ជាថ្មីម្ដងទៀត ស្ថានទូតឥណ្ឌាប្រចាំនៅកម្ពុជា បានចេញសេចក្ដីណែនាំឱ្យពលរដ្ឋខ្លួនបង្កើនការប្រុងប្រយ័ត្នខ្ពស់ចំពោះឱកាសការងារក្លែងក្លាយនៅប្រទេសកម្ពុជា ដែលមានការប្រើប្រាស់ល្បិចលួងលោមផ្ដល់ប្រាក់ចំណូលខ្ពស់។ នេះបើតាមសេចក្តីណែនាំក្រើនរម្លឹករបស់ស្ថានទូតឥណ្ឌា ចេញផ្សាយលើទំព័រហ្វេសប៊ុកនៅថ្ងៃទី១០ ខែមិថុនា ឆ្នាំ២០២៦។
សេចក្តីក្រើនរម្លឹកនេះ ធ្វើឡើងបន្ទាប់ពីពលរដ្ឋឥណ្ឌាជាច្រើននាក់ បានធ្លាក់ក្នុងអន្ទាក់នៃក្រុមជួញដូរមនុស្ស ដោយសារតែការចាញ់បោកការសន្យាក្លែងក្លាយអំពីឱកាសការងារ។ បើតាមស្ថានទូត ជនជាតិឥណ្ឌាទាំងនោះ ត្រូវបានបង្ខិតបង្ខំឱ្យធ្វើការបោកប្រាស់ហិរញ្ញវត្ថុតាមអ៊ីនធឺណិត និងសកម្មភាពខុសច្បាប់ផ្សេងទៀត។
លិខិតដដែល បានណែនាំដល់ពលរដ្ឋឥណ្ឌា ដែលមានបំណងចង់ធ្វើដំណើរមកប្រទេសកម្ពុជា គឺត្រូវឆ្លងកាត់ភ្នាក់ងារស្របច្បាប់ មានអាជ្ញាប័ណ្ណផ្លូវការត្រឹមត្រូវ និងត្រូវមានការត្រួតពិនិត្យប្រវត្តិរូប ក៏ដូចជាព័ត៌មានផ្ទៃក្នុងរបស់អ្នកផ្តល់ការងារ (និយោជក) នៅកម្ពុជាឱ្យបានហ្មត់ចត់ មុនពេលសម្រេចចិត្តផ្ដល់ឯកសារ ឬធ្វើដំណើរមកកាន់ប្រទេសកម្ពុជា។
បន្ថែមលើនេះ ស្ថានទូតបានសង្កត់ធ្ងន់ទៅលើការហាមដាច់ខាតចំពោះការប្រើប្រាស់ទិដ្ឋាការទេសចរណ៍ ដើម្បីមកស្វែងរក ឬបំពេញការងារ ដែលជាទង្វើផ្ទុយពីច្បាប់អន្តោប្រវេសន៍នៃប្រទេសម្ចាស់ផ្ទះ។
ទន្ទឹមគ្នានេះ ស្ថានទូតឥណ្ឌា បានជំរុញឱ្យពលរដ្ឋឥណ្ឌាទាំងអស់ ដែលកំពុងស្នាក់នៅ និងធ្វើការនៅកម្ពុជា ដោយគ្មានទិដ្ឋាការត្រឹមត្រូវ ឬខុសច្បាប់ ត្រូវចាកចេញពីកម្ពុជាជាបន្ទាន់។
ជុំវិញរឿងនេះ វីអូឌី មិនអាចស្វែងរកការឆ្លើយតបពីអ្នកនាំពាក្យរដ្ឋាភិបាលកម្ពុជា លោក ប៉ែន បូណា បានទេនៅថ្ងៃទី១១ ខែមិថុនា។
កន្លងមក ស្ថានទូតឥណ្ឌា ធ្លាប់ចេញសេចក្ដីណែនាំដល់ពលរដ្ឋខ្លួនជាច្រើនដងរួចមកហើយ ពីឱកាសការងារក្លែងក្លាយនៅកម្ពុជា ដោយមានទាំងការផ្សព្វផ្សាយតាមបណ្ដាញសង្គម និងការដាក់ផ្ទាំងបដាផ្សព្វផ្សាយនៅព្រលានយន្តហោះតែម្ដង។
ទាក់ទិនរឿងនេះ ប្រធានក្រុមប្រឹក្សាអ្នកឃ្លាំមើល លោក ម៉ែន ណាត ថ្លែងថា ការបារម្ភរបស់ស្ថានទូតបរទេសឆ្លុះបញ្ចាំងឱ្យឃើញថា កម្ពុជានៅតែមានហានិភ័យសម្រាប់ជនបរទេស ដោយសាររដ្ឋាភិបាលបង្ក្រាបឧក្រិដ្ឋកម្មអនឡាញបានតែក្រុមតូចតាច ខណៈមេខ្លោងធំៗបន្តមានសេរីភាព។ លោកបន្តថា ករណីនេះ រដ្ឋាភិបាលកម្ពុជា ត្រូវបង្ហាញឆន្ទៈពិតប្រាកដក្នុងការបោសសម្អាត ដោយចាប់ផ្ដើមចេញពីបុគ្គលមានអំណាច និងអ្នកជំនួញដែលមានឈ្មោះក្នុងបញ្ជីខ្មៅរបស់សហរដ្ឋអាមេរិក។
លោក ម៉ែន ណាត ថ្លែងថា៖ «ពេលដែលបោសសម្អាតបានជាស្ថាពរហើយ ខ្ញុំជឿថា រឿងរ៉ាវអស់ហ្នឹង ពួកស្ថានទូតអស់ហ្នឹង ពួកមន្ត្រីបេសកកម្ម ឬក៏កុងស៊ុលអស់ហ្នឹង គេនឹងប្រាប់ប្រជាពលរដ្ឋគេថា អាចមកលេងកម្ពុជា ជាលក្ខណៈទេសចរណ៍ ឬក៏អាចមករកការងារធ្វើនៅកម្ពុជាថ្ងៃក្រោយបាន ដោយគ្មានសេចក្តីបារម្ភ ពីព្រោះកម្ពុជាគឺបានសម្អាតអីចឹងជាដើម»។
ការចេញសេចក្ដីប្រកាសថ្មីបន្ថែមទៀតរបស់ស្ថានទូតឥណ្ឌានៅពេលនេះ គឺក្រោយពេលអង្គការលើកលែងទោសអន្តរជាតិ កាលពីថ្ងៃទី៧ ខែមិថុនា បានចេញរបាយការណ៍បង្ហាញពីកំណើនទីតាំងអនឡាញពីចំនួនតែ ៥៣ទីតាំង ឡើងដល់ ៨៦ទីតាំង គិតត្រឹមខែមេសា ឆ្នាំ២០២៦។
លើសពីនេះ របាយការណ៍ ក៏បានលើកឡើងពីចន្លោះប្រហោងនីតិវិធី ការបង្ក្រាបបទល្មើសគ្មានតម្លាភាព ការបិទបាំងរបាយការណ៍ បរាជ័យនៃជាប្រព័ន្ធនៃការបង្ក្រាប ការរំលោភសិទ្ធិមនុស្សយ៉ាងធ្ងន់ធ្ងរផងដែរ ដោយជនរងគ្រោះពីការជួញដូរមនុស្សមិនត្រូវបានជួយសង្គ្រោះតាមលក្ខខណ្ឌច្បាប់។
ក្នុងថ្ងៃតែមួយជាមួយការចេញសេចក្ដីប្រកាសរបស់ស្ថានទូតឥណ្ឌា សារព័ត៌មាន ដឹ ឥណ្ឌាន អេចប្រេស (The Indian Express) បានចេញផ្សាយអត្ថបទមួយ ដោយរំលេចថាប្រទេសកម្ពុជា រួមជាមួយប្រទេសផ្សេងទៀតនៅអាស៊ីអាគ្នេយ៍ គឺជាគោលដៅចុងក្រោយ និងជាមជ្ឈមណ្ឌលអន្តរជាតិសម្រាប់បង្ហូរលុយដែលបោកប្រាស់បានចេញពីប្រទេសឥណ្ឌា តាមរូបិយបណ្ណឌីជីថលគ្រីបតូ ក្រោយប៉ូលីសឥណ្ឌាបានចាប់ខ្លួនមនុស្សគន្លឹះម្នាក់ក្នុងករណីឆបោកលុយចំនួន ៥៨.៥លានរូពី ឬស្មើជាង ៦១ម៉ឺនដុល្លារអាមេរិក៕
