សមាជិកសភាសហរដ្ឋអាមេរិកខាងគណបក្សសាធារណរដ្ឋនៅរដ្ឋសភា កាលពីថ្ងៃទី៩ខែមិថុនា បានអនុម័តសេចក្តីព្រាងច្បាប់ថវិកាចំនួន ៧០ ពាន់លានដុល្លារ ដើម្បីផ្តល់មូលនិធិរហូតដល់ចប់អាណត្តិរបស់លោក ដូណាល់ ត្រាំ ដល់បណ្តាទីភ្នាក់ងារដែលដឹកនាំការបង្ក្រាបជនអន្តោប្រវេសន៍គ្មានច្បាប់ទម្លាប់ ដោយបញ្ចប់ការប្រឈមមុខដាក់គ្នារយៈពេលរាប់ខែ ជាមួយគណបក្សប្រជាធិបតេយ្យ ដែលធ្លាប់បានបង្ខំឱ្យក្រសួងសន្តិសុខមាតុភូមិ (DHS) ត្រូវបិទទ្វារ។
ច្បាប់ការពារសន្តិសុខអាមេរិក (Secure America Act) ត្រូវបានអនុម័តក្នុងលទ្ធផលឆ្នោត ២១៤ ទល់នឹង ២១២ សំឡេង។ វិធានការនេះ បែងចែកថវិកាចំនួន ៣៨ ពាន់លានដុល្លារ ដល់ទីភ្នាក់ងារអនុវត្តច្បាប់អន្តោប្រវេសន៍និងគយ (ICE) ចំនួន ២៦ ពាន់លានដុល្លារ ដល់ទីភ្នាក់ងារគយ និងការពារព្រំដែន (CBP) និង ៥ ពាន់លានដុល្លារបន្ថែមទៀតដល់ក្រសួង DHS រហូតដល់ខែកញ្ញា ឆ្នាំ២០២៩។ បច្ចុប្បន្ន ច្បាប់នេះ កំពុងរង់ចាំការចុះហត្ថលេខារបស់លោក ត្រាំ។
សេចក្តីព្រាងច្បាប់នេះ បានបញ្ចប់ការរារាំងថវិកា ដែលគណបក្សប្រជាធិបតេយ្យបានប្រកាសកាលពីខែមករា បន្ទាប់ពីភ្នាក់ងារសហព័ន្ធបានសម្លាប់ពលរដ្ឋអាមេរិកពីរនាក់ នៅក្នុងទីក្រុង Minneapolis អំឡុងយុទ្ធនាការបង្ក្រាបជនអន្តោប្រវេសន៍។
ការធ្វើពហិការរបស់ពួកគេ បានបង្ខំឱ្យក្រសួង DHS បិទទ្វាររយៈពេល ៧៥ ថ្ងៃ។ ក្រសួងនេះ បានបើកដំណើរការឡើងវិញ បន្ទាប់ពីគណបក្សប្រជាធិបតេយ្យយល់ព្រមផ្តល់ថវិកាដល់ប្រតិបត្តិការទាំងអស់ លើកលែងតែ ICE និង CBP ខណៈដែលគណបក្សសាធារណរដ្ឋបានបន្តអនុម័តថវិកាសម្រាប់ទីភ្នាក់ងារទាំងពីរនោះ រហូតដល់ចប់អាណត្តិប្រធានាធិបតីរបស់ លោក ត្រាំ ដើម្បីការពារកុំឱ្យមានការបិទក្រសួងម្តងទៀត។
សមាជិកគណបក្សប្រជាធិបតេយ្យ បានប្រឆាំងនឹងសេចក្តីព្រាងច្បាប់នេះជាឯកច្ឆន្ទ ដោយមេដឹកនាំសំឡេងភាគតិច លោក Hakeem Jeffries បាននិយាយថា វានឹងខ្ជះខ្ជាយលុយអ្នកបង់ពន្ធចំនួន ៧០ ពាន់លានដុល្លារ ដើម្បីផ្តល់អំណាចពេញលេញដល់ ICE ដោយគ្មានការត្រួតពិនិត្យ។ ផ្ទុយទៅវិញ ភាគីខាងគណបក្សសាធារណរដ្ឋ បានវាយបកវិញថា ការបោះឆ្នោតគាំទ្រច្បាប់នេះ គឺដើម្បីការពារព្រំដែន និងផ្តល់ថវិកាដល់មន្ត្រីអនុវត្តច្បាប់ដែលកំពុងប្រថុយជីវិត។
ការអនុម័តនេះ គឺជាសមិទ្ធផលមួយសម្រាប់ប្រធានរដ្ឋសភា លោក Mike Johnson និងសម្រាប់លោក ត្រាំ ទោះបីជាមានការខ្វែងគំនិតគ្នាលើការប៉ុនប៉ងបង្កើតមូលនិធិ «ប្រឆាំងនឹងការប្រើប្រាស់ស្ថាប័នរដ្ឋជាអាវុធ» តម្លៃជិត ១,៨ ពាន់លានដុល្លារក្តី។ លើសពីនេះ ច្បាប់ថវិកានេះ ក៏ធ្លាប់ត្រូវបានពន្យារពេលដោយសារការប៉ុនប៉ងបញ្ចូលថវិកាចំនួន ១ ពាន់លានដុល្លារ សម្រាប់ការកែលម្អសន្តិសុខសាលពិធី (ballroom) ដែលលោក ត្រាំ កំពុងសាងសង់នៅសេតវិមាន ប៉ុន្តែសមាជិកបក្សសាធារណរដ្ឋនៅព្រឹទ្ធសភាបានយល់ព្រមដកថវិកានោះចេញវិញ ដើម្បីចៀសវាងការរារាំង (filibuster) ពីគណបក្សប្រជាធិបតេយ្យ៕
