmanuel Macron) និងអធិការបតីអាល្លឺម៉ង់ លោក ហ្វ្រីដរិច មឺស (Friedrich Merz) ដើម្បីពិភាក្សាអំពីការគាំទ្ររបស់អឺរ៉ុបចំពោះអ៊ុយក្រែន។
មុនកិច្ចប្រជុំនេះ ក្រុមមន្ត្រីទីក្រុងគៀវ បាននិយាយថា ដ្រូនរបស់រុស្ស៊ីបានវាយប្រហារលើកន្លែងស្តុកទុកកាកសំណល់ឥន្ធនៈនុយក្លេអ៊ែរដែលប្រើប្រាស់រួច នៅជិតរោងចក្រនុយក្លេអ៊ែរឆឺណូប៊ីល (Chornobyl) ភាគខាងជើងប្រទេសអ៊ុយក្រែន។
ពួកគេនិយាយថា អគ្គីភ័យត្រូវបានពន្លត់ ហើយមិនមានអ្នករងរបួសនោះទេ ដោយមន្ត្រីបានបន្ថែមថា កម្រិតវិទ្យុសកម្មនៅតែមានស្ថិរភាព។ លោក ហ្សេឡេនស្គី បានហៅការវាយប្រហារនេះថាជា «ការវាយប្រហារដ៏ថោកទាប» និងមានចេតនាពីសំណាក់រុស្ស៊ី។
ដោយឡែក អាជ្ញាធរបានឱ្យដឹងថា មនុស្សយ៉ាងហោចណាស់ ៣ នាក់ បានស្លាប់ នៅក្នុងការវាយប្រហាររបស់រុស្ស៊ីលើភូមិមួយនៅខាងក្រៅទីក្រុងហ្សាប៉ូរីហ្ស៊ីយ៉ា (Zaporizhzhia) ភាគអាគ្នេយ៍នៃប្រទេស។
យោងតាមក្រុមហ៊ុន អេណឺហូអាតូម (Enerhoatom) ដែលជាប្រតិបត្តិករនុយក្លេអ៊ែររដ្ឋរបស់អ៊ុយក្រែន បានឱ្យដឹងថា ការវាយប្រហាររបស់រុស្ស៊ីលើតំបន់ឆឺណូប៊ីល បាន «បំផ្លាញមួយផ្នែក» នៃអគារស្តុកទុកកាកសំណល់ឥន្ធនៈនុយក្លេអ៊ែរដែលប្រើប្រាស់រួច ប៉ុន្តែវិទ្យុសកម្មនៅតែស្ថិតក្នុងកម្រិតធម្មតា។
លោក ហ្សេឡេនស្គី បានសរសេរនៅលើបណ្តាញសង្គម X ថា៖ «រុស្ស៊ីមានចេតនាវាយប្រហារលើហេដ្ឋារចនាសម្ព័ន្ធនុយក្លេអ៊ែរជាក់លាក់មួយនេះ» ដោយលោកបានពិពណ៌នាថាអគារនោះជា «ហេដ្ឋារចនាសម្ព័ន្ធដ៏សំខាន់បំផុត» ហើយការវាយប្រហារនេះគឺ «ថោកទាប»។
លោកបានបន្តរៀបរាប់លម្អិតអំពីការវាយប្រហារពេញមួយយប់របស់រុស្ស៊ីនៅក្នុងតំបន់ចំនួន ១៣ ដោយបន្ថែមថា ទីក្រុងម៉ូស្គូបានបាញ់បង្ហោះមីស៊ីលចំនួន ៨៨ គ្រាប់ ដ្រូនជាង ៣,២៥០ គ្រឿង និងគ្រាប់បែកណែនាំផ្លូវ (guided bombs) ចំនួន ១,៨០០ គ្រាប់ក្នុងសប្តាហ៍កន្លងទៅនេះ។
កាលពីថ្ងៃទី៦ខែមិថុនា អ៊ុយក្រែនបានកំណត់គោលដៅលើទីក្រុងសាំងពីតធ័របឺគ (St Petersburg) និងតំបន់ជុំវិញ ខណៈដែលទីក្រុងនេះកំពុងរៀបចំថ្ងៃចុងក្រោយនៃវេទិកាសេដ្ឋកិច្ចដ៏ធំមួយ តាមរយៈការវាយប្រហារដោយដ្រូន ដែលអាជ្ញាធររុស្ស៊ីបានពិពណ៌នាថា «មិនធ្លាប់មានពីមុនមក»។
មហាអំណាចលោកខាងលិចទាំងបី ដែលតំណាងនៅវិមានដោននីងស្ទ្រីត ដែលហៅថាក្រុម E3 គឺជាសម្ព័ន្ធមិត្តដ៏រឹងមាំបំផុតមួយចំនួនរបស់ទីក្រុងគៀវ។ ចក្រភពអង់គ្លេស និងបារាំងកំពុងដឹកនាំគំនិតផ្តួចផ្តើម «សម្ព័ន្ធភាពនៃអ្នកស្ម័គ្រចិត្ត» (coalition of the willing) ដើម្បីផ្តល់ការធានាសន្តិសុខសម្រាប់អ៊ុយក្រែន។
កិច្ចខិតខំប្រឹងប្រែងរបស់សហរដ្ឋអាមេរិក ក្នុងការសម្របសម្រួលបទឈប់បាញ់បានចុះខ្សោយ ហើយការយកចិត្តទុកដាក់របស់ទីក្រុងវ៉ាស៊ីនតោន បានប្តូរទៅលើសង្រ្គាមអ៊ីរ៉ង់វិញ។
កាលពីថ្ងៃទី៥ខែមិថុនា លោក ពូទីន បានបដិសេធសំណើរបស់លោក ហ្សេឡេនស្គី សម្រាប់ការចរចាទល់មុខគ្នាដើម្បីបញ្ចប់សង្រ្គាម ដោយនិយាយថា លោកមិនឃើញមានប្រយោជន៍ណាមួយក្នុងការជួបជាមួយមេដឹកនាំអ៊ុយក្រែននោះទេ ហើយបានសង្កត់ធ្ងន់ថា បទឈប់បាញ់នឹងគ្រាន់តែអនុញ្ញាតឱ្យអ៊ុយក្រែនប្រមូលផ្តុំកម្លាំងឡើងវិញតែប៉ុណ្ណោះ៕
