ក្រោយពីមានការចែករំលែកពីសកម្មភាពចាក់ដីលុបមាត់ស្ទឹងព្រែកត្នោត យកធ្វើជាកម្មសិទ្ធិឯកជនស្ថិតក្នុងខេត្តកំពង់ស្ពឺ ដោយគ្មានការទប់ស្កាត់ពីមន្ត្រីជំនាញនោះ ក្រុមអ្នកឃ្លាំមើល ជំរុញឱ្យរដ្ឋាភិបាលចាត់វិធានការទប់ស្កាត់ឱ្យមានប្រសិទ្ធភាព ដើម្បីការពារសម្បត្តិសារធារណៈរបស់រដ្ឋ។
នាយកទទួលបន្ទុកកិច្ចការទូទៅអង្គការលីកាដូ លោក អំ សំអាត នៅថ្ងៃពុធនេះ ជំរុញឱ្យក្រសួងពាក់ព័ន្ធ របស់រដ្ឋាភិបាល ចាត់វិធានការឱ្យមានប្រសិទ្ធភាព ដើម្បីការពារទ្រព្យសម្បត្តិសាធារណៈរបស់រដ្ឋ និងបង្ហាញពីភាពស្មើគ្នាចំពោះមុខច្បាប់។
ក្នុងន័យនេះ លោកសំអាងថា ដីព្រៃ បឹង អូរ និងព្រែកជាដើម ជាទ្រព្យសម្បត្តិសាធារណៈរបស់រដ្ឋ គឺមិនអាចបុគ្គលណារំលោភបំពាន ទន្ទ្រានធ្វើកម្មសិទ្ធិឯកជនដោយខុសច្បាប់បានទេ ទោះបីបុគ្គលនោះជាអ្នកមានទ្រព្យ ឬមានអំណាចបែបណាក្តី។
លោកថា៖ «បើសិនជាធ្វើការហាមឃាត់ហើយមិនស្តាប់ គួរតែចាត់វិធានការតាមផ្លូវច្បាប់ ដើម្បីទប់ស្កាត់បទល្មើសនេះ។ ទោះបីបុគ្គលហ្នឹងមានឋាន្តរសក្តិថ្នាក់ណាក៏ដោយ។ ទី១ ការអនុវត្តច្បាប់ ដើម្បីធានានូវទ្រព្យសម្បត្តិសាធារណៈរបស់រដ្ឋ និងទី២ ដើម្បីធានាសិទ្ធិស្មើគ្នាចំពោះមុខច្បាប់ ដើម្បីកុំឲ្យមានការរិះគន់ថា ពលរដ្ឋសាមញ្ញចាប់សាងសង់ ត្រូវមានការហាមឃាត់មិនអាចធ្វើអីបាន ហើយចំណែកឯអ្នកមានទ្រព្យធន ឬអ្នកមានអំណាចធ្វើអីតាមអំពើចិត្ត អាហ្នឹងធ្វើឲ្យមានការរិះគន់ចំពោះការអនុវត្តច្បាប់មានស្តង់ដារពីរ ហើយក៏ជាគំរូអាក្រក់ផងដែរ»។
ទាក់ទិនបញ្ហានេះ ប្រជាពលរដ្ឋមួយចំនួន បានរិះគន់អាជ្ញាធរពាក់ព័ន្ធ ដែលថាបានបណ្តែតបណ្តោយឱ្យមានសកម្មភាពចាក់ដីលុបចំណីមាត់បឹងព្រែកត្នោតនេះ។ បើតាមពលរដ្ឋ សកម្មភាពចាក់ដីលុបស្ទឹងព្រែកត្នោតនេះ មានទីតាំងស្ថិតនៅខាងមុខទ្វារទឹករលាំងជ្រៃ ក្នុងភូមិអន្លង់ធម្ម ឃុំតាំងក្រូច ស្រុកសំរោងទង ខេត្តកំពង់ស្ពឺ។
ពលរដ្ឋរស់នៅភូមិអន្លង់ធម្ម លោក ទុន សារី បាននិយាយថា លោកបានឃើញសកម្មភាពនេះ ប៉ុន្តែថា សកម្មភាពលុបមាត់ស្ទឹងព្រែកត្នោតនេះ បានផ្អាកសកម្មភាពហើយៗ។ ហើយថាគ្រឿងចក្រ ក៏បានដកចេញពីទីតាំងនោះហើយដែរ។ ប៉ុន្តែថា មកទល់ពេលនេះ ទីតាំងនោះ នៅតែមានគំនរថ្មនៅមាត់ច្រាំងដដែល ដែលលោកចង់ឃើញរដ្ឋ ត្រូវមានវិធានការជាក់ស្តែង ដើម្បីការពារសម្បត្តិសាធារណៈរបស់រដ្ឋ ដោយមិនចង់ឃើញមានការរំលោភបំពានដីមាត់ស្ទឹងបែបនេះទេ។
លោកថា៖ «ឥឡូវគេលេងធ្វើយើង ព្រោះទឹកពេញស្ទឹងអស់ហើយ។ ខ្ញុំឃើញគេកាយដីឡើងលើ ប៉ុន្តែឥឡូវទឹកពេញមាត់ស្ទឹងទៅ គេដឹកគ្រឿងចក្រចេញវិញអស់ទៅ?»។
ទាក់ទិនបញ្ហានេះ លោក អ៊ុំ សំអាន តំណាងរាស្ត្រគណបក្សប្រឆាំង ហៅបញ្ហាដែលបានកើតឡើង មកពីអំណាចទាំងអស់ស្ថិតនៅមាត់មេដឹកនាំ បម្រើតែផលប្រយោជន៍បក្ខពួក ដែលជាការគំរាមកំហែងដល់ការអនុវត្តច្បាប់ ចំពោះអ្នកមានអំណាច ។
លោកថា៖ «ស្រុកខ្មែរយើងច្បាប់ស្ថិតនៅលើមាត់របស់អ្នកធំ។ អញ្ចឹងអ្នកមានលុយមានអំណាចធ្វើសកម្មភាពរំលោភតាមអំពើចិត្ត ហើយអាជ្ញាធរមូលដ្ឋានមិនហ៊ានជាមួយគេទេ។ ហើយខាងក្រសួងខាងអីហ្នឹង ក៏មិនហ៊ានជាមួយឧកញ៉ា ឬអ្នកមានអីហ្នឹងដែរ។ ស្រុកខ្មែរច្បាប់ គឺអត់មានប្រសិទ្ធភាពអីជាមួយអ្នកមានលុយអ្នកមានអំណាចនោះទេ។ ប៉ុន្តែច្បាប់អនុវត្តសម្រាប់តែអ្នកតូចតាច អ្នកក្រីក្រ សម្រាប់បក្សប្រឆាំង សម្រាប់អ្នកគាំទ្រគណបក្សប្រជាជន ឬក៏អ្នកធំបក្សប្រជាជន ច្បាប់អត់ហ៊ានអនុវត្តចំពោះអ្នកទាំងអស់ហ្នឹងនោះទេ ដូច្នេះហើយ យើងឃើញថា តូចស៊ីតាមតូច ធំស៊ីតាមធំ នៅស្រុកខ្មែរយើង»។
វីអូឌី នៅមិនទាន់អាចទាក់ទង លោក ជាម ច័ន្ទសោភ័ណ អភិបាលខេត្តកំពង់ស្ពឺ ដើម្បីសុំបំភ្លឺជុំវិញករណីខាងលើនេះ បានគិតត្រឹមម៉ោងផ្សាយនេះ។
ប៉ុន្តែបើយោងតាមលិខិតរបស់ លោក ញ៉ាញ់ ជាបហ៊ង ប្រធានមន្ទីរធនធានទឹកខេត្តកំពង់ស្ពឺ ដាក់ជូនអភិបាលខេត្តកំពង់ស្ពឺ កាលពីថ្ងៃទី១២ ខែឧសភា ឆ្នាំ២០២៦ បញ្ជាក់ថា ទីតាំងចាក់ដីលុបមាត់ស្ទឹងព្រែកត្នោតនេះ គឺជាកម្មសិទ្ធិរបស់អ្នកស្រី សុខ វណ្ណា ដែលវីអូឌីមិនអាចទាក់ទងបាន។
តែបើតាមប្រភពខាងលើ មន្ត្រីជំនាញ បានរកឃើញថា អ្នកស្រី សុខ វណ្ណា បានចាក់ដីរំលោភចូលក្នុងស្ទឹងព្រែកត្នោត ទំហំ ៤៧៤៦ម៉ែត្រការ៉េ ដោយពុំមានលិខិតអនុញ្ញាត ពីអាជ្ញាធរដែនដី និងស្ថាប័នជំនាញពាក់ព័ន្ធនោះទេ។
ប៉ុន្តែបើតាមកំហេតុ នៃកិច្ចប្រជុំនេះចុះថ្ងៃទី៥ ខែឧសភា ឆ្នាំ២០២៦ មេភូមិអន្លង់ធម្ម លោក ទូច ហ៊ីម បាននិយាយថា តាមការសាកសួររបស់លោក ការចាក់ដីលុបចំណីព្រែកត្នោតនេះ អ្នកស្រី សុខ វណ្ណា ថា មិនមានបំណងយកធ្វើជាកម្មសិទ្ធិទេ តែគ្រាន់តែចង់លុបកុំឱ្យច្រាំងស្ទឹងបាក់ប៉ុណ្ណោះ។
លើសពីនេះ អភិបាលរងស្រុងសំរោងទង លោក អ៊ុំ ដេត ធ្លាប់អះអាងថា មន្ត្រីជំនាញពាក់ព័ន្ធបានជូនដំណឹងឲ្យម្ចាស់ទីតាំងនោះ ឱ្យបញ្ឈប់សកម្មភាពចាក់ដីរំលោភយកដីចំណីស្ទឹងព្រែកត្នោតរួចហើយដែរ។
ប្រហាក់ប្រហែលគ្នានេះ ក្រសួងធនធានទឹក និងឧតុនិយម អំឡុងឆ្នាំ២០២៤ បានចេញលិខិតជូនដំណឹងមួយ និយាយពីបញ្ហានេះដែរ ដែលក្រសួងបញ្ជាក់ថា មានជនមួយចំនួនបានធ្វើសកម្មភាពរំលោភយកដីចំណីស្ទឹងព្រែកត្នោត និងទំនប់អាងទឹក ៧មករា ដែលជាទ្រព្យសម្បត្តិសាធារណៈរបស់រដ្ឋ។
ក្រសួង គូសបញ្ជាក់ថា ដីចំណីស្ទឹង និងដីអាងទឹក គឺជាទ្រព្យសម្បត្តិរដ្ឋ ពុំមានបុគ្គលណាមួយអាចរំលោភបំពានបានឡើយ ទោះក្នុងរូបភាពណាក៏ដោយ។
ចំណែក មាត្រា៨១ នៃច្បាប់ស្តីពីការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ ដែល ប្រកាសឱ្យប្រើនៅឆ្នាំ២០២០ ចែងថា រាល់អំពើរំលោភកាន់កាប់ទ្រព្យសម្បត្តិរដ្ឋ ជាអចលនទ្រព្យដោយខុសច្បាប់ដូចមានចែងក្នុងមាត្រា៧១ ត្រូវផ្តន្ទាទោសដាក់ពន្ធនាគារពី ២ឆ្នាំ ដល់ ៥ឆ្នាំ និងពិន័យជាប្រាក់ពី ៤លានរៀល ដល់ ១០លានរៀល ផងដែរ៕
