ក្រសួងបរិស្ថាន អះអាងពីភាពស្អាតស្អំរបស់មន្ត្រីមន្ទីរបរិស្ថានខេត្តកំពង់ស្ពឺ ២រូប ដែលរងការចោទថាបានទារប្រាក់ពីថៅកែរោងចក្រដំណាប់ស្វាយ ដោយបានជំរុញឱ្យពិនិត្យកសាងសំណុំរឿងនេះទៅតុលាការ ពាក់ព័ន្ធនឹងបទបរិហាកេរ្តិ៍ និងទៅអង្គភាពប្រឆាំងអំពើពុករលួយ។
កាលពីអំឡុងខែមេសា មានករណីបែកធ្លាយវីដេអូលើបណ្តាញសង្គមហ្វេសប៊ុក ដែលគេឃើញមានបុរសពីរនាក់ពាក់អាវក្រហម ជាមន្ត្រីបរិស្ថានខេត្តកំពង់ស្ពឺ បានទៅទារលុយចំនួន ១៥០០ដុល្លារ ចុះនៅត្រឹម ៦០០ដុល្លារ ពីថៅកែរោងចក្រជាជនជាតិចិន ស្ថិតនៅក្នុងភូមិខ្នងក្រាំង ឃុំតាំងសំរោង ស្រុកភ្នំស្រួច ខេត្តកំពង់ស្ពឺ។ ក្នុងវីដេអូនោះដែរ មន្ត្រីបរិស្ថានទាំង២រូបនេះ បានប្រាប់ទៅថៅកែរោងចក្រ ចេញលិខិតបំភ្លឺមួយសន្លឹកសរសេរថា ពួកគេទៅទីនោះ ដើម្បីបំពេញបេសកកម្មការងារ ពុំមែនទៅទារលុយនោះទេ។
ក្រោយហេតុការណ៍នេះ នៅថ្ងៃទី០៦ ខែមេសា ឆ្នាំ២០២៦ រដ្ឋមន្ត្រីក្រសួងបរិស្ថាន លោក អ៊ាង សុផល្លែត បានចាត់មន្ត្រីជំនាញឱ្យចុះទៅស្រាវជ្រាវនៅទីតាំងរោងចក្រខ្នាតតូច កែច្នៃដំណាប់ស្វាយ ឈ្មោះ ហុង ចេងហ្វាង ដោយបានជួបតំណាងក្រុមហ៊ុន ជាជនជាតិចិន និងអ្នកបកប្រែចំនួន២នាក់ ដោយបានសួរនូវសំណួរស៊ើបអង្កេតជាច្រើន ដើម្បីស្វែងរកការពិត និងរកភាពស្អាតស្អំជូនភាគីម្ចាស់ក្រុមហ៊ុន ក៏ដូចជាភាគីមន្ត្រីបរិស្ថាន។ ប៉ុន្តែភ្លាមៗនោះ ក្រសួងមិនទាន់មានការបញ្ជាក់ពីលទ្ធផលនៃការស្រាវជ្រាវនោះទេ។
យ៉ាងណា បើតាមលិខិតរបស់រដ្ឋមន្ត្រីក្រសួងបរិស្ថាន លោក អ៊ាង សុផល្លែត ផ្ញើជូនប្រធានមន្ទីរបរិស្ថានខេត្តកំពង់ស្ពឺ ចុះថ្ងៃទី០៨ ខែមិថុនា និងត្រូវបានផ្សព្វផ្សាយលើទំព័រហ្វេសប៊ុករបស់ក្រសួងនៅថ្ងៃទី០៩ ខែមិថុនានេះ បានឱ្យដឹងថា ក្រោយពីការស៊ើបអង្កេត ស្រាវជ្រាវ និងការប្រមូលព័ត៌មាន ព្រមទាំងការពិនិត្យឯកសារ និងភស្តុតាងពាក់ព័័ន្ធដោយក្រុមការងារអធិការកិច្ច បានរកឃើញថា មន្ត្រីបរិស្ថានខេត្តកំពង់ស្ពឺទាំងពីររូប ដែលមានឈ្មោះ ឈុន ឈៀងហេង ប្រធានការិយាល័យគាំពារបរិស្ថាន និងលោក ជួប ពន្លឺ មន្ត្រីជាប់កិច្ចសន្យា ដែលត្រូវបានសារព័ត៌មានផ្សព្វផ្សាយថា បានទារប្រាក់ពីក្រុមហ៊ុន Hong Cheng Fang Dired Mango Processing Factory Co.,Ltd. គឺពុំបានកើតឡើងដូចការចោទប្រកាន់នោះទេ។
លិខិតបញ្ជាក់ថា៖ «ការពិនិត្យលើប្រភពព័ត៌មាន សក្ខីកម្ម ឯកសារពាក់ព័ន្ធ និងទិន្នន័យដែលប្រមូលបាន មិនបានបង្ហាញពីអង្គហេតុ ឬមូលដ្ឋានច្បាស់លាស់ដែលអាចគាំទ្រដល់ការចោទប្រកាន់ក្នុងករណីនេះបានទេ»។
ការណ៍នេះ រដ្ឋមន្ត្រីក្រសួងបរិស្ថាន បានណែនាំដល់ប្រធានមន្ទីរបរិស្ថានខេត្តកំពង់ស្ពឺ ឱ្យពិនិត្យកសាងសំណុំរឿងទៅតុលាការ ករណីបរិហាកេរ្តិ៍ ឬស្រាវជ្រាវករណីចោទប្រកាន់មន្ត្រីមន្ទីរបរិស្ថានខេត្តកំពង់ស្ពឺទាំងពីររូប និងពិនិត្យដាក់សំណុំរឿងពាក់ព័ន្ធនឹងការទទួលប្រាក់ ឬទារប្រាក់ពីក្រុមហ៊ុនខាងលើ ទៅអង្គភាពប្រឆាំងអំពើពុករលួយ។
យ៉ាងណា មន្ត្រីសង្គមស៊ីវិល ធ្លាប់បានផ្តល់យោបល់ឱ្យស៊ើបអង្កេតករណីនេះ ប្រកបដោយតម្លាភាព និងស្រាវជ្រាវឱ្យដល់ឬសគល់នៃបញ្ហា បើពុំនោះទេ បញ្ហាអំពើពុករលួយ នឹងនៅតែជាជំងឺមហារីកក្នុងសង្គម៕
