មន្ត្រីបក្សប្រឆាំង និងអ្នកឃ្លាំមើល ជឿថា កម្ពុជានិងបាត់បង់ដីនៅតាមតំបន់ព្រំដែនបន្ថែមទៀតទៅវៀតណាម តាមរយៈកិច្ចព្រមព្រៀងរបស់មេដឹកនាំប្រទេសទាំងពីរ ក្នុងការពន្លឿនការបោះបង្គោលព្រំដែនដែលនៅសល់ ១៦ភាគរយទៀតឱ្យបានឆាប់ ក្នុងនោះក៏មានការដោះដូរដី៦ភាគរយ ដូចករណីយកភូមិ លោកហេង សំរិន អតីតប្រធានរដ្ឋសភា នៅក្នុងស្រុកពញាក្រែកខេត្តត្បូងឃ្មុំ ដូរជាមួយដីខ្មែរដើម្បីកាត់ទៅឱ្យវៀតណាមយ៉ាងដូច្នោះដែរ។
ប្រតិកម្មនេះ បានកើតមានឡើងបន្ទាប់ពីមេដឹកនាំកម្ពុជា និងវៀតណាម សង្ឃឹមថា កំណាត់ខ្សែព្រំដែនដែលនៅសេសសល់ ១៦% នឹងត្រូវបានដោះស្រាយជាបន្តបន្ទាប់ ដោយតួលេខនេះនឹងថយចុះក្នុងឆ្នាំខាងមុខ។ នេះបើតាមសេចក្តីប្រកាសរបស់ក្រសួងការបរទេសកម្ពុជា នៅថ្ងៃទី១០ខែមិថុនា ស្តីពីលទ្ធផលនៃដំណើរទស្សនកិច្ចរបស់លោកនាយករដ្ឋមន្ត្រី ហ៊ុន ម៉ាណែត នៅប្រទេសវៀតណាម។
គួររំឭកថា កម្ពុជា និងវៀតណាមមានព្រំដែនគោកប្រវែងជាង ១,២៧០គីឡូម៉ែត្រ ក្នុងនោះ ការបោះបង្គោលព្រំដែនរួចរាល់សម្រេចបាន ៨៤%។ ចំណែកនៅសេសសល់ ១៦% ទៀត មាន ៦% ត្រូវបានមេដឹកនាំប្រទេសទាំង២ ព្រមព្រៀងគ្នាផ្តល់អាទិភាពលើដំណោះស្រាយដោយការដោះដូរដី ស្របតាមសន្ធិសញ្ញាព្រំដែនទាំងអស់ ដែលប្រទេសទាំងពីរបានចុះហត្ថលេខាកន្លងមក។ ការបោះបង្គោលព្រំដែនរបស់រដ្ឋាភិបាល លោកហ៊ុន សែន ជាមួយវៀតណាមកន្លងមក សម្រេចបាន ៨៤% គឺធ្វើតាមសន្ធិសញ្ញាបំពេញបន្ថែមឆ្នាំ២០០៥ ដែលយកតាមសន្ធិសញ្ញាព្រំដែនខុសច្បាប់ឆ្នាំ១៩៨៥ សម័យវៀតណាមត្រួតត្រាកម្ពុជា។
ក្នុងសន្ធិសញ្ញាបំពេញបន្ថែមឆ្នាំ២០០៥ និងសន្ធិសញ្ញាព្រំដែនខុសច្បាប់ឆ្នាំ១៩៨៥ មានប្រើផែនទី UTM ខ្នាត ១/៥០ ០០០ របស់ទាហានអាមេរិកាំងចំនួន ៤០ផ្ទាំង ដែលផ្ទុយនឹងមាត្រា២ នៃរដ្ឋធម្មនុញ្ញដែលតម្រូវឱ្យប្រើផែនទីខ្នាត ១/១០០ ០០០ ជាមួយវៀតណាម។ នេះបើតាមលោកអ៊ុំ សំអាន។
យោងតាមមាត្រា៥៥ នៃរដ្ឋធម្មនុញ្ញ និងកិច្ចព្រមព្រៀងទីក្រុងប៉ារីសឆ្នាំ១៩៩១ តម្រូវឱ្យលុបចោលសន្ធិសញ្ញាព្រំដែនខុសច្បាប់ឆ្នាំ១៩៨២ ឆ្នាំ១៩៨៣ និងឆ្នាំ១៩៨៥ សម័យវៀតណាមត្រួតត្រាកម្ពុជា។ ប៉ុន្តែលោកហ៊ុន សែន បានប្រើអំណាចធ្វើឱ្យសន្ធិសញ្ញាខុសច្បាប់ទាំងនោះ ទៅជាស្របច្បាប់តាមរយៈសន្ធិសញ្ញាបំពេញបន្ថែមឆ្នាំ២០០៥ ដោយគំរាមរំលាយរបបរាជានិយម ប្រសិនបើព្រះមហាក្សត្រមិនឡាយព្រះហស្ថលេខាលើសន្ធិសញ្ញានេះ។
ទាក់ទងទៅនឹងការព្រមព្រៀងគ្នាដោះដូរដី ៦ភាគរយ លោកអ៊ុំ សំអាន អតីតតំណាងរាស្ត្រគណបក្សសង្គ្រោះជាតិ ប្រាប់វីអូឌីនៅថ្ងៃទី១១ខែមិថុនានេះថា អាចនឹងធ្វើឱ្យកម្ពុជាបាត់បង់ទឹកដីបន្ថែមទៀតទៅវៀតណាម។
លោកថា៖ «អាហ្នឹងដូចភូមិលោកហេង សំរិន អ៊ីចឹង គេថាចូលដីវៀតណាម ដូច្នេះដើម្បីបានភូមិលោកហេង សំរិន មកវិញ ត្រូវយកដីខ្មែរយើងនៅតំបន់ផ្សេងទៅឱ្យវៀតណាមវិញ ដល់ចឹងការដោះដូរដីខ្មែរនិងដីខ្មែរមិនបាត់ដីខ្មែរ? ហើយដូចនៅបង្គោល២០៣អ៊ីចឹង វៀតណាមចូលដីខ្មែរយើង១គីឡូម៉ែត្រជាង ដើម្បីបានអាដីខ្មែរហ្នឹងមកវិញ ត្រូវយកដីតំបន់ផ្សេងទៅឱ្យវៀតណាមវិញ។ ដល់អ៊ីចឹងអាវៀតណាមចូលមកដីយើង១គីឡូជាងមិនដីយើង ហើយអាឱ្យវៀតណាម១គីឡូជាងនៅតំបន់ផ្សេងមិនដីយើង? អ៊ីចឹងការដោះដូរដីខ្មែរនិងដីខ្មែរមិនបាត់ដីខ្មែរឃើញទេ? ដូច្នេះការដោះដូរដីខ្មែរនិងដីខ្មែរប្រាកដជាបាត់បង់ដីខ្មែរហើយ»។
លោក ម៉ែន ណាត ប្រធានក្រុមប្រឹក្សាឃ្លាំមើលកម្ពុជា យល់ស្របទៅនឹងការលើកឡើងរបស់ លោក អ៊ុំ សំអាន ដោយថ្លែងបន្ថែមថា ករណីព្រំដែនជាមួយវៀតណាមមិនមានការលំបាកក្នុងការដោះស្រាយទៀតនោះទេ ពីព្រោះវៀតណាមបានចងកម្ពុជារួចជាស្រេចទៅហើយ តាមរយៈសន្ធិសញ្ញាបំពេញបន្ថែមខុសច្បាប់ឆ្នាំ២០០៥ រួមទាំងលោកហ៊ុន សែន ប្រើផែនទីផ្តេសផ្តាសយកទៅបោះបង្គោលព្រំដែនជាមួយវៀតណាមព្រមទាំងធ្វើផែនទីថ្មី។
លោកថា៖ «អ៊ីចឹងមើលទៅរដ្ឋាភិបាលលោកហ៊ុន ម៉ាណែត នឹងបន្តយន្តការឪពុករបស់គាត់អនុវត្តកិច្ចព្រមព្រៀងសន្ធិសញ្ញា ដែលមានស្រាប់ទាំងខុសច្បាប់ នឹងយកទៅបោះបង្គោលព្រំដែនបង្ហើយជាមួយវៀតណាម មិនមានការរាំងស្ទះយូរអង្វែងទេ។ រឿងហ្នឹងវាបញ្ចប់ភ្លេចៗត្រចៀកខ្មែរយើងរវល់គិតរឿងថៃឈ្លានពាន វៀតណាម និងកម្ពុជា បោះបង្គោលព្រំដែនបាត់។ អាហ្នឹងល្បិចលក់ទឹកដីជាតិរបស់ក្រុមគ្រួសារហ៊ុន គឺគេធ្វើអ៊ីចឹង។ អ៊ីចឹងហើយបានថា វាជាអកុសលណាស់សម្រាប់ប្រជាពលរដ្ឋខ្មែរ ដែលមានមេដឹកនាំឆោតល្ងង់លោភលន់តែអំណាច ហើយអត់ខ្វល់ខ្វាយពិតប្រាកដទៅលើការការពារបូរណៈភាពទឹកដី គិតតែពីផលប្រយោជន៍ផ្ទាល់ខ្លួនគិតតែពីអំណាច»។
អ្នកជំនាញកិច្ចការព្រំដែនរូបនេះ បន្តថា ដោយសារតែការដឹកនាំមិនផ្អែកទៅតាមផែនទី និងសន្ធិសញ្ញាបារាំង-សៀម ព្រមទាំងមិនប្រើអ្នកជំនាញបច្ចេកទេសច្បាប់ពិតប្រាកដរបស់ លោក ហ៊ុន សែន និងលោកហ៊ុន ម៉ាណែត នេះហើយ ទើបប្រទេសជិតខាងទាំងវៀតណាម ទាំងថៃ រួមទាំងឡាវផងដែរ បានឆ្លៀតច្បាមវាទយកទឹកដីកម្ពុជា ទៅតាមអ្វីដែលពួកគេអាចធ្វើបាន ដូចដែលបានកើតឡើងនាពេលបច្ចុប្បន្ននេះ។
លោកថា៖ «ការដឹកនាំបែបគ្រួសារនិយម បែបពុករលួយ បែបគិតតែផលប្រយោជន៍ផ្ទាល់ខ្លួន អ៊ីចឹងយើងមើលទៅវាជាហានិភ័យសម្រាប់ជាតិ ហើយកម្ពុជាប្រឈមនឹងការបាត់បង់ប្រទេស បើយើងនិយាយទៅអនាគតទៅ បើមានមេដឹកនាំដូចក្រុមគ្រួសារ ហ៊ុន សែន ដឹកនាំសព្វថ្ងៃនឹងកម្ពុជានឹងបាត់បង់ប្រទេសទៅថ្ងៃក្រោយ និងបាត់ឈ្មោះពីផែនទីពិភពលោក។ យើងមើលវៀតណាមឈ្លានពានព្រំដែនផង តាមរយៈសន្ធិសញ្ញាថ្មីឆ្នាំ២០០៥ ធ្វើឱ្យបាត់បង់រាប់ពាន់គីឡូម៉ែត្រក្រឡាទៅវៀតណាមដីគោក។ ហើយព្រំដែនទឹកត្រូវប្រគល់កោះត្រល់កោះក្រចកសេះ និងដែនសមុទ្រមួយចំនួនឱ្យវៀតណាមទៀត គឺលោកហ៊ុន សែន ជាអ្នកធ្វើតាមសន្ធិសញ្ញាឆ្នាំ៨២-៨៣-៨៥ ហើយសន្ធិសញ្ញា២០០៥ជាមួយវៀតណាម»។
វីអូឌី មិនទាន់អាចទាក់ទងលោកឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន ដើម្បីស្នើសុំធ្វើការពន្យល់ពាក់ព័ន្ធនឹងដំណើរការបោះបង្គោលព្រំដែនកម្ពុជា-វៀតណាម ដែលនៅសល់ ១៦ភាគរយទៀត និងយន្តការនៃការដោះដូរដី ៦ភាគរយ នោះបានទេនៅថ្ងៃទី១១ខែមិថុនានេះ។
បើតាម លោកអ៊ុំ សំអាន មូលហេតុដែលថៃឈប់ប្រើផែនទីខ្នាត១លើ២រយពាន់ (១/២០០ ០០០) របស់បារាំង ហើយងាកមកប្រើផែនទី១លើ៥០ពាន់ (១/៥០ ០០០) វិញ ដោយសារលោក ហ៊ុន សែន ប្រើផែនទី ១/៥០ ០០០ ជាមួយវៀតណាមដែរ។ ដោយសារលោក ហ៊ុន សែន ប្រើផែនទី UTM ខ្នាត ១/៥០ ០០០ របស់ទាហានអាមេរិកាំង ក្នុងការបោះបង្គោលព្រំដែនជាមួយវៀតណាម ទើបធ្វើឱ្យថៃច្រណែនវៀតណាម ហើយថៃប្រើផែនទីខ្នាត ១/៥០ ០០០ ដែលគូរដោយឯកតោភាគីដែរ ដោយមិនទទួលស្គាល់ផែនទីខ្នាត ១/២០០ ០០០ របស់បារាំង ដូចវៀតណាម និងលោកហ៊ុន សែន ប្រើផែនទីខ្នាត ១/៥០ ០០០ ដែរ។
មន្ត្រីបក្សប្រឆាំងរូបនេះ បញ្ជាក់ទៀតថា លោក ហ៊ុន សែន បានកាត់ទឹកដីខ្មែរឱ្យវៀតណាម តាមរយៈការបោះបង្គោលព្រំដែនបាន ៨៤% ដើម្បីសងគុណវៀតណាម ដែលបានលើកបន្តុប លោក ហ៊ុន សែន ឱ្យកាន់អំណាចតាំងពីទសវត្សរ៍ទី៨០៕
