សហរដ្ឋអាមេរិក បានបើកការវាយប្រហារលើប្រទេសអ៊ីរ៉ង់ បន្ទាប់ពីប្រធានាធិបតី ដូណាល់ ត្រាំ បានចោទប្រកាន់ប្រទេសនេះថា បានបាញ់ទម្លាក់ឧទ្ធម្ភាគចក្រអាមេរិកមួយគ្រឿង នៅលើតំបន់ច្រកសមុទ្រហរម៉ូស (Hormuz)។
ទីបញ្ជាការកណ្តាលរបស់អាមេរិក(Centcom) បានប្រកាសថា កងកម្លាំងអាមេរិកបានចាប់ផ្តើមធ្វើការវាយប្រហារកាលពីថ្ងៃទី៩ខែមិថុនា ដើម្បីឆ្លើយតបទៅនឹងការបាញ់ទម្លាក់ឧទ្ធម្ភាគចក្រ ដោយហៅប្រតិបត្តិការនេះថាជា «ការឆ្លើយតបសមាមាត្រទៅនឹងការឈ្លានពានដែលគ្មានហេតុផលរបស់អ៊ីរ៉ង់»។ មានសេចក្តីរាយការណ៍អំពីការផ្ទុះជាច្រើននៅតាមបណ្តោយឆ្នេរសមុទ្រនៃឈូងសមុទ្រពែរ្ស និងច្រកសមុទ្រ Hormuz ជាពិសេសផ្តោតលើប្រព័ន្ធការពារជាតិ និងប្រព័ន្ធរ៉ាដារបស់អ៊ីរ៉ង់ ដូចជា នៅតំបន់ Bandar Abbas, Qeshm និង Sirik។
ចំណែកឯអ្នកបើកឧទ្ធម្ភាគចក្រ Apache ពីរនាក់ដែលត្រូវបានបាញ់ទម្លាក់នោះ ត្រូវបានជួយសង្គ្រោះដោយសុវត្ថិភាពនិងគ្មានរបួសអ្វីឡើយ តាមរយៈការប្រើប្រាស់ដ្រូនជើងទឹក (sea drone) របស់អាមេរិក ដែលប្រតិបត្តិការដោយកងការងារពិសេសទី ៥៩ (Task Force 59)។ នេះជាលើកទីមួយហើយដែលយោធាអាមេរិកបានបញ្ជាក់ជាសាធារណៈ អំពីការប្រើប្រាស់នាវាគ្មានមនុស្សបើកប្រភេទនេះក្នុងប្រតិបត្តិការជួយសង្គ្រោះ។
លោក ត្រាំ បានសរសេរលើបណ្តាញសង្គម Truth Social ថា ទោះបីជាពីលុតមានសុវត្ថិភាព ក៏សហរដ្ឋអាមេរិកចាំបាច់ត្រូវតែឆ្លើយតបចំពោះការវាយប្រហារនេះដែរ។
មន្ត្រីអាមេរិក បានឱ្យដឹងថា អ៊ីរ៉ង់បានប្រើប្រាស់ដ្រូនដើម្បីវាយប្រហារលើឧទ្ធម្ភាគចក្រនោះ ប៉ុន្តែវាមិនទាន់ច្បាស់ទេថាតើជាការវាយប្រហារដោយចេតនាឬយ៉ាងណា។ ដោយឡែក ប្រព័ន្ធផ្សព្វផ្សាយរដ្ឋរបស់អ៊ីរ៉ង់បានទទួលស្គាល់ព្រឹត្តិការណ៍នេះ ប៉ុន្តែបានបញ្ជាក់ថា អ៊ីរ៉ង់មិនបានប្រកាសទទួលខុសត្រូវចំពោះការបាញ់ទម្លាក់នោះទេ។
បន្ទាប់ពីការវាយប្រហាររបស់អាមេរិក រដ្ឋមន្ត្រីការបរទេសអ៊ីរ៉ង់ លោក Abbas Araghchi បានព្រមានតបវិញលើបណ្តាញសង្គម X ថា អ៊ីរ៉ង់ «នឹងមិនទុកឱ្យការវាយប្រហារ ឬការគំរាមកំហែងណាមួយដោយគ្មានការឆ្លើយតបឡើយ» ហើយបានប្រាប់ឱ្យកងកម្លាំងបរទេសចាកចេញពីតំបន់នេះដើម្បីសុវត្ថិភាព។ ស្របពេលជាមួយគ្នានោះ លោក Mohammad Baqer Qalibaf ប្រមុខចរចារបស់អ៊ីរ៉ង់ ក៏បានផ្តល់សញ្ញាព្រមានពីការសងសឹកវិញផងដែរ។
ការប្រឈមមុខដាក់គ្នាផ្នែកយោធានេះ បានកើតឡើងចំពេលដែលកងកម្លាំងអ៊ីស្រាអែល បានវាយប្រហារនៅភាគខាងត្បូងប្រទេសលីបង់។
កាលពីចុងសប្តាហ៍មុន អ៊ីស្រាអែលនិងអ៊ីរ៉ង់បានផ្អាកការវាយប្រហារដាក់គ្នាទៅវិញទៅមក បន្ទាប់ពីលោក ត្រាំ បានប្រាប់ឱ្យប្រទេសទាំងពីរ បញ្ឈប់ការបាញ់បោះភ្លាមៗ ព្រោះវាអាចប៉ះពាល់ដល់ការចរចាកិច្ចព្រមព្រៀងបញ្ចប់សង្គ្រាមតំបន់។
លោក ត្រាំ បានប្រាប់អ្នកកាសែតថា អាមេរិកស្ថិតក្នុងដំណាក់កាលចុងក្រោយនៃកិច្ចព្រមព្រៀងដ៏ល្អមួយ ដែលអាចចំណាយពេល ២ ឬ ៣ ថ្ងៃទៀត ហើយច្រកសមុទ្រ Hormuz នឹងត្រូវបើកឡើងវិញភ្លាមៗបន្ទាប់ពីនោះ ប៉ុន្តែព្រឹត្តិការណ៍ចុងក្រោយនេះ បានធ្វើឱ្យស្ថានការណ៍មានភាពតានតឹងឡើងវិញ៕
